1-3. а) Сар дикхена бут мануша ки пумари бути? б) Саве пучиба ка дикха ко акава поглавје?

 О МАНУША ко цело свето керена бут бути те шај те грижинен пе песке хем пле фамилијаке. Бут џене на мангена пумари бути, а несаве чак мука лен те џан секова диве ки бути. Ако ту да осетинеа тут аѓаар, со ка поможинел туке те уживине повише ки тли бути?

² О Јехова вакерела аменге: „Секова мануш ваљани те хал хем те пиел хем те уживинел ко шукар буќа таро цело пло трудо. Адава тано поклон таро Девел“ (Проповедник 3:13). О Јехова створинѓа амен те овел амен потреба хем желба те кера бути. Ов мангела амен те уживина ки амари бути. (Читин Проповедник 2:24; 5:18.)

³ Адалеске, со ка поможинел аменге те уживина ки бути? Сави бути ваљани о христијања те одбинен? Сар шај те ова урамнотежена машкар амари бути хем и служба е Јеховаске? Хем која тани и најважно бути со шај те кера ла?

4-5. Со мислинела о Јехова баши бути?

⁴ О Јехова бут мангела те керел бути. Ки 1. Мојсеева 1:1 пишинела: „Ко почеток о Девел керѓа о небо хем и  пхув“. Откеда керѓа и Пхув хем са о јавера буќа, ов дикхља кај са адава со керѓа сине „бут шукар“ (1. Мојсеева 1:31). Амаро Створители сине задоволно таро са адава со керѓа (1. Тимотеј 1:11).

⁵ О Јехова никогаш на чхинавела те керел бути. О Исус вакерѓа: „Мо Дад керела бути са џи акана“ (Јован 5:17). Чаче, на џанаја са о шуже буќа со панда керела лен о Јехова, ама несаве лендар џанаја. Ов биринела околен со ка владинен лескере Чхавеа, е Исусеа, ко небо (2. Коринќаните 5:17). О Јехова исто аѓаар грижинела пе е манушенге хем активно водинела о проповедничко дело ко цело свето. Адалеске милиоња мануша пенџарена е Јехова хем иси лен надеж те живинен засекогаш ко рај ки Пхув (Јован 6:44; Римјаните 6:23).

6-7. Саво работнико тано о Исус?

⁶ О Исус, исто сар пло Дад, бут мангела те керел бути. Англедер те авел ки Пхув, о Исус сине е Девлескоро „вешто градители“, соске заедно е Јеховаја керѓа са о буќа сој ко небо хем ки Пхув (Изреки 8:22-31; Колошаните 1:15-17). Џикоте сине ки Пхув, о Исус понадари да керела сине бут бути. Панда сар терно, ов сиклило о столарско занати, изгледа керела сине греда, удара, асталија, столице хем јавера предметија таро каш. О Исус добором шукар керела сине пли бути со сине пенџардо сар „о столари“ (Марко 6:3).

⁷ Ама, е Исусескири најважно бути ки Пхув сине те проповединел о шукар хабери хем те сикавел е манушен башо Јехова. Сине ле трин берш текваш те завршинел пли служба, хем ов керела сине бути таро рано сабајле џи касно раќате (Лука 21:37, 38; Јован 3:2). О Исус пхирѓа пешки бут километре ко пхувјале  друмија те проповединел о шукар хабери кобор со шај повише манушенге (Лука 8:1).

8-9. Соске о Исус уживинела сине ки пли бути?

⁸ Е Исусеске сине сар хајбе те керел адава со мангела о Девел. Адава дела ле сине сила. Сине диве кеда о Исус добором бут сине зафатимо проповедибаја со чак на сине ле време те хал маро (Јован 4:31-38). Ов користинела сине секоја прилика те поможинел е јаверенге те сикљовен башо лескоро Дад. Адалеске шај сине те вакерел е Јеховаске: „Славинѓум тут ки пхув, аѓаар со завршинѓум и бути со денѓан ман те керав ла“ (Јован 17:4).

⁹ Јасно тано кај о Јехова хем о Исус чаче керена бут бути. Ола тане бахтале хем уживинена ки пумари бути. Амен мангаја те постапина сар о Девел хем те џа пало е Исусескоро пример (Ефешаните 5:1; 1. Петрово 2:21). Адалеске амен да кераја бути хем даја амендар са кеда кераја нешто.

10-11. Со ка поможинел аменге те дикха позитивно ки амари бути?

