СТАТИЈА ПРОУЧИБАСКЕ 31
ГИЛИ 12 О Јехова тано баро Девел
Со керѓа о Јехова те спасинел амен таро грево хем мерибе
О Девел добором бут мангља е свето со денѓа пле единствено бијаме Чхаве (ЈОВАН 3:16)
СО КА СИКЉОВА
Ка дикха со керѓа о Јехова те шај те поможинел амен те борина амен против о грево хем те служина леске. Исто аѓаар, ка дикха сар денѓа амен прилика те живина вечно хем засекогаш те ова ослободиме таро грево.
1-2. a) Сој тано о грево, хем сар шај те победина ле? (Дикх хем „Објасниме лафија“.) б) Со ка дикха ки акаја статија хем ко јавера статие таро акава број тари Стражарско кула? (Дикх хем „Белешка е читателенге“ ко акава број.)
МАНГЕА ЛИ те џане кобор бут мангела тут о Јехова, о Девел? Шај те дознајне о одговор аѓаар со ка проучине со керѓа ов те шај те спасинел тут таро грево хем таро мерибе. О грево a тано бут баро душмани кова со нашти коркори те победине ле. Сарине секова диве грешинаја хем адалеске со сием грешникија, ко крајо мераја (Рим. 5:12). Ама иси јекх шукар хабери, о Јехова шај те поможинел амен те победина о грево. Хем адаја победа тани сигурно!
2 Околу 6.000 берша, о Јехова поможинела е манушенге те боринен пе против о грево. Соске? Адалеске со мангела амен. О Јехова мангела е манушен панда откеда керѓа лен, адалеске ов керѓа бут буќа те шај те поможинел лен те боринен пе против о грево. О Девел џанела кај о грево ингарела ко мерибе, а ов на мангела те мера. О Јехова мангела те живина засекогаш (Рим. 6:23). Ов мангела ту да те живине вечно. Ки акаја статија ка дикха трин пучиба: 1) Сави надеж денѓа о Јехова е грешна манушенге? 2) Со керѓе несаве грешна мануша таро пурано време те шај о Јехова те одобринел лен? 3) Со керѓа о Исус те шај те спасинел е манушен таро грево хем таро мерибе?
САВИ НАДЕЖ ДЕНЃА О ЈЕХОВА Е ГРЕШНА МАНУШЕНГЕ
3. Сар ало џи ко адава о Адам хем и Ева те грешинен?
3 Кеда о Јехова керѓа е прва манушен, ов мангља ола те овен среќна. Ов денѓа лен бут шужо тхан живибаске, о брако сар поклон хем јекх бут интересно задача која со керела лен сине радосна. Ола ваљани сине те пхерен и пхув пумаре чхавенцар хем те керен цело пхув рај слично сар и градина Еден. О Јехова денѓа лен само јекх едноставно заповед. Исто аѓаар вакерѓа ленге кај ако на икерена пе ки адаја заповед, ленгоро грево ка ингарел џи ко мерибе. Ако керена сине адава, адалеа ка сикавен сине кај намерно бунинена пе против лесте. Џанаја со уло. Јекх лошно ангели, кова со на мангела сине ни е Девле а ни лен, чхивѓа лен те керен адава грево. О Адам хем и Ева дозволинѓе акава лошно ангели те влијајнел упри ленде. Адалеске со на сине лен доверба ко пумаро Дад кова со бут мангела лен сине, ола керѓе грево. Хем сар со џанаја, е Јеховаскере лафија исполнинѓе пе. Таро адава диве о Адам хем и Ева мора сине те трпинен о последице: ола почминѓе те пхујрон, хем ко крајо муле (1. Мој. 1:28, 29; 2:8, 9, 16-18; 3:1-6, 17-19, 24; 5:5).
4. Соске о Јехова мрзинела о грево хем соске поможинела амен те борина амен против лесте? (Римјања 8:20, 21).
