1-2. а) Ко со надинена пе адала сој неве ко брако? б) Башо кола пучиба ка кера лафи ко акава поглавје?

 КОНЕЧНО ало о диве е бијавескоро! И бори хем о џамутро тане бут бахтале башо заедничко живото сој тано англи ленде хем иси лен суне со мангена те исполнинен пе. Ола надинена пе кај ленгоро брако ка трајнел хем ка овел бахтало.

² Ама бут бракија со почминена шукар на ачхона бахтале. Те шај о брако те овел трајно хем бахтало, о брачна партнерија ваљани те џан пало е Девлескоро водство. Те дикха со вакерела и Библија башо акала пучиба: Кола тане о позитивна стране таро брако? Ако мангеа те кхуве ко брако, сар шај те бирине шукар партнери? Сар шај те ове шукар ром или ромни? Со ка поможинел о брако те овел трајно? (Читин Изреки 3:5, 6.)

3. Дали ваљани те ове ко брако те шај те ове бахтало? Објаснин.

³ Несаве мислинена кај јекх мануш нашти те овел бахтало ако нане ко брако. Ама, адава нане точно. О Исус вакерѓа кај адава со некој нане ко брако шај  те овел поклон (Матеј 19:10-12). Исто аѓаар о апостол Павле вакерѓа кај иси предностија кеда некој нане ко брако (1. Коринќаните 7:32-38). Ту одлучинеа дали ка ове ко брако или на. На ваљани те дозволине тле амала, фамилија или тли култура те теринен тут те кхуве ко брако.

4. Кола тане несаве предностија таро шукар брако?

⁴ И Библија вакерела кај о брако исто аѓаар тано поклон таро Девел хем кај иси ле несаве предностија. О Јехова вакерѓа е прво манушеске, е Адамеске: „Нане шукар више о мануш те овел коркори. Ка керав леске помошничка, некој со одговоринела леске“ (1. Мојсеева 2:18). О Јехова керѓа е Ева те овел е Адамеске ромни, хем ола уле и прво фамилија. Ако јекх брачно пари иси лен чхаве, тегани ленгоро брако ваљани те овел јекх стабилно средина коте со ка шај те бајрарен пумаре чхавен. Ама, о чхаве нане и единствено цел соске тано кердо о брако (Псалм 127:3; Ефешаните 6:1-4).

5-6. Сар шај о брако те овел сар „шело трине врвкенцар“?

⁵ О цари о Соломон пишинѓа: „Дујенге тано пошукар него јекхеске, соске иси лен шукар награда башо пумаро трудо. Соске, ако јекх перела, о дујто ка поможинел пле амалеске те уштел. Ама со ако јекх перела хем нане кој те поможинел леске те уштел?.. Шело трине врвкенцар на чхинѓола локхесте“ (Проповедник 4:9-12).

⁶ Ко јекх брако о брачна партнерија тане најпаше амала. Ола поможинена јекх јекхеске, утешинена пе хем заштитинена јекх јекхе. О мангипе керела о брако те овел зорало, ама ка овел панда позорало ако о ром хем и ромни служинена е Јеховаске. Тегани ленгоро  брако ка овел сар цврсто „шело трине врвкенцар“. Асавко шело тано позорало таро шело плетимо само дује врвкенцар. Јекх брако ка овел позорало ако о Јехова тано дело лестар.

7-8. Саво совет дела и Библија башо брако?

⁷ Одкеда ка венчинен пе, о ром хем и ромни шај те задоволинен пумаре природна сексуална желбе хем те уживинен ко адава (Изреки 5:18). Ама, ако некој мангела те кхувел ко брако само те задоволинел пле желбе, ој или ов шај те биринел погрешно партнери. Адалеске и Библија вакерела кај некој шај те кхувел ко брако откеда ка накхел о време кеда почминена те појавинен пе леске сексуална желбе хем кеда ола тане најсилна (1. Коринќаните 7:36). Пошукар те на кхувел пе ко брако са џикоте на смиринена пе адала чувствија. Тегани јекх мануш шај пошукар те размислинел хем те анел пошукар одлуке (1. Коринќаните 7:9; Јаков 1:15).

