1-2. а) Каскере упатствија ваљани те шуна? б) Башо кола пучиба ка кера лафи ко акава поглавје?

 КЕДА сиан сине чхаво, тле родителија шај некогаш вакерѓе туке те кере нешто со на мангеа те кере. Иако мангеа сине тле родителен хем џанеа сине кај ваљани те шуне лен, понекогаш на мангеа сине те кере адава со вакерена туке.

² Џанаја кај амаро Дад, о Јехова мангела амен. Ов грижинела пе аменге хем дела амен са со ваљани аменге те уживина ко живото. Дела амен водство, или советија хем упатствија кола тане секогаш башо амаро шукарипе. Понекогаш адава керела ле преку о мануша. Амен ваљани те поштујна е Јеховаскоро авторитети (Изреки 24:21). Ама соске понекогаш тано пхаро те прифатина советија хем упатствија? Соске о Јехова родела амендар адава? Сар шај те сикава кај поштујнаја лескоро авторитети? (Дикх и 9 фуснота.)

3-4. а) Сар о мануша уле несовршена? б) Соске шај те овел аменге пхаро те прифатина водство таро јавера?

³ Аменге е манушенге тано природно те ова бунтовна. Адава тано аѓаар панда таро време откеда о прва  мануша, о Адам хем и Ева, грешинѓе. Иако сине створиме совршена, ола бунинѓе пе против е Девлескоро авторитети. Оттегани са о мануша бијанѓовена несовршена. Амари несовршеност тани јекх причина соске аменге пхаро те прифатина водство таро Јехова хем таро мануша. Јавер причина тани адаја со о мануша преку касте о Јехова дела амен водство исто аѓаар тане несовршена (1. Мојсеева 2:15-17; 3:1-7; Псалм 51:5; Римјаните 5:12).

⁴ Адалеске со сием несовршена бут локхо шај те ова горда. И гордост керела те овел аменге пхаро те прифатина о водство. На пример, ко пурано Израел, о Јехова биринѓа е Мојсее те водинел лескере народо. Ама, јекх мануш со викинела пе сине Кореј, кова со бершенцар служинела сине е Јеховаске, уло гордо хем сикавѓа кај на поштујнела е Мојсее. Тари јавер страна, о Мојсеј на сине гордо мануш иако водинела сине е Девлескере народо. Уствари, и Библија баши лесте вакерела кај сине о најкротко мануш со живинела сине ко адава време. Ама о Кореј на прифатинѓа о водство таро Мојсеј. Ов чак убединѓа буте манушен те овен тари лескири страна хем те бунинен пе против о Мојсеј. Со уло е Корееске хем е јавере бунтовниконге? О Јехова мударѓа лен (4. Мојсеева 12:3; 16:1-3, 31-35). Ки Библија иси бут примерија кола со сикавена кај и гордост тани бут опасно. (2. Летописи 26:16-21; дикх и 10 фуснота.)

5. Сар несаве мануша злоупотребинѓе пли моќ?

⁵ Ки манушикани историја, бут џене злоупотребинѓе пумари моќ. (Читин Проповедник 8:9.) На пример о Саул сине шукар хем понизно мануш кеда о Јехова  биринѓа ле те овел цари ко Израел. Ама ов мукхља и гордост хем и љубомора те бајрон леске ко вило, хем адалеске почминѓа те прогонинел е Давиде, кова со на керѓа ништо лошно (1. Самоилова 9:20, 21; 10:20-22; 18:7-11). Покасно, о Давид уло јекх таро најшукар царија ко Израел. Сепак, пало несаво време ов да злоупотребинѓа пли моќ. Ов керѓа сексуално неморал е Витсавеаја, и ромни е Уријаскири. Пало адава, ов мангља те гаравел пло грево адалеа со бичхалѓа е Урија ки борба те мерел (2. Самоилова 11:1-17).

6-7. а) Ко со поттикнинела амен о мангипе спрема о Девел? б) Сар о пример е Исусескоро поможинела аменге те ова послушна е Јеховаске чак кеда нане аменге локхо?

