АЧХОВЕН ЏАНГАВДЕ!
2022: Берш пхердо неволјенцар хем мукенцар — Со вакерела и Библија?
Ко 2022 берш, о војне, о економска проблемија хем о еколошка катастрофе сине главна теме ко вестија. Ама, само и Библија вакерела аменге соске случинена пе асавке буќа.
И чачутни причина башо настанија ко 2022 берш
О настанија со случинѓе пе ко 2022 берш панда повише потврдинена кај живинаја ко периоди колеске со и Библија вакерела кај тано о „последна диве“ (2. Тимотеј 3:1). Акава периоди почминѓа ко 1914 берш. Дикх сар о настанија со случинѓе пе одговоринена адалеа со пророкујнѓа и Библија башо амаро време:
„Војне“ (Матеј 24:6)
„2022 — берш коте со ки Европа иранѓе пе о страшна последице тари војна.“ a
Дикх и статија „И Русија нападинѓа е Украина“.
„Бокхалипе“ (Матеј 24:7)
„2022: Берш коте со сине баро бокхалипе.“ b
Дикх и статија „И војна ки Украина керела те овел побаро бокхалипе ко свето“.
„Заразна насвалипа“ (Лука 21:11)
„Палем појавинѓа пе детско парализа, а исто аѓаар ширинѓе пе о мајмунска сипанице хем о КОВИД-19 понадари да керела баре штете. Акава јасно сикавела кобор тане опасна о заразна насвалипа хем кобор о мануша тане слаба ко адава.“ c
Дикх и статија „Шов милиоња мануша муле таро КОВИД — Со вакерела и Библија башо адава?“.
„Адава со ка дикхен о мануша ка даравел лен“ (Лука 21:11)
„Баро татипе, суше, баре пожарија хем поплаве. Сигурно о нилај 2022 берш, ка памтинел пе таро адава со сине баре климатска промене кола со керѓе бари штета, муле бут мануша хем уништиндиле милиоња кхера.“ d
„Немирија“ (Лука 21:9)
„Адалеске со иси економска проблемија, а посебно со бариле бут о цене, о мануша тане бут похољаме хем адава анѓа ко 2022 берш те бајрол о број таро протестија против о владе.“ e
Дикх и статија „Ко цело свето бајрона о цене — Со вакерела и Библија башо адава?“.
Со ка случинел пе ко следно берш?
Никој амендар нашти те вакерел точно со ка случинел пе ко 2023 берш. Ама јекх џанаја, кај панда хари е Девлескоро Царство, или е Девлескири небесно влада, ка анел баре промене ки пхув (Даниел 2:44). Адаја влада ка цидел са о буќа кола со керена о мануша те циден муке хем ка керел те извршинел пе е Девлескири волја ки цели пхув (Матеј 6:9, 10).
Охрабринаја тут те шуне е Исусескоро совет: „Ачховен џангавде!“, аѓаар со внимателно ка пазине сар о настанија со случинена пе ко свето исполнинена о библиска пророштвија (Марко 13:37). Шај те контактирине аменцар те шај те дознајне повише башо адава сар шај и Библија панда авдиве те поможинел туке хем сар шај ту хем тли фамилија те надинен тумен баши пошукар иднина.
a AP News, „2022 Was Year the Horror of War Returned to Europe,“ by Jill Lawless, 8 декември 2022.
b World Food Programme, „A Global Food Crises“.
c JAMA Health Forum, „Living in an Age of Pandemics—From COVID-19 to Monkeypox, Polio, and Disease X,“ by Lawrence O. Gostin, JD, 22 септември 2022.
d Earth.Org, „What’s Behind the Record-Breaking Extreme Weather Events of Summer 2022?“ by Martina Igini, 24 октомври 2022.
e Carnegie Endowment for International Peace, “Economic Anger Dominated Global Protests in 2022,” by Thomas Carothers and Benjamin Feldman, 8 декември 2022.
Шај исто ка интересинел тут
ОСНОВНА БИБЛИСКА СИКЉОЈБА
Сој е Девлескоро Царство?
Џикоте сине о Исус ки служба, ов керела сине највише лафи башо е Девлескоро Царство. Веконцар, лескере ученикија молинена пе сине те авел о Царство.
ОСНОВНА БИБЛИСКА СИКЉОЈБА
Е Девлескоро Царство почминѓа те владинел ко 1914 берш
Повише таро 2.600 берш англедер, о Девел керѓа јекх моќно цари те дикхел пророчко суно кова со исполнинела пе авдиве.
