Бијамо сиум ко 1927 берш ки јекх тикни диз паше узо Чикаго (Илиноис, Америка). Ме даде хем ме даја сине лен панџ чхаве — и Џета, о Дон, ме, о Карл хем и Џој. Сарине сием сине одлучна те служина е Јеховаске цело душаја. И Џета сине ко дујто класи таро Гилеад ко 1943 берш. О Дон, о Карл хем и Џој геле ко Бетел, ко Бруклин (Њујорк), ко 1944, 1947 хем 1951 берш. Ленгоро шужо пример, а исто аѓаар мле родителенгоро да, сине ле бут баро влијание упри манде.

Ми дај хем мо дад редовно читинена сине и Библија хем бут мангена сине е Девле, хем адава мангипе садинѓе ле ки аменде да. Ама, мо дад на сине ле више поштовање спрема о цркве откеда служинѓа сар војнико ки Европа ко време кеда сине и Прво светско војна. Ми дај бут сине благодарно кеда мо дад иранѓа пе састо весто, хем адалеске вакерѓа: „Карл, ајде те џа ки црква сар со џаја сине поангле“. А мо дад вакерѓа лаке: „Ка испратинав тут џи ки црква ама ме нане те кхував“. А ој пучља: „Соске?“ Ов вакерѓа лаке: „Кеда сине и војна, о свештеникија тари исто религија благословинена сине е војникон хем ленгоро оружје таро солдуј стране. Па, зарем о Девел поддржинела о солдуј стране?“

Покасно, џикоте ми дај сине ки црква, дуј таро е Јеховаскере сведокија але ки аменде кхере. Нудинѓе ме дадеске о лил Светлина, прво хем дујто том, коте со керела пе лафи башо библиско лил Откровение. Мо дад интересинѓа пе хем леља о лила. Кеда ми дај дикхља лен, почминѓа те читинел лен. Јекх диве, ки локално новина читинѓа кај сарине сој тане заинтересириме каниме тане те шунен сар проучинела пе и Библија е лиленцар Светлина. Одлучинѓа ој да те џал. Кеда ресља адари, пхравѓа лаке о удар јекх попхури џувли. Ме даја сине ла ко вас јекх таро адала лила хем пучља: „Акате ли ка проучинел пе акава?“ А ој одговоринѓа лаке: „Оја ми чхај, кхув“. О јавер курко, ми дај леља амен е чхавен пеа, хем тегани почминѓем редовно те џа адари.

Јекх пути о пхрал со водинела сине о состанок, замолинѓа ман те читинав Псалм 144:15, коте со вакерела кај окола со служинена е Јеховаске тане среќна. Бут свиџинѓа пе манге адава стихо,  ама исто аѓаар панда дуј, 1. Тимотеј 1:11, коте со вакерела кај о Јехова тано „радосно Девел“, хем Ефешања 5:1, коте со сием поттикниме те џа пало е Девлескоро пример. Халиљум кај ваљани те овав среќно адалеске со служинава мле Створителеске хем те овав бут благодарно баши адаја чест. Акала дуј буќа никогаш на бистерѓум лен ко мло живото.

О најпаше собрание сине ко Чикаго, 32 километрија дур амендар. Ама, џаја сине ко состанокија хем аѓаар повише сикљовава сине тари Библија. Сетинава ман ко јекх состанок о пхрал денѓа те коментиринел и Џета, џикоте шунава ла сине мислинѓум манге: „Па ме да џанава акава. Ме да шај те ваздав мло вас хем те коментиринав“. Аѓаар ме да почминѓум те спреминав манге коментарија. Ама сој панда поважно, бајровава сине духовно заедно мле пхраленцар хем мле пхењенцар. Крстинѓум ман ко 1941 берш.

Бут шукар сетинава ман ко конгрес со икерѓа пе ко Кливленд (Охајо) ко 1942 берш. Ко адава конгрес исто аѓаар сине прикључиме преку телефони повише таро 50 јавера локацие ки Америка. Амен, исто сар јавера да фамилие, сием сине сместиме ко шаторија паше коте со икерела пе сине о конгрес. И Дујто светско војна панда трајнела сине хем о мануша са повише противинена пе сине е Јеховаскере сведоконге. Раќате дикхљум некобор групе пхраља сар паркиринена пумаре врдија англо шаторија, а о светлија ираме спротивно таро шаторија. Сарине сложинѓе пе раќате ко секова врда те овел барем по јекх мануш те аракхел стража. Ако дикхена сине несави опасност, о пхраља ваљани сине те мукхен о светлија те шај те којрарен е манушен со нападинена хем те почминен те свиринен. Аѓаар шај сине о јавера те авен те поможинен лен. Мислинѓум манге: „Е Јеховаскоро народо тано добором спремно башо са“. Адале мислаја пашлиљум манге хем суќум цело рат, а аври на сине нисаве проблемија.

