Со вакерела и Библија баши толеранција?
„И толеранција тани шукар особина со керела те овел мир“. (Декларација таро УНЕСКО башо принципија баши толеранција таро 1995 берш).
Тари јавер страна, кеда нане толеранција, адава шај те керел те на овел поштовање, па чак те овел омраза. Околен со иси лен асавке чувствија шај те вакерен лошна буќа, те овел лен предрасуде хем те овен насилна.
Ама, е манушен иси лен различно мислење башо адава со значинела те овел пе толерантно. Несаве мислинена кај некој тано толерантно само ако прифатинела са со керена о јавера. А јавера палем, спрема адава со сикавела и Библија, мислинена кај некој тано толерантно ако поштујнела о право е јаверенгоро коркори те биринел ко со ка верујнел хем сар ка живинел, чак ако ов на согласинела пе адале ставенцар.
Шај ли и Библија те поможинел е манушенге ко авдисутно време те сикавен чачутни толеранција?
И библиско основа баши толеранција
И Библија поттикнинела амен те ова толерантна. Ки лате пишинела: „Тумари разумност нека овел пенџарди англо са о мануша“ (Филипјања 4:5). И Библија охрабринела амен те ова е јаверенцар обѕирна, културна хем праведна. Окола со икерена пе ко акава совет прифатинена е јаверенгоро право сар ка живинен, иако ола шај на согласинена пе адалеа.
Сепак, тари Библија дознајнаја кај о Девел денѓа мерилија спрема кола со о мануша ваљани те живинен. Ој вакерела: „[О Девел] вакерѓа туке, мануша, сој тано шукар“ (Михеј 6:8). Ки лате иси корисна советија кола со о Девел денѓа е манушенге башо ленгоро шукарипе, те шај те овел лен најшукар живото со шај (Исаија 48:17, 18).
О Девел на денѓа амен право те судина е јаверенге. Спрема и Библија, само „јекх тано адава со дела о закони хем сој тано Судија... А кој сиан ту те осудине тле пашутне?“ (Јаков 4:12). О Девел секаске денѓа слобода коркори те анел одлуке баши кола со лично ка одговоринел (5. Мојсеева 30:19).
Со вакерела и Библија башо поштовање
Ки Библија пишинела: „Поштујнен саринен“ (1. Петарескоро 2:17). Адалеске, окола со одлучинена те живинен спрема о библиска мерилија поштујнена са е манушен, бизи разлика ко со верујнена или сар живинена (Лука 6:31). Акава на значинела кај окола со живинена спрема е Библијакере мерилија ка согласинен пе са адалеа ко со верујнена или мислинена о јавера, или палем кај ка поддржинен са ленгере одлуке. Ама, наместо те понашинен пе грубо хем бизо поштовање, ола ка ден пестар са те шај те понашинен пе е јаверенцар аѓаар сар со понашинела пе сине о Исус.
На пример, јекх пути, о Исус керѓа лафи јекхе џувљаја која со сине ки религија колаја со ов на согласинела пе сине. Исто аѓаар акаја џувли живинела сине манушеа кова со на сине лакоро ром. Асавко живото о Исус на одобринела сине. Сепак, кеда керѓа лаја лафи, ов сикавѓа поштовање (Јован 4:9, 17-24).
Исто сар о Исус, о христијања тане спремна те објаснинен пумаре верувања околенге со мангена те шунен лен, ама кеда керена адава сикавена „хор поштовање“ (1. Петарескоро 3:15). И Библија советинела е христијанен те на чхивен пло мислење е јаверенге. Ки лате пишинела кај окова со џала пало Исус „на ваљани те акошел пе, него ваљани те овел љубезно сариненцар“, а ко адава тане вклучиме окола да со иси лен јавера верувања (2. Тимотеј 2:24).
Со вакерела и Библија баши омраза
Ки Библија пишинела кај ваљани те ова ко мир сариненцар (Евреија 12:14). О мануш со мангела те овел мир на мукхела те бајрол ко лескоро вило омраза. Бизо те керел нешто сој тано против пле ставија, ов дела пестар са те овел ко мир е јаверенцар (Матеј 5:9). Уствари, и Библија поттикнинела е христијанен те манген пле душманен аѓаар со ка понашинен пе шукар, иако о душмања постапинена лошно ленцар (Матеј 5:44).
И Библија вакерела кај о Девел мрзинела, или јавере лафенцар, одвратно леске кеда некој перавела некаскоро достоинство или керела штета е јаверенге (Изреки 6:16-19). Ама о лафи „мрзинела“ акате значинела те овен туке одвратна о лошна постапке. Сепак, и Библија сикавела кај о Девел тано спремно те простинел хем те поможинел е манушенге со мангена те менин пло начин сар живинена, хем те живинен спрема лескере мерилија (Исаија 55:7).
Библиска стихија со керена лафи баши толеранција хем поштовање
Тит 3:2: „Те овен разумна... секогаш кротка сариненцар“.
Јекх разумно мануш тано љубезно спрема адала со иси лен различно мислење лестар, хем аѓаар керела те овел поштовање машкар ленде.
Матеј 7:12: „Са со тумен мангена о мануша те керен туменге, тумен да мора те керен ленге“.
Сарине амен ценинаја кеда о јавера поштујнена амен хем сикавена кај ленге важно сар амен дикхаја ко буќа хем сар осетинаја амен. Те шај те дознајне повише башо адава сар те применине акава пенџардо правило со вакерѓа ле о Исус, дикх и статија „Шта је златно правило?“
Исус Навин 24:15: „Биринен авдиве каске ка служинен“.
Са о мануша иси лен право те анен одлуке коркори песке. Кеда поштујнаја адава право, кераја те овел мир.
Апостолија 10:34: „О Девел нане пристрасно“.
О Девел никас на одвојнела. И култура, о пол, и националност, и раса хем о потекло некаскоро на влијајнела упро адава сар о Девел ка постапинел леа. Окола со мангена те џан пало пример е Девлескоро сикавена поштовање сариненге.
Авакум 1:12, 13: „Девла... ту нашти те трпине о лошнипе“.
Е Девлескири толеранција иси ла границе. Ов нане те мукхел о мануша те керен лошнипе засекогаш. Те шај те дознајне нешто повише башо акава, дикх о видеоклипи Соске о Девел панда мукхела те овел о лошнипе хем о муке?
Римјања 12:19: „Мукхен о Девел те сикавел пли холи, соске тано пишимо: ’Ме ка иранав о лошнипе, ме ка дав лен адава со заслужинена, вакерела о Јехова‘“. a
О Јехова о Девел никаске на денѓа право те иранел лошнипаја башо лошнипе. Ов сариненге ка дел правда ко време кеда ов одрединѓа ле. Те шај те дознајне нешто повише башо акава, читин и статија „Вистинска правда под Божјата влада“.
a Јехова тано е Девлескоро анав (Псалм 83:18). Дикх и статија „Кој тано о Јехова?“
