Е Девлескере законија темелинена пе ко лескере начелија. Акала начелија тане основна чачипа со аракхљона ки Библија. Ола поможинена аменге те хаљова со мислинела о Девел хем со осетинела башо несаве буќа. О начелија поможинена аменге те ана шукар одлуке ко живото хем те кера адава сој исправно. Ола посебно поможинена аменге ко ситуацие кеда нане конкретна законија башо адава.

▸ Поглавје 1, пасус 8

Те ова послушна е Јеховаске значинела те ова спремна те кера адава со вакерела аменге ов. О Јехова мангела те ова леске послушна адалеске со мангаја ле (1. Јованово 5:3). Ако мангаја е Девле хем иси амен доверба ки лесте, ка шуна лескере упатствија ко са о ситуацие. Ка ова леске послушна чак кеда нане те овел аменге локхо. Ка овел аменге шукар ако сием послушна е Јеховаске, соске ов сикавела амен сар те водина шукар живото акана хем ветинела аменге кај ка уживина ко бут берекетија ки иднина (Исаија 48:17).

▸ Поглавје 1, пасус 10

О Јехова денѓа секоле манушеске слободно волја, или способност те анел одлуке. Ов на керѓа амен те ова сар роботија (5. Мојсеева 30:19; Исус Навин 24:15). Шај те користина амари слобода те ана шукар одлуке. Ама ако на пазинаја, шај те ана одлуке со нане мудра. Адава со иси амен слободно волја значинела кај амен мора коркори те одлучина дали ка ова верна е Јеховаске хем те докажина кај чаче мангаја ле.

▸ Поглавје 1, пасус 12

О Јехова денѓа морална мерилија, или упатствија сар те понашина амен хем сар те постапина. Тари Библија амен сикљоваја кола тане адала мерилија хем сар шај те поможинен аменге те овел амен шукар живото  (Изреки 6:16-19; 1. Коринќаните 6:9-11). Акала упатствија поможинена аменге те џана сој тано англо Девел исправно, а сој погрешно. Ола исто аѓаар поможинена аменге те џана сар те сикава мангипе, сар те ана шукар одлуке хем сар те ова љубезна е јаверенцар. Иако о морална мерилија ко свето џана са потеле, е Јеховаскере мерилија на менинена пе (5. Мојсеева 32:4-6; Малахија 3:6). Ако џаја пали ленде ка ова заштитиме таро бут физичка хем емоционална дукха.

▸ Поглавје 1, пасус 17

И совест тани чувство со иси амен андре ки аменде башо адава сој тано исправно, а сој погрешно. О Јехова денѓа совест секоле јекхеске амендар (Римјаните 2:14, 15). Те шај амари совест те функциониринел исправно, амен мора те школујна ла спрема е Јеховаскере морална мерилија. Тегани амари совест ка поможинел аменге те ана одлуке со ка угодинен е Јеховаске (1. Петрово 3:16). Ој шај те предупрединел амен англедер те кера нешто неразумно, или шај те керел те осетина бари дукх откеда керѓем нешто погрешно. Амари совест шај нане више те функциониринел исправно, ама о Јехова шај те поможинел аменге те менина адава. И чисто совест анела аменге андруно мир хем керела те осетина амен шукар.

▸ Поглавје 2, пасус 3

Те овел амен дар таро Девел значинела те манга ле хем те поштујна ле добором бут со нане те кера нешто со ка разочаринел ле. И дар таро Девел ка поможинел аменге те кера адава сој тано шукар а те избегина те кера адава сој лошно (Псалм 111:10). Адава поттикнинела амен шукар те шуна са со вакерела аменге о Јехова. Исто аѓаар, поможинела аменге те икера амен ко са со ветинѓем леске адалеске со хор поштујнаја ле. И дар таро Девел влијајнела ко начин сар размислинаја, сар понашинаја амен е јаверенцар хем саве одлуке анаја секова диве.