Бершенцар покасно, кеда сетинава ман сине ко адава конгрес сине манге јасно кај ми дај ни хари на дарала сине, а ни на сине секирими. Ла сине ла целосно доверба ко Јехова хем ки лескири организација. Никогаш нане те бистрав лакоро шужо пример.

Кратко англедер адава конгрес, ми дај почминѓа те служинел сар општо пионери. Ој бут шукар шунела сине о говорија коленде со керела пе сине лафи баши полновремено служба. Џикоте џаја аменге сине кхере, ој вакерѓа: „Ме би мангава сине те продолжинав е пионерско службаја, ама нашти хем те џав ки служба хем шукар те грижинав ман е кхереске“. Хем пало адава, ој замолинѓа амен дали ка ова спремна те поможина лаке. Џанѓола пе, амен вакерѓем оја. Хем ој денѓа секоле јекхеске задача те чистинел јекх или дуј собе англедер о сабалуко. Кеда амен ка џа сине ки школа, ој ка проверинел сине дали кхере са тано средимо, а пало адава ка џал сине ки служба. Ми дај сине бут зафатими, ама секогаш грижинела пе сине пле чхавенге. Кеда аваја аменге сине ручкоске или кеда аваја аменге сине тари школа, ој секогаш сине атхе, аџикерела амен сине. Несаве диве кеда аваја аменге сине тари школа, џаја сине лаја заедно ки служба хем адава бут поможинѓа аменге те хаљова со значинела те ове пионери.

Почминѓум е пионерско службаја ко 16 берш. Иако мо дад тегани панда на сине е Јеховаскоро  сведоко, секогаш интересинела пе сине сар џала манге и служба. Јекх рат вакерѓум леске кај керава са, ама нисар нашти те аракхав некас со мангела те проучинел и Библија. Ачхиљум хари хем пучљум ле: „Мангеа ли те проучинав туја?“ Ов хари размислинѓа хем вакерѓа: „Па на дикхава несави причина соске те на проучинав“. Оја, о прво интересенти касаја со почминѓум те проучинав и Библија сине мо дад хем адава сине манге бут бари чест.

Проучинаја сине о лил О чачипе ка ослободинел тумен. Сар џала сине о библиско курси, хаљовава сине кај мо дад поможинела манге сине хем пошукар те проучинав хем пошукар те сикавав. На пример, јекх рат откеда проучинѓем јекх пасус, вакерѓа манге: „Дикхава со вакерела о лил, ама котар ту џанеа кај о лил тано ко право?“ На сиум сине спремно башо асавко пучибе хем вакерѓум: „Акана на џанава сар те докажинав туке кај акава со пишинела ко акава лил тано точно, ама јавер пути кеда ка проучина мислинава кај ка аракхав туке одговор“. Хем аракхљум одговор. Аракхљум некобор стихија сар доказ башо адава со пишинела ко лил. Оттегани па наакари бут пошукар спреминава ман сине башо курси хем сиклиљум сар те истражинав. Адава бут поможинѓа манге духовно те бајровав ме, ама исто аѓаар мо дад да. Ов почминѓа те применинел адава со сикљовела сине хем крстинѓа пе ко 1952 берш.

Гељум манге кхералдан кеда сине ман 17 берш. И Џета a ули мисионерка, а о Дон почминѓа те служинел ко Бетел. О солдуј мангена сине бут пумаре задаче. А адава манге сине бут баро охрабрување. Хем адалеске денѓум молба хем башо Бетел хем баши школа Гилеад хем мукхљум о Јехова те водинел о буќа. Саво сине о резултати? Сиум сине викимо те служинав ко Бетел ко 1946 берш.

Сар накхена сине о берша, ко Бетел сине ман различна задаче. Хем аѓаар шај сине те сикљовав бут неве буќа. Ко акала 75 берш бетелско служба, сиклиљум те керав бути ки печатница хем ко сметководство. Исто аѓаар, сиклиљум сар те кинен пе буќа сој потребна ко Бетел хем сар те бичхален пе важна буќа ко јавера тхана. Ама сој најважно, са акала берша уживинава ки духовно поука со добинава ко Бетел преку и сабалутни библиско програма хем преку о библиска говорија.

