1-2. Со керѓа о Валаам те шај те анел штета е Јеховаскере народоске?

 ЗАМИСЛИН туке сар јекх рибари џала ко јекх тхан коте со џанела кај шај те астарел јекх врста мачхе. Ов биринела јекх мамка хем фрдела и јадица ко пани. Стрпливо аџикерела, хем кеда о мачхо ка астарѓовел ки јадица, ов цидела и трска хем икалела таро пани адава со астарѓа.

² О мануша да ко слично начин шај те овен астарде ки јадица. На пример, о Израелција англедер те кхувен ки Ветими пхув, керѓе песке логори ки моавско рамнина. О цари таро Моав ветинѓа јекхе манушеске со викинела пе Валаам кај ка дел ле бут паре ако денѓа арман е Израелцон. Ко крајо о Валаам аракхља начин сар те керел о Израелција коркори те анен песке арман. Ов шукар биринѓа и мамка. Бичхалѓа терне моавкен те џан ко израелско логори хем те завединен е муршен (4. Мојсеева 22:1-7; 31:15, 16; Откровение 2:14).

3. Сар о Израелција астарѓе пе ки мамка е Валаамескири?

 ³ Дали е Валаамескоро плани успејнѓа? Оја. Бут милје Израелција керѓе „сексуално неморал е моавска џувленцар“. Ола исто аѓаар почминѓе те обожавинен ховавне девлен, сар сој о Ваал таро Фегор, кова со сине девел башо секс. Сар резултати адалестар, 24.000 Израелција муле ки граница англедер те кхувен ки Ветими пхув (4. Мојсеева 25:1-9).

4. Соске бут Израелција керѓе неморал?

⁴ Соске ко бут Израелција успејнѓа е Валаамескоро плани? Ола мислинена сине само башо пле себична желбе, хем бистерѓе са адава со керѓа о Јехова баши ленде. Е Израелцон сине лен бут причине те овен верна е Јеховаске. Ов ослободинѓа лен таро ропство ко Египет, денѓа лен хајбаске џикоте сине ки пустина, хем безбедно анѓа лен џи ки Ветими пхув (Евреите 3:12). Сепак, ола сине заведиме таро сексуално неморал. О апостол Павле пишинѓа: „Те на кера сексуално неморал, сар со несаве лендар керѓе сексуално неморал“ (1. Коринќаните 10:8).

5-6. Со сикљоваја амен таро адава со уло е Израелцонге?

⁵ О нево свето тано бут паше. Ки несави смисла, амен да сием сар о Израелција со сине ки граница англедер те кхувен ки Ветими пхув (1. Коринќаните 10:11). Ко свето коте со живинаја авдиве, о мануша тане опседниме таро секс бут повише него со сине о Моавција. Акава шај локхесте те влијајнел упро е Јеховаскоро народо. Уствари, о сексуално неморал тани и најуспешно мамка со користинела ла о Бенг (4. Мојсеева 25:6, 14; 2. Коринќаните 2:11; Јуда 4).

⁶ Пуч тут: „Дали повише мангава те уживинав ко  несаве себична желбе кола со трајнена кратко време, него те живинав вечно ко бахталипе ко нево свето?“ Врединела те трудине тут те ове послушно ки е Јеховаскири заповед: „Нашен таро сексуално неморал“! (1. Коринќаните 6:18).

7-8. Сој тано о сексуално неморал? Саве тане о последице таро неморал?

⁷ Бут мануша авдиве понашинена пе безобразно хем отворено сикавена кај на поштујнена е Девлескере законија башо секс. Ки Библија, башо израз сексуално неморал мислинела пе ко сексуална односија, орално секс, анално секс, или галибе о полова органија машкар мануша со нане законски ко брако. Ко адава тане вклучиме о сексуална односија машкар о мануша таро исто пол хем сексуална односија машкар о мануша хем о животне. Баши акаја тема шај ка овел лаџаво те кера лафи, ама ваљани јасно те хаљова акава те шај те цида амен таро буќа со мрзинела лен о Девел. (Дикх ки 23 фуснота.)

⁸ И Библија јасно вакерела кај, ако некој керела сексуално неморал хем на каинела пе, мора те овел исклучимо таро собрание (1. Коринќаните 6:9; Откровение 22:15). Кеда некој тано неморално, ов нашавела пло самопоштовање хем е јаверен нане лен доверба ки лесте. О неморал секогаш анела проблемија, сар сој и нечисто совест кхамнипе со нане планиримо, проблемија ко брако, заразна насвалипа, па чак мерибе. (Читин Галатите 6:7, 8.) Ако јекх мануш тано ко искушение те керел неморал, ваљани те терѓол хем шукар те размислинел башо о последице таро адава, тегани ов веројатно  нане те мангел те керел неморал. Ама бут пути о мануша на размислинена башо последице, ола мангена те задоволинен само пумаре желбе. О прво чекори со обично ингарела џи ко неморал тани и порнографија.

