1-2. а) Сар дикхела о Јехова околенде со керена пхаро грево, ама на каинена пе башо адава? б) Со надинела пе о Јехова кај ка керен о грешникија?

 О ЈЕХОВА нане попустливо Девел. Ов мрзинела о грево (Пс. 5:4-6). О Јехова очекујнела амендар те поштујна лескере праведна мерилија кола со аракхљона ко лескоро Лафи, ки Библија. Џанѓола пе, ов на очекујнела совршенство таро несовршена мануша (Пс. 130:3, 4). Ко исто време ов на толериринела „околен со на поштујнена е Девле, кола со е Девлескоро шукарипе со на заслужинаја ле користинена ле те шај те оправдинен пумаро безобразно понашибе“ (Јуда 4). Уствари, и Библија керела лафи башо адава кај „окола со на поштујнена е Девле“ ка овен уништиме ки е Девлескири војна Армагедон (2. Пет. 3:7; Отк. 16:16).

² Ама, о Јехова на мангела никој те овел уништимо. Сар со дикхлем англедер ки акаја серија статие, и Библија јасно вакерела кај ов мангела „саринен те овел лен прилика те каинен пе“ (2. Пет. 3:9). О старешине џана пало е Јеховаскоро пример аѓаар со стрпливо трудинена пе те поможинен е грешниконге те каинен пе хем палем те овен е Јеховаја паше. Ама, понекогаш несаве џене на каинена пе (Иса. 6:9). Иако о старешине повише пути пробинена те поможинен ленге, несаве грешникија  понадари да керена адава сој погрешно. Со мора те керен о старешине ко асавко случај?

„ЦИДЕН Е ЛОШНО МАНУШЕ“

3. а) Спрема и Библија, со ваљани те керел пе е грешниконцар со на каинена пе? б) Соске шај те вакерел пе, кај ки несави смисла, о грешнико коркори биринѓа те овел цидимо таро собрание?

³ Ако јекх грешнико на каинела пе, е старешинен нане лен јавер избор освен те икерен пе ко упатство таро 1. Коринќања 5:13: „Циден е лошно мануше сој машкар туменде!“ Ки несави смисла, о грешнико коркори биринѓа те овел цидимо таро собрание. Ов кхедела адава со коркори a сејнѓа (Гал. 6:7). Соске шај те вакера акава? Адалеске со ов одбинѓа те менинел пе иако о старешине повише пути пробинѓе те поможинен леске те авел џи ко адава те каинел пе (2. Цар. 17:12-15). Лескере постапке сикавена кај ов биринѓа те на шунел е Јеховаскере заповедија (5. Мој. 30:19, 20).

4. Соске дела пе известување кај несаво грешнико со на каинела пе тано цидимо таро собрание?

⁴ Кеда несаво грешнико со на каинела пе тано цидимо таро собрание, тегани дела пе известување кај ов повише нане е Јеховаскоро сведоко. b Адава известување на дела пе те шај те понижинел пе е грешнико, него те шај о собрание те икерел пе ки библиско заповед те чхинавел те дружинел пе адале манушеа, па чак хем те на хал леа (1. Кор. 5:9-11). Иси шукар причине соске о Јехова денѓа акаја заповед. О апостол Павле пишинѓа: „Хари квасацо ушљарела цело хумер“ (1. Кор. 5:6). Ако некој со на каинела пе башо пле гревија ачхола ко собрание, ов шај те влијајнел упро јавера те мислинен песке кај нане добором важно те живинен спрема е Јеховаскере праведна мерилија (Изр. 13:20; 1. Кор. 15:33).

5. Сар ваљани те дикха ки некасте сој цидимо таро собрание, хем соске?

