ЗАМИСЛИН туке кај ало нево доктори ко тхан коте со џивдинеа. Шај нане одма те мислине кај ов тано шукар доктори. А со ако несаве таро те амала геле ки лесте хем ленгоро састипе уло пошукар? Нане ли ту да те манге те џа ко адава доктори?

Шај те вакера кај е Девлескоро Лафи тано сар јекх доктори. Несаве мануша нане сигурна дали те роден лестар совет. Ама кеда керена адава со пишинела ки лесте, ленгоро џивдипе овела пошукар. Те дикха несаве примерија.

„Ко почеток таро амаро брако, мислинѓум кај мо ром о Думас, на мислинела сине манге“, сетинела пе и Сумијатун. „Ки холи, бут пути викинава сине леске, фрдава сине пали лесте са со ка аракхав, чак кхувава ле сине. Несаво пути тари бари холи, перава сине ко несвест.“

„Кеда о Думас леља те сикљол таро е Девлескоро Лафи, асава сине леске. Ама, гаравиндор тари јавер соба, шунава ле сине сар керела лафи е манушенцар со сикавена ле сине башо Девел. Јекх диве, шунѓум сар читинела акала лафија: ‚О ромња те овен подложна пумаре роменге сар е Господареске ... И ромни ваљани таро вило те поштуњел пе роме‘ (Ефешаните 5:22, 33). Акала лафија кхувге манге ко вило. Молинѓум ма е Девлеске те простинел манге со сиум сине бут лошно ме ромеа хем те поможинел ма те овав пошукар ромни. Сигенде пало адава, о Думас хем ме почминѓам те сикљова е Девлескоро Лафи заедно.“

Е Девлескоро Лафи исто аѓаар вакерела: „О рома да ваљани те манген пумаре ромњен сар коркори пес” (Ефешаните 5:28). И Сумијатун вакерела: „О буќа со сиклиљам менинѓе амен солдујен. Почминѓум ме ромеске те керав чај кеда авела тари бути хем шукарипаја те керав леа лафи. А о Думас, сикавѓа манге панда побаро мангипе хем поможинела сине манге ко кхерутне буќа. Солдуј џене денѓам амендар са ‚те сикава милост јекх јекхеске, те ова сочувствителна, хем спремно те простина јекх јекхеске‘ (Ефешаните 4:32). Адалеске, о мангипе хем о поштовање машкар аменде са побутер бариле. Акана, амен сиам бахтале ко брако побутер таро 40 берш. О шукар совет таро е Девлескоро Лафи спасинѓа амаро брако!“

„Бут сигате хољанава сине“ вакерела о Таиби. „Бут пути марава ма сине  хем пиштолеа даравкерава сине е јаверен. Исто аѓаар, марава сине ме ромња, е Кустријана, хем ки холи перавава ла сине ки пхув. Бут мануша дарана сине мандар.“

„Јекх диве, читинѓум о лафија со вакерѓа лен о Иса: ‚Дава тумен неви заповед: манген тумен јекх јекхеа; сар ме со мангљум тумен‘ (Јован 13:34). Акава хор погодинѓа ма хем мангљум те овав појавер. Кеда уклела ма сине и холи, молинава ма сине е Девлеске те ачховав смиримо. Сигате пало адава ми холи нашавѓовела сине. Ме хем ми ромни керѓам адава со бешела ко Ефешаните 4:26, 27: ‚Ма мукхен те накхел о диве, а тумен панда те овен хољаме, ни ма мукхен тхан е бенгеске.‘ Секоја рат заедно читинаја сине е Девлескоро Лафи хем молинаја амен сине. Акава цидинѓа амендар о стрес со сине амен секова диве хем анѓа амен те ова попаше ме ромњаја.“

„Акана џанена ма сар мирно мануш. Ми ромни хем ме чхаве мангена ма хем поштуњена ма. Иси ма бут амала, хем сиум паше е Девлеа. Ме сиум чаче бахтало мануш.“

„Дружинава ма сине терненцар тари јекх банда, бут пушинава сине, хем бут пути накхљум и рат мато ки улица“, вакерела о Гоин. „Исто аѓаар, бикинава хем лава сине дрога — марихуана хем екстазе — кола со гаравава лен сине ко мо панцирно елеко. Дикхјовава сине сар зорало хем керава сине лошна буќа, ама палем џивдинава сине ки дар.“

