ЛЕКЦИЈА 01
Сар шај те поможинел туке и Библија?
Сарине иси амен пучиба башо живото, о муке, о мерибе хем и иднина. Исто аѓаар, секиринаја амен башо секојдневна буќа, сар на пример, сар те заработина доволно паре башо живото или сар те овел амен бахтали фамилија. Бут мануша халиле кај ки Библија, на само со иси одговорија башо најважна пучиба ко живото, него исто аѓаар кај ки лате иси практична советија со шај те поможинен аменге ко амаро секојдневно живото. Чаче, и Библија шај те поможинел секаске амендар.
1. Ко кола пучиба дела одговор и Библија?
И Библија дела одговор ко акала важна пучиба: Сар уло о живото? Која тани и смисла е животоскири? Соске о мануша цидена муке? Со овела некасаја кеда мерела? Иако сарине мангена те овел мир, соске иси добором бут војне? Со ка овел е пхувјаја ки иднина? Милиоња мануша тане бахтале со аракхле о одговорија башо акала пучиба ки Библија.
2. Сар шај и Библија те поможинел аменге те ова бахтале ко живото?
Ки Библија иси бут корисна советија. На пример, ој шај те поможинел аменге те овел амен бахтали фамилија, те икљова ко крајо кеда иси амен стрес хем те сикљова те уживина ки амари бути. Џикоте разглединаја акава материјали, ка дознајне со вакерела и Библија башо акала хем бут јавера буќа. Ко крајо, ту да шај ка согласине тут кај „цело Лил [са адава со пишинела ки Библија] тано... корисно“ (2. Тимотеј 3:16).
Акаја публикација нане замена баши Библија. Наместо адава, ој поттикнинела тут те истражине и Библија. Адалеске, ка овел шукар те читине о стихија со иси ко акала лекцие хем те размислине сар ола тане поврзиме адалеа со сикљовеа.
ДОЗНАЈН ПОВИШЕ
Дикх сар и Библија поможинѓа несаве манушенге, сар шај те уживине џикоте читинеа ла хем соске тано шукар некој те поможинел туке те хаљове ла.
3. И Библија шај те дел амен мудро водство
Исто сар јекх батериско лампа која со сикавела аменге о друмо кеда тано темно, аѓаар и Библија шај те сикавел аменге сар шај те ана шукар одлуке ко живото хем вакерела аменге со аџикерела амен ки иднина.
Читин Псалм 119:105, а пало адава керен лафи башо акала пучиба:
-
Со мислинѓа баши Библија о писатели таро акава псалм?
-
Со мислинеа ту баши Библија?
4. И Библија шај те дел амен одговор ко амаре пучиба
Јекх џувли аракхља о одговорија ки Библија башо пучиба со мучинѓе ла бершенцар. Дикх о ВИДЕОКЛИПИ, а пало адава керен лафи башо акала пучиба:
-
Кола пучиба мучинена сине акале џувља?
-
Сар поможинѓа лаке о проучибе и Библија?
И Библија поттикнинела амен те пуча пучиба. Читин Матеј 7:7, а пало адава керен лафи башо акава:
-
Дали иси тут несаве пучиба коленге и Библија шај те дел тут одговор?
5. Ту шај те уживине џикоте читинеа и Библија
Бут мануша уживинена те читинен и Библија адалеске сој тане свесна кај ој шај бут те поможинел ленге. Дикх о ВИДЕОКЛИПИ, а пало адава керен лафи башо акала пучиба:
-
Со мислинена о терне таро акава видеоклипи башо читибе и Библија?
-
Соске ола мангена те читинен и Библија?
И Библија вакерела кај лакере советија шај те ден амен утеха хем надеж. Читин Римјаните 15:4, а пало адава керен лафи башо акава пучибе:
-
Дали мангеа те џане повише башо адава сар и Библија шај те дел тут утеха хем надеж?
6. О јавера шај те поможинен аменге те хаљова и Библија
Освен со читинена и Библија коркори, бут џене халиле кај поможинела ленге адава да со керена е јаверенцар лафи баши лате. Читин Дела 8:26-31, а пало адава керен лафи башо акава пучибе:
-
Сар шај те хаљова и Библија? (Дикх о стихија 30 хем 31.)
Е Етиопјанеске ваљанѓа помош те шај те хаљовел адава со читинела сине. Буте џененге користинела адава со керена лафи е јаверенцар баши Библија
НЕСАВЕ ШАЈ ВАКЕРЕНА: „Само ка нашаве тло време ако проучинеа и Библија“.
-
Со ка вакере ту, хем соске?
СО СИКЛИЛЕМ
И Библија дела советија башо секојдневно живото, дела одговор ко важна пучиба хем дела утеха хем надеж е манушенге.
Сар ка одговорине?
-
Саве советија шај те аракха ки Библија?
-
Ко кола пучиба дела одговор и Библија?
-
Башо кола буќа мангеа те џане нешто повише тари Библија?
ИСТРАЖИН
Дикх сар шај о библиска советија те поможинен туке авдиве.
„Библијата крие безвременска мудрост“ (Стражарска кула бр. 1, 2018)
Дикх сар и Библија поможинѓа јекхе манушеске кова со боринела пе сине негативна чувствонцар панда таро тикнипе.
Дикх несаве практична советија со дела и Библија е фамилиенге.
Дикх сар и Библија сикавела кој чаче владинела е светоја.
Шај исто ка интересинел тут
НАЈЧЕСТА ПУЧИБА
Сар изглединела о библиско курси со нудинена е Јеховаскере сведокија?
Џикоте икерела пе о бесплатно библиско курси, шај те користине било кова превод тари Библија. Ко курси шај те канине некас тари тли фамилија или несаве амале.
