1-3. а) Соске јекх дај мангела лакоро чхаво те овел чисто? б) Соске о Јехова мангела лескоро народо те овел чисто?

 ЗАМИСЛИН ТУКЕ јекх дај сар спреминела пле чхаве те џал ки школа. Нанѓарела ле хем уравела ле чиста хем уредна шеја. Ој керела адава башо е чхавескоро састипе, хем адава сикавела е јаверенге кај ола сар родителија грижинена пе пле чхавеске.

² Амаро Дад, о Јехова, мангела те ова чиста (Псалм 18:26). Ов џанела кај адава со ка ова чиста тано башо  амаро шукарипе. Кеда сием чиста, тегани фалинаја ле. (Езекиел 36:22; читин 1. Петрово 2:12.)

³ Со значинела те ова чиста? Соске тано башо амаро шукарипе те ова чиста? Џикоте кераја лафи башо акала пучиба, шај ка дикха кај ваљани те кера несаве промене ки аменде.

4-5. а) Соске ваљани те ова чиста? б) Сар о буќа со створинѓа о Јехова сикавена амен сар ов дикхела ки чистота?

⁴ Амен сикљоваја те ова чиста таро е Јеховаскоро пример (3. Мојсеева 11:44, 45). Адалеске, и главно причина соске ваљани те ова чиста тани соске мангаја те ова „сар о Девел“ (Ефешаните 5:1).

⁵ О буќа со створинѓа о Јехова бут сикавена амен сар ов дикхела ки чистота. О Јехова створинѓа природна циклусија со оддржинена амаро воздух хем о пани чисто (Еремија 10:12). Размислин ко кола са начинија и Пхув чистинела пе коркори, чак откеда о мануша загадинѓе ла. На пример, о Јехова створинѓа микроорганизмија кола тане бут ситна хем шај те дикхен пе само микроскопеа. Акала микроорганизмија шај о штетна материе те керен лен ко корисна материе. Акава тано бут моќно процес. О научникија чак користинена несаве таро акала микроорганизмија те шај те чистинен нешто сој загадимо (Римјаните 1:20).

6-7. Сар е Мојсеескоро закони сикавела кај окола со обожавинена е Јехова мора те овен чиста?

⁶ Кобор тано важно те овел пе чисто исто аѓаар дикхела пе таро Закони со о Јехова денѓа е Израелцонге преку о Мојсеј. На пример, о мануша ваљани сине те овен чиста ко физичко поглед те шај о Јехова те  прифатинел ленгоро обожавибе. Ко Диве простибаске о гревија, о првосвештенико ваљани сине те нанѓол дуј пути (3. Мојсеева 16:4, 23, 24). А исто аѓаар, о јавера да свештеникија англедер те ден жртве, ваљани сине те тховен пумаре васта хем пре (2. Мојсеева 30:17-21; 2. Летописи 4:6). Ко несаве ситуацие, ако некој на шунела сине акала законија баши чистота сине казнимо аѓаар со сине мудардо (3. Мојсеева 15:31; 4. Мојсеева 19:17-20).

⁷ Сар тано авдиве? Таро Закони шај те сикљова повише башо е Јеховаскере мерилија (Малахија 3:6). Лестар јасно шај те дикхел пе кај окола со служинена е Јеховаске ваљани те овен чиста. Е Јеховаскере мерилија на менинѓе пе. Авдиве да, ов панда очекујнела таро пле слуге те овен чиста (Јаков 1:27).

8. Со ваљани те кера те шај те ачхова чиста англо Јехова?

⁸ Англо е Јеховаскере јакхја, те овел пе чисто на значинела само те овел чисто тло тело, тле шеја хем тло кхер. Ко адава тано вклучимо цело амаро живото, сар сој амари служба, понашибе хем мисле. Оја, те шај англо Јехова те ова чиста, амен мора те ова чиста ко са о аспектија таро амаро живото.

9-10. Со значинела амаро обожавибе те овел чисто?

⁹ Чисто обожавибе. Амен ко нисаво начин на смејнаја те ова поврзиме е ховавне религијаја. Кеда о Израелција сине робија ко Вавилон, ола живинена сине машкар о мануша кола со сине вклучиме ки неморално паганско религија. О Исаија пророкујнѓа кај о Израелција ка иранен пе ко Израел хем ка обновинен о чисто обожавибе. О Јехова вакерѓа ленге: „Икљовен  адатхар, ма пипинен ништо сој тано нечисто! Икљовен тари лакири средина, ачховен чиста“. Ленгоро обожавибе на ваљани сине те овел мешимо е сикљојбаја, е навикенцар или е обичаенцар тари ховавни религија ко Вавилон (Исаија 52:11).

¹⁰ О чачутне христијања авдиве да цидена пе тари ховавни религија. (Читин 1. Коринќаните 10:21.) Ко цело свето иси различна традицие, обичаија хем верувања кола со темелинена пе ко сикљојба тари ховавни религија. На пример, ко бут културе, бут мануша верујнена кај иси нешто андре ки аменде кова со живинела пало амаро мерибе, хем бут обичаија темелинена пе ко акава верување (Проповедник 9:5, 6, 10). О христијања ваљани те циден пе таро асавке обичаија. Амари фамилија шај те керел аменге притисок те ова ленцар ко асавке обичаија. Ама, адалеске со мангаја англо Јехова те ова чиста, на дозволинаја о јавера те влијајнен упри аменде (Дела 5:29).