⁵ Сар ваљани те дикха ко несаво грешнико сој цидимо таро собрание? Иако на дружинаја амен леа на ваљани те мислина кај баши лескири ситуација нане надеж. Ов уствари тано сар јекх бакхро со нашавдило. Кеда несаво бакхро ка нашавѓовел ов шај палем те иранел пе ко стадо. Ма бистре кај адава мануш денѓа лафи е Јеховаске кај ка служинел леске цело пло живото. Жално тано адава со ко моменти на живинела спрема пло завет хем адалеске тано ки опасност (Езек. 18:31). Ама, са џикоте иси време хем са џикоте о Јехова тано спремно те сикавел милост, иси надеж кај адава мануш ка иранел пе. Сар о старешине сикавена кај лен да иси лен асавки надеж, чак хем кеда несаво грешнико ка овел цидимо таро собрание?

САР О СТАРЕШИНЕ ПОМОЖИНЕНА ОКОЛЕНГЕ СОЈ ЦИДИМЕ ТАРО СОБРАНИЕ

6. Кола буќа ка керен о старешине те шај те поможинен некаске сој цидимо таро собрание?

⁶ Кеда некој тано цидимо таро собрание, дали о старешине нане више те трудинен пе те поможинен леске те иранел пе ко Јехова? Нормално кај ка поможинен ле. Кеда о одбор таро старешине ка известинел некас кај тано цидимо таро собрание, адала пхраља исто аѓаар ка објаснинен леске кола буќа ваљани те керел те шај те иранел пе ко собрание. Ама, о старешине ка керен хем повише таро адава. Ко повише случаија, ола ка вакерен е грешникоске кај би мангена палем те овел лен состанок леа пало некобор масекија те шај те дикхен дали менинѓа пло стави. Ако ов сложинела пе палем те дикхел пе е старешиненцар, ко адава состанок ола спремно ка поттикнинен ле те каинел пе. Чак хем ако ов џи тегани на менинѓа пло стави, о старешине  таро време ко време ка пробинен те кхеден пе леа те шај те поттикнинен ле те каинел пе.

7. Кеда некој тано цидимо таро собрание сар о старешине сикавена сочувство исто сар о Јехова? (Еремија 3:12).

⁷ О старешине трудинена пе те џан пало е Јеховаскоро пример, аѓаар со сикавена сочувство некаске сој цидимо таро собрание. На пример, о Јехова на аџикерѓа лескоро бунтовно народо ко пурано Израел те керел о прво чекори. Наместо адава, ов керѓа нешто те поможинел е Израелцонге панда англедер те сикавен било саве знакија кај каинена пе. Сар со дикхлем ки дујто статија таро акава број, о Јехова сикавѓа кобор тано сочувствително адалеа со вакерѓа пле пророкоске е Осијаске те џал ки пли ромни хем те дел ла прилика те смиринен пе, иако ој панда керела сине пхаро грево (Оси. 3:1; Мал. 3:7). Исто сар о Јехова, о старешине чаче мангена о грешнико те иранел пе хем на керена леске пхаро те керел адава. (Читин Еремија 3:12.)

8. Сар е Исусескири споредба башо чхаво со нашавдило поможинела аменге пошукар те хаљова кобор тано сочувствително хем милостиво о Јехова? (Лука 15:7).

⁸ Сетин тут сар реагиринѓа о дад тари е Исусескири споредба башо чхаво со нашавдило. Кеда дикхља пле чхаве сар иранела пе кхере, о дад „прастандило ки лесте, гушинѓа ле хем чуминѓа ле“ (Лука 15:20). Приметин кај о дад на аџикерѓа лескоро чхаво те молинел ле те простинел леске. Наместо адава, о дад керѓа о прво чекори хем прастандило ки лесте, сар со би керела сине секова дад сој пхердо мангипаја. О старешине трудинена пе те сикавен слично стави спрема околенде со цидинѓе пе таро е Девлескоро стадо. Ола мангена акала бакхре со нашавдиле „те иранен пе кхере“ (Лука 15:22-24, 32). Кеда несаво грешнико ка иранел пе, иси бари радост хем ко небо хем ки пхув. (Читин Лука 15:7.)

9. Ко со охрабринела о Јехова е грешникон?

