1. Башо со сине секиримо о Исус и рат англедер те мерел?

 И РАТ англедер те мерел, о Исус сине секиримо башо адава со ка овел ки иднина лескере учениконцар соске џанља кај панда хари нане те овел ленцар. Ов вакерѓа ленге: „На сиен дело таро свето“ (Јован 15:19). Покасно, ов молинѓа пе пле Дадеске хем вакерѓа баши ленде: „Ола нане дело таро свето, сар ме со на сиум дело таро свето“ (Јован 17:15, 16). Со мислинѓа о Исус адалеа?

2. Сој тано о „свето“ башо кова со керѓа лафи о Исус?

² Акате е лафеа „свето“ мислинела пе ко мануша со на пенџарена е Девле хем касаја со владинела о Сатана (Јован 14:30; Ефешаните 2:2; Јаков 4:4; 1. Јованово 5:19). Сар шај те на ова „дело таро свето“? Ко акава поглавје, ка дикха некобор начинија: 1) те ова верна башо е Девлескоро Царство хем те ова неутрална ки политика, 2) те спротивставина амен е духоске таро акава свето, 3) те ова скромна ко урајбе хем дотерибе, 4) те овел амен урамнотежено стави спрема о паре хем, 5) те урава цело воено опрема со денѓа амен о Девел. (Дикх и 16 фуснота.)

3. Саво стави сине е Исусе баши политика?

³ Кеда о Исус сине ки Пхув, ов шај сине те дикхел кај е манушен иси лен бут проблемија хем кај на сине ленге  локхо о живото. Ов чаче грижинела пе сине ленге хем мангела сине те поможинел лен. Дали уло политичко водачи? На. Ов џанља кај е манушенгере проблемија шај те решинел лен само е Девлескоро Царство, или е Девлескири влада коте со ваљани сине ов те овел Цари. Е Девлескоро Царство сине и главно тема башо со проповединела сине ов (Даниел 7:13, 14; Лука 4:43; 17:20, 21). О Исус на мешинѓа пе ки политика хем секогаш сине неутрално. Кеда о Исус иклило англо римско управители, о Понтиј Пилат, вакерѓа: „Мло Царство нане дело таро акава свето“ (Јован 18:36). Лескере ученикија исто аѓаар сине неутрална. Ко јекх лил пишинела кај о христијања таро прво веко „на сине ки нисави политичко функција“ (On the Road to Civilization). Авдиве, о чачутне христијања иси лен исто стави. Амен верно поддржинаја е Девлескоро Царство хем сием неутрална ки политика (Матеј 24:14).

4. Сар о чачутне христијања поддржинена е Девлескоро Царство?

⁴ Кеда несаво пратенико, или амбасадори, добинела задача те служинел ки јавер пхув, ов на мешинела пе ки политика тари адаја пхув. О помазаникија, кола со иси лен надеж те владинен е Исусеа ко небо, тане ки слично ситуација. О Павле е помазиме христијаненге пишинѓа: „Амен сием пратеникија со застапинена е Исусе“ (2. Коринќаните 5:20). О помазаникија тане претставникија тари е Девлескири влада. Ола на мешинена пе ко политичка буќа акале светоскере (Филипјаните 3:20). Наместо адава, о помазаникија поможинѓе буте манушенге те џанен баши е Девлескири влада. О „јавера бакхре“, кола со иси лен надеж вечно те живинен ко е Девлескоро нево свето, поддржинена е помазаникон. Ола да тане неутрална (Јован 10:16;  Матеј 25:31-40). Јасно тано кај нијекх чачутно христијани на ваљани те мешинел пе ки политика акале светоскири. (Читин Исаија 2:2-4.)

5. Која тани јекх причина соске о чачутне христијања на џана ки војна?

⁵ О чачутне христијања дикхена ко пумаре пхраља хем пхења сар пли фамилија хем бизо разлика тари која пхув или култура авена, ола тане ко јекхипе (1. Коринќаните 1:10). Кеда би џаја сине ки војна, тегани би ваљани сине те борина амен против амаре пхраља хем пхења, или амари фамилија, кас со ваљани те манга сар со заповединѓа аменге о Исус (Јован 13:34, 35; 1. Јованово 3:10-12). Освен адава, о Исус заповединѓа пле учениконге те манген чак пумаре душманен (Матеј 5:44; 26:52).

