О ДЕВЕЛ пе слугенге вакерѓа кај ка овел искушими ленгири вера. Лескоро Лафи вакерела: „Овен џангавде! Тумаро душмани, о Бенг, тано сар лави со викинела кеда тано бокхало хем родела некас те хал“ (1. Петрово 5:8). Со керела о Бенг те шај те уништинел амари вера ко Девел?

О Бенг шај преку о јавера, чак преку адала со и аменге паше, те теринел амен те чхинава те сикљова таро е Девлескоро Лафи. Адалеске, о Иса вакерѓа: „Е манушескере душмања ка овен лескере кхерутне“ (Матеј 10:36). И фамилија хем о амала со на мислинена аменге лошнипе, шај на џанена кај о чачипе аракхљола ко е Девлескоро Лафи. Или, шај дарана со ка вакерен о јавера. Ама, е Девлескоро Лафи вакерела: „Кој тинанела даратар таро мануш чхивела песке замка, а кој веруњела ко Јехова ка овел заштитимо“ (Изреки 29:25). Те керѓем е манушенгири волја, адалеа со ка чхинава те сикљова таро е Девлескоро Лафи, ка радуња ли е Девле? Сигурно на! Ама, ако сикаваја чачутни вера, о Девел ка поможинел амен. „Амен на сиам адалендар со тари дар цидена пе таро Девел хем џана ко уништување, него адалендар со веруњена хем спасинена по џивдипе“ (Евреите 10:39).

Те сетина амен ко пример е Думасескоро, со дикхлем ле англедер. Лескири ромни асала сине леске баши лескири вера. Ама пало адава, ој да почминѓа те сикљовел таро е Девлескоро Лафи. Ако амен да кераја адава со и праведно, шај те поможина амаре амаленге хем амаре мангленге, ола да те керен аѓаар. Бут пути, окова со сикљола таро е Девлескоро Лафи пле шукар постапкенцар хем адалеа со сикавѓа поштовање, поможинѓа некој тари лескири фамилија те служинел е Девлеске (1. Петрово 3:1, 2).

О Бенг, исто аѓаар, теринела е манушен те мислинен кај нане лен време те сикљовен таро е Девлескоро Лафи. Ов мангела о пхарипе со иси амен ко амаро џивдипе — о муке хем о финансиска проблемија — те ‚тасавен о лафи [е Девлескоро]‘ аѓаар со амари вера ‚нане те дел плоди‘ (Марко 4:19). Ма те мукха асавко стави со нане разумно те влијањел упри аменде да. Е Девлескоро Лафи вакерела: „Те шај те добинен вечно џивипе ваљани шукар те пенџарен тут, е јекхе чачутне Девле, хем околе  со бичхалѓан ле, о Исус Христос“ (Јован 17:3). Оја, ако понадари да сикљоваја побутер башо Девел хем башо Иса, о Месија, ка овел амен вечно џивдипе ко џенети ки Пхув!

Те сетина амен ко пекамбери о Муса, кова со барило ки фамилија е фараонескири ко Египет. Шај сине те овел ле барвалипе, слава хем моќ. Ама, о Муса „побутер мангља те овел мучимо е Девлескере народоја, него те уживинел ко грешна буќа со сигате накхена“. Соске? „Ов сине истрајно сар те пхене дикхела сине Околе со на дикхјола“ (Евреите 11:24, 25, 27). Оја, е Муса сине ле зорали вера ко Девел. Леске сине поважно о Девел него о себична желбе, хем адалеске о Девел денѓа ле бут берекетија. Ако амен да кераја аѓаар, ов ка дел берекетија аменге да.

О Бенг шај те пробинел те ховавел амен ко бут начинија. Ма те мукха те ова лескири жртва. Е Девлескоро Лафи охрабринела амен: „Противинен тумен е Бенгеске, хем ов ка нашел тумендар“ (Јаков 4:7). Сар шај те противине ту леске?

Понадари да сикљов таро е Девлескоро Лафи. Читин е Девлескоро Лафи секова диве, сикљов лестар хем кер адава со вакерела ов. Кериндор акава, ка ураве и „цело воено опрема таро Девел“, колаја со ка бранине ту таро Бенг (Ефешаните 6:13).

Ов амал е манушенцар со иси лен чачутни вера. Роде туке амала кола со читинена е Девлескоро Лафи, со сикљовена лестар хем икерена адава со бешела ки лесте. Асавке мануша шунена акава совет: „Те размислина јекх јекхеске те шај те поттикнина амен те сикава мангипе хем те кера шукарипе... те охрабрина амен јекх јекхеа“. Ола ка поможинен ту те бајрол ти вера (Евреите 10:24, 25).

Ов паше е Јеховаја. Молин ту е Девлеске те поможинел ту хем нека овел тут доверба ки лесте. Никогаш ма бистре, о Девел мангела те поможинел тут. Е Девлескоро Лафи вакерела аменге: „Са тумаро пхарипе фрден леске [е Девлеске], соске ов грижинела пе туменге“ (1. Петрово 5:6, 7). „О Девел тано верно, хем нане те мукхел те овен искушиме побутер таро адава со шај те ингарен, него ка поможинел тумен кеда иси тумен искушение те шај те издржинен ле“ (1. Коринќаните 10:13).

О Бенг асала е Девлеске адалеа со вакерела кај нијекх мануш кеда иси ле проблемија нане те служинел леске. Ама, секој амендар шај те сикавел кај о Бенг ховавела! „Ов гоѓавер“ вакерела о Девел, „хем радуњкер мо вило, те шај те одговоринав околеске со асала манге“ (Изреки 27:11). Оја, те ова решиме те сикава кај иси амен чачутни вера!