⁶ Поштујнаја е Јеховаскоро водство соске иси амен мангипе спрема лесте. Адалеске со мангаја ле повише таро било кој или било со јавер, амен мангаја те кера ле бахтало. (Читин Изреки 27:11; Марко 12:29, 30.) Панда таро почеток, о Сатана мангела те теринел е манушен те мислинен кај е Јехова нане ле право те вакерел со те керен о мануша. Ама, амен џанаја кај адава тано ховајбе. Амен сложинаја амен акале лафенцар: „Моќно Јехова, ту сиан амаро Девел хем заслужинеа сарине те славинен тут хем те сикавен туке чест, соске ту керѓан са о буќа“ (Откровение 4:11).

⁷ Кеда сиан сине чхаво, шај тле родителија сикавѓе тут те шуне лен чак кеда на мангеа сине те кере адава. Слично аѓаар, сар е Јеховаскере слуге, шај понекогаш нане те овел аменге локхо те ова послушна е Јеховаске. Ама адалеске со мангаја ле хем со поштујнаја ле, кераја  са со шај те ачхова леске послушна. О Исус денѓа амен шужо пример башо акава. Ов сине послушно е Јеховаске чак кеда на сине леске локхо. Баш адалеске ов шај сине те вакерел пе Дадеске: „Ма те овел сар ме со мангава, него те овел сар ту со мангеа“. (Лука 22:42; дикх и 11 фуснота.)

8. Кола тане несаве начинија сар водинела амен о Јехова? (Дикх и рамка „ Прифатин совет“.)

⁸ Авдиве о Јехова дела амен водство ко различна начинија. На пример, ов денѓа амен и Библија. Исто аѓаар, дела амен старешине ко собрание. Амен сикаваја кај поштујнаја е Јеховаскоро авторитети адалеа со поштујнаја е старешинен. Ако на прифатинаја ленгоро водство, уствари на прифатинаја о водство со дела амен о Јехова. Кеда о Израелција отфрлинѓе е Мојсее, англо е Јеховаскере јакхја адава сине сар те пхене отфрлинена лесте. (4. Мојсеева 14:26, 27; дикх и 12 фуснота.)

9. Сар о мангипе поттикнинела амен те шуна о упатствија?

⁹ Кеда поштујнаја о авторитети, адалеа исто аѓаар сикаваја кај мангаја амаре пхрален хем е пхењен. Размислин башо акава пример. Кеда случинела пе јекх природно катастрофа, бут пути о членија таро тими спасибаске соработинена заедно те шај те спасинен кобор со шај повише манушен. Те шај о тими те овел успешно некој ваљани те организиринел ле, хем секова члени таро тими ваљани те шунел о упатствија. Ама со ако некој на шунела о упатствија хем керела песке сар со мангела ов? Чак те овел ле да шукар намера, адалеа со нане послушно шај те керел проблемија е јаверенге ко тими, на пример, некој шај те овел сериозно повредимо. Слично аѓаар, ако на шунаја о водство  таро Јехова хем таро окола со денѓа лен ов несаво авторитети, шај те кера штета амаре пхраленге хем е пхењенге. Ама кеда сием послушна е Јеховаске, сикаваја кај мангаја амаре пхрален хем пхењен хем кај поштујнаја о начин сар о Јехова водинела о буќа (1. Коринќаните 12:14, 25, 26).

10-11. Со ка дикха акана?

¹⁰ Са со родела о Јехова амендар тано башо амаро шукарипе. Кеда поштујнаја о авторитети ки фамилија, ко собрание хем кеда поштујнаја е властен, адава користинела сариненге (5. Мојсеева 5:16; Римјаните 13:4; Ефешаните 6:2, 3; Евреите 13:17).

¹¹ Ако хаљоваја соске о Јехова мангела те поштујна е јаверен, ка овел аменге полокхо те кера адава. Те дикха повише башо адава сар шај те сикава поштовање ко трин подрачја таро амаро живото.

12. Сар шај о ром те сикавел кај поштујнела е Јеховаскоро авторитети?