11. Со значинела те ова чиста ко амаро понашибе?

¹¹ Чисто понашибе. Те шај те ова чиста англо Јехова, амен мора те цида амен таро секова сексуално неморал. (Читин Ефешаните 5:5.) Ки Библија, о Јехова вакерела аменге: „Нашен таро блуд!“ Ов јасно вакерела кај окола со живинена неморално хем на каинена пе „нане те наслединен е Девлескоро царство“. (1. Коринќаните 6:9, 10, 18; дикх и 22 фуснота.)

12-13. Соске ваљани те овен амен чиста мисле?

¹² Чиста мисле. О мисле често водинена џи ко постапке (Матеј 5:28; 15:18, 19). О чиста мисле ка поттикнинен амен те постапина ко чисто начин. Џанѓола пе, амен сием несовршена, хем понекогаш ка овен амен  погрешна мисле. Ако иси амен асавке мисле, ваљани одма те цида лен. Ако на цидаја лен, пало несаво време амаро вило шај те овел нечисто. Шај ка почмина те манга те кера о буќа башо кола со стално мислинаја. Наместо адава, мора те пхера амари годи чиста мисленцар. (Читин Филипјаните 4:8.) Адалеске избегинаја забава сој неморално хем насилно. Пазинаја со читинаја, со дикхаја хем башо со кераја лафи (Псалм 19:8, 9).

¹³ Те шај те ачхова ко е Девлескоро мангипе, мора те овел чисто амаро обожавибе, понашибе хем амаре мисле. Ама исто аѓаар е Јеховаске тано важно те ова чиста ко физичко поглед.

14. Соске тано важно те ова чиста ко физичко поглед?

¹⁴ Ако икераја амаро тело хем амари околина чисто, адава тано корисно на само аменге него хем е манушенге сој тане околу аменде. Аѓаар ка осетина амен шукар, хем о јавера ка манген те овен аменцар. Ама иси поважно причина соске ваљани те ова чиста ко физичко поглед. Адава со сием чиста анела слава е Јеховаске. Размислин башо акава. Кеда дикхеа јекхе чхаве кова сој секогаш мелало, шај мислинеа лошно башо лескере родителија. Слично аѓаар, ако амен да на грижинаја амен те ова чиста, о мануша шај те мислинен лошно башо Јехова. О Павле вакерѓа: „Ко нисаво начин на даја нисави причина те сопкинен пе, те нашти те аракхен нисави грешка ки амари служба, него ко са сикаваја кај сием е Девлескере слуге“ (2. Коринќаните 6:3, 4).

15-16. Со ваљани те кера те шај те ова чиста?

 ¹⁵ Амаро тело хем амаре шеја. Те одржина амаро тело чисто тано нешто со ваљани те кера секова диве. На пример, редовно нанѓоваја, ако шај секова диве. Тховаја амаре васта сапунеа хем пањеа, секогаш англедер те кера хајбаске или те ха хем посебно пало користибе о тоалети или кеда астараја нешто мелало. О тхојбе васта изглединела сар едноставно бути ама тано потребно те шај те на ширинен пе бактерие хем насвалипа, а адава шај чак те спасинел животија. Ако нане амен тоалети или канализација сепак шај те аракхел пе начин те фрдел пе о измет. Ко пурано време е Израелцон на сине лен канализација, адалеске ола ваљани сине те парунен о измет ки пхув, подур таро  ленгере шаторија хем подур таро изворија е пањескере (5. Мојсеева 23:12, 13).

¹⁶ Амаре шеја на ваљани те овен скупа хем најмодерна. Ама ваљани те овен чиста хем уредна. (Читин 1. Тимотеј 2:9, 10.) Преку амаро изглед амен мангаја секогаш те ана чест е Јеховаске (Тит 2:10).

17. Соске мангаја те овен чиста амаро кхер хем и околина?

¹⁷ Амаро кхер хем и околина. Бизи разлика коте живинаја, амен одржинаја амаро кхер чисто. Исто аѓаар, амен ваљани те икера чиста амаро врда, мотори, точако или било со јавер, посебно ако џаја ленцар ки дворана или ки служба. Уствари, амен ки служба вакераја е манушенге башо живото со ка овел ко рај ки чисто Пхув (Лука 23:43; Откровение 11:18). Адава сар изглединела амаро кхер хем и околина шај те сикавел кај амен спреминаја амен панда акана башо живото ко чисто нево свето.

18. Соске мангаја амаро тхан обожавибаске те овел чисто?

