1-2. Дали адава со иси проблемија ко брако значинела кај о брако нане успешно? Објаснин.

 О БРАКО тано јекх поклон таро Јехова. Ов шај те керел е манушескоро живото побахтало. Ама, ко секова брако ка овен проблемија. Шај чак ка изглединел кај никогаш нане те авел крајо е проблеменге, хем о брачна партнерија шај те на овен више добором паше сар со сине.

² На ваљани те изненадина амен ако ко брако понекогаш ка овен амен пхарипа. Ама, адава со иси амен пхарипа на значинела кај амаро брако нане успешно. Чак о брачна парија со сине лен сериозна проблемија аракхле начин сар те решинен лен хем те керен пумаро брако позорало. Сар успејнѓе те керен адава?

3-4. Со шај те случинел пе понекогаш ко брако?

³ О брако тано врска машкар дуј различна мануша со мангена различна буќа, со иси лен различна идее хем ко различно начин керена о буќа. Исто аѓаар, о ром хем и ромни шај авена тари различно средина хем култура. Ваљани време хем трудо те шај јекх пари те пенџарел пе хем шукар те хаљовел пе машкар песте.

⁴ Сар со накхела о време, о ром хем и ромни шај те  овен добором преокупириме пумаре лична буќенцар, со ка овен са подур јекх јекхестар. Шај те изглединел кај ола живинена одвојмо живото. Со ка поможинел ленге те овен палем попаше?

5. а) Со ка поможинел е брачно партнеренге те овен попаше? б) Спрема Евреите 13:4, сар ваљани те дикха ко брако?

⁵ О Јехова дела бут шуже советија кола со шај те поможинен туке хем тле брачно партнереске те овен попаше јекх јекхеа хем е Девлеа (Псалм 25:4; Исаија 48:17, 18). Ов вакерела аменге: „Сарине ваљани те поштујнен о брако“ (Евреите 13:4). Нормално амен поштујнаја нешто сој аменге скапоцено. Адалеске о Јехова мангела амен те дикха ко брако сар нешто скапоцено. Амен ваљани те пазина амаро брако хем те дикха ки лесте сар нешто вредно.

6. Сар дикхела о Јехова ко брако, спрема о лафија таро Матеј 19:4-6?

⁶ О Јехова керѓа о прво брако. Лескоро чхаво, о Исус, вакерѓа: „На читинѓен ли кај окова со керѓа лен ко почеток, керѓа лен мурш хем џувли хем вакерѓа: ’Адалеске о мануш ка мукхел пле даде хем пле даја хем ка спојнел пе пле ромњаја хем ола ка овен јекх тело‘? Аѓаар ола нане повише дуј, него јекх тело. Адалеске, о Девел со пханља те овел јекх, о мануш ма те одвојнел“ (Матеј 19:4-6). Панда таро почеток е Јеховаскири намера сине о брако те трајнел цело живото. Ов мангља о фамилие те овен паше машкар песте, те овен бахтале хем те уживинен заедно ко живото.

7. Сар шај о ром хем и ромни те керен позорало пумаро брако?

⁷ Ама, о брачна парија авдиве иси лен бут повише стресија хем притисокија него било кеда англедер. Понекогаш адава притисок тано добором баро со ола мислинена кај нашти те спасинен пумаро брако хем откажинена пе. Адава со ка хаљова сар о Јехова дикхела ко брако шај те поможинел аменге (1. Јованово 5:3).

8-9. а) Кеда ваљани те шуна е Јеховаскере упатствија башо брако? б) Сар шај те сикава кај амаро брако тано аменге скапоцено?

⁸ Е Јеховаскере упатствија тане секогаш башо амаро шукарипе. Сар со дикхлем, ов советинела амен: „Ваљани те поштујнен о брако“ (Евреите 13:4; Проповедник 5:4). Ако џаја пало е Јеховаскоро водство чак кеда аменге пхаро, сигурно ка овел амен корист (1. Солуњаните 1:3; Евреите 6:10).

⁹ Адалеске со амаро брако тано скапоцено аменге, нане те кера или те вакера нешто со ка руминел амаро  брако. Наместо адава, мангаја те кера и врска амаре брачно партнереа те овел позорали. Сар шај те кера адава?

10-11. а) Саво сериозно проблеми иси ко несаве бракија? б) Соске тано бут важно сар кераја лафи амаре брачно партнереа?