¹² О Јехова створинѓа и фамилија хем секаске тари фамилија денѓа несави улога. Кеда секова члени хаљола со родела о Јехова лестар, ки фамилија ка овел слога хем сарине ка овен бахтале (1. Коринќаните 14:33). О Јехова чхивѓа е роме те овел поглавари ки фамилија. Адава значинела кај о Јехова очекујнела лестар мангипаја те грижинел пе хем те дел водство пле ромњаке хем пле чхавенге. Значи о ром ка одговоринел англо Јехова башо адава сар грижинела пе пле фамилијаке. Јекх ром со служинела е Јеховаске ваљани те овел љубезно хем мангипаја те грижинел пе пле ромњаке хем пле чхавенге. Ов ваљани те постапинел ленцар исто сар о Исус со постапинела е собраниеа. Кеда јекх ром постапинела  аѓаар, сикавела кај поштујнела е Јехова. (Ефешаните 5:23; дикх и 13 фуснота.)

13. Сар шај јекх ромни те сикавел кај поштујнела о авторитети?

¹³ Е ромња исто аѓаар иси ла важно улога ки фамилија. Ој ваљани те поддржинел пле роме џикоте ов трудинела пе те овел шукар поглавари ки фамилија. Заедно пле ромеа, ола да иси ла одговорност те воспитинел пумаре чхавен. Јекх начин сар сикавела пле чхавен те поштујнен е јаверен тано аѓаар со ој да ка овел пример ко адава (Изреки 1:8). И ромни ваљани те поштујнел пле роме хем те поддржинел лескере одлуке. Чак кеда на согласинела пе леа ко нешто, ој ко љубезно начин ка вакерел пло мислење хем ка сикавел поштовање. Кеда јекх ромни тани ко брако некасаја со нане е Јеховаскоро сведоко, иси ла посебна предизвикија. Ама, ако понадари да сикавела мангипе хем поштујнела пле роме, шај јекх диве ов да те мангел те пенџарел е Јехова хем те служинел леске. (Читин 1. Петрово 3:1.)

14. Сар шај те сикавен о чхаве кај поштујнена о авторитети?

¹⁴ О чхаве тане скапоцена е Јеховаске, ленге ваљани посебно заштита хем водство. Кеда о чхаве тане послушна пле родителенге, ола керена лен бахтале. Сој најважно, кеда тане послушна сикавена поштовање спрема о Јехова хем керена ле бахтало (Изреки 10:1). Ко бут фамилие, о чхаве бајрона само јекхе родителеа. Тегани шај те овел пхаро хем е родителеске хем е чхавенге. Ама кеда о чхаве тане послушна хем поддржинена адале јекхе родителе, ка овел лен пошукар живото. Било сар те овел, нијекх фамилија нане совршено. Ама секоја фамилија шај те овел бахтали ако секова јекх лендар шунела е Јеховаскоро водство. Адава анела фалба е Јеховаске, о Створители со керѓа са о фамилие (Ефешаните 3:14, 15).

15. Сар шај те сикава кај поштујнаја околен со иси лен авторитети ко собрание?

¹⁵ О Јехова дела амен водство преку о христијанско собрание. Ов денѓа е Исусеске целосно авторитети упро собрание (Колошаните 1:18). А о Исус поставинѓа о „верно хем разборито робо“ те грижинел пе е Девлескере народоске ки Пхув (Матеј 24:45-47). Авдиве, о „верно хем разборито робо“ тано о Водечко тело. О Водечко тело дела амен духовно храна ко право време која поможинела аменге амари вера те ачхол зорали. О старешине, о слуга-помошникија хем о покраинска надгледникија добинена упатствија таро Водечко тело хем поможинена е собраниенге ко цело свето те ачховен духовно зорале. Са акала пхраља иси лен одговорност те грижинен пе аменге. Ола ка одговоринен англо Јехова сар керена адава. Адалеске, кеда поштујнаја акале пхрален, поштујнаја е Јехова. (Читин 1. Солуњаните 5:12; Евреите 13:17; дикх и 14 фуснота.)

16. Соске шај те вакера кај о старешине хем о слуга-помошникија тане именујме таро свети дух?

