16 ПОГЛАВЈЕ
Противин тут е Бенгеске
„Противинен тумен е Бенгеске, хем ов ка нашел тумендар“ (ЈАКОВ 4:7)
1-2. Со ваљани те хаљова башо Сатана хем о демонија?
О ЖИВОТО ко нево свето ка овел бут шукар. Конечно ка живина аѓаар сар со сине е Јеховаскири намера ко почеток. Ама, акана живинаја ко свето коте со владинела о Сатана хем лескере демонија (2. Коринќаните 4:4). Иако нашти те дикха лен, ола постојнена хем тане бут моќна.
2 Ко акава поглавје ка дикха сар шај те ачхова паше узо Јехова хем те заштитина амен таро Сатана. О Јехова ветинела кај ка поможинел амен. Ама ваљани те хаљова саве методе користинена о Сатана хем о демонија те шај те ховавен хем те нападинен амен.
„САР ЛАВИ СО ВИКИНЕЛА“
3. Со мангела те керел аменге о Бенг?
3 О Сатана вакерела кај о мануша обожавинена е Јехова таро себична причине, хем кеда ка овел ленге пхаро ола ка чхинавен те служинен леске. (Читин Јов 2:4, 5.) Кеда некој мангела те сикљовел башо Јехова, о Сатана хем о демонија дикхена адава хем трудинена пе те чхинавен ле. Ола тане бут хољаме кеда некој дела лафи е Јеховаске кај ка служинел леске хем кеда крстинела пе. И Библија спорединела е Бенге сар „лави со викинела кеда тано бокхало хем родела некас те хал“ (1. Петрово 5:8). О Сатана мангела те руминел амаро амалипе е Јеховаја (Псалм 7:1, 2; 2. Тимотеј 3:12).
О Сатана тано хољамо кеда одлучинаја амаро живото те користина ле те кера е Јеховаскири волја
4-5. а) Со нашти те керел о Сатана? б) Сар шај те противина амен е Бенгеске?
4 Ама амен на ваљани те дара таро Сатана хем лескере демонија. О Јехова ограничинѓа адава со шај те керен аменге. О Јехова ветинела кај јекх „баро мноштво“ таро чачутне христијања ка преживинен „и бари неволја“ (Откровение 7:9, 14). Адава о Бенг нашти те чхинавел соске о Јехова заштитинела пле народо.
5 Ако ачховаја паше узо Јехова, о Сатана нашти те руминел амаро амалипе леа. Е Девлескоро Лафи уверинела амен: „О Јехова ка овел туменцар са џикоте тумен сиен леа“. (2. Летописи 15:2; читин 1. Коринќаните 10:13.) Бут верна мурша хем џувља таро пурано време, сар сој о Авел, о Енох, о Ное, и Сара хем о Мојсеј, противинѓе пе е Бенгеске аѓаар со ачхиле паше узо Јехова (Евреите 11:4-40). Амен да шај те кера исто адава. Е Девлескоро Лафи ветинела: „Противинен тумен е Бенгеске, хем ов ка нашел тумендар“ (Јаков 4:7).
„БОРИНАЈА АМЕН“
6. Сар нападинела амен о Сатана?
6 Иако о Сатана џанела кај о Јехова ограничинѓа адава со шај те керел аменге, ов понадари да ка керел са те шај те руминел амаро однос е Девлеа. Авдиве, о Бенг нападинела амен ко различна начинија хем користинела иста методе со користинела лен бершенцар. Кола тане несаве лендар?
7. Соске о Сатана нападинела е Јеховаскере народо?
7 О апостол Јован пишинѓа: „Цело свето тано ко васта е Лошноскере“ (1. Јованово 5:19). О Сатана владинела акале лошно светоја, а исто аѓаар мангела те владинел е Јеховаскере народоја (Михеј 4:1; Јован 15:19; Откровение 12:12, 17). Ов џанела кај ачхило ле панда хари време, адалеске секаске амендар керела баро притисок те шај те на ова верна е Девлеске. Понекогаш о Бенг нападинела директно, а понекогаш адава керела ле бизо те приметина.
8. Со ваљани секова христијани те хаљол?
8 Ко Ефешаните 6:12 читинаја: „Боринаја амен... против о лошна духија сој ко небо“. Секова христијани лично ваљани те боринел пе против о Бенг хем о демонија. Ваљани те хаљова кај секој со денѓа лафи кај ка служинел е Јеховаске тано ки адаја борба. Ко пло писмо џи ко Ефешања, о апостол Павле некобор пути поттикнинѓа е христијанен те ачховен зорале ки борба против о Сатана (Ефешаните 6:11, 13, 14).