¹⁰ Сар е Јеховаскоро народо, амен кераја бут бути те шај те грижина амен аменге хем амаре фамилијаке. Ама нане секогаш локхо те уживина ки бути. Адалеске, со те кера те шај те уживина ки амари бути?

¹¹ Ов позитивно. Шај нашти те менина о тхан хем адава кобор кераја бути, ама шај те менина амаро стави. Ка поможинел амен бут ако хаљоваја со очекујнела амендар о Јехова. На пример, о Јехова очекујнела таро поглавари ки фамилија те грижинел пе кобор со шај башо потребе пле фамилијакере. Уствари, и Библија вакерела ако некој на грижинела пе пле фамилијаке  „полошно тано таро мануш сој бизи вера“ (1. Тимотеј 5:8). Ако ту сиан поглавари ки фамилија, сигурно кереа бут бути те шај те грижине тут тле фамилијаке. Бизи разлика дали мангеа тли бути или на, ту џанеа кај адалеа со грижинеа тут тле фамилијаке, ту угодинеа е Јеховаске.

12. Сар поможинела туке адава со сиан буќарно хем чесно?

¹² Ов буќарно хем чесно. Аѓаар ка овел туке полокхо те уживине ки бути (Изреки 12:24; 22:29). Сар прво е газда ка овел ле повише доверба ки туте. О газдија ценинена чесна работникон адалеске со на чорена паре, материјалија или време (Ефешаните 4:28). Сој најважно, о Јехова џанела кај сиан буќарно хем чесно. Шај те овел тут „чисто совест“ соске џанеа кај угодинеа тле Девлеске со мангеа ле (Евреите 13:18; Колошаните 3:22-24).

13. Со шај јавер те случинел пе ако сием чесна ки бути?

¹³ Ов свесно башо адава кај тло понашибе ки бути шај те анел слава е Јеховаске. Акава дела амен панда јекх причина соске ваљани те уживина ки амари бути (Тит 2:9, 10). Шај чак те случинел пе некој таро тле колеге те мангел те проучинел и Библија таро тло шукар пример. (Читин Изреки 27:11; 1. Петрово 2:12.)

14-16. Башо со ваљани те размислина кеда биринаја бути?

¹⁴ Ки Библија нане списако која бути о христијања ваљани те прифатинен, а која на. Ама ки лате иси начелија со шај те поможинен аменге те ана шукар одлуке кеда керела пе лафи баши бути (Изреки 2:6). Џикоте користинаја о библиска начелија, шај те пуча амен акала пучиба.

 ¹⁵ Дали акаја бути родела мандар те керав нешто со о Јехова вакерела кај тано погрешно? Амен сиклилем кола буќа о Јехова мрзинела, сар сој о чорибе хем о ховајбе (2. Мојсеева 20:4; Дела 15:29; Ефешаните 4:28; Откровение 21:8). Амен на прифатинаја бути која сој тани против е Јеховаскере начелија. (Читин 1. Јованово 5:3.)

¹⁶ Дали акале буќаја поддржинава нешто со о Јехова осудинела? На пример, со ако нудинела пе туке те кере бути сар чистачи ко несаво казино или обложувалница?  Нане ништо погрешно ко адава те керел пе бути сар чистачи. Ама, ту џанеа кај о комари тано јекх врста алчност хем о Јехова мрзинела адава. Иако ту лично на кхелеа комари, ама адалеа со кереа бути ко асавко тхан, зарем на поддржинеа адава со о Јехова мрзинела? (1. Коринќаните 6:10; 1. Тимотеј 3:8).

17. Со ка поможинел аменге те ана одлуке со ка овен угодна е Девлеске?

¹⁷ Кеда користинаја е Девлескере начелија, амен шај те ова сар о мануша сој тане опишиме ко Евреите 5:14, кола со ленгири „способност хаљојбаске преку искуство тани вежбими те разликујнел о исправно хем о погрешно“. Пуч тут: „Дали ка сопкинав е јаверен ако прифатинава акаја бути? Дали ка ваљани баши акаја бути те мукхав ме брачно партнере хем е чхавен хем те џав ки јавер пхув? Сар адава ка влијајнел упри ленде?“

18. Соске шај те овел пхаро те концентририна амен ко амаро обожавибе?

¹⁸ Шај те овел пхаро о служибе е Јеховаске те чхива ле ко прво тхан, посебно ко акава „бут пхаро време“ (2. Тимотеј 3:1). Нане локхо те аракхел пе хем те задржинел пе бути. Џанѓола пе, амен ваљани те грижина амен амаре фамилијаке, ама џанаја кај амаро обожавибе тано ко прво тхан. На смејнаја те дозволина о материјална буќа те овен аменге најважна ко живото (1. Тимотеј 6:9, 10). Сар шај те поможинел аменге и способност ’те проценина сој тано најважно‘ те концентририна амен ко амаро обожавибе е Јеховаске хем ко исто време те грижина амен амаре фамилијаке? (Филипјаните 1:10).

