Ко 9 октомври 2024 берш, и Светско фондација баши заштита е природакири објавинѓа јекх извештај башо адава кај о активностија е манушенгере влијајнена лошно упро животне. Ко извештај пишинела кај „ко последна 50 берша (1970-2020), о број е дива животненгоро намалинѓа пе башо 73%“. Пало адава сине акава предупредување: „Нане те претеринел пе ако вакерела пе кај таро адава со ка случинел пе ко следна панџ берш ка зависинел и иднина е животоскири ки пхув“.

 Нормално тано со бут мануша тане шокириме таро асавке извештаија. Амен мангаја амари бут шужи планета хем пхаро аменге кеда дикхаја кај о животне мучинена пе. Осетинаја амен аѓаар соске е Девлескири намера сине амен те грижина амен е животненге (1. Мојсеева 1:27, 28; Изреки 12:10).

 Адалеске, шај пучеа тут: „Ка успејна ли те заштитина е животнен ки пхув? Со вакерела и Библија?“

 Кобор хем те трудина амен те кера пошукар о буќа, е животненгири иднина зависинела таро Девел. Спрема Откровение 11:18, и Библија пророкујнѓа кај о Девел ка уништинел „околен со уништинена и пхув“. Таро акава стихо сикљоваја дуј буќа:

1.  1. О Девел нане те мукхел о мануша целосно те уништинен и пхув.

2.  2. О Девел панда хари ка керел нешто. Котар џанаја адава? Адалеске со авдиве и опасност о мануша те уништинен е животнен тани побари таро било кеда англедер.

 Со ка керел о Девел те шај те решинел акава проблеми? Преку пли небесно влада, или Царство, ов ка владинел упри цели пхув (Матеј 6:10). Адаја влада ка сикавел хем ка обучинел е послушна манушен те шај те џанен сар те грижинен пе е животненге хем те заштитинен лен (Исаија 11:9).