¹⁰ Иси различна начинија сар шај некој те поврединел пле брачно партнере. Сар христијања џанаја кај никогаш на ваљани те мара амаре брачно партнере или физички те повредина ле. Ама, амен шај те повредина јекх јекхе амаре лафенцар. О лафија шај те овен сар чхурик. Јекх ромни вакерѓа: „Мо ром марела ман лафенцар. Шај на дикхјона модрице, ама лескере оштра лафија со вакерела лен стално, сар сој: ’Пхарипе сиан манге!‘ хем ’На врединеа ништоске!‘, чхинена мо вило“. Јекх ром вакерѓа кај лескири ромни стално перавела ле сине лакере лафенцар хем чхивела леске сине разна анава. Ов вакерѓа: „Пошукар те на повторинав са адала лафија со вакерела лен манге ој. Лаја нашти нормално те керав лафи, хем адалеске ачховава повише ки бути. Пошукар манге ки бути него кхере лаја“. Авдиве тано нормално те користинен пе груба лафија со вреџинена хем со дукхавена.

¹¹ Кеда о ром хем и ромни керена грубо лафи машкар песте, адава анела емоционална ране со на сасљона сигате. Јасно тано кај о Јехова на мангела о ром хем и ромни те понашинен пе ко асавко начин. Ама, шај те повредине тле брачно партнере бизо те ове свесно башо адава. Ту шај мислинеа туке кај сиан љубезно тле партнереа, ама дали ов да мислинела аѓаар? Ако нешто вакерѓан  со поврединела тле брачно партнере, ка манге ли те менине тут? (Галатите 5:15; читин Ефешаните 4:31.)

12. Сар шај амаре лафија те влијајнен упро амаро однос е Јеховаја?

¹² Е Јеховаске тано бут важно сар кераја лафи амаре брачно партнереа, бизи разлика дали сием коркори или англо јавера. (Читин 1. Петрово 3:7.) Ко Јаков 1:26 пишинела: „Ако некој мислинела кај обожавинела е Девле ама на контролиринела пли чхиб, ов ховавела коркори песте, хем лескоро обожавибе на врединела“.

13. Сар шај ко јавер начин те поврединен пе о брачна партнерија?

¹³ Иси јавера да начинија сар о брачна партнерија шај те поврединен јекх јекхе. На пример, сар ка осетинел пе тло партнери ако почминеа те накхаве повише  време некасаја јавереа таро спротивно пол? Иако шај те овен оправдана причине, сар сој те џал пе ки служба или те поможинел пе некаске кеда иси ле проблеми, дали тло брачно партнери осетинела пе повредимо? Јекх пхен вакерѓа: „Пхаро манге адава со дикхава кај мо ром трошинела повише време хем сикавела побаро внимание јекхе јавере пхењаке таро собрание. Адава керела те осетинав ман кај на сиум леске важно“.

14. а) Кова начело сикљоваја тари 1. Мојсеева 2:24? б) Со ваљани те пуча амен?

¹⁴ Сар христијања иси амен одговорност спрема амаре родителија хем спрема о пхраља хем о пхења таро собрание. Ама, кеда кхуваја ко брако, амари главно одговорност тани те грижина амен амаре брачно партнереске. О Јехова вакерела кај о ром „ка спојнел пе пле ромњаја“ (1. Мојсеева 2:24). О чувствија амаре брачно партнерескере ваљани те овен аменге бут важна. Пуч тут: „Дали дава мле партнереске мло време, внимание хем мангипе сој леске потребна хем со заслужинела лен?“

15. Соске о христијања сој ко брако ваљани те избегинен те овен бут паше некасаја со нане ленгоро ром или ромни?

¹⁵ Ако оваја бут паше некасаја со нане амаро ром или ромни, адава ка анел проблемија ко амаро брако. Шај емотивно те поврзина амен хем те бајрон ки аменде романтична чувствија спрема адаја личност (Матеј 5:28). Асавке чувствија шај те бајрон хем шај те теринен тут те кере нешто со ка руминел тло брако.

16. Сави заповед дела и Библија башо брако?

¹⁶ Ки Библија пишинела: „Сарине ваљани те поштујнен о брако“, хем пало адава вакерела: „И брачно  постела ваљани те овел чисто, соске о Девел ка судинел околенге со керена сексуално неморал хем прељуба“ (Евреите 13:4). Е лафенцар „и брачно постела“ мислинела пе ко сексуална односија машкар о ром хем и ромни (Изреки 5:18). Сар шај те сикава кај поштујнаја акаја врска хем кај икераја ла чисто?