19. Сар и доверба ко Јехова ка поможинел амен те ова урамнотежена баши амари бути?

 ¹⁹ Те овел тут целосно доверба ко Јехова. (Читин Изреки 3:5, 6.) О Девел џанела со точно ваљани аменге хем бут грижинела пе аменге (Псалм 37:25; 1. Петрово 5:7). Лескоро Лафи вакерела: „Ко тумаро живото те на овел тумен мангипе спрема о паре, него овен задоволна адалеа со иси тумен. Соске, ов [о Девел] вакерѓа: ’Никогаш нане те мукхав тут хем нане те иранав туке мло думо‘“ (Евреите 13:5). О Јехова на мангела стално те секирине тут сар ка грижине тут тле фамилијаке. Ов стално сикавѓа кај шај те грижинел пе башо потребе пле народоскере (Матеј 6:25-32). Бизо разлика сави тани амари ситуација, амен редовно проучинаја е Девлескоро Лафи, проповединаја о шукар хабери хем сием присутна ко амаре христијанска состанокија (Матеј 24:14; Евреите 10:24, 25).

20. Сар шај те живина едноставно живото?

²⁰ Тли јакх нека овел концентририми само ки јекх бути. (Читин Матеј 6:22, фуснота, 23.) Адава значинела те живина едноставно живото те шај те концентририна амен те служина е Јеховаске. На смејнаја те дозволина о паре, о удобно живото хем и најневи технологија те овен аменге поважна таро амаро амалипе е Девлеа. Адалеске, со ка поможинел аменге те чхива ко прво тхан о најважна буќа? Амен мора те да са амендар те на кхува ко борчи. Ако више иси тут борчи, кер туке плани те тикњаре ле или те исплатине ле. Ако на пазинаја, о материјална буќа шај те лен амендар бут време хем сила, хем шај нане те овел амен време те молина амен, те проучина хем те џа ки служба. Наместо те дозволина  о материјална буќа те комплициринен амаро живото, амен мангаја те сикљова те ова задоволна основна буќенцар сар сој хајбе хем урајбе (1. Тимотеј 6:8). Било сави те овел амари ситуација, ка овел шукар често те испитина саве тане амаре околностија те дикха дали шај те служина е Јеховаске ки побари мера.

21. Соске ваљани те одлучина со ка овел аменге ко прво тхан ко амаро живото?

²¹ Те овен тут исправна приоритетија. Ваљани мудро те користина амаро време, сила хем материјална буќа.  Ако на пазинаја о буќа со нане добором важна, сар сој о образование или о паре, шај те лен амаро скапоцено време. О Исус вакерѓа: „Најангле роден о царство“ (Матеј 6:33). О одлуке со анаја лен, амаре навике, адава со кераја секова диве хем амаре целија сикавена сој аменге ко прво тхан ко амаро вило.

22-23. а) Која тани и најважно бути со шај те кера ла сар христијања? б) Со ка поможинел аменге те уживина ки амари бути?

²² И најважно бути со шај те кера ла тани те служина е Јеховаске. Јекх главно начин сар шај те служина леске тано аѓаар со ка проповедина о шукар хабери е јаверенге (Матеј 24:14; 28:19, 20). Сар о Исус, мангаја те да амендар са те кера акаја бути. Несаве селинѓе пе ко тхана коте со иси побари потреба проповедибаске. А јавера сикљовена јавер чхиб те шај те проповединен е манушенге ки ленгири чхиб. Кер лафи адаленцар со керѓе асавке промене хем пуч лен башо адава. Ола ка вакерен туке кај ленгоро живото акана тано побахтало хем иси ле побари смисла. (Читин Изреки 10:22.)

²³ Авдиве, бут џене те шај те обезбединен пле фамилијаке о најосновна буќа керена бут саатија бути па чак ко повише тхана. О Јехова џанела адава хем ценинела са со кераја те грижина амен амаре фамилијаке. Бизи разлика сави бути кераја, мангаја те ова сар о Јехова хем о Исус кола со керена бут бути. Хем ма те бистра кај амари најважно бути тани те служина е Јеховаске хем те проповедина о шукар хабери башо е Девлескоро Царство. Адава ка керел амен те ова чаче бахтале.