9. Соске и порнографија тани опасно?

⁹ И порнографија тани керди те бајрарел амаре сексуална желбе. Авдиве, порнографија иси сегде — ко списанија, лила, музика хем телевизиска емисие, а исто аѓаар ко интернет. Бут мануша мислинена кај и порнографија нане штетно, ама уствари ој тани бут опасно. Ој шај те керел несаво мануш те овел зависно таро секс хем те бајрон ки лесте румиме желбе. Ако некој почминела те дикхел порнографија, адава шај те анел џи ки навика те мастурбиринел, те овен ле проблемија ко брако хем чак те анел џи ко развод. (Римјаните 1:24-27; Ефешаните 4:19; дикх и 24 фуснота.)

10. Сар о начело таро Јаков 1:14, 15 ка поможинел амен те избегина о неморал?

¹⁰ Важно тано те хаљова со шај те анел џи ко неморал. Ко Јаков 1:14, 15 читинаја: „Секова јекх тано искушимо аѓаар со цидела ле хем ховавела ле лескири желба. Кеда и желба овела бут бари, анела џи ко грево, а о грево анела мерибе“. Кеда ка појавинен пе туке погрешна мисле, одма циде лен тари тли годи. Ако случајно појавинена пе туке еротска слике, одма чхинав те дикхе лен! Ачхав о компјутери или менин и програма. Ма дозволин те кхувен погрешна желбе ко тло вило. Ако на кереа адава, тле погрешна желбе шај те овен добором силна со ка овел туке пхаро те контролирине лен. (Читин Матеј 5:29, 30.)

11. Сар ка поможинел аменге о Јехова кеда иси амен погрешна мисле?

 ¹¹ О Јехова џанела амен пошукар него амен со пенџараја амен. Џанела кај сием несовршена. Ама исто аѓаар џанела кај амен шај успешно те борина амен против о погрешна желбе. О Јехова вакерела аменге: „Мударен о желбе со авена таро тело: о сексуално неморал, о мелалипе, и неконтролирано сексуално страст, и лошно желба хем и желба те овел тумен са повише хем повише, која тани идолопоклонство“ (Колошаните 3:5). Иако нане локхо те керел пе адава, о Јехова тано стрпливо аменцар хем ов ка поможинел аменге (Псалм 68:19). Јекх терно пхрал пело ки замка те овел ле навика те дикхел порнографија хем те мастурбиринел. Лескере амала тари школа ко адава дикхена сине сар нешто нормално, ама ов вакерела: „Мли совест више на  реагиринела сине хем водинава сине неморално живото“. Халило кај ваљани сине те контролиринел пле желбе, хем ов чхинавѓа асавке навикенцар соске о Јехова поможинѓа леске. Ако иси тут неморална мисле, молин е Јехова те дел тут „сила која со накхавела и нормално“ те шај тле мисле те ачховен чиста (2. Коринќаните 4:7; 1. Коринќаните 9:27).

12. Соске ваљани те аракха амаро вило?

¹² О Соломон вакерѓа: „Таро са о буќа со ваљани те аракхе, највише аракх тло вило, соске лестар авела о живото“ (Изреки 4:23). О Соломон акате мислинѓа ко адава саве сием андрал, коте сој вклучиме амаре мисле, чувствија хем желбе, кола со о Јехова шај те дикхел лен. Адава со дикхаја шај те овел ле баро влијание упро аменде. О верно Јов вакерѓа: „Керѓум завет ме јакхенцар. Адалеске сар шај те дикхав ки јавер џувли ко погрешно начин?“ (Јов 31:1). Сар о Јов, амен да ваљани бут те пазина со дикхаја хем башо со размислинаја. Сар о псалмисти, те молина амен: „Циде ме јакхја таро буќа со на врединена“ (Псалм 119:37).

13. Саве амала биринѓа песке и Дина?