¹⁶ О старешине хем о слуга-помошникија поможинена сариненге ко собрание те ачховен верна е Девлеске хем те овен ко јекхипе. Џанѓола пе, ола да тане несовршена мануша сар аменде. А сар тане бириме акала пхраља? Ола ваљани те пхерен о условија сој тане пишиме ки Библија (1. Тимотеј 3:1-7, 12; Тит 1:5-9). О Јехова користинѓа пло свети дух те поможинел е манушенге со пишинѓе и Библија јасно те вакерен кола тане адала условија. О старешине молинена е Јехова те дел лен свети дух кеда керена лафи башо адава касте те именујнен сар старешина или слуга-помошнико. Акава  јасно сикавела кај о Јехова хем о Исус водинена о собранија (Дела 20:28). О пхраља кола тане именујме те поможинен аменге хем те грижинен пе аменге тане поклон таро Девел (Ефешаните 4:8).

17. Со ка ваљани понекогаш те керел јекх пхен те шај те сикавел поштовање?

¹⁷ Понекогаш ко несаво собрание нане старешине или слуга-помошникија со шај те керен несави задача. Ко адава случај, и задача шај те керел ла јекх крстимо пхрал. Ама ако нане ни асавко пхрал, тегани и задача шај ка ваљани те керел ла јекх пхен. Кеда јекх пхен керела јекх задача со нормално ваљани крстимо пхрал те керел, и пхен ваљани те учхарел пло шеро, шамијаја или стадикаја (1. Коринќаните 11:3-10). Ко асавко начин ој сикавела кај поштујнела о поглаварство со денѓа ле о Јехова ки фамилија хем ко собрание. (Дикх и 15 фуснота.)

18-19. а) Со сикљоваја таро Римјаните 13:1-7? б) Сар сикаваја поштовање спрема о властија?

¹⁸ Авдиве, о Јехова дозволинела е манушикане властенге те овел лен несаво авторитети, хем амен ваљани те поштујна лен. Ола грижинена пе ко државе те овел несаво редо хем обезбединена е манушенге различна услуге. Е Девлескере слуге тане послушна ко упатство сој тано пишимо ко Римјаните 13:1-7. (Читин.) Амен сием „подложна е властенге“ хем поштујнаја о законија ки пхув коте со живинаја. Акала законија шај те влијајнен упри амари фамилија, бизнис или амаро имот. На пример, амен платинаја данокија хем даја точна податокија кеда пхераја несаве формуларија или документија со родена о властија. Ама со ваљани те кера кеда о властија родена  амендар те кера нешто сој тано против е Девлескоро закони? О апостол Петар вакерѓа: „Мора повише те шуна е Девле, него е манушен“ (Дела 5:28, 29).

¹⁹ Ако мора те кера лафи несаве службено манушеа, сар на пример, судијаја или полицајцоја, амен ваљани секогаш те сикава поштовање. О терне сикавена поштовање пумаре наставниконге хем е јаверенге со керена бути ки ленгири школа. Ки бути, амен поштујнаја амаре газден чак ако о јавера на керена адава. Кеда постапинаја ко асавко начин, џаја пало пример е Павлескоро кова со поштујнела сине е властен чак кеда адава на сине локхо (Дела 26:2, 25). Ако о јавера на постапинена шукар аменцар, амен понадари да ваљани те сикава кај поштујнаја лен. (Читин Римјаните 12:17, 18; 1. Петрово 3:15.)

20-21. Кола шукар буќа ка овен ако поштујнаја е јаверен?

²⁰ О мануша ко свето сикавена са похари поштовање спрема о јавера. Ама е Девлескере слуге тане појавер. Амен трудинаја амен те поштујна са е манушен. Амен шунаја о совет таро апостол Петар: „Поштујнен саринен“ (1. Петрово 2:17). Кеда сикаваја поштовање, о јавера дикхена адава. О Исус вакерѓа: „Мукхен тумари светлина те светинел англо мануша, те шај ола те дикхен тумаре шукар буќа со керена лен хем те славинен тумаре Даде“ (Матеј 5:16).

²¹ Кеда сикаваја поштовање ки фамилија, ко собрание хем ко јавера подрачја ко амаро живото, тегани амаро шукар пример шај те поттикнинел е јаверен те дознајнен повише башо Јехова. Кеда сикаваја кај поштујнаја е јаверен, сикаваја кај поштујнаја е Јехова. Аѓаар кераја е Јехова бахтало, хем сикаваја кај мангаја ле.