1-2. Сар осетинела пе о Јехова кеда дикхела кај трудинаја амен те ова чесна?

 ЈЕКХ чхаво џикоте иранела пе тари школа, ко друмо аракхела јекх новчанико пхердо паренцар. Со ка керел? Шај те лел песке о паре. Ама наместо адава, ов иранела о новчанико е манушеске со нашавѓа ле. Кеда шунела лескири дај со керѓа ов, ој тани бут бахтали башо адава.

² Бут родителија тане бахтале кеда ленгере чхаве тане чесна. Амаро Дад сој ко небо, о Јехова, тано „о Девел е чачипаскоро“, хем ов тано бут бахтало кеда сием чесна (Псалм 31:5). Амен мангаја те угодина леске хем „ко са о буќа те ова поштена“ (Евреите 13:18). Те дикха ко кола аспектија таро живото шај те овел аменге пхаро те ова чесна. Пало адава ка дикха саве користија ка овел амен ако сием чесна.

3-5. а) Сар шај те ховава коркори аменде? б) Со ка поможинел амен те ова искрена коркори аменцар?

³ Те шај те ова чесна е јаверенцар, ваљани прво те ова чесна коркори аменцар. Адава нане секогаш локхо. Ко прво веко, о пхраља таро собрание ки  Лаодикија ховавѓе коркори пес аѓаар со мислинѓе кај угодинена е Девлеске, ама уствари на сине аѓаар (Откровение 3:17). Амен да шај те ховава коркори амен башо адава саве мануша чаче сием.

⁴ О ученико о Јаков вакерѓа: „Ако некој мислинела кај обожавинела е Девле ама на контролиринела пли чхиб, ов ховавела коркори песте, хем лескоро обожавибе на врединела“ (Јаков 1:26). Шај те ховава коркори амен ако мислинаја аменге кај са џикоте кераја несаве шукар буќа, е Девлеске нане те овел важно дали сием груба е јаверенцар, саркастична или ако вакераја ховајба. Со ка поможинел аменге те на ховава коркори амен?

⁵ Кеда дикхаја амен ки ајна амен шај те дикха сар изглединаја авријалдан. Кеда читинаја и Библија, амен шај те дикха саве сием андрал. И Библија шај те поможинел аменге те дикха кола тане амаре слаба хем јака стране. Ка сикљова кола промене ваљани те кера ко начин сар размислинаја, сар постапинаја хем сар кераја лафи. (Читин Јаков 1:23-25.) Ама, ако вакераја аменге кај нане амен нисаве слабостија, тегани нашти те кера важна промене. Адалеске ваљани те користина и Библија те шај те дикха саве чаче сием (Плач Еремиин 3:40; Агеј 1:5). И молитва, исто аѓаар шај те поможинел амен ко адава. Шај те молина е Јехова те испитинел амен хем те поможинел аменге те дикха амаре слабостија те шај те поправина амен (Псалм 139:23, 24). Ма те бистра кај „е Јеховаске тане одвратна о нечесна мануша, а паше тано околенцар сој тане чесна“ (Изреки 3:32).

6. Соске о ром хем и ромни ваљани те овен чесна машкар песте?

⁶ И чесност тани нешто најважно ки фамилија. Кеда о ром хем и ромни тане искрена јекх јекхеа, ола осетинена пе сигурна хем шај чаче те овел лен доверба машкар песте. Сар шај те на овел пе чесно ко брако? На пример, ако јекх таро брачно партнери флертујнела или дикхела порнографија или ако иси ле тајно романтично врска некасаја јавереа. Дикх со вакерѓа о псалмисти: „На дружинава ман е манушенцар со ховавена, хем на џава ко окола со гаравена саве тане“ (Псалм 26:4). Ако на сиан чесно тле брачно партнереа чак ко тле мисле, адава ка анел штета ко тло брако.

7-8. Сар шај те користине и Библија те сикаве тле чхавен башо адава кобор тано важно те овел пе чесно?

 ⁷ О чхаве да исто аѓаар ваљани те сикљон кај тано бут важно те овен чесна. О родителија шај те користинен и Библија те сикавен лен адава. Ки лате иси лошна примерија таро мануша со на сине чесна: о Ахан, кова со уло чор; о Гиезиј, кова со ховавѓа те шај те лел паре; хем о Јуда кова со чорела сине паре хем покасно предајнѓа е Исусе башо 30 сребреникија (Исус Навин 6:17-19; 7:11-25; 2. Царевите 5:14-16, 20-27; Матеј 26:14, 15; Јован 12:6).

