1-2. Соске мангеа е Девле?

 ДАЛИ мангеа е Девле? Шај добором бут мангеа ле со чак денѓан леске лафи кај ка служине леске цело тло живото. Шај сиан леа паше сар тло најшукар амал. Ама, англедер ту те манге е Јехова, прво ов тут мангља. Ки Библија пишинела: „Амен сикаваја мангипе, соске прво ов сикавѓа мангипе аменге“ (1. Јованово 4:19).

² Размислин ко кола са начинија о Јехова сикавѓа кај мангела амен. Ов денѓа амен и Пхув те живина ки лате хем денѓа амен са сој аменге потребно те шај те уживина ко живото (Матеј 5:45; Откровение 4:11). О Јехова мангела те ова леа паше хем денѓа амен са со ваљани те шај те сикљова баши лесте. Кеда читинаја и Библија, амен шунаја е Јехова. А кеда молинаја амен леске, тегани ов шунела амен (Псалм 65:2). О Јехова водинела амен хем дела амен сила преку пло моќно свети дух (Лука 11:13). Ов чак бичхалѓа пле мангле Чхаве ки Пхув те шај те ослободинел амен таро грево хем мерибе. (Читин Јован 3:16; Римјаните 5:8.)

3. Сар шај те ачхова паше амала е Јеховаја?

 ³ Кратко размислин башо некој таро тле најшукар амала, некој со сине туја хем ко шукар хем ко лошно. Ваљани бут те трудине тут те икере асавко паше амалипе. Акава тано исто важно башо амаро амалипе е Јеховаја, о најшукар амал со шај те овел амен. Амаро амалипе леа шај те трајнел вечно. Адалеске и Библија вакерела аменге: „Ачховен ко е Девлескоро мангипе“ (Јуда 21). Сар шај те кера адава? И Библија дела амен о одговор: „Те мангел пе е Девле значинела те икерен пе лескере заповедија, а лескере заповедија нане пхаре“ (1. Јованово 5:3).

4-5. Сар почминѓа те бајрол тло мангипе спрема о Девел?

⁴ Дали сетинеа тут сар почминѓа те бајрол тло мангипе спрема о Девел? Сетин тут сар осетинеа тут сине кеда прво пути дознајнѓан кај о Јехова мангела те живине вечно ко лескоро нево свето.

⁵ Ту дознајнѓан са со керѓа о Јехова те шај амен те живина вечно, хем халиљан кобор скапоцено поклон денѓа амен кеда бичхалѓа пле Чхаве ки Пхув (Матеј 20:28; Јован 8:29; Римјаните 5:12, 18). Кеда халиљан кај о Јехова бут мангела тут, адава поттикнинѓа тут ту да те манге ле. (Читин 1. Јованово 4:9, 10.)

6. а) Со значинела те манге некас? б) Ко со поттикнинѓа тут о мангипе спрема о Девел?

⁶ Ама адава со осетинѓан асавко мангипе спрема о Девел сине само почеток. На пример, кеда мангаја некас, амен сием спремна те кера нешто повише него само те вакера леске: „Мангава тут“. О мангипе теринела амен те кера буќа со ка керен ле бахтало. Исто  аѓаар, о мангипе спрема о Јехова поттикнинѓа тут те живине ко начин со ка керел е Јехова бахтало. Сар со бајрола сине тло мангипе спрема лесте, ту шај денѓан леске лафи кај ка служине леске хем крстинѓан тут. Ко адава начин, ту ветинѓан е Јеховаске кај ка служине леске засекогаш. (Читин Римјаните 14:7, 8.) Сар шај те икере тут ко адава со ветинѓан?

7. а) Со ка кера ако мангаја е Јехова? б) Кола тане несаве таро лескере заповедија?

⁷ Адалеске со мангаја е Јехова, амен икераја лескере заповедија. Сар кераја адава? Аѓаар со сием леске послушна. Тари Библија сикљоваја сар мангела о Јехова те живина. На пример, ов вакерела аменге кај тано погрешно те маќова, те чора хем те ховава, те овен амен сексуална односија некасаја со на сием ко брако хем те обожавина некас или нешто јавер освен лесте (1. Коринќаните 5:11; 6:18; 10:14; Ефешаните 4:28; Колошаните 3:9).