6. Саво стави иси е Девлескере слуген спрема о властија?

 ⁶ Иако сар христијања сием неутрална, трудинаја амен те ова шукар граѓанија. На пример, амен сикаваја кај поштујнаја е властен аѓаар со сием послушна ко ленгере законија хем платинаја данокија. Ама најважно аменге тано те да „е Девлескоро е Девлеске“ (Марко 12:17; Римјаните 13:1-7; 1. Коринќаните 6:19, 20). Адава со ваљани те да е Девлеске тано те манга ле, те ова леске послушна хем те служина леске. Попрво би мераја сине, него те ова непослушна е Јеховаске. (Лука 4:8; 10:27; читин Дела 5:29; Римјаните 14:8.)

7-8. Сој тано „о духо е светоскоро“ хем сар влијајнела упро мануша?

⁷ Те на ова дело таро свето е Сатанаскоро значинела те на дозволина „о духо акале светоскоро“ те водинел амен. „О духо акале светоскоро“ тано о размислибе хем о понашибе со авела таро Сатана, хем влијајнела упро окола со на служинена е Јеховаске. Ама е Девлескере слуге спротивставинена пе акале духоске. Сар со вакерѓа о Павле: „Амен на приминѓем о духо е светоскоро, него о духо сој тано таро Девел“. (1. Коринќаните 2:12; Ефешаните 2:2, 3; дикх и 17 фуснота.)

⁸ О духо е светоскоро керела е манушен себична, горда хем бунтовна. Теринела лен те мислинен кај на ваљани те овен е Девлеске послушна. О Сатана мангела о мануша те керен са со мангена бизо те размислинен башо последице. Ов мангела о мануша те верујнен кај „и желба е телоскири хем и желба е јакхенгири“ тане о најважна буќа ко живото (1. Јованово 2:16; 1. Тимотеј 6:9, 10). О Бенг посебно трудинела пе те ховавел е  Девлескере слуген. Ов мангела те теринел амен те размислина сар лесте (Јован 8:44; Дела 13:10; 1. Јованово 3:8).

9. Сар шај о духо таро свето те влијајнел упри аменде?

⁹ Исто сар о воздух со дишинаја, аѓаар о духо е светоскоро тано сегде околу аменде. Ако на даја амендар са те спротивставина амен акале духоске, ов ка влијајнел упри аменде. (Читин Изреки 4:23.) Асавко влијание ко почеток шај те дикхјол аменге кај нане опасно, на пример, ако дозволинаја упри аменде те влијајнел о размислибе хем о ставија е манушенгере со на служинена е Јеховаске (Изреки 13:20; 1. Коринќаните 15:33). Исто аѓаар, упри аменде шај те влијајнен буќа сар сој порнографија, отпадништво или спортија коте сој тано најважно само те побединел пе. (Дикх и 18 фуснота.)

10. Сар шај те спротивставина амен е духоске таро акава свето?

¹⁰ Со ваљани те кера те на дозволина упри аменде те влијајнел о духо акале светоскоро? Ваљани те ачхова паше е Јеховаја хем те мукха те водинен амен лескере мудра советија. Мора стално те молина ле те дел амен пло свети дух хем те ова зафатиме адалеа со ка служина леске. О Јехова тано и најмоќно личност ко универзум. Увериме сием кај ов шај те поможинел амен те противина амен е духоске таро акава свето (1. Јованово 4:4).

11. Сар о духо акале светоскоро влијајнела упро начин сар о мануша уравена пе?

¹¹ Јавер начин сар сикаваја кај на сием дело таро свето тано адава сар дотеринаја амен хем сар ураваја амен. Бут мануша ко свето уравена пе те шај те привлечинен  внимание, те поттикнинен ки јаверенде неморална мисле, те сикавен бунтовност спрема о општество или те сикавен кобор паре иси лен. А јаверенге палем ни најхари нане важно сар изглединена, дали тане неуредна или мелале. Амен на смејнаја те дозволина асавке ставија те влијајнен ко адава сар дотеринаја амен хем сар ураваја амен.

