1. Кобор сине важно о маро е манушенге ко библиско време?

 О МАРО сине јекх таро најважна буќа буте џененге ко библиско време (1. Мој. 14:18; Лука 4:4). Уствари, ов сине добором важно со кеда ки Библија понекогаш користинела пе о лафи „маро“, мислинела пе ко хајбе (1. Мој. 41:54; Мат. 6:11). Исто аѓаар, о маро сине и главно бути ко е Исусескере дуј чудија кола сој аменге шукар пенџарде (Мат. 16:9, 10). Јекх таро акала чудија тано пишимо ко 6 поглавје таро лил Јован. Џикоте дикхаја акава извештај ка сикљова несаве поуке кола со важинена аменге да авдиве.

2. Ки која ситуација некобор милја манушенге ваљани сине хајбаске?

² Откеда о апостолија иранѓе пе таро јекх проповедничко патујбе хем ваљани сине ленге одмор, о Исус ингарѓа лен чамцоја преку о Галилејско Море џи ко јекх тхан коте со шај сине те овен коркори паше узи Витсаида (Мар. 6:7, 30-32; Лука 9:10). Ама пало кратко време некобор милја мануша кхединѓе пе околу ленде. О Исус на цидинѓа пе лендар хем спремно одвојнѓа време те сикавел лен башо Царство хем те сасљарел е насвален. Сар со накхела сине о диве, о ученикија пучена пе сине со ка хал са адава народо. Несаве таро мануша шај сине лен нешто хајбаске, ама повише џене ка ваљани сине те џан ко гава хем те кинен хајбаске (Мат. 14:15; Јован 6:4, 5). Со керѓа о Исус?

О ЧУДО Е МАРЕНЦАР

3. Со вакерѓа о Исус пле апостоленге те керен башо мануша? (Дикх хем и слика.)

³ О Исус вакерѓа е апостоленге: „На ваљани те џан, тумен ден лен нешто те хан“ (Мат. 14:16). Ама, акава сине проблеми соске сине околу 5.000 мурша, а заедно е ромњенцар хем е чхавенцар шај сине околу 15.000 мануша коленге со ваљани сине хајбаске (Мат. 14:21). Ама, о Андреј вакерѓа: „Аке  акате иси јекх тикно чхаво, ле иси ле панџ маре таро јачмен хем дуј тикне мачхе. Ама сар шај адава те овел доволно добором буте манушенге?“ (Јован 6:9). О мануша ко адава време често хана сине маро таро јачмен, а о тикне мачхе шај сине лондале хем шуке. Ама о маро хем о мачхе со сине акале тикне чхаве на сине доволно са акале манушенге.

4. Со шај те сикљова таро Јован 6:11-13? (Дикх хем о слике.)

⁴ Адалеске со мангља те сикавел е манушенге гостопримство, о Исус вакерѓа ленге те бешен ки чар ко групе (Мар. 6:39, 40; читин Јован 6:11-13). Пало адава заблагодаринѓа пе пле Дадеске башо маре хем башо мачхе. Акалеа уствари о Исус сикавѓа кај о Девел сине адава со денѓа лен о хајбе. Важно тано амен да те џа пало лескоро пример аѓаар со ка молина амен англедер те ха маро бизи разлика дали сием коркори или иси јавера мануша околу аменде. Пало адава, о Исус заповединѓа те делинел пе о хајбе хем о мануша хале џикоте на чалиле. Чак ачхило да хајбаске, а о Исус на мангља адава хајбе те фрдел пе. Адалеске ов вакерѓа пле учениконге те кхедел пе адава со ачхило те шај те користинел пе башо покасно. О Исус денѓа аменге шукар пример башо адава сар мудро те користина адава со иси амен. Ако сиан родители, заедно тле чхавенцар шај те дикхен акава извештај хем те керен лафи башо адава саве поуке шај те сикљовен баши молитва, гостопримство хем дарежливост.

5. Сар реагиринѓе о мануша ко адава со керѓа о Исус адава диве, хем сар постапинѓа ов?

⁵ О мануша сине воодушевиме таро начин сар о Исус сикавела сине хем таро чудија со  керела лен сине. Ола џанле кај о Мојсеј вакерѓа кај о Девел ка бичхалел ленге јекх посебно пророко хем адалеске шај мислинена сине кај о Исус тано адава пророко (5. Мој. 18:15-18). Ако сине аѓаар, шај изглединела сине кај ов ка овел бут шукар владетели хем чак ка шај те дел хајбаске секоле јекхеске ко Израел. Адалеске, о мануша мангле „те астарен ле хем те керен ле цари“ (Јован 6:14, 15). Те мукхел сине о Исус те случинел пе адава, тегани би мешинела пе сине ки еврејско политика која со сине тели римско власт. Тегани со керѓа? Ки Библија читинаја кај о Исус одлучно цидинѓа пе ки планина. Значи, на пело ко е јаверенгоро притисок хем на мешинѓа пе ки политика. Кобор важно поука аменге!

6. Сар шај те сикава кај мангаја те џа пало е Исусескоро пример? (Дикх хем и слика.)

