1. Со мангела о Јехова са е манушенге?

 КЕДА о Јехова керѓа е манушен, денѓа лен слободно волја. Секова пути кеда анаја одлуке амен користинаја акава поклон. И најважно одлука со шај некој те анел ла тани те дел лафи е Јеховаске кај ка служинел леске цело живото хем те овел дело тари лескири фамилија. О Јехова мангела секова јекх амендар те керел адава. Соске? Адалеске со мангела е манушен хем мангела те овен среќна. Ов мангела ола те овен леа амала хем те живинен засекогаш (5. Мој. 30:19, 20; Гал. 6:7, 8).

2. Сар дикхела о Јехова некасте со керѓа грево хем на каинела пе? (1. Јованескоро 2:1).

² Сепак, о Јехова никас на чхивела силаја те служинел леске. Ов мукхела секој коркори те одлучинел со ка керел. Ама со ако јекх крстимо христијани пхагела е Девлескоро закони адалеа со керела пхаро грево? Ако на каинела пе, ов мора те овел цидимо таро собрание (1. Кор. 5:13). Сепак, чак хем кеда ка авел џи ко адава, о Јехова цело вилеа надинела пе кај адава со грешинѓа ка иранел пе ки лесте. Уствари, адаја тани јекх важно причина соске о Јехова денѓа и откупнина — те шај те простинел околенге со каинена пе башо пумаре гревија.  (Читин 1. Јованескоро 2:1.) Амаро Девел кова сој пхердо мангипаја, љубезно поттикнинела околен со грешинѓе те каинен пе (Зах. 1:3; Рим. 2:4; Јак. 4:8).

3. Со ка дикха ки акаја статија?

³ О Јехова мангела те овел амен сар лескоро стави башо грево хем башо окола со керена пхаро грево. Ки акаја статија ка дикха сар шај те кера адава. Џикоте читинеа акаја статија, приметин 1) сар постапинѓа о собрание ко Коринт ко прво веко кеда јекх христијани керѓа пхаро грево, 2) саве упатствија денѓа о Павле кеда адава мануш каинѓа пе хем 3) со сикавела аменге акава библиско извештај башо Јеховаскоро стави спрема о христијања со керена пхаро грево.

САР ПОСТАПИНЃА О СОБРАНИЕ КО КОРИНТ КЕДА ЈЕКХ МАНУШ КЕРЃА ПХАРО ГРЕВО

4. Со случинѓа пе ко собрание ко Коринт таро прво веко? (1. Коринќања 5:1, 2).

⁴ Читин 1. Коринќања 5:1, 2. Кеда сине ко пло трито мисионерско патујбе, о Павле шунѓа башо нешто страшно со случинѓа пе ко нево собрание ко Коринт. Јекхе пхрале таро адава собрание сине ле сексуална односија пле маќеаја. Адава сине страшно хем асавко нешто на случинѓа пе ни машкар о мануша со на пенџарена е Девле. О собрание на само со мислинела сине кај адава нане страшно, него шај хем дичинела пе сине адалеа. Шај несаве ко собрание мислинена сине кај аѓаар тане милостива сар о Јехова сој милостиво спрема о несовршена мануша. Ама о Јехова на одобринела кеда некој таро лескоро народо керела грево. Асавке дрско понашибаја, акава мануш сигурно каљарѓа о анав е собраниескоро. Исто аѓаар, шај влијајнѓа упро јавера да христијања со дружинена пе сине леа. Адалеске, саве упатствија денѓа о Павле е собраниеске?

5. Саве упатствија денѓа о Павле е собраниеске хем соске? (1. Коринќања 5:13; дикх хем и слика.)

⁵ Читин 1. Коринќања 5:13. Водимо тари е Девлескири сила, о Павле пишинѓа писмо колесте со денѓа упатство кај о грешнико со на каинела пе ваљани те овел цидимо таро собрание. Сар ваљани сине о верна христијања те понашинен пе леа? О Павле вакерѓа ленге те чхинавен те дружинен пе акале манушеа. Ов вакерѓа ленге чак ни те на хан леа (1. Кор. 5:11). Ако хаја некасаја заедно, локхе шај те почмина те накхава повише време леа. Сар ка користинел сине е собраниеске ако чхинавела сине те дружинел пе акале христијанеа? Аѓаар о собрание ка овел сине заштитимо таро лошно влијание (1. Кор. 5:5-7). Исто аѓаар, адава со нане сине  те дружинен пе леа шај сине те поможинел леске те хаљовел кај керѓа нешто бут лошно англо е Јеховаскере јакхја хем аѓаар те почминел те лаџал хем те овел поттикнимо те каинел пе.