9. Со пробинена те керен аменге о Сатана хем о демонија?
9 О Сатана хем о демонија пробинена те ховавен амен ко разна начинија. Ако јекх метода на успејнела леске ки аменде, о Сатана ка пробинел несави јавер. Ов трудинела пе те дикхел кола тане амаре слабостија те шај те биринел која замка те користинел. Амен шај те на пера ки ленде соске и Библија откринела аменге е Бенгескере замке. (2. Коринќаните 2:11; дикх и 31 фуснота.) Јекх замка тани о демонизам.
ОВ ПОДУР ТАРО ДЕМОНИЈА
10. а) Сој тано о демонизам? б) Сар дикхела о Јехова ко демонизам?
10 Демонизам, или спиритизам, тано те овел пе ко контакт е демоненцар, на пример преку о буќа сар сој те дикхел пе ко фали, те керен пе магие или те керел пе лафи е муленцар. И Библија вакерела аменге кај о демонизам тано „одвратно“. Нашти некој те керел буќа коте сој вклучимо о демонизам, а ко исто време те обожавинел е Јехова (5. Мојсеева 18:10-12; Откровение 21:8). О христијања ваљани целосно те отфрлинен са о врсте таро демонизам (Римјаните 12:9).
11. Со шај те овел ако интересинена амен о натприродна буќа?
11 О Сатана џанела кај ако привлечинена амен о натприродна буќа, ов шај те користинел о демонизам те пера ки адаја замка. Секоја врста таро демонизам шај те руминел амаро амалипе е Јеховаја.
О САТАНА ПРОБИНЕЛА ТЕ ХОВАВЕЛ АМЕН
12. Сар мангела о Сатана те влијајнел ко амаро размислибе?
12 О Сатана мангела те бунинел е манушен. Ов хари похари керела о мануша те сумнинен пе, са џикоте на мислинена „кај о шукар тано лошно, а о лошно шукар“ (Исаија 5:20). Ов мангела те мислина кај о советија тари Библија нане корисна хем кај ка ова побахтале ако на икераја е Девлескере мерилија.
13. Сар о Сатана пробинела те чхивел сумње?
13 Те ширинел сумње тани јекх таро е Сатанаскере најуспешна методе. Ов користинела ла сине бут поангле. Ки Еденско градина, ов пробинѓа те чхивел сумње е Еваке кеда пучља ла: „Чаче ли о Девел вакерѓа туменге кај на смејнена те хан таро секова каш ки градина?“ (1. Мојсеева 3:1). Покасно, ко време кеда живинела сине о Јов, о Сатана пучља е Јехова англо ангелија: „Зарем о Јов џабе дарала таро Девел?“ (Јов 1:9). Одкеда о Исус крстинѓа пе о Сатана вакерѓа леске: „Ако сиан е Девлескоро чхаво, вакер акале баренге те овен маре“ (Матеј 4:3).
14. Сар шај о Сатана те керел о мануша те сумнинен пе кај о демонизам тано погрешно?
14 О Бенг понадари да чхивела сумње. Ов мангела амен те верујна кај о демонизам нане бут лошно, аѓаар со керела те изглединел кај нане опасно. Чак несаве христијања на сине свесна кобор акава тано опасно (2. Коринќаните 11:3). Адалеске, сар шај те заштитина амен? Сар шај те ова сигурна кај на пелем е Бенгеске ки замка? Те дикха дуј подрачја таро живото коте со шај о Бенг те ховавел амен: и забава хем о медицинска третманија.
О САТАНА КОРИСТИНЕЛА АМАРЕ ПРИРОДНА ЖЕЛБЕ
15. Сар шај те овел амен бути е демоненцар преку и забава?
15 Амен о мануша мангаја те забавина амен. Авдиве, ко бут филмија, клипија, телевизиска емисие, компјутерска игре хем интернет странице иси демонија, магие хем натприродна силе. Бут џене ки ленде дикхена сар забава со нане опасно, ама на хаљовена кобор тано опасно те овел тут бути е демоненцар. Ко демонизам исто аѓаар тане вклучиме о хороскоп, те дикхел пе фали ко вас, ко тарот карте, ко филџани хем ко граво. О Бенг гаравела кобор тане опасна акала буќа, хем керела те дикхјон сар нешто мистериозно, возбудливо хем забавно. Некој шај те мислинел кај нане ништо лошно те дикхел нешто сој демонско или натприродно, соске ов лично на керела буќа сој тане поврзиме е демоненцар. Соске асавко размислибе тано опасно? (1. Коринќаните 10:12).
16. Соске ваљани те избегина забава коте со иси нешто натприродно?
