ЛЕКЦИЈА 22
Сар шај ту да те проповедине о шукар хабери?
Џикоте сикљовеа о библиска чачипа, шај мислинеа туке: „Сарине ваљани те џанен башо акава“. Хем адава тано точно. Ама, шај иси тут трема кеда ваљани те вакере е јаверенге башо адава со сиклиљан. Те дикха сар шај те накхаве адаја трема хем сар шај те почмине бахталипаја те проповедине о шукар хабери тари Библија.
1. Сар шај те вакере адава со сиклиљан околенге кас со пенџареа?
Е Исусескере ученикија вакерѓе: „Амен нашти те на кера лафи башо адава со дикхлем хем шунѓем“ (Дела 4:20). Ола добором бут ценинѓе о чачипе со мангле те вакерен ле кобор со шај повише манушенге. Дали ту да осетинеа тут аѓаар? Тегани роде прилике те вакере тле фамилијаке хем тле амаленге башо адава со сиклиљан, ама ма бистре те кере адава ко љубезно начин хем те сикаве ленге поштовање. (Читин Колошаните 4:6.)
Сар шај те почмине разговор?
-
Кеда кереа лафи некасаја тари тли фамилија, почмин те кере лафи баши несави библиско тема, аѓаар со ка вакере: „Сиклиљум нешто интересно акава курко“.
-
Вакер јекх охрабрувачко стихо тари Библија јекхе амалеске кова сој тано насвало или секиримо.
-
Кеда о колеге тари бути пучена тут сар накхљан акава курко, вакер ленге со сиклиљан тари Библија ко тло библиско курси или ко состанок.
-
Сикав тле амаленге амари интернет-страница jw.org.
-
Канин некас ко тло библиско курси или сикав леске сар шај коркори те родел библиско курси ки jw.org.
2. Соске тано шукар те чхиве туке цел те проповедине заедно е собраниеа?
Е Исусескере ученикија на проповединена сине само е манушенге касте со пенџарена сине. О Исус „бичхалѓа лен дуј по дуј... ки секоја диз“ те проповединен (Лука 10:1). Адалеске со ов аѓаар организиринѓа лен, ола шај сине те проповединен повише манушенге. Исто аѓаар, адава со о ученикија заедно проповединѓе керѓа лен бахтале (Лука 10:17). Дали ту да шај те чхиве туке цел те проповедине заедно е собраниеа?
ДОЗНАЈН ПОВИШЕ
Сикљов сар шај те накхаве и трема те проповедине хем дикх кобор бахтало ка ове кеда ка вакере о шукар хабери.
3. О Јехова ка овел туја
Несаве шај мангена те проповединен, ама дарана со ка мислинен о мануша баши ленде хем сар ка реагиринен.
-
Дали иси тут трема те вакере е јаверенге адава со сиклиљан? Соске?
Дикх о ВИДЕОКЛИПИ, а пало адава керен лафи башо акава пучибе:
-
Сар акала терне Сведокија накхавѓе пумари дар?
Читин Исаија 41:10, а пало адава керен лафи башо акава пучибе:
-
Сар шај те поможинел туке и молитва кеда дараја те проповедине?
Дали џанљан?
Бут таро е Јеховаскере сведокија мислинѓе кај никогаш ка нашти те проповединен о шукар хабери е јаверенге. На пример, о Сергеј осетинела пе сине кај на врединела хем сине леске пхаро те керел лафи е јаверенцар. Ама, почминѓа те проучинел и Библија. Ов вакерела: „Иако дарава сине, почминѓум те керав лафи е јаверенцар башо адава со сикљовава сине. Изненадинѓум ман кај адава со керава сине лафи е јаверенцар баши Библија, керѓа те овел ман повише доверба ки манде. Исто аѓаар, адава керѓа позорали мли вера“.
4. Сикав поштовање
Кеда вакереа е јаверенге о шукар хабери, размислин на само со ка вакере него исто аѓаар сар ка вакере. Читин 2. Тимотеј 2:24 хем 1. Петрово 3:15, а пало адава керен лафи башо акала пучиба:
-
Сар шај те применине акала стихија кеда кереа лафи е јаверенцар баши Библија?
-
Шај некој тари тли фамилија или таро тле амала нане те согласинен пе туја. Со ваљани те кере, а со на ваљани те кере?
-
Соске тано пошукар те користине пучиба ко тактично начин, наместо силаја те вакере ленге со те верујнен?
5. О проповедибе анела бахталипе
О Јехова денѓа е Исусеске задача те вакерел о шукар хабери. Сар о Исус дикхља ки адаја задача? Читин Јован 4:34, а пало адава керен лафи башо акала пучиба:
-
О шукар хајбе икерела амен ко живото хем керела амен бахтале. Соске о Исус вакерѓа кај те керел пе е Девлескири волја, коте сој вклучимо те вакерел пе о шукар хабери, тано сар те ха несаво хајбе?
-
Со мислинеа, соске шај те ова бахтале кеда проповединаја о шукар хабери?
Предлогија
-
Ко состанок Амаро живото хем служба приметин ко кола начинија шај те почмине разговор.
-
Кер лафи околеа со проучинеа со ваљани те кере те шај те овел тут задача ко состанок Амаро живото хем служба. Адала задаче ка поможинен туке те сикљове сар те објаснине е јаверенге ко со верујнеа.
-
Користин о делија „Несаве шај вакерена“ или „Несаве шај пучена“ те шај те вежбине сар те одговорине ко пучиба или приговорија со често шунаја лен.
НЕСАВЕ ШАЈ ПУЧЕНА: „Со иси нево ки туте?“
-
Сар шај те користине адаја прилика те вакере со сиклиљан ко тло библиско курси?
СО СИКЛИЛЕМ
Те проповедине о шукар хабери заедно е јаверенцар анела бахталипе хем адава нане добором пхаро кобор со шај мислинеа.
Сар ка одговорине?
-
Со поттикнинела амен те вакера е јаверенге о шукар хабери?
-
Сар шај те сикаве поштовање кеда проповединеа?
-
Со ка поможинел туке те накхаве и трема?
ИСТРАЖИН
Дикх штар едноставна начинија сар шај те проповедине о шукар хабери аѓаар со ка користине и визит-картичка башо jw.org.
Сикљов башо штар особине со шај те поможинен туке те проповедине о шукар хабери.
„Дали сиан спремно те ове рибари со астарела манушен?“ (Стражарско кула таро септември 2020)
Дикх сар јекх пример тари Библија шај те дел амен храброст те проповедина о шукар хабери чак кеда сием терне.
Сикљов сар шај те кере лафи баши Библија тле фамилијаја кола со на пенџарена е Јехова.
„Допри до срцето на твоите најблиски“ (Стражарска кула таро 15 март 2014)
Шај исто ка интересинел тут
НАЈЧЕСТА ПУЧИБА
Сар изглединела о библиско курси со нудинена е Јеховаскере сведокија?
Џикоте икерела пе о бесплатно библиско курси, шај те користине било кова превод тари Библија. Ко курси шај те канине некас тари тли фамилија или несаве амале.