6. Сар влијајнѓа е Павлескоро писмо упро собрание хем упро окова со керѓа о пхаро грево?

⁶ Откеда бичхалѓа о писмо е христијаненге ко Коринт, о Павле почминѓа те пучел пе сар ка реагиринен ола ко лескере лафија. Пало несаво време, о Тит вакерѓа леске нешто со бут радујнкерѓа ле. О собрание реагиринѓа позитивно ко е Павлескоро писмо (2. Кор. 7:6, 7). Адала христијања шунѓе лескере упатствија. Освен адава, кратко откеда добинѓе о писмо таро Павле, о мануш кова со керѓа адава пхаро грево каинѓа пе. Ов чхинавѓа те постапинел погрешно, менинѓа пло стави хем почминѓа те икерел пе ко е Јеховаскере праведна мерилија (2. Кор. 7:8-11). Со јавер вакерѓа о Павле е собраниеске те керел?

 САР ВАЉАНИ СИНЕ О СОБРАНИЕ ТЕ ПОСТАПИНЕЛ Е МАНУШЕА СО КАИНЃА ПЕ

7. Соске сине шукар адава со о мануш со керѓа грево сине цидимо таро собрание? (2. Коринќања 2:5-8).

⁷ Читин 2. Коринќања 2:5-8. О Павле вакерѓа: „Повише џене тумендар више укоринѓе асавке мануше со грешинѓа, хем адава тано доволно“. Јавере лафенцар, о укор исполнинѓа пли цел. Која цел? Те поможинел леске те каинел пе (Евр. 12:11).

8. Со јавер вакерѓа о Павле е собраниеске те керел?

⁸ Адалеске, башо пхрал со керѓа грево, о Павле вакерѓа е собраниеске: „Спремно простинен леске хем утешинен ле... сикавен леске кај мангена ле“. Приметин кај о Павле мангља о собрание те керел нешто повише него само те дозволинел акале манушеске палем те овел дело таро е Јеховаскоро народо. О Павле мангља ола те уверинен ле пле лафенцар, постапкенцар хем понашибаја кај чаче простинѓе леске хем кај мангена ле. Аѓаар јасно ка сикавен леске сине кај радујнена пе со иранѓа пе ко собрание.

9. Соске несавенге шај сине пхаро те простинен е пхралеске кова со каинѓа пе башо пло грево?

⁹ Ко почеток, несаве таро собрание шај на радујнѓе пе кеда шунѓе кај о мануш кова со каинѓа пе башо пло грево палем тано дело таро собрание. Соске вакераја акава? Ов пле постапкенцар керѓа штета цело собраниеске, а шај несаве џененге анѓа лаџ да. Несаве таро собрание кола со дена сине пестар са те ачховен чиста ко морално поглед шај мислинена сине кај нане фер акава мануш те овел спремно примимо ко собрание. (Споредин Лука 15:28-30.) Соске сепак сине важно о собрание те сикавел кај чаче мангела пле пхрале кова со иранѓа пе?

10-11. Со шај сине те случинел пе ако о старешине на простинена сине е манушеске со каинѓа пе?

¹⁰ Замислин туке со шај сине те случинел пе ако о старешине на иранена сине ко собрание е мануше кова со чаче каинѓа пе. Или, ако откеда иранѓа пе, о собрание те на мангел сине те сикавел леске мангипе. Шај сине те „перавел ле и бут бари жал“. Локхе шај сине те мислинел песке кај никогаш више нашти палем те овел дело таро собрание. Ов шај чак те чхинавел сине те трудинел пе те овел палем паше е Девлеа.

¹¹ Сој панда полошно, ако на простинена сине е грешникоске со каинѓа пе, тегани е пхраленгоро хем е пхењенгоро амалипе е Јеховаја ка овел сине ки опасност. Соске? Адалеске со аѓаар на би џана сине пало е Јеховаскоро пример, кова со простинела околенге со каинена пе башо пумаре гревија, него би џана сине пало е Сатанаскоро пример, кова сој лошно хем нане милостиво. Ола уствари ка овен сине алатке ко е Бенгескере васта кола со ов шај сине те користинел лен те шај акава мануш те чхинавел те служинел е Јеховаске (2. Кор. 2:10, 11; Еф. 4:27).

12. Сар шај сине о собрание те џал пало е Јеховаскоро пример?