4 О Јехова мукхља акава извештај те овел пишимо ки Библија те шај те хаљова нешто бут важно. Ов поможинела амен те хаљова соске о Јехова добором бут мрзинела о грево. О грево цидела амен таро амаро Дад хем ингарела амен ко мерибе (Иса. 59:2). О Сатана мрзинела е Јехова хем е манушен, адалеске ов чхивѓа е Адаме хем е Ева те керен грево, а искушинела е манушен да авдиве. Адалеске кеда о Адам хем и Ева грешинѓе, о Сатана шај мислинѓа песке кај руминѓа е Јеховаскири намера е манушенцар. Ама ов на халило кобор баро мангипе иси е Јехова. О Девел никогаш на менинѓа пли намера башо чхаве е Адамескере хем е Евакере. Ов мангела е манушен хем адалеске одма денѓа надеж сариненге. (Читин Римјања 8:20, 21.) О Јехова џанља кај некој таро мануша ка биринен те манген ле, хем кај ка роден помош лестар те шај те боринен пе против о грево. Адалеске, сар ленгоро Дад хем Створители, ов одлучинѓа те аракхел начин те шај те овен леа паше хем те овен ослободиме таро грево хем таро мерибе. Сар керѓа адава?
5. Кеда о Јехова денѓа надеж е грешна манушенге? Објаснин (1. Мојсеева 3:15).
5 Читин 1. Мојсеева 3:15. О Јехова денѓа надеж е грешна манушенге кеда вакерѓа со ка овел е Сатанаја. О Јехова пророкујнѓа кај јекх „потомство“ ка спасинел е манушен. Акава потомство ко крајо ка уништинел е Сатана хем ка цидел са о последице таро лошнипе со керѓа ле ки градина Еден (1. Јов. 3:8). Ама, о Јехова пророкујнѓа кај англедер те случинел пе адава, о Сатана ка ранинел адале потомство, јавере лафенцар ка мударел ле. Адава ка анел сине бари дукх е Јеховаске. Ама ов сине спремно те трпинел адаја дукх соске џанља кај аѓаар бут мануша ка овен спасиме таро грево хем таро мерибе.
САР НЕСАВЕ ГРЕШНА МАНУША КО БИБЛИСКО ВРЕМЕ ДОБИНЃЕ Е ЈЕХОВАСКОРО ОДОБРУВАЊЕ?
6. Со керѓе о Абел, о Ное хем јавера верна слуге е Девлескере те шај те овен леа паше?
6 Сар со накхела сине о време о Јехова хари по хари откринела сине сар шај о грешна мануша те овен леа паше. О Абел, о дујто чхаво е Адамескоро хем е Евакоро, сине о прво мануш со сикавѓа вера ко Јехова откеда о Адам хем и Ева бунинѓе пе против о Девел ки градина Еден. Адалеске со мангела сине е Јехова хем мангела сине те керел ле радосно хем те овел леа паше, о Абел денѓа ле жртва. Ов сине овчари хем адалеске леља некоборе терне бакхрен, чхинѓа лен хем денѓа лен сар жртва е Јеховаске. Сар реагиринѓа о Јехова? Ов одобринѓа хем ле хем лескири жртва (1. Moj. 4:4). О Јехова сине задоволно таро јавера да слична жртве кола со денѓе лен мануша со мангена ле сине хем со сине лен доверба ки лесте — сар со сине о Ное (1. Мој. 8:20, 21). Адалеа со прифатинѓа акала жртве, о Јехова сикавѓа кај о грешна мануша шај те овен одобриме лестар хем те ова леа паше. b
7. Со сикљоваја таро адава со о Авраам сине спремно те дел пле чхаве сар жртва?
7 О Јехова родинѓа таро Авраам, мануш кова со сине ле бари вера, те керел нешто бут пхаро — те дел сар жртва пле чхаве е Исако. Е Авраамеске сигурно акаја сине и најпхари задача. Сепак ов сине спремно те шунел е Јехова. Ама о Девел ко последно моменти чхинавѓа е Аврааме те мударел пле чхаве. Таро акава извештај шај бут те сикљовен са о мануша со иси лен вера. О Јехова сине спремно те дел сар жртва пле Чхаве кас со бут мангела. Акава сикавела кобор бут о Јехова мангела е манушен (1. Мој. 22:1-18).