⁸ Ако размислинеа те кхуве ко брако, ваљани те ове реално хем свесно кај секова брако ка овел ле предизвикија. О Павле вакерѓа кај окола со кхувена ко брако „ка овен лен телесна неволје“ (1. Коринќаните 7:28). Чак ко најшукар брако ка овен проблемија. Адалеске, ако одлучинѓан те кхуве ко брако, мудро бирин туке шукар партнери.

9-10. Со ка случинел пе ако кхуваја ко брако некасаја со на служинела е Јеховаске?

⁹ Кеда биринаја брачно партнери важно тано те икера амен ко акава библиско начело: „Ма чхивен тумен ко јарем е неверниконцар, кова со нане еднакво“  (2. Коринќаните 6:14). О апостол Павле кеда пишинѓа акала лафија сине ле ки годи адава со керена о земјоделција. Ако дуј животне сој тане различна ки сила хем ко барипе, јекх земјоделцо нане те чхивел лен ко исто јарем те керен бути ки нива. Адава нане те овел шукар солдује животненге соске солдуј ка мучинен пе. Слично аѓаар, ако некој со служинела е Јеховаске кхувела ко брако некасаја со на служинела леске, ка овел ле бут проблемија. Адалеске и Библија дела амен о мудро совет те кхува ко брако „само ко Господари“ (1. Коринќаните 7:39).

¹⁰ Понекогаш, несаве христијања мислинена кај ка овел пошукар те кхувен ко брако некасаја со на служинела е Јеховаске него те ачхон коркори. Ако на шунаја о библиско совет, адава шај те анел аменге дукх хем те на ова бахтале. Аменге сар е Јеховаскере слуге, најважно ко живото тано те служина леске. Сар би осетинеа тут сине ако и најважно бути ко тло живото нашти те делине ла тле брачно партнереа? Бут џене одлучинѓе те ачхон коркори него те овен ко брако некасаја со на мангела е Јехова хем со на служинела леске. (Читин Псалм 32:8.)

11. Сар шај те бирине туке шукар брачно партнери?

¹¹ Акава на значинела кај било кој со служинела е Јеховаске шај те овел туке шукар ром или ромни. Ако мислинеа те кхуве ко брако, роде некас со чаче ка свиџинел пе туке хем касаја со шукар ка хаљове тут. Аџикер џикоте на аракхеа некас со иси ле иста целија ко живото сар со иси туте хем кој со чхивела е Јехова ко прво тхан. Одвојн туке време те читине хем те размислине башо корисна советија башо брако со иси ко  амаре публикацие со авена таро верно хем разборито робо. (Читин Псалм 119:105.)

12. Со шај те сикљова таро библиско извештај башо Авраам кеда биринѓа ромни пле чхавеске?

¹² Ко несаве културе тано нормално о родителија те биринен брачно партнери пле чхавеске или чхајаке. Мислинела пе кај о родителија џанена сој тано најшукар ленгере чхавенге. Акава обичај сине исто аѓаар нормално ко библиско време. Адалеске ако тли фамилија одлучинела те икерел пе ко акава обичај, и Библија шај те поможинел е родителенге те џанен кола особине те роден ко јекх брачно партнери пле чхавенге.  На пример, кеда о Авраам биринѓа ромни пле чхавеске е Исакоске, на сине леске важно о барвалипе или и положба, него дали ој мангела е Јехова. (1. Мојсеева 24:3, 67; дикх и 25 фуснота.)

13-15. а) Сар шај јекх мурш те спреминел пе те шај те овел шукар ром? б) Сар шај јекх џувли те спреминел пе те шај те овел шукар ромни?

¹³ Ако мислинеа те кхуве ко брако, размислин дали сиан спремно. Шај мислинеа кај сиан, ама ајде те дикха со чаче значинела те ове спремно башо брако. О одговор шај ка изненадинел тут.