8-9. Сар шај те џана со мангела о Јехова те кера ко ситуацие кеда нане конкретно закони ки Библија? Вакер пример.

⁸ Ама, те шај те кера адава со мангела о Јехова, нане доволно само те икера лескере заповедија. Ов на денѓа амен јекх баро списако пхердо законенцар баши секоја ситуација ко живото. Адалеске, нане секогаш те аракха конкретно закони ки Библија со ка вакерел аменге со те кера. Тегани, сар шај те ана исправна одлуке ко асавке ситуацие? (Ефешаните 5:17). Ки Библија иси начелија, а адала тане основна библиска чачипа кола со сикавена амен сар дикхела о Јехова ко буќа. Џикоте читинаја и Библија, амен пошукар пенџараја  е Јехова. Сикљоваја сар ов размислинела, исто аѓаар со мангела, а со мрзинела. (Читин Псалм 97:10; Изреки 6:16-19; дикх и 1 фуснота.)

⁹ На пример, сар амен одлучинаја со ка дикха ки телевизија или ко интернет? О Јехова на вакерела аменге со точно шај те дикха, а со на. Ама, о начелија со дела амен ка поможинен аменге те ана шукар одлуке. Авдиве побаро дело тари забава тани пхерди насилство хем сексуално неморал. Ки Библија, о Јехова вакерела аменге кај „мрзинела околен со мангена о насилство“ хем кај ка судинел околенге со керена сексуално неморал (Псалм 11:5; Евреите 13:4). Сар шај акала начелија те поможинен аменге те ана шукар одлуке? Кеда џанаја кај о Јехова мрзинела нешто или дикхела ко адава сар нешто нечисто ко морално поглед, амен ваљани адава те избегина.

10-11. Соске сием послушна е Јеховаске?

¹⁰ Соске сием послушна е Јеховаске? Адава на кераја ле само те на ова казниме или те шај те избегина о последице таро лошна одлуке (Галатите 6:7). Амен сием послушна е Јеховаске соске мангаја ле. Исто сар јекх чхаво со мангела те керел пе даде бахтало, аѓаар амен да мангаја те кера бахтало амаре Даде сој ко небо. Нане ништо пошукар таро адава те џана кај о Јехова тано задоволно амендар! (Псалм 5:12; Изреки 12:2; дикх и 2 фуснота.)

¹¹ Амен на сием послушна е Јеховаске само кеда аменге локхо или кеда нане амен јавер избор. Исто аѓаар, на биринаја кола законија хем начелија ка шуна, а кола на (5. Мојсеева 12:32). Наместо адава,  амен сием послушна е Јеховаске ко са, сар со вакерѓа о псалмисти: „Уживинава ко тле заповедија, мангава лен“ (Псалм 119:47; Римјаните 6:17). Мангаја те ова сар о Ное кова со сикавѓа кај мангела е Јехова адалеа со керѓа са со заповединѓа леске те керел. И Библија башо Ное вакерела: „Баш аѓаар керѓа“ (1. Мојсеева 6:22). Сигурно мангеа о Јехова туке да те вакерел аѓаар.

12. Сар шај те кера е Јехова бахтало?

¹² Сар осетинела пе о Јехова кеда сием леске послушна? Кераја ле бахтало (Изреки 11:20; 27:11). Замислин туке! Амен кеда сием послушна кераја бахтало е Створителе е вселенакоро. Ама ов никогаш на теринела амен силаја те кера адава. Наместо адава, ов денѓа амен слободно волја. Акава значинела кај иси амен слобода те бирина дали ка постапина исправно или погрешно. О Јехова мангела амаро мангипе спрема лесте те поттикнинел амен те ана шукар одлуке со ка поможинен те овел амен о најшукар живото. (5. Мојсеева 30:15, 16, 19, 20; дикх и 3 фуснота.)

13-14. Котар џанаја кај е Девлескере заповедија нане бут пхаре те икерен пе? Вакер пример.