¹³ Амаре амала шај бут те влијајнен упри аменде — или ко шукар начин или ко лошно. Ако биринеа амален кола со икерена пе ко е Девлескере мерилија, ола шај те поможинен туке ту да те кере адава. (Изреки 13:20; читин 1. Коринќаните 15:33.) Кобор тано важно те бирина шукар амала дикхјола пе таро адава со уло е Динаке. Ој сине јекх таро е Јаковескере чхаја, со значинела кај барили ки фамилија со служинела сине е Јеховаске. И Дина на сине неморално џувли, ама сине паше  амалин е ханаанско чхаенцар кола со на служинена сине е Јеховаске. О Ханаанција дикхена сине ко секс бут поразлично таро е Девлескоро народо хем сине пенџарде сар неморална (3. Мојсеева 18:6-25). Џикоте и Дина сине пле амалинкенцар запознајнѓа е Сихеме, јекх терно Ханаанцо. Леске свиџинѓа пе и Дина. О Сихем сине о „најугледно“ мануш ки пли фамилија. Ама ов на мангела сине е Јехова (1. Мојсеева 34:18, 19).

14. Со уло е Динаке?

¹⁴ О Сихем керѓа адава со леске сине нормално хем прифатливо. Адалеске со свиџинѓа пе леске и Дина, ов леља ла хем силујнѓа ла. (Читин 1. Мојсеева 34:1-4.) Адава со ов силујнѓа ла, анѓа џи ко повише проблемија со завршинѓе трагично е Динаке хем лакере фамилијаке (1. Мојсеева 34:7, 25-31; Галатите 6:7, 8).

15-16. Сар шај те ова мудра?

¹⁵ На ваљани те кера и исто грешка сар и Дина те шај те џана кај е Јеховаскере морална мерилија тане башо амаро шукарипе. Ки Библија пишинела: „Кој џала мудра манушенцар, мудро ка овел, а кас иси бути околенцар со нане гоѓавер, лошно ка накхел“ (Изреки 13:20). Чхив туке сар цел те хаљове сој тано исправно англо Јехова хем тегани ка избегине непотребна дукха хем муке (Изреки 2:6-9; Псалм 1:1-3).

¹⁶ Шај те ова мудра ако проучинаја е Девлескоро лафи, ако молинаја амен леске англедер те ана несави одлука хем ако шунаја о шукар советија таро верно хем разборито робо (Матеј 24:45; Јаков 1:5). Џанѓола пе, сарине амен сием слаба хем несовршена (Еремија 17:9). Сар ка реагирине ако некој предупрединела тут кај сиан ки опасност те кере неморал? Дали ка вреџине  тут или понизно ка прифатине и помош? (2. Царевите 22:18, 19).

17. Сар шај те поможинел амен о совет таро јекх пхрал или пхен? Вакер пример.

¹⁷ На пример, замислин туке акаја ситуација. Јекх пхен ки бути иси ла јекх колега со сикавела лаке посебно внимание хем канинела ла те икљол леа. Ов на служинела е Јеховаске, ама изглединела бут симпатично хем љубезно. Јекх јавер пхен дикхела лен заедно хем покасно трудинела пе те керел лаја лафи башо адава. Сар ка реагиринел и прво пхен? Дали ка оправдинел пе, или ка овел благодарно башо предупредување? Акаја пхен шај мангела е Јехова хем мангела те керел адава сој исправно. Ама ако продолжинела те икљол акале манушеа, дали нашела „таро сексуално неморал“ или иси ла „доверба ко пло вило“? (Изреки 22:3; 28:26; Матеј 6:13; 26:41).

18-19. Сар о Јосиф нашља таро неморал, хем со поможинѓа леске те керел адава?

¹⁸ Сар терно, о Јосиф сине робо ко Египет. Секова диве, лескере господарескири ромни родела сине те совел леа, ама о Јосиф џанела сине кај адава тано погрешно. О Јосиф мангела сине е Јехова хем мангела сине те угодинел леске. Секова пути кеда ој мангела сине те завединел ле, о Јосиф одбинела ла сине. Адалеске со сине робо, ов нашти сине те џал ко јавер господари. Јекх диве, кеда лескере господарескири ромни мангља силаја те теринел ле те совел лаја, ов „нашља аври“. (Читин 1. Мојсеева 39:7-12.)

¹⁹ Акаја ситуација шај сине те завршинел бут појавер ако е Јосифе сине ле неморална мисле или ако фантазиринела сине баши лате. Ама о амалипе е Јеховаја сине леске најважно таро са јавер. Ов вакерѓа лаке: „Мо господари... на забранинѓа манге ништо освен туте, соске сиан лескири ромни. Адалеске сар шај те керав добором баро лошнипе хем те грешинав е Девлеске?“ (1. Мојсеева 39:8, 9).

20. Котар џанаја кај о Јосиф керѓа бахтало е Јехова?

