Претпоставинела пе кај околу 5 милијарде мануша дикхена о светско првенство со почминѓа таро 20 ноември хем ка трајнел џи ко 18 декември 2022 берш. Бут џене мислинена кај асавке спортска настанија шај те керен нешто повише него само те анен е манушен ко јекх тхан сар публика.

•   „О спорт шај те менинел о свето. Иси ле моќ те мотивиринел. Иси ле моќ ко јекх посебно начин те анел ко јекхипе е манушен“ (Акава вакерѓа ле о поранешно претседатели тари Јужно Африка о Нелсон Мандела).

•   „О фудбал керела о мануша те овен ко јекхипе соске анела надеж, радост, возбуда, мангипе спрема о јавера мануша хем керела те овел лен нешто заедничко“ (Акава вакерѓа ле о претседатели тари ФИФА о Џиани Инфантино). a

 Шај ли о светско првенство или било кова јавер спортско настан те исполнинел асавке баре целија? Иси ли несави надеж башо мир хем јекхипе?

 Акава берш о светско првенство керѓа о мануша те размислинен башо повише буќа, а на само башо фудбал. Уствари, о утакмице керѓе о мануша те дискутиринен башо социјална хем политичка теме коте сој вклучиме о манушикане правија, дискриминација хем економска разлике.

 Сепак, бут мануша уживинена те дикхен о меѓународна спортска настанија, сар сој о светско првенство. Ама, иако бут џене мангена те овел јекхипе, акала настанија нашти те анен јекхипе засекогаш. Наместо адава, ки ленде често истакнинена пе ставија хем постапке кола со одвојнена е манушен. А и Библија вакерела кај ко „последна диве“ е манушен ка овел лен баш асавке ставија хем постапке (2. Тимотеј 3:1-5).

 И Библија дела чачутни надеж башо јекхипе ко цело свето. Ој ветинела кај са о мануша ки пхув ка овен ко јекхипе кеда ка владинел јекх небесно влада која со викинела пе „е Девлескоро Царство“ (Лука 4:43; Матеј 6:10).

 О Цари таро адава Царство, о Исус Христос, ка керел те овел мир ко цело свето. Ки Библија пишинела:

•   „О праведнико ка цутинел хем ка овел баро мир“ (Псалм 72:7).

•   „Ка спасинел е чороле со ровела баши помош... Ка спасинел лен таро малтретирибе хем насилство“ (Псалм 72:12, 14).

 Е Исусескере сикљојба панда авдиве анѓе ко јекхипе милиоња манушен таро 239 пхувја. Ола сиклиле те на мрзинен е јаверен. Те шај те дознајне повише, читин и серија таро статие е насловеа „Како да се прекине кругот на омразата?“