ЛЕКЦИЈА 55
Сар шај те поможине ко тло собрание?
Ко цело свето, милиоња мануша тане бахтале со шај те обожавинен е Јехова ко пумаре собранија. Ола ценинена со шај адатхе те добинен упатствија хем водство, хем бахтале тане со шај ко бут начинија те поможинен ко пумаре собранија. Дали ту да сиан бахтало хем ценинеа адава со шај те ове дело таро собрание? Дали мангеа те поможине ко тло собрание?
1. Сар шај те користине тло време хем тли сила те шај те поможине ко собрание?
Секој амендар шај те поможинел ко собрание. На пример, дали ко собрание иси попхуре или насвале? Шај ли те поможине ленге те авен ко состанокија? Дали шај те поможине ленге ко јавер практично начин, на пример те џа те кине ленге адава со ваљани ленге или те поможине ленге ко кхерутне буќа? (Читин Јаков 1:27.) Исто аѓаар, шај те чхива амен ко располагање те поможина кеда чистинела пе хем одржинела пе амари дворана. Никој силаја на чхивела амен те кера акала буќа. О мангипе спрема о Девел хем спрема амаре пхраља хем пхења поттикнинела амен те вакера: „Аке сиум ме! Бичхал ман!“ (Исаија 6:8).
Окола сој крстиме шај те поможинен ко собрание ко јавера да начинија. О пхраља кола со исполнинена о библиска условија шај те служинен сар слуга-помошникија или старешине. О пхраља хем о пхења шај те служинен сар пионерија. Несаве пхраља хем пхења шај те поможинен ки изградба теократска објектија или те селинен пе ко јавер собрание коте со иси побари потреба.
2. Сар шај те користине тле материјална буќа те шај те поможине ко собрание?
Амен шај те сикава чест е Јеховаске амаре материјална буќенцар (Изреки 3:9). Бахтале сием со шај те да паре хем јавера материјална буќа те шај те поддржина о собрание хем о проповедибе ко цело свето. (Читин 2. Коринќаните 9:7.) Исто аѓаар, амаре доброволна прилогија користинена пе кеда иси несави катастрофа. Бут џене одлучинѓе редовно те чхивен паре ки страна те шај те ден адава сар доброволно прилог. (Читин 1. Коринќаните 16:2.) Амаре прилогија шај те чхива лен ко кутие башо доброволно прилог ки дворана или те да лен електронски преку амари интернет-страница donate.pr418.com. Адалеа со мукхља амен коркори те одлучина сар ка користина амаре материјална буќа, о Јехова денѓа амен прилика те сикава кобор мангаја ле.
ДОЗНАЈН ПОВИШЕ
Дикх некобор начинија сар шај те поможине ко тло собрание.
3. Користин тле финансиска средствија
О Јехова хем о Исус мангена околен со дена таро вило. На пример, о Исус пофалинѓа јекхе удовица која со денѓа прилог е Јеховаске, иако ој сине бут чороли. Читин Лука 21:1-4, а пало адава керен лафи башо акала пучиба:
-
Со мислинеа, дали о Јехова ценинела само о баре прилогија?
-
Сар осетинена пе о Јехова хем о Исус кеда даја таро вило?
Те шај те дознајне сар користинена пе амаре прилогија дикх о ВИДЕОКЛИПИ, а пало адава керен лафи башо акава пучибе:
-
Сар амаре прилогија поможинена е собраниенге ко цело свето?
4. Чхив тут ко располагање те поможине
Ко библиско време, е Јеховаскере слуге бут трудинена пе сине те икерен ки шукар состојба о тхан коте со обожавинена сине е Јехова. Ама, освен со денѓе паре ола керѓе панда нешто. Со сине адава? Читин 2. Летописи 34:9-11, а пало адава керен лафи башо акава пучибе:
-
Сар шај сине секова Израелцо те учествујнел ко одржибе е Јеховаскоро кхер?
Те шај те дикхе сар е Јеховаскере сведокија џана пало адава библиско пример дикх о ВИДЕОКЛИПИ, а пало адава керен лафи башо акала пучиба:
-
Соске тано важно те икера амаре дворане чиста хем ки шукар состојба?
-
Сар шај ту те поможине?
5. О пхраља шај те трудинен пе те керен повише ко собрание
И Библија охрабринела е пхрален те ден пестар са те поможинен ко собрание. Ама, сар шај о пхраља те керен адава? Те шај те дикхе јекх пример дикх о ВИДЕОКЛИПИ, а пало адава керен лафи башо акава пучибе:
-
Со керѓа о Рајан те шај повише те поможинел ко собрание?
Ки Библија пишинела кола условија ваљани о пхраља те исполнинен ако мангена те служинен сар слуга-помошникија хем старешине. Читин 1. Тимотеј 3:1-13, а пало адава керен лафи башо акала пучиба:
-
Кола условија ваљани те исполнинен о пхраља ако мангена те служинен сар слуга-помошникија хем старешине?
-
Со очекујнела пе таро ленгере фамилие? (Дикх о стихија 4 хем 11.)
-
Со мислинеа, сави корист ка овел е собрание ако о пхраља трудинена пе те исполнинен акала условија?
НЕСАВЕ ШАЈ ПУЧЕНА: „Сар финансиринела пе адава со керена е Јеховаскере сведокија?“
-
Сар ка одговорине ту?
СО СИКЛИЛЕМ
О Јехова бут ценинела кеда користинаја амаро време, сила хем материјална буќа те шај те поможина ко собрание.
Сар ка одговорине?
-
Сар шај те користине тло време хем тли сила те шај те поможине ко собрание?
-
Сар шај те користине тле материјална буќа те шај те поможине ко собрание?
-
Ко саве начинија мангеа ту те поможине ко собрание?
ИСТРАЖИН
И Библија денѓа несаве улоге е крстиме пхраленге. Ама со ако јекх пхен ваљани те керел несаве буќа со керела лен јекх пхрал?
„О поглаварство ко собрание“ (Стражарска кула таро февруари 2021)
Дикх сар амаре храбра пхраља ингарѓе амаре публикацие е пхраленге ко Конго.
Дознајн сар финансиринена пе амаре активностија хем сар адава разликујнела пе таро јавера религиозна организацие.
„Сар финансиринела пе адава со керена е Јеховаскере сведокија?“ (интернет статија)
Шај исто ка интересинел тут
НАЈЧЕСТА ПУЧИБА
Сар изглединела о библиско курси со нудинена е Јеховаскере сведокија?
Џикоте икерела пе о бесплатно библиско курси, шај те користине било кова превод тари Библија. Ко курси шај те канине некас тари тли фамилија или несаве амале.
