1-2. а) Соске ваљани туке водство кеда аракхљовеа ко несаво тхан со на пенџареа ле? б) Со денѓа амен о Јехова те шај те водинел амен ко живото?

 ЗАМИСЛИН туке кај пхиреа ки јекх бари пустина. И околина лакири стално менинела пе соске и бари бавлал ингарела и пошик ко различна стране. Адалеске, бут сигате шај те нашавѓове. Котар ка џане која страна те џа? Ваљани туке некој или нешто те водинел тут. Адава шај те овел компас, о кхам хем о черења, несави карта, GPS (Глобално системи баши позиција), или несаво мануш  со бут шукар џанела и пустина. Бут тано важно те овел тут шукар водство соске, ако џанеа ки која страна ваљани те џа, адава шај те спасинел тло живото.

² Ко амаро живото иси амен бут предизвикија, хем понекогаш шај осетинаја амен сар нашавде. Ама те шај те водинел амен, о Јехова секаске амендар денѓа совест (Јаков 1:17). Те дикха сој тани и совест хем сар функциониринела. Пало адава ка дикха сар шај те школујна амари совест, соске ваљани те мислина баши совест е јаверенгири хем сар шај и чисто совест те керел амаро живото бут пошукар.

3. Сој тани и совест?

³ И совест тани бут шужо поклон таро Јехова. Ој тани чувство со иси амен андре ки аменде башо адава сој тано исправно, а сој погрешно. Ки Библија, о грчко лафи сој тано користимо баши „совест“ дословно значинела „те пенџаре коркори туте“. Кеда функциониринела шукар, амари совест поможинела аменге те испитина саве чаче сием андрал. Ој шај те поможинел аменге искрено те дикха саве тане амаре најхор мисле хем чувствија. И совест шај те водинел амен те постапина исправно хем те спречинел амен те постапина погрешно. Исто аѓаар, ој шај те керел те осетина амен бахтале кеда анаја мудро одлука, а те осетина амен крива кеда анаја несави лошно одлука. (Дикх и 5 фуснота.)

4-5. а) Со случинѓа пе кеда о Адам хем и Ева на шунѓе пумари совест? б) Кола библиска примерија сикавена аменге сар функциониринела и совест?

⁴ Секој амендар шај те биринел дали ка шунел пли совест или на. О Адам хем и Ева биринѓе те на шунен  пумари совест, хем адалеске керѓе грево. Пало адава осетинѓе пе крива, ама сине бут касно. Ола више сикавѓе кај нане послушна е Девлеске (1. Мојсеева 3:7, 8). Иако солдујен сине лен совршено совест хем џанена сине кај тано погрешно те на шунен е Девле, ола сепак одлучинѓе те на шунен пумари совест.

⁵ Тари јавер страна, бут несовршена мануша шунѓе пли совест. О Јов сине јекх шукар пример. Адалеске со шунела сине пли совест хем анела сине шукар одлуке, ов шај сине те вакерел: „Мо вило нане те осудинел ман са џикоте сиум џивдо“ (Јов 27:6). Кеда керѓа лафи башо пло „вило“, о Јов мислинѓа ки пли совест, или ко лескоро чувство башо адава сој тано исправно, а сој погрешно. А о Давид понекогаш на шунѓа пли совест хем на сине послушно е Јеховаске. Пало адава осетинѓа пе бут криво хем лескоро вило осудинела ле сине (1. Самоилова 24:5). Значи, лескири совест вакерѓа леске кај адава со керѓа сине погрешно. Адава со мучинѓа ле лескири совест поможинѓа леске те на керел палем исто грешка.

6. Соске шај те вакера кај и совест тани поклон таро Девел?

⁶ Чак о мануша со на пенџарена е Јехова обично џанена кај иси буќа сој тане исправна хем буќа сој тане погрешна. И Библија вакерела: „Ко пле мисле ола осетинена пе крива или оправдиме“ (Римјаните 2:14, 15). На пример, бут мануша џанена кај тано погрешно те мударел пе или те чорел пе. Иако нане свесна, ола уствари шунена пумари совест, о чувство со денѓа лен о Јехова башо адава сој исправно а сој погрешно. А адалеа со шунена пумари совест, ола постапинена спрема о библиска начелија — основна чачипа кола со денѓа амен  о Јехова те шај те поможинен аменге те ана шукар одлуке ко живото.