▸ Поглавје 2, пасус 9

Те каинел пе некој значинела те овел леске бут жал адалеске со керѓа нешто погрешно. Окола со мангена е Девле бут ленге жал кеда хаљовена кај керѓе нешто сој тано против лескере мерилија. Ако кераја нешто погрешно, ваљани те молина е Јехова те простинел аменге преку е Исусескири откупно жртва (Матеј 26:28; 1. Јованово 2:1, 2). Ако искрено каинаја амен хем чхинаваја те кера лошна буќа, шај те овел амен доверба кај о Јехова ка простинел аменге. На ваљани више те осетина амен крива башо адава со керѓем поангле (Псалм 103:10-14; 1. Јованово 1:9; 3:19-22). Амен мора бут те трудина амен те сикљова таро амаре грешке, те менина амаро погрешно размислибе хем те живина спрема е Јеховаскере мерилија.

▸ Поглавје 2, пасус 18

Кеда некој со сериозно грешинѓа на каинела пе хем одбинела те икерел е Јеховаскере мерилија, нашти више те овел е Јеховаскоро сведоко. Ов ваљани те овел исклучимо. Кеда некој тано исклучимо, нане амен ништо више леа хем чхинаваја те кера леа лафи (1. Коринќаните 5:11; 2. Јованово 9-11). Е исклучибаја икерела пе чисто е Јеховаскоро анав хем о собрание (1. Коринќаните 5:6). О исклучибе исто аѓаар тано укор со поможинела некаске те каинел пе те шај те иранел пе ко Јехова (Лука 15:17).

▸ Поглавје 3, пасус 19

О Јехова мангела амен хем мангела те поможинел аменге. Адалеске дела амен водство, упатство хем совет преку и Библија хем преку о мануша со мангена е Девле. Сар несовршена мануша, аменге бут ваљани асавки помош (Еремија 17:9). Кеда поштујнаја хем шунаја адален со о Јехова користинела те водинел амен, сикаваја кај поштујнаја ле хем кај мангаја те ова леске послушна (Евреите 13:7).

▸ Поглавје 4, пасус 2

Адалеске со сием несовршена, полокхо тано те ова себична хем горда. Ама о Јехова очекујнела амендар те ова понизна. Бут пути, почминаја те сикљова те ова понизна кеда спорединаја амен е Јеховаја хем тегани хаљоваја кобор уствари сием тикне (Јов 38:1-4). Јавер начин сар сикаваја понизност тано те сикљова те мислина повише башо јавера хем сој тано пошукар ленге а на аменге. И гордост почесто керела о мануш те мислинел песке кај тано пошукар е јаверендар. Јекх понизно мануш дикхела ки песте искрено хем свесно тано башо пле јака хем слаба стране. На дарала те признајнел пле грешке, те извининел пе хем те прифатинел предлогија хем совет. О понизно мануш иси ле доверба ко Јехова хем џала пало лескоро водство (1. Петрово 5:5).

▸ Поглавје 4, пасус 4

Адален со иси лен авторитети иси лен право те вакерен со те керел пе хем те анен одлуке. Е Јехова иси ле најбаро авторитети ко небо хем ки Пхув. Адалеске со створинѓа са, ле иси ле и најбари моќ ко универзум. Ов секогаш користинела пло авторитети ки корист е јаверенге. О Јехова денѓа несаве манушенге и одговорност те грижинен пе аменге. На пример, о родителија, о старешине ко собрание хем о властија иси лен несаво авторитети, хем о Јехова мангела те соработина ленцар (Римјаните 13:1-5; 1. Тимотеј 5:17). Кеда о манушикане законија тане против е Девлескере законија, амен сием послушна е Девлеске, а на е манушенге (Дела 5:29). Кеда прифатинаја о авторитети околенгоро со о Јехова користинела лен, амен сикаваја е Јеховаске кај поштујнаја лескере одлуке.

▸ Поглавје 4, пасус 7

О Јехова користинела е старешинен, кола тане искусна пхраља, те грижинен пе башо собрание (5. Мојсеева 1:13; Дела 20:28). Акала мурша поможинена аменге те ова попаше е Јеховаја хем те обожавина ле ко мирно хем организиримо начин (1. Коринќаните 14:33, 40). Те шај о старешине те овен именујме таро свети дух, мора те исполнинен о условија  сој тане денде ки Библија (1. Тимотеј 3:1-7; Тит 1:5-9; 1. Петрово 5:2, 3). Амен иси амен доверба ки е Девлескири организација хем поддржинаја ла, адалеске сием бахтале кеда соработинаја е старешиненцар (Псалм 138:6; Евреите 13:17).

