АЧХОВЕН ЏАНГАВДЕ!
Милиоња избеглице нашена тари Украина
Ко 24 февруари 2022 берш, и Русија нападинѓа е Украина. Акава керѓа те овел бари хуманитарно криза хем о мануша мангена сигате те нашен тари адаја пхув. a
„Шунаја сине сар експлодиринена бомбе. Добором сине страшно со нашти те објаснинел пе лафенцар. Кеда шунѓем кај иси возија коленцар со шај те наша, одлучинѓем те џа. Ваљани сине те мукха са пали аменде соске смејнаја сине те ла само по јекх тикно ранцо. Шај сине те ла само амаре документија, хапија, пани хем грицке. Са о јавера буќа мукхлем хем џикоте перена сине бомбе гелем ки железничко станица.“ (И Наталија таро Харков, Украина.)
„Џи ко последно моменти на верујнѓем кај ка овел војна. Таро несаве делија тари диз шунава сине експлозие хем о пенџерке тресинена сине. Одлучинѓум те нашав хем лељум манцар само о потребна буќа. Иклиљум кхералдан ко офто о саати сабајле хем уклиљум ко вози со џала сине ко Лавов хем пало адава уклиљум ко автобуси те џав џи ки Полска.“ (И Надија таро Харков, Украина.)
Ки акаја статија
Кола тане о чачутне причине баши акаја криза?
И избегличко криза почминѓа адалеске со и руско војска нападинѓа е Украина. Ама, и Библија откринела аменге јавера похор причине башо адава соске иси асавке кризе:
О манушикане владе на успејнѓе те ден адава со ваљани е манушенге. О владе бут пути користинена пло авторитети те шај те контролиринен хем те малтретиринен е манушен (Проповедник 4:1; 8:9).
О Сатана о Бенг, „о владетели е светоскоро“, иси ле добором баро влијание упро мануша со и Библија вакерела: „Цело свето тано ко васта е Лошноскере“ (Јован 14:30; 1. Јованово 5:19).
Освен о проблемија со иси е манушен веконцар, и Библија вакерела кај амен живинаја „ко последна диве“ хем кај ка овел бут пхаро те икљол пе ко крајо (2. Тимотеј 3:1). Исто аѓаар, ко акала последна диве ка овен војне, природна катастрофе, бокхалипе хем заразна насвалипа — буќа кола со ка керен о мануша те нашен таро пумаре кхера (Лука 21:10, 11).
Коте шај о избеглице те аракхен надеж?
И Библија вакерела кај амаро Девел, о Јехова, b тано Девел коле со иси мангипе хем сочувство е избеглиценге хем околенге со мора те џан песке таро пумаре кхера (5. Мојсеева 10:18). Ов ветинела кај ка решинел е избеглиценгере проблемија преку пли небесно влада, е Девлескоро Царство, која со ка заменинел е манушикане владен (Даниел 2:44; Матеј 6:10). О Јехова преку пло Царство ка цидел е Бенге (Римјаните 16:20). Адава Царство ка владинел ко цело свето хем нане више те овен границе кола со одвојнена е манушен. О мануша таро цело свето ка овен сар јекх фамилија. Никој нане више те нашел таро пло кхер, соске и Библија ветинела: „Секова јекх ка бешел тели пли дракх хем тели пли смоква хем никој нане те даравкерел лен, соске адала тане лафија со авена таро муј е Јеховаскоро упредер о војске“ (Михеј 4:4).
Само е Девлескоро Царство ка анел трајно решение башо избегличка кризе со дикхаја лен авдиве. О Јехова преку пло Царство ка цидел о проблемија кола со анена о мануша те овен избеглице. Те дикха несаве примерија.
Војна. „[О Јехова] чхинавела о војне ки цели пхув“ (Псалм 46:9). Те шај те дикхе сар о Девел ка чхинавел о војне, читин и статија „Како ке се воспостави мир на Земјата?“
Малтретирибе хем насилство. „Таро малтретирибе хем насилство [о Јехова] ка спасинел лен“ (Псалм 72:14). Те шај те хаљове сар шај о мануша те менинен пумаро негативно стави, читин и серија таро статие „Кед и мржња више на ка овел“.