⁹ Таро адава со дикхлем џи акана, јасно тано кај о Јехова на мукхела те ачхол некој ко собрание со керела грево хем на каинела пе башо адава. Ама, ов на иранела думо е грешниконге. Ов мангела те иранен пе. Ко Осија 14:4 тано опишимо саве чувствија иси е Јехова спрема окола со каинена пе башо пумаре гревија. Адари пишинела: „Ме ка сасљарав лен те шај те овен манге више верна. Ка мангав лен таро вило, соске на сиум ленге више хољамо“. Акава тано баро поттик е старешиненге те реагиринен ки секоја промена со сикавела кај некој почминела те каинел пе. Акава тано исто аѓаар јекх баро поттик сариненге со мукхле е Јехова те иранен пе со шај посигате.

10-11. Сар о старешине трудинена пе те поможинен околенге со англедер бут берша сине цидиме таро собрание?

¹⁰ Сар о старешине ка пробинен те поможинен околенге со сине англедер цидиме таро собрание, шај англедер бут берша? Асавке шај чхинавѓе те керен о грево башо кова со нане више дело таро собрание. Несаве лендар шај чак ни на сетинена пе соске сине цидиме таро собрание. Бизи разлика кобор време некој нане дело таро собрание, о старешине ка пробинен те аракхен ле хем те посетинен ле. Ко асавке посете, о старешине чак ка предложинен леске те молинен пе леа заедно хем љубезно ка поттикнинен ле те иранел пе ко собрание. Џанѓола пе, ако некој бут берша нане дело таро собрание, сигурно ов тано бут слабо ко духовно поглед. Адалеске, ако ов вакерела кај мангела те иранел пе ко собрание, о старешине шај те организиринен некој те водинел библиско курси леа, иако панда нане ирамо ко собрание. Ко секова случај, о старешине ка овен адала со ка организиринен асавко библиско курси.

 ¹¹ О старешине трудинена пе те сикавен сочувство е манушенге сар со сикавела о Јехова. Адалеске, ола ка трудинен пе те аракхен са околен со цидинѓе пе таро Јехова хем ка поттикнинен лен те иранен пе леске. Штом јекх грешнико ка сикавел кај каинела пе хем кај менинѓа пло начин сар размислинела хем постапинела, ов шај палем те иранел пе ко собрание (2. Кор. 2:6-8).

12. а) Ко кола ситуацие о старешине ваљани посебно те пазинен? б) Соске на ваљани те мислина кај окола со керѓе несави врста грево никогаш нашти те добинен е Јеховаскири милост? (Дикх хем и фуснота.)

¹² Ко несаве ситуацие, о старешине ваљани посебно те пазинен англедер те одлучинен дали некој ка овел палем ирамо ко собрание. На пример, ако некој злоупотребинѓа чхаве или сине отпаднико, или ако намерно  местинѓа о буќа аѓаар те шај те чхивел крајо ко пло брако, о старешине ваљани посебно те пазинен кеда проценинена дали ов искрено каинела пе (Мал. 2:14; 2. Тим. 3:6). Ола мора те заштитинен о стадо. Ко исто време, ваљани те хаљова кај о Јехова ка приминел секоле грешнико со сикавела кај чаче каинела пе хем чхинавела те постапинел погрешно. Значи, иако о старешине ваљани посебно те пазинен асавкенцар со постапинѓе сурово хем дволично е јаверенцар, ола на ваљани те мислинен кај окола со керѓе несави врста грево, никогаш нане те добинен е Јеховаскири милост c (1. Пет. 2:10).

СО ШАЈ ТЕ КЕРЕЛ О СОБРАНИЕ

13. Која тани и разлика ко адава сар постапинаја некасаја со сине укоримо таро старешине, а сар постапинаја некасаја со сине цидимо таро собрание?