7. Соске амари совест понекогаш шај те реагиринел погрешно?

⁷ Ама понекогаш амари совест шај те реагиринел погрешно. На пример, шај упри лате лошно те влијајнен амаре несовршена мисле хем чувствија хем шај те водинел амен ко погрешно друмо. Амари совест нане автоматски те реагиринел исправно. Ваљани те трудина амен те школујна ла. Адава шај те дикхел пе таро е Јосифескоро пример. Лескири совест сине исправно школујми, адалеске ов на грешинѓа (1. Мојсеева 39:1, 2, 7-12). О Јехова дела амен пло свети дух хем о библиска начелија те шај те поможинел аменге те школујна амари совест (Римјаните 9:1). Те дикха сар шај те кера адава.

8. а) Сар шај амаре чувствија те влијајнен упри амари совест? б) Со ваљани те пуча амен англедер те кера нешто?

⁸ Несаве мануша мислинена кај те шунен пли совест значинела те водинен пе таро пле чувствија. Ола мислинена кај шај те керен са со мангена, са џикоте на осетинена пе крива башо адава. Ама, амен сием несовршена, амаре чувствија шај те водинен амен ко погрешно правцо. О чувствија шај те овен добором силна со ка влијајнен ки амари совест. И Библија вакерела: „О вило тано поховавно таро било со јавер хем спремно тано ко са. Кој шај те пенџарел ле?“ (Еремија 17:9). Адалеске шај те почмина те мислина кај нешто тано исправно, иако тано погрешно. На пример, о Павле англедер те овел христијани, ов сурово прогонинѓа е Девлескере слуген хем верујнѓа кај адава со керела тано исправно. Ов мислинела сине кај лескири совест тани чисто. Ама кеда дознајнѓа  сар о Јехова дикхела ки адаја бути, о Павле халило кај ваљани те менинел пе. Ов халило кај најважно тано те овел ле чисто совест англо Јехова (Дела 23:1; 1. Коринќаните 4:4; 2. Тимотеј 1:3). Акава јасно сикавела кај, англедер те кера нешто, ваљани те пуча амен: „Дали о Јехова мангела те керав адава?“

9. Со значинела те овел амен дар таро Девел?

⁹ Кеда мангеа некас, сигурно на мангеа те разочарине ле. Адалеске со мангаја е Јехова, на мангаја те кера нешто со ка разочаринел ле. И дар те на разочарина е Јехова, ваљани те овел бут силно. Адава шај те дикха таро пример е Неемијаскоро. Ов на мангела сине те користинел пли положба сар управители те шај те барваљовел соске дарала сине таро Девел (Неемија 5:15). Ов на мангља те керел нешто со ка разочаринел е Јехова. Исто сар о Неемија, амен да на мангаја те кера нешто со ка разочаринел е Јехова. Шај те дознајна со мангела о Јехова адалеа со ка читина и Библија. (Дикх и 6 фуснота.)

10-11. Кола библиска начелија ка поможинен аменге те ана шукар одлука кеда керела пе лафи башо алкохол?

¹⁰ На пример, јекх слуга е Девлескоро шај ка ваљани те одлучинел дали те пиел алкохол или на. Кола начелија ка поможинен леске те анел јекх шукар одлука? Те дикха некобор. И Библија на забранинела те пиел пе алкохол. Уствари, ој вакерела аменге кај и мол тани поклон таро Девел (Псалм 104:14, 15). Ама, о Исус вакерѓа пле следбениконге те на маќовен (Лука 21:34). Исто аѓаар, о Павле вакерѓа е христијаненге те избегинен распуштена забаве хем маќојбе (Римјаните 13:13). Ов вакерѓа кај о пијанице „нане те наслединен е Девлескоро царство“ (1. Коринќаните 6:9, 10).