⁸ Ки Библија исто аѓаар иси шукар примерија таро мануша со сине чесна: о Јаков, со теринѓа пле чхавен те иранен о паре со аракхле лен; о Јефтај хем лескири чхај, кола со икерѓе пе ко пло лафи со денѓе е Јеховаске; хем о Исус, кова со ачхило чесно чак ко пхаре ситуацие (1. Мојсеева 43:12; Судиите 11:30-40; Јован 18:3-11). Акала примерија шај те поможинен е чхавенге те хаљовен кобор тано важно те овел пе чесно.

9. Сар ка поможинел е чхавенге адава со о родителија тане чесна?

⁹ О родителија шај те сикљон таро акава важно библиско начело: „Зарем ту, кова со сикавеа е јаверен, на сикавеа коркори туте? Зарем ту, кова со проповединеа: ’Ма чор‘, чореа?“ (Римјаните 2:21). О чхаве џанена кеда о родителија вакерена јекх, а керена јавер. Ако вакераја амаре чхавенге те овен чесна ама амен на сием чесна, тегани о чхаве ка овен буниме. Ако о чхаве дикхена кај о родителија ховавена, чак ко тикне буќа, тегани ола да шај те керен адава. (Читин Лука 16:10.) Спротивно таро адава, кеда о чхаве дикхена кај о родителија тане чесна, адава ка поможинел ленге да,  кеда ка овен родителија, ленгере чхаве те овел лен доверба ки ленде (Изреки 22:6; Ефешаните 6:4).

10. Сар шај те ова чесна е пхраленцар хем е пхењенцар ко собрание?

¹⁰ Амен исто аѓаар ваљани те ова чесна амаре пхраленцар хем пхењенцар ко собрание. Бут локхесте јекх обично разговор шај те иранел пе ко оговарање, па чак ко клеветибе. Ако вакераја нешто бизо те џана дали тано чаче, шај те ширина ховајбе. Бут пошукар ка овел те ’контролирина амари чхиб‘ (Изреки 10:19). Те ова чесна или искрена, на значинела кај мора те вакера са со мислинаја, са со џанаја или са со шунаја. Чак ако адава со мангаја те вакера тано чаче, шај адава нане амари бути, или нане важно те вакерел пе хем нане љубезно (1. Солуњаните 4:11). Несаве мануша кеда поврединена некас лафенцар, оправдинена пе адалеа со вакерена: „Ме сиум сине само искрено!“ Ама сар е Јеховаскоро народо, амен мангаја амаре лафија секогаш те овен пријатна хем љубезна. (Читин Колошаните 4:6.)

11-12. а) Соске некој со грешинела ваљани те овел искрено е старешиненцар? б) Сар ваљани те размислина ако амаро амал керела сериозно грешка? в) Сар шај те ова чесна е Јеховаскере организацијаја?

¹¹ О Јехова денѓа одговорност е старешиненге те грижинен пе башо собрание. Е старешиненге ка овел полокхо те поможинен аменге ако сием искрена ленцар. Соске? Ако сиан насвало хем џаја ко доктори, дали ка гараве лестар те вакере са со дукхала тут? Ако кереа адава, дали шај те поможинел туке? Слично аѓаар, ако амен кераја несави грешка, на ваљани те ховава. Наместо адава, ваљани те џа ко старешине хем искрено  те кера ленцар лафи башо адава со керѓем (Псалм 12:2; Дела 5:1-11). Ама акана замислин туке јекх јавер ситуација: Со ако дознајнѓан кај тло амал керѓа јекх сериозно грешка? (3. Мојсеева 5:1). Дали ка вакере: „Ов тано мо амал, хем ме нане те тхарав ле“? Или ка размислине башо адава кај о старешине тане адатхе те поможинен леске те шај те поправинел хем те зајакнинел пло однос е Јеховаја (Евреите 13:17; Јаков 5:14, 15).

¹² Амен исто аѓаар ваљани те ова чесна е Јеховаскере организацијаја кеда даја извештај баши амари служба. Исто аѓаар ваљани те ова искрена кеда пхераја молба баши пионерско или баши било која јавер служба. (Читин Изреки 6:16-19.)

13. Сар шај те ова чесна ако кераја бути амаре пхраленцар или пхењенцар?

¹³ Амен е Јеховаскере сведокија на кераја бизнис џикоте сием ки дворана или ки служба. Исто аѓаар, на искористинаја амаре пхрален хем пхењен башо амаро бизнис. Ако ки тли фирма керена бути Сведокија, де лен плата ко време, хем добором кобор со договоринѓен тумен хем де лен са со следујнела ленге спрема о закони. Ко адава тано вклучимо те овен пријавиме хем те добинен платимо одмор (1. Тимотеј 5:18; Јаков 5:1-4). Ако ту кереа бути ко несаво Сведоко ма очекујн те постапинел пе туја ко посебно начин (Ефешаните 6:5-8). Икер тут ко тло договор башо работно време хем кер и бути со сиан платимо те кере ла (2. Солуњаните 3:10).