¹⁴ И Библија вакерела кај е роме хем е ромња иси лен различна улоге ки фамилија. Адалеске те шај јекх мурш или јекх џувли те хаљон дали тане спремна башо брако ваљани те размислинен сави улога ка овел лен ко брако. Ако јекх мурш мислинела те женинел пе, ваљани те пучел пе дали тано спремно те овел поглавари ки фамилија. О Јехова очекујнела таро јекх ром те грижинел пе пле ромњаке хем пле чхавенге ко материјално хем ко емоционално поглед. Сој најважно, о ром ваљани те лел водство ко духовна активностија ки пли фамилија. Спрема и Библија, јекх мануш со на грижинела пе пле фамилијаке „полошно тано таро мануш сој бизи вера“ (1. Тимотеј 5:8). Адалеске, ако сиан мурш хем мангеа те женине тут, размислин сар шај те применине акава библиско начело: „Завршин тли бути со иси тут авријал хем спремин са со ваљани туке баши нива, хем пало адава градин тло кхер“. Јавере лафенцар, англедер те женине тут, размислин дали ка шај те ове асавко ром сар со родела о Јехова (Изреки 24:27).

 ¹⁵ Ако јекх џувли размислинела те кхувел ко брако ваљани те пучел пе дали тани спремно баши одговорност те овел ромни или дај. Ки Библија тане спомниме некобор начинија сар шај јекх шукар ромни те грижинел пе пле ромеске хем чхавенге (Изреки 31:10-31). Авдиве, бут мурша хем џувља мислинена само башо адава со ваљани о брачно партнери те керел ленге. Ама о Јехова мангела те размислина башо адава со амен ваљани те кера башо амаро партнери.

16-17. Башо со ваљани те размислине ако мангеа те кхуве ко брако?

¹⁶ Англедер те кхуве ко брако, размислин башо адава со вакерела о Јехова башо ром хем и ромни. Те овел пе поглавари ки фамилија на значинела кај о ром шај те постапинел грубо, ни ко физичко ни ко емоционално поглед. Исто сар о Исус, јекх шукар поглавари ки фамилија љубезно хем мангипаја грижинела пе пле фамилијаке (Ефешаните 5:23). А јекх џувли ваљани те размислинел со значинела те поддржинел пле ромескере одлуке хем те соработинел леа (Римјаните 7:2). Ој ваљани те пучел пе дали ка овел бахтали ако тани подложно јекхе несовршено манушеске. Ако мислинела кај нашти те керел адава, шај ка одлучинел кај ка овел пошукар те на кхувел ко брако несаво време.

¹⁷ О ром хем и ромни ваљани те грижинен пе повише башо адава те овел бахтало ленгоро партнери него ола. (Читин Филипјаните 2:4.) О Павле пишинѓа: „Секова јекх тумендар мора те мангел пле ромња сар коркори пес, а и ромни ваљани хор те поштујнел пле роме“ (Ефешаните 5:21-33). Солдуј џене, хем о ром хем и ромни, ваљани те осетинен пе мангле хем поштујме. Ама те шај о брако те функциониринел  шукар, е ромеске тано посебно важно те џанел кај и ромни поштујнела ле, а е ромњаке тано посебно важно те џанел кај о ром мангела ла.

18. Соске јекх пари ваљани те пазинел џикоте запознајнела пе?

¹⁸ О периоди кеда дуј џене запознајнена пе ваљани те овел бахтало време солдујенге. Адава тано време кеда ваљани те овен реална хем искрена те шај те одлучинен дали ка манген те овен заедно цело живото. Џикоте запознајнена пе, о мурш хем и џувли сикљона сар те керен лафи јекх јекхеа хем трудинена пе те дикхен  со чаче иси јекх јекхе ко вило. Сар со овела и врска попаше, природно тано те осетинен пе физички привлечиме јекх јекхеа. Ама ола ваљани те контролиринен акала чувствија англедер те лен пе, те шај те на керен неморал. О чачутно мангипе ка поможинел ленге те контролиринен пе хем ка спречинел лен те керен нешто со ка руминел ленгоро однос машкар песте хем ленгоро однос е Јеховаја (1. Солуњаните 4:6).