▸ Поглавје 4, пасус 8

О Јехова денѓа е родителенге и одговорност те грижинен пе пумаре чхавенге хем са со ваљани е кхереске. Ама, и Библија вакерела кај о ром тано о поглавари ки фамилија. Ако нане дад ко кхер, тегани и дај тани о поглавари. О поглавари ки фамилија ваљани те грижинел пе хајбаске, урајбаске хем башо тхан живибаске. Бут тано важно ов те предводинел ко адава те поможинел пле фамилијаке те служинен е Јеховаске. Сар на пример, ов грижинела пе редовно те џан ко состанокија, ки служба хем заедно те проучинен и Библија. О поглавари ки фамилија исто аѓаар иси ле одговорност те анел одлуке. Ов секогаш трудинела пе те џал пало е Исусескоро пример, аѓаар со ка овел љубезно хем разумно, хем никогаш нане те понашинел пе грубо или оштро. Акава ка поможинел ки фамилија те овел јекх шукар атмосфера, аѓаар со сарине ка осетинен пе сигурна хем ка овен попаше е Јеховаја.

▸ Поглавје 4, пасус 12

О Водечко тело тани група мурша со иси лен небесно надеж. О Девел користинела лен те водинен о активностија лескере народоскере. Ко прво веко, о Јехова користинѓа о Водечко тело те водинел о христијанско собрание ко ленгоро обожавање хем ко проповедибе (Дела 15:2). Авдиве, и група таро пхраља со служинена сар Водечко тело водинена е Девлескере народо, дена упатствија хем поможинена ленге те ачховен паше узо Јехова. Акала пхраља кеда анена одлуке, ола слединена о водство таро е Девлескоро Лафи хем лескоро свети дух. О Исус вакерѓа кај акаја група таро помазиме мурша тани о „верно хем разборито робо“ (Матеј 24:45-47).

▸ Поглавје 4, пасус 15

Понекогаш јекх пхен шај те овел замолими те керел нешто ко собрание со обично ваљани те керел јекх пхрал. Кеда керела адаја задача, ој сикавела кај поштујнела о поглаварство со денѓа ле о Јехова адалеа со ка учхарел пло шеро. Јавер ситуација кеда јекх пхен ваљани те учхарел пло шеро тани кеда водинела библиско курси, а адатхе тано присутно лакоро ром или јекх крстимо пхрал (1. Коринќаните 11:11-15).

▸ Поглавје 4, пасус 17

Адалеске со сием неутрална, на мешинаја амен ки политика (Јован 17:16). Е Јеховаскоро народо поддржинела лескоро царство. Амен на мешинаја амен ко буќа акале светоскере, исто сар о Исус.

О Јехова заповединѓа аменге те ова подложна е властенге (Тит 3:1, 2; Римјаните 13:1-7). Ама е Девлескоро закони вакерела кај на ваљани те мудара. Адалеске и совест јекхе христијанескири нане те дозволинел леске те џал ки војна. Ако шај те керел цивилно служба наместо те џал ки војска, ов мора те размислинел дали лескири совест дозволинела леске те керел адава.

Амен служинаја само е Јеховаске соске ов тано амаро Створители. Иако поштујнаја о државна симболија, амен нане те поздравина о знаме или те гиљава и химна (Исаија 43:11; Даниел 3:1-30; 1. Коринќаните 10:14). Исто аѓаар, адала со служинена е Јеховаске анена лично одлука те на гласинен баши нисави политичко партија или кандидати. Адава тано аѓаар, соске амен више одлучинѓем о Девел те владинел аменцар (Матеј 22:21; Јован 15:19; 18:36).

▸ Поглавје 5, пасус 2

О свето ширинела е Сатанаскоро размислибе. Асавко начин размислибаске тано нормално машкар о мануша со на мангена е Јехова, со на џана пало лескоро пример хем со на икерена пе ко лескере мерилија (1. Јованово 5:19). Акава начин сар о мануша размислинена хем сар постапинена тано опишимо сар о духо е светоскоро (Ефешаните 2:2). Е Јеховаскоро  народо трудинела пе упро лесте те на влијајнел акава духо (Ефешаните 6:10-18). Наместо адава, амен мангаја о начин сар о Јехова размислинела хем сар постапинела, хем трудинаја амен те икера амен ко адава.