 ¹¹ Јекх христијани шај те пучел пе: „Кобор тано манге важно о алкохол? Дали ваљани те пијав алкохол те шај те опуштинав ман? Дали пијава алкохол те шај те овел ман побари доверба ки манде? Дали иси ман контрола упро адава кобор бут хем кобор често пијава? * Дали шај те накхав манге фино ме амаленцар чак бизо алкохол?“ Шај те молина е Јехова те поможинел аменге те ана мудра одлуке. (Читин Псалм 139:23, 24.) Адалеа со размислинаја башо библиска начелија хем искрено испитинаја амен, школујнаја амари совест спрема е Девлескере мерилија. Ама, ваљани панда нешто.

12-13. а) Соске шај амари совест те реагиринел различно тари е јаверенгири? б) Сар ваљани те дикха ко асавке разлике?

¹² И совест са е манушенгири на реагиринела исто. Тли совест шај те дозволинел туке нешто со и совест е јаверескири нане те дозволинел леске. На пример, ту шај ка одлучине те пие алкохол, ама некој јавер нане те пиел. Соске дуј мануша шај те овел лен различна ставија башо акава?

¹³ Бут пути, упро амаре ставија шај те влијајнел о тхан коте со барилем, сар амари фамилија дикхела ко буќа, амаро искуство ко живото хем јавера буќа. Кеда керела пе лафи башо алкохол, некој со поангле претеринела сине е пијбаја акана шај ка одлучинел те на пиел ни најхари (1. Царевите 8:38, 39). Адалеске, ако некаске нудинеа алкохол а ов одбинела тут, сар ка реагирине? Дали  ка вреџине тут? Дали понадари да ка терине ле те пиел? Дали ка ове упорно те џане соске на пиела? На, соске поштујнеа лескири совест.

14-15. а) Сави ситуација појавинѓа пе е Павлеске ко време? б) Кова шукар совет денѓа о Павле?

¹⁴ Ко прво веко, појавинѓа пе јекх ситуација со сикавела кај и совест шај те разликујнел пе таро мануш ко мануш. Несаве мануша ко пазари бикинена сине мас со сине жртвујмо идоленге. О апостол Павле мислинѓа кај нане погрешно те кинел пе хем те хал пе асавко мас (1. Коринќаните 10:25). Спрема лесте, са о хајбе авела таро Јехова. Ама несаве пхраља кола со англедер обожавинена сине идолија, дикхена сине појавер ки акаја бути. Те хал пе асавко мас, спрема ленде сине погрешно. Дали о Павле мислинѓа песке: „Манге ми совест дозволинела адава. Ман иси ман право те хав со мангава“?

¹⁵ О Павле на мислинѓа аѓаар. Добором сине леске важно те на поврединел пле пхрален, со сине спремно те откажинел пе таро нешто со сине ле право ко адава. О Павле вакерѓа кај на ваљани „те угодина коркори аменге“. Ов вакерѓа: „Ни о Христос на угодинѓа коркори песке“ (Римјаните 15:1, 3). Исто сар о Исус, о Павле мислинѓа повише башо јавера него баши песте. (Читин 1. Коринќаните 8:13; 10:23, 24, 31-33.)

16. Соске на ваљани те осудина амаре пхрален хем пхењен башо адава со дозволинела ленгири совест те керен?

¹⁶ Ама, со ако некаскири совест дозволинела леске те керел нешто со амен мислинаја кај тано погрешно? Ваљани бут те пазина те на критикујна хем те на ова упорна ко адава кај амен сием ко право. (Читин Римјаните 14:10.) О Јехова денѓа амен и совест те судина коркори амен, а на те судина е јаверен (Матеј 7:1). Никогаш на  мангаја амаре одлукенцар те кера поделбе ко собрание. Наместо адава, те сикава мангипе хем те бајрара о јекхипе машкар аменде (Римјаните 14:19).

17. Сави совест иси несаве манушен?