„Тегани некој сикавѓа манге акала лафија: ‚Мо чхаво, ма бистре ме лафија со сикавава тут... соске ола ка продолжинкерен о диве хем о берша ко тло џивдипе хем о мир‘ (Изреки 3:1, 2). Бут мангава сине те џивдинав бут берша хем ко мир! Исто аѓаар, читинѓум акала  лафија: ‚Адалеске со иси амен акала ветувања, ме мангле, те чистина секова мелалипе таро амаро тело хем духо, те ова са побутер света [чиста] ки дар е Девлестар‘ (2. Коринќаните 7:1). Адалеске чхинавѓум е лошна навикенцар, иклиљум тари банда, хем почминѓум те служинав е Девлеске.“

„Акана, побутер таро 17 берш на лава дрога. Иси ма шукар састипе, бахтали фамилија, шукар амала хем чисто совест. Побутер на пашљовава мато ки улица, него секоја рат мирно совава ко мо кревети.“

О Бамбанг вакерела: „Сар терно, сиум сине криминалцо хем побутер таро ме жртве сине мануша тари јавер нација со мрзинава ла сине“.

„Сар со накхела сине о време, почминѓум те родав е Девле. Адава анѓа ма џи ки јекх група со заедно кхедела пе сине те сикљовел е Девлескоро Лафи. Адари сиум сине шукар доџардо таро мануша тари адаја нација со мрзинава ла сине! Исто аѓаар дикхљум кај ки адаја група о мануша таро разна расе хем нацие сине бахтале хем слободно керена сине лафи машкар песте. Сиум сине изненадимо! Тегани халиљум адава со вакерела е Девлескоро Лафи: ‚О Девел на одвојнела е манушен, ов тари секоја нација прифатинела околе со дарала лестар хем керела адава со и праведно‘ (Дела 10:34, 35).“

„Акана, побутер на мрзинава е јаверен. Несаве таро ме најшукар амала тане тари адаја нација со англедер мрзинава ла сине. Таро по Лафи, о Девел сикавѓа ма те мангав.“

„Панда сар терно чхаво трин пути сиум сине ко пханлипе — дуј пути башо чорибе хем јекх пути соске бизи несави жал посавѓум јекхе мануше“, вакерела о Гарога. „Кхувѓум ки јекх бунтовно група хем мударѓум буте манушен. Пало адава, водинава сине јекх криминално група со даравкерела сине е манушен хем лела лендар лове хем јавера буќа. Ме телохранителија сине секогаш  манцар. Сиум сине насилно хем опасно мануш.“

„Тегани, јекх диве, ко е Девлескоро Лафи читинѓум акава: ‚О мануш кова со иси ле мангипе бут трпинела хем тано љубезно. Нане љубоморно, на фалинела пе, на ваздела пе, на керела непристојна буќа, на родела пи корист, на хољанела локхесте, на памтинела о лошнипе‘ (1. Коринќаните 13:4, 5). Акала лафија погодинѓе ма ко вило. Гељум те џивдинав ко јавер тхан, тегани почминѓум те сикљовав таро е Девлескоро Лафи хем те керав ко мо џивдипе адава со сикљовава сине.“

„Акана побутер на сиум насилно, него о јавера џанена ма сар мануш со сикавела е јаверен башо Девел хем поштуњена ма. Акана сиум ко право друмо хем џанава соске џивдинава.“

Акала хем бут јавера примерија сикавена кај ‚е Девлескоро Лафи тано џивдо хем силно‘ (Евреите 4:12). О советија лестар локхе хаљовена пе, поможинена ко џивдипе хем керена те овел аменге пошукар.

Шај ли е Девлескоро Лафи те поможинел туке да? Оја, шај те поможинел ко са о проблемија со иси тут. Са со и пишимо ки лесте „авела таро Девел хем корисно тано те сикавел е мануше, те сикавел кеда нешто тано погрешно, те исправинел са о буќа хем те сикавел сар те џивдинел пе праведно сар со мангела о Девел, те шај е Девлескоро мануш те овел способно хем спремно баши секоја шукар бути“ (2. Тимотеј 3:16, 17).

Адалеске, те дикха несаве важна буќа со сикавела е Девлескоро Лафи.