▸ Поглавје 5, пасус 7

О отпадникија тане мануша кола со мукле е Јехова хем противинена пе е чачипаске тари Библија. Ола бунинена пе против о Јехова хем о Исус, кова тано Цари ко е Девлескоро Царство. Исто аѓаар трудинена пе те влијајнен упро јавера те придружинен пе ленге (Римјаните 1:25). Ола мангена те керен окола со служинена е Јеховаске те сумнинен пе ко чачипе. Ко собрание таро прво веко, несаве мануша уле отпадникија, а асавке иси авдиве да (2. Солуњаните 2:3). Окола сој тане верна е Јеховаске на мангена те овел лен ништо е отпадниконцар. Никогаш на ваљани те дозволина тари радозналост или таро јаверенгоро влијание те читина или те шуна отпадничка идее. Амен сием верна е Јеховаске хем служинаја само леске.

▸ Поглавје 5, пасус 9

Џикоте о Израелција сине тело е Мојсеескоро закони, ола ваљани сине те ден ко храми сар жртве гив, зејтини хем животне те шај о Јехова те простинел ленгере гревија. Ко акава начин, о Израелција сетинена пе сине кај о Јехова сине спремно те простинел ленгере лична гревија хем е цело нацијакере. Покасно, откеда о Исус денѓа пло живото те учхарел амаре гревија, акала жртве на сине више потребна. О Исус денѓа и совршено жртва „јекх пути хем засекогаш“ (Евреите 10:1, 4, 10).

▸ Поглавје 7, пасус 6

Спрема е Мојсеескоро закони дозволимо сине е манушенге те хан мас таро животне. Исто аѓаар, сине ленге заповедимо те ден животне сар  жртве (3. Мојсеева 1:5, 6). Ама о Јехова никогаш на дозволинѓа пле народоске те понашинен пе грубо е животненцар (Изреки 12:10). Уствари, ко Закони сине правилија сар те заштитинен пе о животне. Е Израелцонге сине заповедимо шукар те грижинен пе пле животненге (5. Мојсеева 22:6, 7).

▸ Поглавје 7, пасус 6

Ратескере фракцие. О штар главна состојке е ратескере тане о лоле клетке, парне клетке, плочке хем плазма. Таро акала штар главна состојке шај те икален пе потикне состојке кола со викинена пе ратескере фракцие. *

О христијања на приминена трансфузија таро цело рат или тари нијекх главно состојка. Ама дали ваљани те прифатинен е ратескере фракцие? Ки Библија нане денде конкретна деталија. Адалеске секова христијани мора коркори те анел одлука спрема пли библиско школујми совест.

Несаве христијања одбинена са о фракцие, соске спрема е Девлескоро закони со сине дендо е Израелцонге родела пе сине о рат е животненгоро те тхавдел ки пхув (5. Мојсеева 12:22-24).

Јаверенгири совест дозволинела те прифатинен несаве фракцие. Ола мислинена кај адала тикне фракцие више на претставинена о живото адалескоро кастар сој лендо о рат.

Кеда ваљани те ане одлука башо е ратескере фракцие, размислин башо акала пучиба:

• Дали сиум свесно кај адава со одбинава са о фракцие ка значинел кај на прифатинава иљачија кола со користинена пе против несаво насвалипе, или кола со поможинена те чхинавел пе о крварибе?

• Дали шај те објаснинав е докторенге соске одбинава или прифатинава несаве ратескере фракцие?

 Медицинска постапке. Амен сар христијања, на даја рат хем на складиринаја амаро рат баши трансфузија некобор курке англедер несави операција. Ама иси јавера медицинска постапке коте со користинела пе о рат е пациентескоро. Секој коркори мора те одлучинел сар ка користинел пе лескоро рат џикоте трајнела и операција или несави терапија или несаво медицинско испитување. Џикоте трајнела несави медицинско постапка, о рат е пациентескоро шај несаво време те овел целосно одвојмо лестар. (Повише информацие баши акаја тема шај те дикхе ки Стражарска кула таро 15 октомври 2000, стране 30-31.)

На пример, јекх медицинско постапка викинела пе хемодилуција. Ки акаја постапка кратко англедер те почминел и операција, лела пе несави количина рат таро пациенти хем заменинела пе волуменско експандереа. Покасно, џикоте трајнела и операција или кратко пали лате, о рат палем иранела пе ко пациенти.