¹³ Сар со дикхлем ки англуни статија, понекогаш известинела пе кај некој тано укоримо. Ко асавко случај, шај понадари да те дружина амен леа, соске џанаја кај каинѓа пе хем кај менинѓа пло начин сар размислинела хем постапинела (1. Тим. 5:20). Ов понадари да тано дело таро собрание хем ваљани леске охрабрување кова со шај те добинел ле ако дружинела пе е пхраленцар (Евр. 10:24, 25). Ама, и ситуација тани скроз појавер кеда некој тано цидимо таро собрание. Амен шунаја и библиско заповед: „Чхинавен те дружинен тумен [асавкеа]... На ваљани чак ни те хан асавке манушеа“ (1. Кор. 5:11).

14. Сар шај јекх христијани те користинел пли совест кеда ваљани те одлучинел сар ка постапинел некасаја сој цидимо таро собрание? (Дикх хем и слика.)

¹⁴ Дали о упатство таро 1. Коринќања 5:11 значинела кај ваљани скроз те избегина некас со сине цидимо таро собрание? На. Џанѓола пе, амен нане те дружина амен леа. Ама, спрема пли библиско школујми совест о христијања шај те одлучинен дали ка канинен некас сој цидимо таро собрание те авел ко состанок. На пример, шај некој ка мангел те канинел некас тари пли фамилија или некас касаја со сине паше. Ако авела ко состанок, сар ваљани те постапина леа? Англедер, на поздравинаја амен сине асавкенцар. Ама, акана ко акава да случај, секова христијани ваљани  те постапинел спрема пли библиско школујми совест. Несавенге шај нане те сметинел ако поздравинена ле или вакерена леске кај радујнена пе со дикхена ле ко состанок. Сепак, амен нане те ачхова те кера леа повише лафи, а ни палем те дружина амен леа.

15. Башо саве грешникија керела пе лафи ко 2. Јованескоро 9-11? (Дикх хем и рамка „ Дали о Јован хем о Павле керѓе лафи баши исто врста грево?“)

¹⁵ Несаве шај пучена пе: „Зарем и Библија на вакерела кај јекх христијани со поздравинела асавке ’учествујнела ко лескере лошна постапке‘?“ (Читин 2. Јованескоро 9-11.) О контекст таро акала стихија сикавела кај акава упатство важинела е отпадниконге хем секоле јекхеске со поттикнинела е јаверен те керен адава со и Библија вакерела кај тано погрешно (Отк. 2:20). Адалеске, ако некој ширинела отпадничка сикљојба или ко јавер начин поттикнинела е јаверен те постапинен погрешно, о старешине нане те посетинен ле. Џанѓола пе, иси надеж кај асавко мануш некогаш ка авел ки годи хем ка каинел пе. Ама, са џикоте на случинела пе адава, амен нане ни те поздравина асавке мануше, а ни те канина ле те авел ко амаре состанокија.

СИКАВ МИЛОСТ ХЕМ СОЧУВСТВО САР О ЈЕХОВА

16-17. а) Со мангела о Јехова те керен о грешникија? (Езекиел 18:32). б) Сар шај о старешине те соработинен е Јеховаја кеда трудинена пе те поможинен околенге со керѓе грево?

¹⁶ Со сиклилем таро акала панџ статие? О Јехова на мангела никој те овел уништимо! (Читин Езекиел 18:32.) Ов мангела о грешникија те смиринен пе леа (2. Кор. 5:20). Баш адалеске о Јехова секогаш поттикнинела сине пле слуген те каинен пе хем те иранен пе леске. Е старешинен ко собрание иси лен чест те соработинен е Јеховаја џикоте трудинена пе те поможинен околенге со керѓе пхаро грево те каинен пе (Рим. 2:4; 1. Кор. 3:9).

¹⁷ Замислин кобор бари радост иси ко небо кеда јекх грешнико ка каинел пе! Амаро небесно Дад о Јехова бут радујнела пе секова пути кеда јекх таро лескере бакхре со нашавдило ка иранел пе ко собрание. Амаро мангипе спрема о Јехова понадари да бајрола џикоте размислинаја башо лескоро сочувство, лескири милост хем лескоро шукарипе со на заслужинаја ле (Лука 1:78).