¹⁸ Амаро тхан обожавибаске. Адалеске сој аменге важно и чистота, амен икераја чисто о тхан обожавибаске, бизи разлика дали адаја тани и дворана или о тхан коте со иси амен конгрес. Кеда о мануша прво пути авена ки дворана бут пути ола приметинена кобор тани чисто. Адава анела чест е Јеховаске. Сарине амен таро собрание, шај те поможина те чистинел пе хем те одржинел пе и дворана (2. Летописи 34:10).

19. Со ваљани те избегина?

¹⁹ Ки Библија на пишинела која тани секоја лошно навика со ваљани те избегина ла. Ама ки лате иси начелија со поможинена аменге те дикха со мислинела о  Јехова башо асавке навике. Ов на мангела амен те пушина или те злоупотребина алкохол или дрога. Ако сием паше е Девлеа, амен нане те кера акала лошна буќа. Соске? Адалеске со бут ценинаја о живото сар скапоцено поклон. Акале навикенцар шај те кратина амаро живото, те уништина амаро састипе хем те кера штета е јаверенге сој околу аменде. Бут мануша мангена те чхинавен акала лошна навике башо пумаро састипе. Сар е Јеховаскере амала, амен иси амен и најбари причина те чхинава акала навике — адава тано амаро мангипе спрема лесте. Јекх терни џувли вакерела: „О Јехова поможинѓа манге те чистинав мло живото хем те ослободинав ман таро лошна навике колендар со сиум сине зависно... Мислинава кај никогаш нашти сине те керав коркори асавке промене“. Те дикха панџ библиска начелија со ка поможинен аменге те чхинава несаве штетна навике.

20-21. Таро кола навике о Јехова мангела те ослободина амен?

²⁰ „Адалеске со иси амен акала ветувања, ме мангле, те чистина секова мелалипе таро амаро тело хем духо, те ова са побутер света ки дар е Девлестар“ (2. Коринќаните 7:1). О Јехова мангела те ослободина амен таро нечиста навике те шај те на керен штета ки амари годи хем ко амаро тело.

²¹ Јекх бут бари причина соске „те чистина секова мелалипе“ амендар пишинела ко 2. Коринќаните 6:17, 18. О Јехова вакерела аменге: „Повише ма пипинен ништо сој мелало“. Ов ветинела: „Ме ка приминав тумен. Хем ме ка овав тумаро дад, а тумен ка овен ме чхаве хем ме чхаја“. Оја, о Јехова ка мангел амен сар јекх дад со мангела пле чхавен ако избегинаја са со ка керел амен нечиста англи лесте.

22-25. Кола библиска начелија ка поможинен аменге те цида амен таро лошна навике?

 ²² „Манг е Јехова, тле Девле, са тле вилеа, са тле душаја хем са тле гоѓаја“ (Матеј 22:37). Акаја тани и најважно заповед таро са о јавера (Матеј 22:38). О Јехова заслужинела те манга ле аѓаар. Нашти те овел амен асавко мангипе спрема о Девел ако кераја нешто со ка кратинел амаро живото или ка керел штета амаре гоѓаке. Наместо адава, амен кераја са те шај те сикава кај ценинаја о живото со денѓа амен.

²³ „[О Јехова] дела сариненге живото, дишибе хем са“ (Дела 17:24, 25). Ако то амал денѓа тут јекх посебно поклон, дали ка фрде ле или дали ка уништине ле? О живото тано јекх бут шужо поклон таро Јехова хем амен бут ценинаја акава поклон. Адалеске мангаја те користина амаро живото те шај те славина ле (Псалм 36:9).

²⁴ „Манг тле пашутне сар коркори тут“ (Матеј 22:39). О штетна навике на керена штета само аменге. Ола исто аѓаар шај те овен штетна околенге сој тане околу аменде, обично адала тане о мануша со највише мангаја лен. На пример, јекх мануш со живинела ко исто кхер некасаја со пушинела шај те овел ле сериозна проблемија састипаја само адалеске со дишинела о чуро. Ама кеда чхинаваја акале лошна навикенцар сикаваја е јаверенге кај мангаја лен (1. Јованово 4:20, 21).

²⁵ „Сетинкер лен те овен послушна е властенге хем околенге со иси лен авторитети“ (Тит 3:1). Ко бут пхувја иси законија коте тано забранимо те овел некас дрога или те користинел ла. Адалеске со о Јехова дела амен заповед те шуна е властен, амен сием послушна ко адала законија (Римјаните 13:1).

26. а) Со ваљани те кера ако мангаја те ова е Јеховаскере амала? б) Соске даја амендар са те ачхова чиста?

 ²⁶ Ако мангаја те ова е Јеховаскере амала, шај ка дикха кај ваљани те кера несаве промене. Ако тано аѓаар, ваљани те почмина одма. Нане секогаш локхо те чхинава несави нечисто навика, ама шај те кера адава! О Јехова ветинела кај ка поможинел аменге. Ов вакерела: „Ме, о Јехова, сиум тло Девел, кова со сикавела тут башо тло шукарипе, окова со водинела тут ко друмо колесте со ваљани те џа“ (Исаија 48:17). Кеда даја амендар са те ачхова чиста, тегани шај те ова сигурна кај адава анела фалба амаре Девлеске.