Џи околенде со мангена е Јехова хем лескоро Лафи, и Библија:

„Ка џанен о чачипе, хем о чачипе ка ослободинел тумен“, вакерѓа о Исус (Јован 8:32). Размислин сар осетинѓан тут кеда прво пути дознајнѓан башо чачипе тари Библија! Возбудливо сине те џане кај ко акава свето сој пхердо ховајбаја, амен шај те сикљова о чачипе (2. Тимотеј 3:1).

О Јехова мангела те џана о чачипе. Хем адалеске со мангаја е манушен, амен вакераја ленге башо чачипе. Ама те шај те служина е Јеховаске ваљани нешто повише. Мора бут те трудина амен те живина сар христијања соске бут ценинаја е Јеховаскере начелија. О Исус објаснинѓа јекх важно начин сар шај те сикава е Девлеске кај мангаја ле. Ов вакерѓа: „Ако икерена мле заповедија, ка ачховен ко мло мангипе, сар ме со икерѓум о заповедија мле Дадескере хем ачхиљум ко лескоро мангипе“ (Јован 15:10).

О Исус чаче мангела пле Даде хем керела са со родела лестар лескоро Дад. Ако живинаја сар о Исус, о Јехова ка мангел амен хем ка ова чаче бахтале. Сар со вакерѓа о Исус, „ако џанена акала буќа, бахтале сиен кеда керена лен“ (Јован 13:17).

Надинаја амен кај акаја публикација ка поможинел туке те живине спрема о чачипе тари Библија хем те ове е Девлескоро амал. Молинаја амен тло мангипе спрема о Девел те бајрол хем те ачхове „ко е Девлескоро мангипе“ хем ’те надине тут ко вечно живото‘ (Јуда 21).