„О насилство упро џувља тано проблеми ко цело свето кова со ширинела пе сар епидемија. Адалеске тано важно те керел пе нешто те шај те чхинавел пе акава“, вакерела и Светско здравствено организација. Акаја организација проценинела кај 30 посто „таро са о џувља со сине ко брако или ки врска доживинѓе физичко хем/или сексуално насилство“ таро ленгоро партнери. А ко јекх извештај таро ОН проценинела пе кај јекхе бершеске, секова диве, по 137 џувља сине мударде таро ленгоро партнери или некастар тари фамилија. a

 И статистика шај сикавела кобор тано баро акава проблеми, ама ни најхари нашти те опишинел и емоционално хем и физичко дукх со секоја жртва доживинела ла.

 Дали доживинеа насилство ки фамилија? Или, дали пенџареа некас со доживинела акава? Ако тано аѓаар, дикх акала мисле тари Библија со шај те поможинен туке.

  Ту на сиан криво

  Шај те добине помош

  На сиан коркори

  Јекх диве нане више те овел насилство ки фамилија

  Сар шај те поможине некаске со доживинела насилство ки фамилија

 Со вакерела и Библија: „Секова јекх амендар мора песке те одговоринел англо Девел“ (Римјања 14:12).

 Ма бистре: Окова со малтретиринела тут тано одговорно башо пле постапке.

 Ако тло партнери вакерела кај ту сиан криво башо адава со ов тано туја насилно, адава нане точно. О ромња заслужинена те овен мангле, а на малтретириме (Колошања 3:19).

 Несаве таро адала со малтретиринена пумаре партнерен шај иси лен психичка проблемија, шај бариле ки фамилија коте со сине насилство или шај тане алкохоличарија. Бизи разлика која тани и причина, окова со малтретиринела тут тано одговорно англо Девел башо адава сар постапинела туја. Хем мора те керел са со ваљани те шај те менинел пе.

 Со вакерела и Библија: „О планија успејнена кеда иси бут советникија“ (Изреки 15:22).

 Ма бистре: Ако на осетинеа тут безбедно или на џанеа со те кере, о јавера шај те поможинен туке.

 Соске ваљани туке помош таро јавера? О насилство ки фамилија нане едноставно проблеми. Шај ка овел туке пхаро те одлучине сој тано најшукар те кере џикоте размислинеа башо акала буќа:

•   Тли лично безбедност

•   Со ка овел најшукар тле чхавенге

•   Тли финансиско ситуација

•   О мангипе спрема тло партнери

•   Шај ка манге те спасине и врска тле партнереа ако ов менинела пе

 Нормално тано ако осетинеа тут буними хем ако и ситуација изглединела туке бут комплицирано. Кастар шај те роде помош?

 Несаво амал или некој тари фамилија колесте со иси тут доверба шај практично те поможинел туке хем те поддржинел тут ко емоционално поглед. Адава со ка кере лафи некасаја со грижинела пе туке, шај бут те поможинел тут.

 О СОС телефонска броја башо жртве со доживинена насилство ки фамилија, шај те поможинен туке ко секова време. Окола со керена бути атхе шај те ден тут предлогија сар те заштитине тут. Ако тло партнери признајнела пло проблеми хем искрено мангела те менинел пе, о СОС броја шај те поможинен леске те керел о прва чекорија башо адава.

 Јавера итна службе шај те поможинен туке ако аракхљовеа ки опасно ситуација. Ко асавке службе тане вклучиме докторија, медицинска сестре хем јавера стручна мануша.

 Со вакерела и Библија: „О Јехова b тано паше узо адала сој пхаге вилеа хем спасинела адален сој пхаге духоја“ (Псалм 34:18).

 Ма бистре: О Девел ветинела кај ка поможинел туке.

 О Јехова чаче грижинела пе туке (1. Петарескоро 5:7). Ов хаљола тле најхор мисле хем чувствија. Шај те утешинел тут преку пло Лафи, и Библија. Хем, мангела те молине тут леске. Кеда молинеа тут, шај те роде лестар мудрост хем сила те шај те икљове ко крајо е ситуацијаја колате со аракхљовеа (Исаија 41:10).

 Со вакерела и Библија: „Секова јекх ка бешел тели пли дракх хем тели пли смоква хем никој нане те даравкерел лен“ (Михеј 4:4).

 Ма бистре: И Библија ветинела кај панда хари ка авел време кеда секова јекх ка осетинел баро мир ко пло кхер.

 Само о Девел о Јехова шај целосно хем засекогаш те решинел амаре проблемија. И Библија ветинела: „Ов ка косел секоја асвин таро ленгере јакхја, хем мерибе нане те овел више, ни жалибе, ни ројбе, ни дукха“ (Откровение 21:4). Ко адава време, нане више те сетина амен ко лошна буќа со доживинѓем лен, наместо адава ка шај те радујна амен ко шуже моментија (Исаија 65:17). И Библија ветинела кај туте да шај те овел тут асавки шужи иднина.