Јавер медицинско постапка тани кхедибе о клетке. Ки акаја постапка, о рат со нашавела о пациенти џикоте трајнела и операција кхедела пе, чистинела пе хем пало адава палем иранела пе ко пациенти џикоте трајнела и операција или кратко пали операција.

 Секова доктори користинела акала постапке ко различно начин. Адалеске англедер те прифатине несави операција, медицинско испитување или терапија ваљани те дознајне сар точно ка користинел пе тло рат.

Кеда ваљани те ане одлуке башо медицинска постапке коте со ка користинел пе тло рат, размислин башо акала пучиба:

• Ако дело таро мо рат тано пренасочимо авријал таро мо тело хем и циркулација ме ратескири шај чак те овел чхинавди несаво време, дали ми совест ка дозволинел манге панда те дикхав ко акава рат сар дело мандар, хем кај тегани на ваљани „те тхавдел ки пхув“? (5. Мојсеева 12:23, 24).

• Дали ми библиско школујми совест ка мучинел ман ако џикоте трајнела несави медицинско постапка икалела пе мандар дело таро рат, прочистинела пе, хем палем иранела пе ко мо тело?

• Дали сиум свесно кај ако одбинава са о медицинска постапке коте сој вклучимо мо рат значинела кај ка одбинав те керел пе манге крвно слика, кај на прифатинава дијализа или кај на прифатинава те користинен пе машине башо срце или плуќа?

Англедер те ана одлука башо е ратескере фракцие или медицинска постапке коте со користинела пе амаро рат, ваљани те молина е Јехова те водинел амен хем те истражина нешто повише баши адаја тема (Јаков 1:5, 6). Пало адава мора те користина амари библиско школујми совест те шај те ана лично одлука. На ваљани те пуча е јаверен со би керена  сине ола те овен сине ко амаро тхан. А ни о јавера на ваљани те пробинен те влијајнен ко амаре одлуке (Римјаните 14:12; Галатите 6:5).

▸ Поглавје 7, пасус 11

Те ова морално чиста значинела кај амаре постапке хем понашибе тане чиста англо е Девлескере јакхја. И морално чистота вклучинела адава со мислинаја, со вакераја хем со кераја. О Јехова заповединела аменге те цида амен тари секоја сексуално нечистотија хем неморал (Изреки 1:10; 3:1). Мора те одлучина те икера е Јеховаскере мерилија англедер те ава ки ситуација со шај те искушинел амен те кера нешто погрешно. Ваљани те молина е Јехова стално те поможинел амен те икера амаре мисле чиста, хем мора те ова одлучна те наша таро искушенија со шај те ингарен амен ко неморал (1. Коринќаните 6:9, 10, 18; Ефешаните 5:5).

▸ Поглавје 8, пасус 11

О безобразно понашибе вклучинела те керел пе лафи или те постапинел пе ко начин со сериозно противинела пе ко е Девлескере мерилија хем сикавела пе билаџутно стави. Јекх мануш кова со сикавела асавко стави на поштујнела е Девлескере законија. Ако иси доказија кај некас иси безобразно понашибе, тегани формиринела пе правно одбор со ка решинел адава. Ко мелалипе тане вклучиме различна погрешна постапке. Зависинела таро адава кобор тани сериозно и ситуација, башо несаве буќа коте сој вклучимо о мелалипе, шај те формиринел пе правно одбор ко собрание. (Галатите 5:19-21; Ефешаните 4:19; башо повише информацие, дикх ко „Пучиба таро читателија“ ки Стражарско кула таро 15 јули 2006. Акава број нане ко романе.)

