Бут паре тане трошиме башо војне.

•   „Лани о владе ко цело свето трошинѓе 2,2 билионија доларија башо некобор војне. Адава тано највише паре со џи акана сине трошиме башо војне“ (The Washington Post, 13 февруари 2024).

 И цена со платинела пе баши јекх војна тани бут повише него само паре. Аке јекх пример: И војна ки Украина.

•   Војникија. Спрема несаве проценке, скоро 500.000 војникија сине мударде или раниме откеда почминѓа и војна англедер дуј берш.

•   Цивилија. Спрема о Обединета нацие, повише таро 28.000 тане мударде или повредиме. Ама јекх баро службенико таро ОН вакерѓа: „Нашти те проценинел пе кобор манушенгере животија сине уништиме ки акаја војна“. a

 О муке со о мануша цидена таро војне хем конфликтија ко цело свето тане бут бари цена со ола платинена ла.

•   114 милионија — о број таро мануша со мора сине те селинен пе башо војне или насилство ко цело свето џи ко септември 2023 берш.

•   783 милионија — о број таро мануша кола со ачхона бокхале. „О конфликтија панда тане и најбари причина башо бокхалипе, 70 отсто таро мануша со ачхона бокхале ко цело свето, живинена ко подрачја коте со иси војне хем насилство“ (Светско програма баши храна).

 Дали некогаш ка завршинен о војне? Шај ли те надина амен кај ка овел мир? Дали некогаш ка авел време кеда нане те овен чороле мануша хем сарине ка уживинен ко адава со бијанела и пхув хем ка овел доволно хајбаске? Со вакерела и Библија?

 И Библија пророкујнѓа кај ко цело свето ка овен војне хем ола тане претставиме јекхе јавачеа ко грас.

•   „Хем иклило јекх јавер грас лоле бојаја. Лескере јаваческе сине дендо те лел о мир тари пхув те шај о мануша те мударен пе јекх јекхеа. Хем сине леске дендо баро мачи“ (Откровение 6:4).

 Пали лесте џана дуј јавера јавачија со претставинена о бокхалипе хем о мерибе кова со авела таро заразна насвалипа хем јавера причине (Откровение 6:5-8). Те шај те дознајне повише башо акава библиско пророштво хем соске шај те ова сигурна кај исполнинела пе ко амаре диве, дикх и статија „Што претставуваат четирите јавачи?“

 Панда хари, о паре ко цело свето нане те користинен пе башо војне. Ама акава нане те керел јекх мануш. И Библија вакерела:

•   О Девел ка чхинавел „о војне ки цели пхув“ (Псалм 46:9).

•   О Девел ка цидел о лошна последице таро војне. „Ка косел секоја асвин таро ленгере јакхја, хем мерибе нане те овел више, ни жалибе, ни ројбе, ни дукха. Са со сине англе, накхља“ (Откровение 21:4).

•   О Девел ка анел трајно мир сариненге. „Мло народо ка живинел ко тхана коте со иси мир, ко тхана коте сој безбедна хем ко тхана коте со никој нане те вознемиринел лен“ (Исаија 32:18).

 Спрема о библиска пророштвија о војне хем о јавера настанија со овена авдиве сикавена кај панда хари ка овел мир.

 Сар о Девел ка анел мир? Ов ка керел адава преку пли небесно влада, јавере лафенцар о Царство (Матеј 6:10). Те шај те дознајне сој тано акава Царство хем со значинела акава туке, дикх о кратко видео Сој е Девлескоро Царство?