8. Со сикљоваја таро жртве со ваљани сине те ден пе спрема е Мојсеескоро закони? (3. Мојсеева 4:27-29; 17:11).
8 Веконцар покасно кеда денѓа лен о Закони, о Јехова вакерѓа е Израелцонге кај мора те ден животинска жртве те шај те овен простиме ленгере гревија. (Читин 3. Мојсеева 4:27-29; 17:11.) Адала жртве сикавена сине кај ваљани те овел денди јекх побари жртва која со целосно ка спасинел е манушен таро грево. О пророкија водиме тари е Девлескири сила објаснинѓе кај о ветимо потомство, кова со покасно сине јасно кај адава тано е Девлескоро единствено бијамо Чхаво, ка ваљани сине те цидел муке хем те мерел. Ов ка ваљани сине те овел сар бакхро кова со ка овел сине дендо сар жртва (Иса. 53:1-12). Замислин, о Јехова ветинѓа кај ка дел пле мангле Чхаве сар жртва те шај те спасинел е манушен таро грево хем таро мерибе, а адатхе сиан вклучимо ту да!
СО КЕРЃА О ИСУС ТЕ ШАЈ ТЕ СПАСИНЕЛ АМЕН?
9. Со вакерѓа о Јован Крстител башо Исус? (Евреија 9:22; 10:1-4, 12).
9 Ко 29 берш а.е., кеда о Јован Крстител дикхља е Исусе таро Назарет, водимо тари е Девлескири сила, вакерѓа: „Аке тано е Девлескоро Бакхро, кова со цидела о грево таро свето“ (Јован 1:29). Акала лафија сикавена кај о Исус тано о потомство кова со сине пророкујмо бут време англедер. О Исус ваљани сине те дел пло живото сар жртва. Конечно е Јеховаскоро потомство ало те шај целосно те побединел о грево. (Читин Евреија 9:22; 10:1-4, 12.)
10. Сар о Исус сикавѓа кај ало те викинел е грешникон?
10 О Исус посебно сине концентриримо ко адава те поможинел е манушенге кола со сине ленге пхаро адалеске со сине грешникија хем викинѓа лен те овен лескере следбеникија. Ов џанља кај и главно причина соске о мануша цидена муке тано о грево. Адалеске ов посебно поможинела сине околен со сине пенџарде сар грешникија. Јекхе споредбаја ов објаснинѓа: „Е састе манушенге на ваљани доктори, него е насваленге“. Пало адава вакерѓа: „На аљум те викинав е праведна манушен, него е грешникон“ (Мат. 9:12, 13). О Исус живинѓа спрема адала лафија. Кеда јекх џувли тховѓа лескере пре пле асвенцар, ов љубезно простинѓа лакере гревија (Лука 7:37-50). Ов исто аѓаар сикавѓа е Самарјанка ко бунари башо важна чачипа иако џанља кај живинела неморално (Јован 4:7, 17-19, 25, 26). О Девел чак денѓа моќ е Исусеске те цидел и крајно последица таро грево — о мерибе. Сар? Аѓаар со воскреснинѓа муршен, џувлен хем чхавен (Мат. 11:5).
11. Соске окола со керена сине баре гревија осетинена пе сине шукар узо Исус?
11 Нане чудно со чак окола со керена сине баре гревија осетинена пе сине шукар узо Исус. Ов сине љубезно ленцар хем сикавела сине ленге сочувство. Ола на дарана сине те џан ки лесте хем те керен леа лафи (Лука 15:1, 2). Кеда некој ка сикавел сине вера ки лесте, о Исус пофалинела ле сине хем наградинела ле сине (Лука 19:1-10). О Исус сине милостиво исто сар сој тано лескоро Дад (Јован 14:9). Пле лафенцар хем постапкенцар ов сикавѓа кај лескоро сочувствително хем милостиво Дад мангела е манушен хем мангела те поможинел секаске те побединел о грево. О Исус поможинѓа околенге со керѓе баре гревија те манген те менинен пе хем те џан пали лесте (Лука 5:27, 28).
12. Со вакерѓа о Исус башо пло мерибе?