¹⁷ О апостол Павле пишинѓа: „Икерен чисто тумари совест“ (1. Петрово 3:16). Жално тано адава со, ако о мануша намерно на шунена е Јеховаскере начелија, ко крајо ленгири совест нане ни те реагиринел. О Павле вакерѓа кај асавки совест тани „тхари тате састрнеа“  (1. Тимотеј 4:2). Дали некогаш тхарѓан тли кожа добором бут со ко адава тхан више ништо на осетинеа? Слично овела ако некој понадари да керела лошна буќа. Лескири совест шај те овел „тхари“ хем, сар со накхела о време, нане те функциониринел.

18-19. а) Со шај те сикљова таро адава со осетинаја амен крива? б) Со шај кераја ако панда осетинаја амен крива башо амаре грешке коленге со више каинѓем амен?

¹⁸ Кеда осетинаја амен крива, амари совест шај вакерела аменге кај нешто грешинѓем. Адава шај те поможинел аменге те хаљова со грешинѓем хем те чхинава те кера адава. Шукар тано те сикљова таро амаре грешке те шај те на повторина лен. На пример, о цари о Давид керѓа грево хем лескири совест поттикнинѓа ле те каинел пе. Ов почминѓа те мрзинел адава со керѓа хем одлучинѓа ки иднина те овел послушно е Јеховаске.  О Давид таро пло искуство шај сине те пхенел: „Ту, Јехова, сиан шукар хем спремно сиан те простине“. (Псалм 51:1-19; 86:5; дикх и 7 фуснота.)

¹⁹ Ама, некој шај панда те осетинел пе криво, иако накхља бут време кеда каинѓа пе башо о грево со керѓа. Адава шај те анел аменге дукх хем те осетина амен кај на врединаја. Ако ту да понекогаш осетинеа тут аѓаар, ма бистре кај нашти те менине адава со уло. Бизи разлика дали намерно или ненамерно керѓан нешто погрешно, о Јехова простинѓа туке целосно соске каинѓан тут хем адалеске тле гревија тане бришиме. Ту сиан чисто англо Јехова хем џанеа кај акана постапинеа исправно. Тло вило шај панда осудинела тут, ама и Библија вакерела: „О Девел тано побаро таро амаре виле“. (Читин 1. Јованово 3:19, 20.) Акава значинела кај лескоро мангипе хем адава сој спремно те простинел туке тано побаро таро  секова чувство со керела те осетине тут криво или те лаџа таро адава со керѓан. Ту шај те ове сигурно кај о Јехова простинѓа туке. Ако прифатинеа акава, тли совест ка овел чисто хем ка ове бахтало џикоте служинеа е Девлеске (1. Коринќаните 6:11; Евреите 10:22).

20-21. а) Ко со ка поможинел туке акаја публикација? б) Сар ваљани те користина и слобода со денѓа амен о Јехова?

²⁰ Акаја публикација тани керди те поможинел туке те школујне тли совест те шај те предупрединел тут хем те заштитинел тут ко акала последна диве. Исто аѓаар, ој шај те поможинел туке те икере о библиска начелија ко различна ситуацие ко тло живото. Ама, ки акаја публикација нане те аракхе списако со иси ле правилија башо адава сар те постапине ки секоја ситуација. Амен живинаја спрема „е Христосескоро закони“, кова со темелинела пе ко е Девлескере начелија хем дела амен бари слобода (Галатите 6:2). Ама, кеда нане конкретно закони баши несави бути, на користинаја адава сар изговор те кера нешто сој погрешно хем на вакераја: „Ако нешто нане забранимо, тегани тано дозволимо“ (2. Коринќаните 4:1, 2; Евреите 4:13; 1. Петрово 2:16). Наместо адава, амари слобода користинаја ла те сикава амаро мангипе спрема о Јехова.

²¹ Кеда размислинаја башо о библиска начелија хем икераја лен ко амаро живото, сикљоваја те користина амари „способност хаљојбаске“ или јавере лафенцар те дикха и разлика машкар о исправно хем о погрешно, хем те размислина сар о Јехова (Евреите 5:14). Аѓаар ка овел амен школујми совест спрема о библиска начелија која со ка водинел амен ко живото хем ка поможинел аменге те ачхова ко е Девлескоро мангипе.