¹³ Понекогаш шај те мислина аменге кај е Јеховаскере заповедија тане бут пхаре или кај ограничинена амари слобода. И Библија јасно вакерела: „Лескере заповедија нане пхаре“ (1. Јованово 5:3). О грчко лафи сој акате преведимо сар „пхаре“, ко јавера библиска стихија користинела пе те шај те опишинен пе о неразумна правилија или те опишинел манушен со  мангена те контролиринен хем те поврединен е јаверен (Матеј 23:4; Дела 20:29, 30). Е Јеховаскере заповедија нане „пхаре“ ки адаја смисла со нане бут пхаро те ова ленге послушна. Ов тано секогаш разумно хем никогаш на родела амендар те кера нешто со нашти кераја.

¹⁴ На пример, замислин туке кај поможинеа несаве амалеске те селинел пе ко нево кхер. Ов кхединѓа са пле буќа ко кутие. Несаве кутие тане локхе, а несаве тане добором пхаре со ваљани дуј џене те вазден лен. Дали то амал ка родел тутар те вазде коркори и најпхари кутија? Сигурно на! Соске? Соске на мангела те повредине тут. Исто сар акава амал, о Јехова никогаш нане те родел амендар те кера нешто сој тано бут пхаро аменге (5. Мојсеева 30:11-14). Ов бут шукар хаљовела амен. О Јехова „шукар пенџарела состар сием керде, на бистрела кај сием таро право“ (Псалм 103:14).

15. Соске шај те ова сигурна кај е Јеховаскере заповедија тане башо амаро шукарипе?

¹⁵ О Мојсеј вакерѓа е Израелцонге кај, ако икерена е Јеховаскере заповедија, секогаш ка овел ленге шукар хем адава ка поможинел ленге те ачховен џивде (5. Мојсеева 5:28-33; 6:24). Исто адава важинела аменге да авдиве. Са со родела амендар о Јехова поможинела аменге те овел амен пошукар живото. (Читин Исаија 48:17.) Амаро Дад, о Јехова, секогаш џанела сој тано најшукар аменге (Римјаните 11:33). И Библија вакерела: „О Девел тано мангипе“ (1. Јованово 4:8). Акава значинела кај са со вакерела хем са со керела о Јехова тано поттикнимо таро мангипе.

16. Со поможинела аменге те ова послушна е Девлеске иако сием несовршена хем живинаја ко јекх лошно свето?

 ¹⁶ Нане секогаш локхо те ова послушна е Девлеске. Живинаја ко јекх лошно свето коте со владинела о Бенг. Ов теринела е манушен те керен лошна буќа (1. Јованово 5:19). Освен адава, мора те борина амен амаре несовршена мисленцар хем чувствонцар, соске ола шај те теринен амен те на шуна е Девле (Римјаните 7:21-25). Ама о мангипе спрема о Јехова ка дел амен сила те кера адава сој тано исправно. Ов дикхела кобор трудинаја амен те ова леске послушна хем поможинела аменге аѓаар со дела амен пло моќно свети дух (1. Самоилова 15:22, 23; Дела 5:32). О свети дух поможинела аменге те развина особине коленцар со шај полокхе те ова послушна е Девлеске (Галатите 5:22, 23).

17-18. а) Со ка сикљова тари акаја публикација? б) Башо со ка кера лафи ко следно поглавје?

¹⁷ Тари акаја публикација ка сикљова сар те живина ко начин кова со ка керел е Јехова бахтало. Ка сикљова сар те применина лескере начелија хем сар те икера амен ко лескере морална мерилија. Ма бистре кај о Јехова никогаш на чхивела амен силаја те ова леске послушна. Ако одлучинаја те ова леске послушна, амаро живото ка овел пошукар хем ка овел амен пошужи иднина. А сој најважно, амари послушност ка сикавел е Девлеске кобор бут мангаја ле. (Дикх и 4 фуснота.)

¹⁸ Те шај те поможинел аменге те џана сој тано исправно, а сој погрешно, о Јехова секаске амендар денѓа совест. Ако школујнаја амари совест, адава ка поможинел аменге те икера лескере заповедија. Тегани, сој тани и совест, хем сар шај те школујна ла? Те дикха.