▸ Поглавје 9, пасус 7; Поглавје 12, пасус 10

О Јехова денѓа о сексуална односија те шај о ром хем и ромни те сикавен машкар песте мангипе ко јекх чисто начин. Ама, ако некој, бизи  разлика мурш или џувли мастурбиринела, или користинела ко погрешно начин пле полова органија те шај коркори те задоволинел пе, ов или ој користинела о секс ко нечисто начин. Акаја навика шај те руминел некаскоро однос е Јеховаја. Адава шај те керел те појавинен пе румиме желбе хем те керел о мануш те дикхел ко секс ко погрешно начин (Колошаните 3:5). Ако некаске тано пхаро те чхинавел асавке навикаја, ваљани понадари да те боринел пе хем ма те обесхрабринел пе (Псалм 86:5; 1. Јованово 3:20). Ако ту сиан ки асавки ситуација, таро вило молин е Јехова те поможинел туке. Избегин буќа сар сој и порнографија, кола со шај те керен туке нечиста мисле. Кер лафи некасаја со поштујнела е Јеховаскере законија, адава шај те овел јекх таро тле родителија или јекх зрело амал (Изреки 1:8, 9; 1. Солуњаните 5:14; Тит 2:3-5). Шај те ове сигурно кај о Јехова дикхела хем ценинела тло трудо те ачхове морално чисто (Псалм 51:17; Исаија 1:18).

▸ Поглавје 9, пасус 9

Кеда некас иси ле повише таро јекх брачно партнери адава викинела пе полигамија. О Јехова керѓа о брако те овел машкар јекх ром хем јекх ромни. Ко пурано Израел, о Девел дозволинѓа е муршенге те овел лен повише ромња, ама ко почеток адава на сине лескири намера. Авдиве о Јехова на дозволинела полигамија машкар пло народо. Јекх ром шај те овел ле само јекх ромни, хем јекх ромни шај те овел ла само јекх ром (Матеј 19:9; 1. Тимотеј 3:2).

▸ Поглавје 10, пасус 12

Е Јеховаскири намера сине о ром хем и ромни те ачховен заедно цело пло живото (1. Мојсеева 2:24; Малахија 2:15, 16; Матеј 19:3-6; 1. Коринќаните 7:39). Ов дозволинела развод само ако јекх таро партнерија керела прељуба. Ко асавко случај, о Јехова дела право е брачно партнереске со нане криво те одлучинел дали ка развединел пе или на (Матеј 19:9).

Понекогаш, несаве христијања одлучинѓе те одвојнен пе таро пло брачно партнери иако на керѓа прељуба (1. Коринќаните 7:11). Јекх христијани шај те одвојнел пе таро пло брачно партнери ко акала ситуацие:

•   Намерно на грижинела пе: Ако јекх ром на мангела те грижинел пе пле фамилијаке ко материјално поглед џи ко адава степен со нане те овел лен паре башо основна потребе, сар на пример хајбаске (1. Тимотеј 5:8).

• Баро физичко малтретирибе: О брачно партнери тано добором насилно со анела ки опасност лакоро или лескоро састипе или живото (Галатите 5:19-21).

• О однос е Јеховаја тано ки бари опасност: Ако о ром или и ромни целосно спречинела пле брачно партнере те служинел е Јеховаске (Дела 5:29).

▸ Поглавје 11, пасус 19

Сариненге ваљани пофалба хем охрабрување (Изреки 12:25; 16:24). Шај те утешина амен хем те кера амен позорале амаре љубезна лафенцар кола сој пхерде мангипе. Асавке лафија шај те поможинен амаре пхраленге хем пхењенге те издржинен хем понадари те служинен е Јеховаске иако иси лен муке хем пхарипа (Изреки 12:18; Филипјаните 2:1-4). Ако некој осетинела пе бут обесхрабримо, амен мора шукар те шуна ле хем те трудина амен те хаљова сар осетинела пе. Адава ка поможинел аменге те џана со те вакера или со те кера те шај те поможина леске (Јаков 1:19). Те овел амен цел те џана пошукар амаре пхрален хем пхењен те шај те хаљова со чаче ваљани ленге. Тегани ту шај те поможине ленге те роден е Девле со дела утеха хем охрабрување, коте со шај те овен чаче освежиме (2. Коринќаните 1:3, 4; 1. Солуњаните 5:11).