19-20. Сар ваљани те дикха ко брако?

¹⁹ Ко бут лила хем филмија о врске завршинена јекхе баре хем бахтале бијавеа. Ама ко реално живото о бијав тано само почеток. Е Јеховаскири намера сине о брако те овел трајно врска (1. Мојсеева 2:24).

²⁰ Авдиве, бут мануша ко брако дикхена сар нешто привремено. Локхесте кхувена ко брако хем локхесте развединена пе. Несаве мислинена кај, кеда почминена о проблемија тегани ваљани те мукхен пе. Ама сетин тут ки споредба тари Библија башо плетимо шело трине врвкенцар. Асавко шело нане те чхинѓол чак кеда тано ко баро притисок. Ако молинаја е Јехова те поможинел амен, амаро брако шај те овел трајно. О Исус вакерѓа: „О Девел со пханља те овел јекх, о мануш ма те одвојнел“ (Матеј 19:6).

21. Со ка поможинел е ромеске хем е ромњаке те манген пе јекх јекхеа?

²¹ Саринен иси амен јака хем слаба стране. Бут локхесте шај те концентририна амен ко е јаверенгере слабостија, а посебно амаре брачно партнерескере. Ама, ако кераја адава, нане те ова бахтале. Тари јавер страна, ако концентриринаја амен ко шукар особине амаре  брачно партнерескере, ка шај те овел амен бахтало брако. Дали шај те дикха аѓаар ко амаро брачно партнери иако тано несовршено? Шај. О Јехова џанела кобор сием несовршена, ама сепак дикхела амаре шукар особине. Замислин туке те на керел адава! О псалмисти вакерѓа: „Ако дикхеа ко амаре грешке, о Јах, тегани, о Јехова, кој ка ачхол?“ (Псалм 130:3). О ром хем и ромни шај те овен сар о Јехова адалеа со ка дикхен о  шукар буќа ко пло партнери хем ка овен спремна те простинен. (Читин Колошаните 3:13.)

22-23. Сар о Авраам хем и Сара денѓе шукар пример башо брако?

²² Сар со накхена о берша, о брако шај те овел позорало. Е Аврааме хем е Сара сине лен бахтало брако. Кеда о Јехова вакерѓа е Авраамеске те мукхел пло кхер ки диз Ур, е Сара шај сине ла повише таро 60 берш. Замислин туке кобор сине лаке пхаро те мукхел пло удобно кхер хем те живинел ко шаторија. Ама и Сара поштујнела сине е Аврааме. Кеда ваљани сине нешто те одлучинел пе, ој поддржинела сине пле роме таро вило. И Сара чаче сине е Авраамеске шукар амал хем партнери (1. Мојсеева 18:12; 1. Петрово 3:6).

²³ Џанѓола пе, о шукар брако на значинела кај о ром хем и ромни секогаш ка согласинен пе ко са. Јекх пути, кеда о Авраам на согласинѓа пе е Сараја, о Јехова вакерѓа леске: „Шун ла“. О Авраам керѓа адава, хем ко крајо сине лен шукар резултатија (1. Мојсеева 21:9-13). Ако понекогаш на согласинеа тут тле брачно партнереа, ма обесхрабрин тут! Најважно тано, чак кеда иси тумен асавке несогласувања, понадари да те сикавен кај поштујнена хем мангена јекх јекхе.

24. Сар шај амаро брако те анел слава е Јеховаске?

²⁴ Ко христијанско собрание, иси бут бахтале брачна парија. Ако мангеа те кхуве ко брако, ма бистре кај адава кас ка бирине те овел тло брачно партнери тани јекх таро најважна одлуке ко тло живото. Адава ка влијајнел ко цело тло живото, адалеске роде о Јехова те водинел тут. Тегани мудро ка бирине тле партнере, ка спремине тут башо брако хем ка трудине тут тло брако те овел јекх цврсто врска со ка анел слава е Јеховаске.