12-13. Кола начелија шај те поможинен аменге кеда одлучинаја со ка урава?

¹² Сар слуге е Јеховаскере, ваљани секогаш те урава амен шукар хем амаре шеја те овен чиста, уредна хем  соодветна баши прилика. Амен ураваја амен скромно хем разумно, а адалеа сикаваја кај служинаја е Девлеске (1. Тимотеј 2:9, 10; Јуда 21).

¹³ О начин сар ураваја амен влијајнела упро адава саво мислење иси е јаверен башо Јехова хем башо лескоро народо. Амен мангаја те кера „са баши е Девлескири слава“ (1. Коринќаните 10:31). Те овел пе скромно значинела те ла ко предвид о чувствија е јаверенгере хем ленгоро мислење. Адалеске, кеда биринаја со ка урава или сар ка изгледина, на смејнаја те бистра кај амаре одлуке влијајнена упро јавера (1. Коринќаните 4:9; 2. Коринќаните 6:3, 4; 7:1).

14. Башо со ваљани те размислина кеда биринаја со ка урава кеда учествујнаја ко теократска активностија?

¹⁴ Сар ураваја амен кеда џаја ко состанокија или ки служба? Дали привлекујнаја бут внимание упри аменде? Дали ураваја амен аѓаар со е јаверенге тано незгодно? Дали мислинаја кај адава сар ураваја амен тани амари бути хем кај никој на ваљани те мешинел пе аменге ко адава? (Филипјаните 4:5; 1. Петрово 5:6). Нормално тано те манга те изгледина шукар, ама адава со ка керел амен чаче те ова шуже тане амаре христијанска особине. Адала тане о особине со о Јехова дикхела ки аменде. Ола сикавена саве чаче сием андре ко вило, а адава бут врединела англо Девел (1. Петрово 3:3, 4).

15. Соске о Јехова на денѓа амен конкретна правилија башо адава сар ваљани те урава амен хем сар те изгледина?

¹⁵ О Јехова на дела амен списако коте со иси правилија башо адава со ваљани, а со на ваљани те урава. Наместо адава, ов денѓа амен библиска начелија кола со шај те поможинен аменге те ана шукар одлуке (Евреите 5:14). Ов мангела амаре одлукенцар, бизи разлика дали  тане тикне или баре, те сикава кај мангаја ле хем е јаверен. (Читин Марко 12:30, 31.) Е Девлескере слуге ко цело свето уравена пе ко различно начин спрема ленгири култура или спрема адава сар ленге лично свиџинела пе. Асавке разлике керена амаро живото пошужо хем поинтересно.

16. а) Саво погрешно стави иси е свето башо паре? б) Сар шај те џана дали иси амен исправно стави башо паре?

¹⁶ О Сатана мангела о мануша те мислинен кај о паре хем о материјална буќа ка керен лен бахтале. Ама  е Јеховаскере слуге џанена кај адава нане точно. Согласинаја амен е Исусескере лафенцар: „Чак кеда некас иси ле бут, лескоро живото на авела таро адава со иси ле“ (Лука 12:15). О паре нашти те керен амен те ова чаче бахтале. Ленцар нашти те кина аменге чачутне амала, андруно мир, а ни вечно живото. Џанѓола пе, аменге ваљани несаве материјална буќа, а исто аѓаар мангаја те уживина ко живото. Ама о Исус сикавѓа амен кај шај те ова бахтале ако сием паше е Девлеа хем ако ко амаро живото најважно тано те служина леске (Матеј 5:3; 6:22, фуснота). Пуч тут: „Дали влијајнела упри манде о стави башо паре со иси ко акава свето? Дали стално мислинава хем керава лафи само башо паре?“ (Лука 6:45; 21:34-36).

17. Сар ка овел тло живото ако на прифатинеа о стави башо паре со иси е свето?

¹⁷ Ако аменге тано најважно те служина е Јеховаске хем ако на прифатинаја о стави со иси е свето башо паре, тегани ка овел амен смисла ко живото (Матеј 11:29, 30). Ка ова задоволна хем ка овел амен андруно мир (Матеј 6:31, 32; Римјаните 15:13). Нане те ова претерано секириме башо материјална буќа. (Читин 1. Тимотеј 6:9, 10.) Ка осетина амен бахтале кеда даја (Дела 20:35). Ка овел амен повише време околенге со мангаја лен хем пошукар ка сова (Проповедник 5:12).