Чоролипе. „[О Јехова] ка спасинел е чороле со родела помош“ (Псалм 72:12). Те шај те дикхе сар о Девел корендан ка решинел о чоролипе, читин и статија „Да ли је могуће остварити праведан економски систем?“
Бокхалипе. „Ки пхув о гив бут ка бијанел“ (Псалм 72:16). Те шај те дикхе сар о Девел ка керел нијекх те на овел више бокхало, читин и статија „Свијет без глади“.
Дали шај и Библија те поможинел е избеглиценге авдиве?
Оја. Освен со дела сигурно надеж баши иднина, и Библија шај те поможинел ленге те икљовен о крајо е проблеменцар со иси лен акана.
Начело тари Библија: „О наивно мануш верујнела ко секова лафи, а о паметно пазинела ко секова пло чекори“ (Изреки 14:15).
Со значинела акава: Размислин башо опасна ситуацие со шај те случинен пе хем со ка кере те шај те заштитине тут. Аракх тут таро криминалција со мангена те искористинен е избеглицен.
Начело тари Библија: „Ако иси амен хајбаске, урајбаске хем тхан живибаске, те ова задоволна акале буќенцар“ (1. Тимотеј 6:8).
Со значинела акава: Ма размислин бут башо материјална буќа. Кеда сиан задоволно е основна буќенцар, ка ове побахтало.
Начело тари Библија: „Са со тумен мангена тумен о мануша те керен туменге, керен тумен да ленге“ (Матеј 7:12).
Со значинела акава: Ов стрпливо хем љубезно. Аѓаар ка овел полокхо е манушенге таро нево тхан коте со живинеа те поштујнен тут хем те прифатинен тут.
Начело тари Библија: „Ма иран никаске лошнипаја лошнипаске“ (Римјаните 12:17).
Со значинела акава: Ма дозволин и холи те чхивел тут те одмаздине тут. Адава ка керел о буќа те овен панда полошна.
Начело тари Библија: „Са шај те керав соске поможинела манге окова со дела ман сила“ (Филипјаните 4:13).
Со значинела акава: О Девел нека овел туке ко важно тхан ко тло живото хем молин тут леске. Ов шај те дел тут и сила со ваљани туке.
Начело тари Библија: „Ма секиринен тумен башо ништо, него ко са — молитваја, молбаја хем благодарибаја — вакерен е Девлеске со родена. Хем о мир таро Девел, кова сој упредер секоја мисла, ка аракхел тумаре виле хем тумаре мисле преку о Христос Исус“ (Филипјаните 4:6, 7).
Со значинела акава: Роде мир таро Девел бизи разлика ки сави ситуација аракхеа тут. Дикх и статија „Филипљанима 4:6, 7: Не брините се ни за што“.
a Ко диве кеда почминѓа о напад, о Учо комесаријати ко Обединета нацие башо избеглице (UNHCR) вакерѓа кај и ситуација тани најсериозно со шај. Башо 12 диве, повише таро дуј милиоња избеглице нашле тари Украина, а јекх милиони мануша мора сине те мукхен пле кхера хем те нашен ко јавера делија тари Украина.
b Јехова тано е Девлескоро анав (Псалм 83:18). Дикх и статија „Кој тано о Јехова?“.
Шај исто ка интересинел тут
И Русија нападинѓа е Украина — дали адалеа исполнинена пе о библиска пророштвија?
Дознајн со значинела акава настан.
ОСНОВНА БИБЛИСКА СИКЉОЈБА
Сој е Девлескоро Царство?
Џикоте сине о Исус ки служба, ов керела сине највише лафи башо е Девлескоро Царство. Веконцар, лескере ученикија молинена пе сине те авел о Царство.
ОДГОВОР БАШО БИБЛИСКА ПУЧИБА
Дали и Пхув ка овел уништими?
Адава со вакерела и Библија шај ка изненадинел тут.