12 О Исус џанља со ка овел леа. Ко некобор прилике ов вакерѓа пле следбениконге кај ка овел предајмо хем ковимо ко стубо (Мат. 17:22; 20:18, 19). Сар со вакерѓа о Јован хем сар со пророкујнѓе о пророкија, о Исус џанља кај лескири жртва ка цидел о грево таро свето. О Исус исто аѓаар вакерѓа кај откеда ка дел пло живото сар жртва ка анел ки песте „манушен таро са о нацие“ (Јован 12:32). О грешна мануша шај те радујнен е Јехова аѓаар со ка сикавен вера ко Исус хем ка шунен лескере заповедија. Ако керена адава, ко крајо ола ка овен ослободиме таро грево (Рим. 6:14, 18, 22; Јован 8:32). Адалеске о Исус храбро хем спремно прифатинѓа те мучинен ле хем те мерел (Јован 10:17, 18).
13. Сар муло о Исус хем со сикљоваја таро адава башо Јехова? (Дикх хем и слика.)
13 Јекх таро е Исусескере паше амала предајнѓа ле. Пало адава о душмања астарѓе ле, вреџинѓе ле хем кривинѓе ле башо буќа со на керѓа лен. Ола осудинѓе е Исусе ко мерибе, а пало адава мучинѓе ле. Ко крајо о војникија ковинѓе ле ко стубо те шај те мударен ле. О Исус верно истрајнѓа џикоте трпинѓа адала дукха хем муке. Ама е Јеховаске сине панда попхаро џикоте дикхела сине сар о Исус мучинела пе. Е Јехова сине ле моќ хем шај сине те чхинавел о муке пле Чхавескере, ама на керѓа адава. Ов дозволинѓа лескоро мангло Чхаво те цидел муке хем те мерел. Соске? Адалеске со о Јехова бут мангела амен. О Исус вакерѓа: „О Девел добором бут мангља е свето со денѓа пле единствено бијаме Чхаве те шај секој со ка верујнел ки лесте те на овел уништимо него вечно те живинел“ (Јован 3:16).
Кеда дозволинѓа лескоро Чхаво те овел мудардо, о Јехова трпинѓа добором бари дукх со нашти ни те замислина аменге те шај те ослободинел амен таро грево хем таро мерибе (Дикх ко пасус 13)
14. Со сикљовеа тари жртва е Исусескири?
14 И жртва е Исусескири тани о најбаро доказ кај о Јехова мангела е чхавен е Адамескере хем е Евакере. Ој тани доказ кобор бут о Јехова мангела тут. Ов денѓа сар жртва пле мангле Чхаве хем трпинѓа и најбари дукх со шај те замислине туке, те шај те спасинел тут таро грево (1. Јов. 4:9, 10). О Јехова мангела те поможинел секоле јекхеске амендар те боринел пе против о грево хем те побединел!
15. Со мора те кера те шај те овел амен корист тари откупно жртва е Исусескири која сој поклон таро Девел?
15 И откупно жртва која со денѓа ла е Јеховаскоро единствено бијамо Чхаво тани поклон таро Девел колеа со шај те овен простиме амаре гревија. Ама те шај о Девел те простинел аменге мора те кера нешто. Со? О Јован Крстител, а пало адава о Исус Христос да, вакерѓе о одговор: „Каинен тумен соске о небесно Царство тано паше“ (Мат. 3:1, 2; 4:17). Значи, мора те каина амен башо амаре гревија ако чаче мангаја те борина амен против о грево хем те ова паше амаре Дадеа кова со бут мангела амен. Ама со значинела те каина амен хем сар адава шај те поможинел амен те борина амен против о грево кова сој ки аменде? О одговор ка дознајна ки следно статија.
ГИЛИ 18 Благодарна баши откупнина
a ОБЈАСНИМЕ ЛАФИЈА: Ки Библија, е лафеа „грево“ шај те мислинел пе ко адава кеда кераја нешто со о Јехова вакерела кај тано погрешно или кеда на кераја адава со ов вакерела кај тано исправно. Ама е лафеа „грево“ исто аѓаар шај те мислинел пе ки амари несовршено или грешно состојба со наслединѓем ла таро Адам. Сарине амен мераја адалеске со наслединѓем о грево.