▸ Поглавје 12, пасус 16

Ки Библија нане денде посебна правилија башо бијава. О обичаија хем о законија разликујнена пе тари пхув ки пхув (1. Мојсеева 24:67; Матеј 1:24; 25:10; Лука 14:8). О најважно дело таро бијав тано кеда о брачно пари дела завет англо Јехова. Бут брачна парија одлучинена ленгири фамилија хем о паше амале те овен присутна ки ленгири регистрација кеда дена песке завет. Исто аѓаар ола шај те одлучинен јекх старешина  те икерел ленге библиско говор. О пари одлучинела дали пало акава ка овел бијав хем саво ка овел о бијав (Лука 14:28; Јован 2:1-11). Бизи разлика со ка одлучинел о пари, ола ваљани те овен сигурна кај адава ка анел слава е Јеховаске (1. Мојсеева 2:18-24; Матеј 19:5, 6). О библиска начелија ка поможинен ленге те анен шукар одлуке (1. Јованово 2:16, 17). Ако ола одлучинѓе те ден алкохол ко бијав, ваљани те овен сигурна кај о бијав ка овел шукар надгледимо (Изреки 20:1; Ефешаните 5:18). Ваљани те овен сигурна кај и музика хем са адава со ка керел пе ко бијав ка анел слава е Јеховаске. Јекхе христијанско пареске на ваљани те овел најважно о бијав, него те овел лен шукар однос е Јеховаја хем ленгоро брако те овел успешно. (Изреки 18:22; башо повише предлогија дикх ки Стражарска кула таро 15 октомври 2006, ки страна 18-31. Акава број нане ко романе.)

▸ Поглавје 13, пасус 18

Мангаја те ана шукар одлуке кола со темелинена пе ко начелија таро е Девлескоро Лафи. На пример, јекх христијани шај те овел канимо таро пло брачно партнери со нане е Јеховаскоро сведоко те овел заедно е фамилијаја ко ручко или вечера кеда иси несаво празнико. Со ка кере ту ки асавки ситуација? Ако тли совест дозволинела туке те џа, ту шај те објаснине тле брачно партнереске кај ако сине несаве паганска обичаија ки адаја прослава, ту нане те учествујне ко адава. Пуч тут: „Дали ка сопкинав е јаверен адалеа со ка овав присутно адари?“ (1. Коринќаните 8:9; 10:23, 24).

Јекх јавер ситуација тани ако тло шефи дела тут поклон башо празнико. Дали ваљани те одбине о поклон? На секогаш. Дали ка прифатине о поклон или на шај те зависинел таро адава сар тло шефи дикхела ко поклон со ка примине ле. Дали адава поклон тано дело тари несави прослава? Или тано поклон соске адалеа сикавела кај ценинела тут? Ако размислинеа башо акава хем башо јавера буќа, ту ка ваљани те одлучине дали ка прифатине о поклон.

Ки јавер ситуација, шај некој те дел тут поклон башо празникија хем те вакерел туке: „Џанава кај на славинеа о празнико, ама ме мангава те дав тут акава“. Шај адалеа само мангела те овел љубезно туја. Тари јавер страна, шај иси тут чувство кај ов адалеа мангела те испитинел  тли вера хем те теринел тут те славине о празнико. Откеда ка размислине башо акава, ту ваљани те одлучине дали ка прифатине о поклон или на. Ко са амаре одлуке мангаја те овел амен чисто совест хем те ачхова верна е Јеховаске (Дела 23:1).

▸ Поглавје 13, пасус 22

Ко бут случаија, ако о несогласувања решинена пе сигате хем ко мирно начин, ола нане те бајрон ко побаро проблеми (Матеј 5:23-26). Са е христијаненге, најважно ваљани те овел те анел пе фалба е Јеховаске хем те икерел пе о собрание ко јекхипе (Јован 13:34, 35; 1. Коринќаните 13:4, 5).

Ако машкар о христијања иси несаво несогласување башо бизнис, ола ваљани те пробинен те решинен адава машкар песте бизо те џан ко судо. Ко 1. Коринќаните 6:1-8 о Павле пишинѓа башо судска спорија машкар о христијања. Ако несаве пхраља тужинена пе ко судо адава анела лаџ е Јеховаске хем е собраниеске. Ко Матеј 18:15-17 денде тане трин чекорија коленде со о христијања ваљани те икерен пе кеда иси лен сериозна проблемија, сар сој клеветибе или финансиско измама. 1) Ола ваљани прво те трудинен пе те решинен о проблеми коркори машкар песте. 2) Ако нашти, шај те пучен те овен присутна јекх или дуј зрела џене таро собрание те шај те поможинен. 3) Пало адава, ако иси потреба, о случај шај те вакерел пе е старешиненге. Ако и ситуација ресља џи ки акаја точка, о старешине ка користинен о библиска начелија те поможинен сариненге сој вклучиме ко акава случај те решинел пе о проблеми ко мирно начин. Ако некој лендар сој вклучимо ко акава проблеми на мангела те икерел пе ко библиска начелија, шај ка ваљани о старешине те формиринен правно одбор.