Бут сиклиљум исто аѓаар таро мо потикно пхрал о Карл, кова со ало ко Бетел ко 1947 берш. Ов бут шукар сине ко адава те проучинел и Библија, ама исто те сикавел е јаверен баши Библија. Јекх пути замолинѓум ле те поможинел манге башо јекх говор со ваљани сине те икерав ле. Вакерѓум леске кај аракхљум бут материјали, ама на џанава сар те  користинав са адава. Јекхе пучибаја решинѓа мло проблеми. Пучља ман: „Џоел, која тани тли тема?“ Одма сине манге јасно со мангела те вакерел — користин само о материјали сој тано конкретно поврзимо е темаја, а о јавер мукх. Никогаш нане те бистрав адаја поука.

Те шај те ова среќна ко Бетел ваљани те да са амендар хем те проповедина, а адава шај те анел џи ко бут шуже искуствија. Те вакерав туменге башо јекх колеске со бут шукар сетинава ман. Јекх диве акшамеске јекхе пхралеа гелем ко Бронкс, ки диз Њујорк, хем посетинѓем јекхе џувља која со англедер леља Стражарско кула хем Џангавѓовен! Поздравинѓем ла хем вакерѓем лаке: „Авдиве мангаја те поможина е манушенге те дознајнен несаве охрабрувачка мисле тари Библија“. А ој вакерѓа аменге: „Ако керена лафи баши Библија, кхувен“. Читинѓем лаке хем керѓем лафи башо несаве стихија башо е Девлескоро Царство хем о нево свето. Дикхјола пе кај сине воодушевими соске о јавер курко викинѓа несавен амален те овен присутна. Покасно, ој хем лакоро ром уле верна слуге е Јеховаскере.

Халиљум кај мангава те женинав ман, хем деш берш покасно аракхљум манге ромни. Со поможинѓа манге те аракхав шукар ромни? Ки молитва размислинѓум башо пучибе: „Со мангава те керав откеда ка женинав ман?“

Ко 1953 берш, пало конгрес кова со икерѓа пе ко стадиони Јенки, запознајнѓум јекхе пхења која со викинела пе сине Мери Аниол. Ој хем ми пхен и Џета сине ко дујто класи тари школа Гилеад хем заедно служинѓе сар мисионерке. И Мери воодушевими раскажинела сине манге сар сине лаке ки служба сар мисионери ко Кариби хем башо библиска курсија со сине ла са адала берша. Сар со пошукар запознајнаја амен сине, халилем кај о солдуј џене иси амен иста духовна целија. Заманглем амен хем ко април 1955 берш, лелем амен. Буте буќенге сикавѓа пе кај и Мери тани манге поклон таро Јехова хем пример пало кова со шај те џав. Било сави задача те добинел сине, ој радосно керела ла сине. Сине бут буќарни, искрено мангела сине е јаверен хем о Царство секогаш сине лаке ко прво тхан (Мат. 6:33). Трин берш сием сине ки покраинско служба, а ко 1958 берш викинѓе амен ко Бетел сар брачно пари.

Бут сиклиљум тари Мери. На пример, кратко откеда лелем амен решинѓем заедно те читина и Библија, отприлика по 15 стихија. Откеда јекх амендар ка читинел сине о стихија, кераја сине лафи баши ленде хем башо адава сар те применина лен ко амаро живото. И Мери бут пути раскажинела сине со сиклили ко Гилеад или со сиклили џикоте служинѓа сар мисионери. Адава со сиклиљум латар бут поможинѓа манге те спреминав пошукар говорија хем те џанав сар пошукар те охрабринав е пхењен (Изр. 25:11).

Мли мангли Мери мули ко 2013 берш. Душаја аџикерава о диве кеда палем ка дикхав ла ко нево свето. А џи тегани, одлучно сиум понадари да те сикљовав хем те овел ман доверба ко Јехова цело вилеа (Изр. 3:5, 6). Радосно сиум хем дела ман утеха кеда размислинава башо адава са со ка керен е Јеховаскере слуге ко нево свето, а ко адава ка овел вклучимо те сикљова неве буќа башо хем таро амаро Најбаро Учители. Оја, бут сиум благодарно башо са адава со сиклиљум лестар хем башо са о начинија коленцар со сикавела манге о шукарипе со на заслужинаја ле.