¹² Тегани сар шај сине о собрание ко Коринт те џал пало пример е Јеховаскоро наместо е Сатанаскоро? Аѓаар со ка постапинел сине околенцар со каинена пе башо пумаре гревија исто сар со би постапинела сине о Јехова. Приметин со пишинѓе башо Јехова несаве писателија е Библијакере. О цари о Давид пишинѓа: „Ту, Јехова, сиан шукар хем спремно сиан те простине“ (Пс. 86:5). О Михеј пишинѓа: „Кова Девел тано сар туте, кова со простинела о грешке хем накхела преку о грево?“ (Мих. 7:18). А о Исаија вакерѓа: „О румимо мануш нека мукхел пло дром хем о лошно мануш пле мисле, нека иранел пе ко Јехова, кова со ка сикавел леске милост, ко амаро Девел, соске ов спремно ка простинел леске!“ (Иса. 55:7).

13. Соске шај сине о мануш палем те овел ирамо ко собрание? (Дикх и рамка „ Кеда сине ирамо о мануш таро Коринт?“)

 ¹³ Те шај те џан сине пало е Јеховаскоро пример, о христијања таро собрание ко Коринт ваљани сине те сикавен акале манушеске кај мангена ле хем тане среќна со иранѓа пе. Адалеа со шунѓе о упатство е Павлескоро хем простинѓе леске, о христијања таро акава собрание сикавѓе кај тане „послушна ко са“ (2. Кор. 2:9). Иако накхле само некобор масекија откеда сине цидимо таро собрание, акале манушеске о укор поможинѓа те каинел пе. Адалеске, штом сине јасно кај каинѓа пе, на ваљани сине више те аџикерел пе те шај палем те овел ирамо ко собрание.

ТЕ СИКАВА ПРАВДА ХЕМ МИЛОСТ САР О ЈЕХОВА

14-15. Со сикљоваја таро адава со случинѓа пе ко собрание ко Коринт? (2. Петарескоро 3:9; дикх хем и слика.)

¹⁴ О извештај башо адава сар постапинѓа о собрание ко пурано Коринт ки акаја ситуација, сине пишимо хем гаравдо „те шај амен те сикљова“ (Рим. 15:4). Таро акава извештај сикљоваја кај о Јехова на дозволинела некој со керела пхаро грево те ачховел ко собрание. Несаве шај мислинена кај адалеске со о Јехова тано милостиво, ка дозволинел некој со на каинела пе те ачховел ко собрание. Ама о Јехова на сикавела милост ко асавко начин. О Јехова тано милостиво, ама  нане попустливо, а ни палем на перавела пле мерилија (Јуда 4). Уствари, ако дозволинела е грешниконге со на каинена пе те ачховен ко собрание, о Јехова ни хари нане те овел милостиво соске аѓаар ка анел ки опасност цело собрание (Изр. 13:20; 1. Кор. 15:33).

¹⁵ Сепак, сикљоваја хем кај о Јехова на мангела никој те овел уништимо. Ов мангела, секогаш кеда адава шај, те поможинел е манушенге те спасинен пе. Ов сикавела милост околенге со менинѓе пло начин сар размислинена хем постапинена хем кола со мангена палем те овен леа амала. (Езек. 33:11; читин 2. Петарескоро 3:9.) Адалеске, кеда о мануш ко Коринт каинѓа пе хем чхинавѓа те керел адава сој погрешно, о Јехова користинѓа е Павле те шај те објаснинел е собраниеске кај ваљани те овел леске простимо хем кај ваљани мангипаја палем те прифатинен ле.

16. Со осетинеа башо Јехова откеда дикхлем со случинѓа пе ко Коринт?

¹⁶ Адава со дикхлем ко саво начин о собрание ко Коринт постапинѓа ки акаја ситуација, поможинела аменге те дикха кај о Јехова тано пхердо мангипаја хем праведно (Пс. 33:5). Зарем акава на поттикнинела тут панда повише те фалине амаре Девле? Уствари, сарине амен грешинаја — секова јекх амендар — хем иси амен потреба таро адава ов те простинел аменге. Саринен амен иси амен причина те ова благодарна е Јеховаске баши откупнина, која сој темели те шај те овен простиме амаре гревија. Кобор тано утешно адава со џанаја кај о Јехова чаче мангела пле слуген хем кај мангела те овен среќна засекогаш!

17. Башо со ка кера лафи ко следна статие?

¹⁷ Ако некој авдиве керела пхаро грево, сар шај о старешине таро собрание те џан пало е Јеховаскоро пример хем мангипаја те поможинен е манушеске те каинел пе? Со ваљани те керел о собрание кеда о старешине ка одлучинен некој те овел цидимо или палем ирамо ко собрание? Башо акала пучиба ка кера лафи ко следна статие.