17. а) Сар бут мануша авдиве дикхена ки прељуба? б) Сар ваљани о христијања те дикхен ки прељуба?

¹⁷ Авдиве несаве мануша мислинена кај нане ништо лошно ко адава те на овен верна пумаре брачно партнереске. На смејнаја те дозволина акава стави те влијајнел упри аменде. О Јехова јасно вакерела кај мрзинела о сексуално неморал хем и прељуба. (Читин Римјаните 12:9; Евреите 10:31; 12:29.) Ако иси амен сексуална односија некасаја со нане амаро ром или ромни, нане те икера чисто амаро брако. Ка сикава кај на поштујнаја е Јеховаскере мерилија хем ка румина амаро однос леа. Адалеске ваљани те избегина те кера чак о прво чекори со шај те ингарел амен ко адава те кера прељуба. Ко адава тано вклучимо те избегина о неморална мисле башо некој со нане амаро брачно партнери (Јов 31:1).

18. а) Соске и прељуба тани исто сар те обожавинен пе ховавне девела? б) Сар дикхела о Јехова ки прељуба?

¹⁸ Ко пурано Израел, спрема е Мојсеескоро закони, и прељуба сине бут сериозно грево, исто добором сериозно сар те обожавинен пе ховавне девела. Башо солдуј гревија и казна сине мерибе (3. Мојсеева 20:2, 10). Соске и прељуба сине исто сар те обожавинен пе ховавне девела? Ако јекх Израелцо обожавинела сине ховавне девлен, ов на икерела пе сине ко пло лафи со  денѓа кај ка овел верно е Јеховаске. Исто аѓаар ако ов керела сине прељуба, тегани на икерела пе сине ко пло лафи со денѓа кај ка овел верно пле брачно партнереске. (2. Мојсеева 19:5, 6; 5. Мојсеева 5:9; читин Малахија 2:14.) Јасно тано, кај о Јехова ко пурано време дикхела сине ки прељуба сар бут сериозно грево.

19. Со ка поможинел аменге те ова одлучна те на кера прељуба?

¹⁹ Сар тано авдиве? Иако на сием више тело е Мојсеескоро закони, о Јехова панда дикхела ки прељуба ко исто начин. Исто сар со никогаш нане те обожавина ховавне девлен, амен никогаш на ваљани те ова неверна амаре брачно партнереске (Псалм 51:1, 4; Колошаните 3:5). Ако сием неверна, сикаваја кај на ценинаја ни амаро брако ни амаре Девле, е Јехова. (Дикх и 26 фуснота.)

20. Сар шај и мудрост те поможинел ко брако?

²⁰ Сар шај те кере тло брако позорало? Е Девлескоро лафи вакерела: „Преку и мудрост градинела пе о кхер, хем преку и разборитост овела стабилно“ (Изреки 24:3). О брако тано слично сар јекх кхер, ов шај те овел шудро хем чучо или тато, удобно хем безбедно. Јекх мудро мануш трудинела пе лескоро брако те овел стабилно хем бахтало, коте со ка шај те уживинел.

21. Сар шај о џандипе те керел тло брако позорало?

²¹ Кеда керела лафи башо акава кхер, и Библија вакерела: „О џандипе пхерела лескере собе различно буќенцар сој тане вредна, скапоцена хем шуже“ (Изреки 24:4). О буќа со сикљовеа таро е Девлескоро Лафи шај те керен тло брако те овел пошукар (Римјаните  12:2; Филипјаните 1:9). Кеда заедно сар пари читинена и Библија хем амаре публикацие, керен лафи сар шај те применинен адава со сикљовена. Роден начинија сар шај машкар туменде те сикавен мангипе хем поштовање, а исто аѓаар сар те овен љубезна хем обѕирна. Молин е Јехова те поможинел туке те овен тут особине со ка керен тло брако позорало хем со ка керен тло партнери те мангел тут повише (Изреки 15:16, 17; 1. Петрово 1:7).

22. Соске ваљани те сикава мангипе, поштовање хем ценење амаре брачно партнереске?

²² Ваљани те кера са со шај те сикава мангипе, поштовање хем ценење амаре ромеске или ромњаке. Тегани амаро брако ка овел позорало. А сој најважно, ка кера е Јехова бахтало (Псалм 147:11; Римјаните 12:10).