„Овен учителија“ (Евр. 5:12). Замислин туке, о Јехова — о најшукар Учители ко универзум — денѓа аменге задача те сикава е јавере манушен баши лесте! Аменге тани скапоцено чест хем бари одговорност те сикава е јаверен башо Јехова, бизи разлика дали кераја адава ки фамилија, ко собрание или ки служба. Со ка поможинел аменге шукар те кера акаја задача?

О одговор аракхљовела ко лафија со пишинѓа лен о апостол Павле е Тимотееске: „Понадари да концентририн тут ко јавно читибе, ко охрабрибе е јаверен, ко сикајбе“. Пало адава о Павле вакерѓа: „Кериндор адава ка спасине хем тут хем адален со шунена тут“ (1. Тим. 4:13, 16). О шукар хабери со вакераја ле шај те спасинел е манушенгоро живото. Адалеске тано бут важно те ова са пошукар ко читибе хем сикајбе. Акаја брошура ка поможинел аменге ко адава. Те дикха некобор буќа со иси ки лате.

О Јехова тано „о Најбаро Учители“ (Иса. 30:20). Иако акаја брошура ка поможинел туке те ове са пошукар ко читибе хем сикајбе, никогаш ма бистре кај о хабери со вакераја ле авела таро Јехова хем кај ов привлечинела е манушен (Јован 6:44). Адалеске, редовно молин е Јехова те дел тут свети дух. Користин и Библија со шај повише. Никогаш ма вакер тле идее, него секогаш поможин е јаверенге те хаљовен сар дикхела хем сар размислинела о Јехова баши несави бути. Трудин тут те поможине е јаверенге те манген е Јехова цело вилеа.

Денди туке задача те сикаве е јаверен башо најважно хабери со сине некогаш дендо е манушенге. Увериме сием кај ка успејне ко адава, са џикоте родеа таро Девел те дел тут пли сила (1. Пет. 4:11).

Тумаре соработникија,

Водечко тело е Јеховаскере сведоконгоро