Ко несаве ситуацие о случај шај чаче ка ваљани те дел пе ко судо, сар на пример, те добинел пе развод, те добинел пе старателство башо чхаве, алиментација, отштета тари несави осигурително компанија, те керел пе стечајно постапка, хем те читинел пе тестаменти. Ако јекх христијани користинела акава законско право те шај ко мирно начин те решинел о случај, тегани на пхагела е Павлескоро совет.

 Ако тано кердо несаво сериозно криминал, сар на пример, силујбе, те злоупотребинен пе чхаве, те нападинел пе некас, баро чорибе или мударибе, тегани јекх христијани со пријавинела адава ко властија на пхагела е Павлескоро совет.

▸ Поглавје 14, пасус 14

Панда таро почеток ки Еденско градина, о Сатана пробинѓа те ховавел е манушен (1. Мојсеева 3:1-6; Откровение 12:9). Ов џанела кај ако руминела амаро размислибе, тегани ка шај те влијајнел ки аменде те кера нешто погрешно (2. Коринќаните 4:4; Јаков 1:14, 15). Ов преку и политика, религија, трговија, забава, образование хем бут јавера буќа ширинела пло размислибе, хем керела адава те овел прифатливо (Јован 14:30; 1. Јованово 5:19).

О Сатана џанела кај нане ле бут време те ховавел е манушен. Адалеске керела са те ховавел кобор со шај повише манушен. Посебно мангела те ховавел околен со служинена е Јеховаске (Откровение 12:12). Ако на пазинаја, о Бенг шај хари похари те руминел амаро размислибе (1. Коринќаните 10:12). На пример, о Јехова мангела о брако те овел трајно (Матеј 19:5, 6, 9). Ама бут мануша авдиве ко брако дикхена сар нешто привремено со шај локхесте те руминел пе. Бут филмија хем телевизиска емисие ширинена адаја идеја. Амен мора те пазина асавко стави те на влијајнел упри аменде.

Јавер начин сар о Сатана пробинела те ховавел амен тано аѓаар со ширинела о стави те овел пе независно (2. Тимотеј 3:4). Ако на пазинаја, шај те на поштујна о авторитети околенгоро кас со биринѓа о Јехова. На пример, јекх пхрал шај те почминел те на прифатинел о водство таро старешине ко собрание (Евреите 12:5). Или јекх пхен шај те почминел те пучел пе дали о начело башо поглаварство ки фамилија со поставинѓа о Јехова тано чаче мудро (1. Коринќаните 11:3).

Мора те ова одлучна те на дозволина е Бенгеске те влијајнел ко амаро размислибе. Наместо адава, мангаја те размислина сар о Јехова хем те „мислина башо адава сој ко небо“ (Колошаните 3:2; 2. Коринќаните 2:11).

▸ Поглавје 16, пасус 9

Сарине мангаја те ова састе, адалеске кеда сием насвале даја амендар са те шај те сасљова ко најшукар начин (Исаија 38:21; Марко 5:25, 26; Лука 10:34). Авдиве иси бут медицинска технике хем третманија со нудинена о докторија хем јавера. Кеда одлучинаја саво третмани ка прифатина, бут тано важно те икера амен ко библиска начелија. На бистраја кај само е Девлескоро Царство ка сасљарел амен трајно. На мангаја те ова добором преокупириме амаре састипаја со ка бистра амаро обожавање (Исаија 33:24; 1. Тимотеј 4:16).

Амен мора те одбина секова третмани коте со јасно дикхела пе кај тано поврзимо е демоненцар (5. Мојсеева 18:10-12; Исаија 1:13). Адалеске англедер те прифатина несаво третмани или иљачи ваљани те испитина котар авела адава третмани хем дали тано поврзимо е демоненцар (Изреки 14:15). Те на бистра кај о Сатана мангела те ховавел амен хем те чхивел амен те кера буќа коте со иси демонизам. Ако сумнинаја амен кај несаво третмани тано поврзимо акалеа, најшукар тано те одбина ле (1. Петрово 5:8).

▸ Поглавје 16, пасус 18