²⁰ Иако о Јосиф сине дур тари пли фамилија хем таро пло кхер, ов секогаш сине верно е Девлеске хем о Јехова наградинѓа ле (1. Мојсеева 41:39-49). О Јехова сине бут бахтало адалеске со о Јосиф сине леске верно (Изреки 27:11). Шај те овел пхаро те избегине о неморал. Ама сетин тут ко акала лафија: „Тумен со мангена е Јехова, мрзинен адава сој лошно! Ов аракхела о живото околенгоро сој верна, хем спасинела лен таро васта е лошна манушенгере“ (Псалм 97:10).

21. Сар јекх терно пхрал постапинѓа сар о Јосиф?

 ²¹ Секова диве, е Јеховаскоро народо храбро сикавела кај мрзинела о лошно, а кај мангела о шукар (Амос 5:15). Бизи разлика кобор берш иси тут, ту да шај те ачхове верно е Јеховаске. Јекхе терне пхралескири вера сине чхивди ко испит ки школа. Јекх чхај вакерѓа леске кај ка овел ла сексуална односија леа ако поможинела лаке ко тести баши математика. Со керѓа акава пхрал? Ов постапинѓа сар о Јосиф. Ов вакерѓа: „Одма одбинѓум ла. Адалеске со ачхиљум цврсто, на нашавѓум мо достоинство хем мо самопоштовање“. Секова привремено задоволство со авела таро неморал, често анела дукх хем секирација (Евреите 11:25). Ако сием послушна е Јеховаске, секогаш ка ова бахтале (Изреки 10:22).

22-23. Сар шај те поможинел аменге о Јехова чак ако кераја сериозно грево?

²² О Сатана ка пробинел те астарел амен ки замка преку о сексуално неморал, хем шај те овел аменге бут пхаро те на пера ки адаја замка. Секаске аменге шај понекогаш те појавинен пе погрешна мисле (Римјаните 7:21-25). О Јехова џанела акава хем „на бистрела кај сием таро право“ (Псалм 103:14). Ама, со ако јекх христијани керела неморал? Шај ли нешто те поможинел леске ки акаја ситуација? Оја. Ако ов чаче каинела пе, о Јехова ка поможинел леске. О Девел тано спремно те простинел. (Псалм 86:5; Јаков 5:16; читин Изреки 28:13.)

²³ О Јехова исто аѓаар дела мануша „сар поклон“ — старешине кола со мангипаја грижинена пе аменге (Ефешаните 4:8, 12; Јаков 5:14, 15). Ола поможинена аменге те шај палем те ова ко шукар однос е Јеховаја (Изреки 15:32).

24-25. Сар шај и мудрост те поможинел туке те избегине о неморал?

²⁴ Те шај те ана шукар одлуке ваљани те хаљова сар е Јеховаскере законија тане башо амаро шукарипе. На мангаја те ова сар о терно мануш сој опишимо ко Изреки 7:6-23. Ов на сине мудро, хем адалеске астарѓа пе ки мамка таро сексуално неморал. Те ове мудро тано бут повише него само те ове интелигентно. Кеда сием мудра, трудинаја амен те хаљова сар о Девел размислинела хем те применина адава ко амаро живото. Сетин тут ко акала мудра лафија: „Кој трудинела пе те овел разборито, мангела коркори песте. Кој ценинела и разборитост ка овел успешно“ (Изреки 19:8).

²⁵ Дали сиан целосно уверимо кај е Девлескере мерилија тане исправна? Дали чаче верујнеа кај, ако икереа тут ки ленде ка ове бахтало? (Псалм 19:7-10; Исаија 48:17, 18). Ако панда на сиан сигурно, сетин тут ко са о шукар буќа со керѓа туке о Јехова. И Библија вакерела: „Пробинен хем дикхен кобор тано шукар о Јехова!“ (Псалм 34:8). Кобор повише размислинеа башо акава, добором повише ка манге е Девле. Манг со ов мангела, а мрзин со ов мрзинела. Стално мислин башо шукар буќа — буќа сој чачутне, праведна, чиста, мангипаске хем вредна фалибаске (Филипјаните 4:8, 9). Мукх те водинел тут е Јеховаскири мудрост, сар со водинѓа е Јосифе хем аѓаар ка овел тут бари корист (Исаија 64:8).

26. Со ка дикха понадари?

²⁶ Бизи разлика дали сиан ко брако или на, о Јехова мангела те уживине ко тло живото хем те ове бахтало. Ко следна дуј поглавја ка дикха кола буќа ка поможинен аменге те кера амаро брако успешно.