16 О Сатана хем о демонија нашти те читинен амаре мисле. Ама ола шај те џанен со мангаја хем сар размислинаја адалеа со дикхена саве одлуке анаја аменге хем амаре фамилијаке, ко адава тано вклучимо хем сави забава биринаја. Ако биринаја филмија, музика или лила коте со иси магионичарија, магие, опседниме демоненцар, вештерке, вампирија или слично, о Сатана ка дикхел кај интересинаја амен ленге. Тегани о Бенг хем о демонија шај те трудинен пе те чхивен амен панда похор ко демонизам. (Читин Галатите 6:7.)
17. Сар шај о Сатана те користинел амари желба те ова састе?
17 О Сатана исто аѓаар користинела амари желба те ова састе. Бут џене авдиве тане бут насвале. Некој шај пробинѓа различна третманија, ама на успејнѓе (Марко 5:25, 26). Асавке мануша шај те овен бут разочариме хем те овен спремна те пробинен било со. Ама амен сар христијања ваљани те пазина те на бирина медицинска третманија коте со иси магие (Исаија 1:13).
Нека овел тут доверба ко Јехова кеда сиан насвало
18. Кола медицинска третманија ваљани о христијања те одбинен?
18 Ко пурано Израел, несаве мануша користинена сине магие. О Јехова вакерѓа ленге: „Кеда ваздена тумаре васта ки молитва, пхандава ме јакхја англи туменде. Вакерена бут молитве, ама ме на шунава“ (Исаија 1:15). Замислин туке, о Јехова на мангља чак те шунел ленгере молитве! На мангаја те кера нешто со ка руминел амаро амалипе е Јеховаја хем те чхинава ле те поможинел аменге, посебно кеда сием насвале (Псалм 41:3). Англедер те прифатина несаво третмани, мора те испитина хем те дикха дали тано поврзимо демоненцар или натприродна силенцар (Матеј 6:13). Ако тано поврзимо, ваљани те одбина ле! (Дикх и 32 фуснота.)
ПАРАМИСА БАШО ДЕМОНИЈА
19. Сар о Бенг даравела е манушен?
19 Несаве мануша мислинена кај о Бенг хем о демонија тане измислиме, а јавера џанена кај ола чаче постојнена соске сине лен искуство ленцар. Бут мануша икерена несаве суеверна обичаија соске дарана те на мучинен лен о лошна духија. Јавера вакерена парамиса кај о демонија керена бут страшна буќа е манушенге хем аѓаар даравена лен. Бут пути о мануша тане воодушевиме таро асавке парамиса, хем мангена те раскажинен лен е јаверенге. Акала парамиса керена о мануша те даран таро Бенг.
20. Сар шај те ширина е Сатанаскере ховајба?
20 Размислин башо акава: о Сатана мангела о мануша те даран лестар (2. Солуњаните 2:9, 10). Ов ховавела хем џанела сар те влијајнел ко мисле е манушенгере со керена демонизам хем керела те верујнен ко буќа со нане чаче. Акала мануша шај те вакерен парамиса башо буќа со ола мислинена кај дикхле или шунѓе. Кобор повише о мануша раскажинена лен, добором повише бајрарена о буќа ко акала парамиса. На мангаја те поможина е Сатанаске те ширинел дар адалеа со ка раскажина асавке парамиса (Јован 8:44; 2. Тимотеј 2:16).
21. Наместо те вакера парамиса башо демонија, башо со шај те кера лафи?
21 Ако некој таро е Јеховаскоро народо доживинѓа нешто таро демонија, на ваљани адава те раскажинел е јаверенге сар нешто интересно. Е Јеховаскоро народо на ваљани те дарал таро адава со шај те керел о Бенг хем о демонија. Наместо адава, амен ваљани те концентририна амен ко Исус хем ки моќ со денѓа ле о Јехова (Евреите 12:2). О Исус на раскажинѓа пле учениконге парамиса башо демонија. Ов концентриринѓа пе ко хабери башо Царство хем ко шукар буќа со керѓа о Девел (Дела 2:11; Лука 8:1; Римјаните 1:11, 12).
22. Со сиан одлучно те кере?
22 Ма те бистра кај е Сатанаскири цел тани те уништинел амаро однос е Јеховаја. Ов ка керел са те шај те успејнел ко адава. Ама амен сием свесна кола тане е Бенгескере методе хем одлучна сием те одбина секоја врста таро демонизам. Амен на мукхаја „тхан е Бенгеске“ те ховавел амен него икераја амен цврсто ки амари одлука. (Читин Ефешаните 4:27.) Оја, ако противинаја амен е Бенгеске нане те пера ко лескере замке хем о Јехова ка заштитинел амен (Ефешаните 6:11).