18. Со мангела о Сатана те керел аменге?

¹⁸ О Сатана мангела те уништинел амаро амалипе е Јеховаја, адалеске мора те кера са со шај те заштитина ле. Амен боринаја амен „против о лошна духија“ (Ефешаните  6:12). О Сатана хем лескере демонија на мангена те ова бахтале или те живина вечно (1. Петрово 5:8). Акала моќна душмања боринена пе против аменде, ама о Јехова шај те поможинел амен те победина!

19. Сар тани опишими е Девлескири „воено опрема“ ко Ефешаните 6:14-18?

¹⁹ Ко пурано време, о војникија сине лен воено опрема те шај те заштитинен пе ки војна. Слично аѓаар, амен да мора те урава и „воено опрема“ со дела амен о Јехова (Ефешаните 6:13). Аѓаар ка ова заштитиме. Акаја воено опрема тани опишими ко Ефешаните 6:14-18: „Адалеске, овен постојана! Пханден тумен ки половина о појас е чачипаскоро, чхивен ко колин и праведност сар оклоп хем уравен ко пре и спремност те проповединен о шукар хабери башо мир. Англедер са, лен о баро штити е веракоро, колеа со ка шај те ачхавен са о јагале стреле е Лошноскере. Исто аѓаар, лен о спасение сар шлеми хем о мачи е духоскоро, а адава тано е Девлескоро лафи, џикоте понадари да молинена тумен преку о духо ки секоја прилика аѓаар со користинена секоја молитва хем секоја молба таро вило“.

20. Со ваљани те кера те шај и духовно „воено опрема“ те поможинел аменге?

²⁰ Ако јекх војнико бистрела јекх дело тари воено опрема хем мукхела несаво дело таро пло тело бизи заштита, тегани о душмани ка нападинел ле баш адатхе. Ако мангаја амари „воено опрема“ те заштитинел амен, на ваљани те бистра нијекх дело латар. Ваљани те пхирава ла стално хем те одржина ла. Амари борба ка продолжинел са џикоте е Сатанаскоро свето нане уништимо хем са џикоте о Сатана хем лескере демонија нане те овел лен нисаво влијание упри Пхув (Откровение  12:17; 20:1-3). Адалеске ако боринаја амен против о погрешна желбе или несаве слабостија, на ваљани те откажина амен! (1. Коринќаните 9:27).

21. Сар шај те победина ки духовно војна?

²¹ Коркори нашти те победина е Бенге. Ама ако поможинела аменге о Јехова, шај! Те шај те ачхова верна, ваљани те молина амен е Јеховаске, те проучина лескоро Лафи хем те ова заедно амаре пхраленцар хем пхењенцар (Евреите 10:24, 25). Акала буќа ка поможинен аменге те ачхова верна е Девлеске хем те ова спремна те бранина амари вера.

22-23. а) Сар шај секогаш те ова спремна те бранина амари вера? б) Со ка дикха ко следно поглавје?

²² Мора секогаш те ова спремна те бранина амари вера (Јован 15:19). Ко одредена буќа, е Јеховаскере сведокија иси лен појавер стави таро бут мануша. Пуч тут: „Дали манге јасно соске иси амен асавко стави баши акаја бути? Дали сиум уверимо кај адава со пишинела ки Библија хем адава со вакерела о верно хем разборито робо тано исправно? (Матеј 24:45; Јован 17:17). Дали сиум гордо со сиум е Јеховаскоро сведоко? (Псалм 34:2; Матеј 10:32, 33). Шај ли те објаснинав е јаверенге ко со верујнава?“ (Читин 1. Петрово 3:15.)

²³ Ко бут ситуацие тано бут јасно со ваљани те кера те шај те ачхова одвојме таро свето. Ама иси ситуацие кеда адава нане добором јасно. О Сатана пробинела ко разна начинија те астарел амен ки замка. Јекх замка со користинела тани и забава. Сар шај мудро те бирина амари забава? Ка дикха ко следно поглавје.