14. Со ваљани те керен о христијања англедер те кхувен ко бизнис заедно?

¹⁴ Ама со ако мангаја те кхува ко бизнис несаве пхралеа или пхењаја? Адава шај те овел несави заедничко  инвестиција или заем. Ко асавке ситуацие важинела о библиско начело: Кер писмено договор! Кеда о пророко о Еремија бикинѓа јекх нива, ов керѓа дуј копие таро договор, јекх копија сине потпишими таро сведокија, хем солдуј документија сине гаравде те користинел лен покасно кеда ка овен леске потребна. (Еремија 32:9-12; исто аѓаар дикх 1. Мојсеева 23:16-20.) Несаве мислинена ако керена асавко писмено договор тегани нане лен доверба машкар песте сар пхраља. Ама, адава со ка керен писмено договор ка поможинел те на авел џи ко несогласувања, разочарибе хем расправие. Чак кеда керела пе бизнис, ма бистре кај о мир ко собрание секогаш тано поважно таро било кова договор. (1. Коринќаните 6:1-8; дикх 30 фуснота.)

15. Сар дикхела о Јехова ко нечесна постапке?

¹⁵ Амен мора те ова чесна секасаја, на само амаре пхраленцар или пхењенцар. Е Јеховаске тано бут важно те ова чесна. „И нечесно вага тани одвратно е Јеховаске, а и вага со меринела точно тани угодно леске“ (Изреки 11:1; 20:10, 23). Ко библиско време, и вага често користинела пе сине те меринен пе о буќа со бикинена пе или о паре коленцар со платинена нешто. Несаве трговција ховавена сине пумаре муштериен аѓаар со дена лен сине похари таро адава со родена или керена сине те платинен повише него со ваљани. Авдиве, исто сар ко адава време, асавке нечесна буќа тане нормална. Исто сар о Јехова со мрзинела сине асавке постапке ко пурано време, ов мрзинела лен авдиве да.

16-17. Ко кола ситуацие о христијања ваљани те овен чесна?

 ¹⁶ Авдиве иси бут ситуацие коте со шај о мануш те овел нечесно. На пример кеда родаја бути, кеда пхераја несаве документија или кеда иси амен тести ки школа. Бут мануша мислинена кај нане ништо лошно ко адава те ховаве, те бајраре о буќа или те де одговорија со анена џи ко погрешно заклучок. Адава на изненадинела амен. И Библија вакерѓа кај ко последна диве таро акава свето, о мануша „ка манген коркори пес, ка манген о паре... нане те манген о шукарипе“ (2. Тимотеј 3:1-5).

¹⁷ Понекогаш шај те дикхјол пе аменге кај о нечесна мануша авдиве успејнена ко живото (Псалм 73:1-8). О христијања шај чак те нашавен пумари бути, те трпинен финансиско штета или те овен малтретириме ки бути адалеске сој тане чесна. Ама и чесност врединела повише таро са. Соске?

18. Соске врединела те ове пенџардо сар чесно мануш?

¹⁸ Авдиве ко свето ретко аракхена пе мануша сој тане чесна, касте со шај те овел тут доверба хем мануша сој тане одговорна. Асавке особине бут ценинена пе хем секој амендар шај те овел асавко мануш (Михеј 7:2). Точно тано адава, кај некој шај те асал туке или те керел тут делино башо адава со сиан чесно. Ама јавера ка ценинен тут хем ка овел лен доверба ки туте баши тли чесност. Ко цело свето, е Јеховаскере сведокија тане пенџарде сар чесна мануша. Несаве газдија повише мангена те лен Сведокон ки бути само адалеске сој тане чесна. Амаре пхраља хем пхења бут пути  ачховена ки бути, а о јавера тане палдиме тари бути соске нане чесна.

19. Сар адава со ка ове чесно ка влијајнел ко тло амалипе е Јеховаја?

¹⁹ Кеда сиан чесно ко са адава ка анел туке чисто совест хем андруно мир. Шај те ова сар о Павле кова со пишинѓа: „Увериме сием кај иси амен чисто совест“ (Евреите 13:18). А сој најважно, тло Дад сој пхердо мангипаја, о Јехова, ка дикхел хем ка ценинел адава со трудинеа тут те ове чесно ко са. (Читин Псалм 15:1, 2; Изреки 22:1.)