⁶ Џанѓола пе, авдиве о јавера нане те роден амендар чудоја те да лен хајбаске или те сасљара е насвален, а ни палем те пробинен те керен амен владетелија. Ама ола шај ка поттикнинен амен те мешина амен ки политика аѓаар со ка гласина некаске или ка сикава кај поддржинаја некас каске со ола мислинена кај ка керел несаве промене. Ама и поука таро е Исусескоро пример тани јасно. Ов одбинѓа те мешинел пе ки политика, а покасно чак вакерѓа: „Мло Царство нане дело таро акава свето“ (Јован 17:14; 18:36). Сар христијања амен ваљани те размислина хем те постапина сар о Исус. Амен поддржинаја, сведочинаја хем  молинаја амен башо адава Царство (Мат. 6:10). Те дикха со шај јавер те сикљова таро извештај башо чудо преку кова со о Исус денѓа маро.

СО ЗНАЧИНЕЛА О ЧУДО Е МАРЕНЦАР

7. Со керѓа о Исус хем сар реагиринѓе о апостолија? (Јован 6:16-20).

⁷ Откеда денѓа хајбаске е манушенге, о Исус вакерѓа пле учениконге те циден пе таро адава тхан хем те џан ко Капернаум чамцоја, а ов цидинѓа пе ки планина хем аѓаар чхинавѓа е манушен те керен ле цари. (Читин Јован 6:16-20.) Џикоте о апостолија сине ко море чамцоја, почминѓа силно бура баре бавлалаја хем баре браненцар. Тегани о Исус ало паше узи ленде пхириндор упро пани хем вакерѓа е апостол Петареске ов да те пхирел упро пани (Мат. 14:22-31). Кеда о Исус кхувѓа ко чамцо, и бавлал смиринѓа пе. О ученикија сине воодушевиме хем вакерѓе: „Чаче ту сиан е Девлескоро Чхаво“ a (Мат. 14:33). Сепак, ола на халиле сар тано поврзимо акава чудо е чудоја со керѓа ле о Исус англедер е маренцар. О Марко додајнѓа акава детали: „О ученикија бут чудинѓе пе соске на халиле со значинела о чудо со керѓа е маренцар. Ленгере виле понадари да нашти сине те хаљон адава“ (Мар. 6:50-52). Ола на халиле кобор бари моќ о Јехова денѓа е Исусе те керел чудија. Кратко пало адава о Исус палем спомнинѓа о чудо е мареа хем денѓа панда јекх поука.

8-9. Соске о народо родинѓа е Исусе? (Јован 6:26, 27).

⁸ Е манушенге коленге со о Исус денѓа хајбаске сине најважно те задоволинен пумаре телесна потребе хем желбе. Соске вакераја акава? О тајсутното диве, ола приметинѓе кај о Исус хем о апостолија геле песке адатхар. Адалеске, уклиле ко несаве чамција кола со ресле тари Тиверијада хем геле ко Капернаум те шај те аракхен е Исусе (Јован 6:22-24). Дали адава керѓе ле адалеске со сине ленге важно те шунен повише башо Царство? На. Ола најангле геле те шај о Исус те дел лен панда хајбаске. Котар џанаја акава?

⁹ Приметин со случинѓа пе кеда о мануша аракхле е Исусе паше узо Капернаум. О Исус директно вакерѓа ленге кај ленге тано најважно те задоволинен пумаре моментална телесна потребе. Ов вакерѓа ленге: „Хален таро маре хем чалилен“, адава тано „хајбе кова со руминѓовела“. Ов поттикнинѓа лен те керен бути башо хајбе кова со „анела вечно живото“. (Читин Јован 6:26, 27.) О Исус вакерѓа кај лескоро Дад шај те дел лен асавко хајбе. Кеда шунѓе кај иси асавко хајбе кова со шај те дел лен вечно живото, о мануша сигурно сине изненадиме. Кова хајбе шај те керел адава, хем сар шај сине те добинен ле?

10. Со ваљани сине те керен о мануша те шај те добинен вечно живото?

¹⁰ Јасно тано кај акала Евреија халиле кај ваљани те керен нешто те шај те добинен акава хајбе. Ола шај мислинѓе кај ваљани те керен о буќа кола со спрема е Мојсеескоро закони очекујнела пе сине лендар те керен пе. Сепак, о Исус вакерѓа: „О Девел родела тумендар те верујнен ко окова касте со ов бичхалѓа“ (Јован 6:28, 29). Те шај те добинел пе „вечно живото“, ваљани те сикавел пе вера околесте касте со о Девел бичхалѓа. Уствари, о Исус англедер да вакерѓа акава (Јован 3:16-18, 36). Хем покасно ов вакерѓа панда нешто башо адава сар шај те добина вечно живото (Јован 17:3).

11. Сар сикавѓе о Евреија кај најважно сине ленге те добинен дословно маро? (Псалм 78:24, 25).

 ¹¹ Акала Евреија на прифатинѓе е Исусескоро сикљојбе кај о Девел родела лендар те сикавен вера ко Исус. Ола пучле ле: „Саво чудо кереа те шај амен те дикха хем те верујна ки туте?“ (Јован 6:30). Тегани спомнинѓе кај ленгере парапапија ко е Мојсеескоро време добинена сине мана која со шај те спорединел пе мареа (Неем. 9:15; Читин Псалм 78:24, 25.) Јасно тано кај сине ленге најважно те добинен дословно маро. Чак кеда пало адава о Исус керѓа лафи башо чачутно маро сој таро небо, кова со поразлично тари мана шај сине те дел лен вечно живото, ола ни на пробинѓе те пучен ле со значинела адава (Јован 6:32). Ола добором бут концентриринѓе пе ко пле телесна потребе со на дикхле о духовна чачипа баши кола со о Исус пробинѓа те сикавел лен. Со шај те сикљова таро акава извештај?

СО ВАЉАНИ ТЕ ОВЕЛ АМЕНГЕ НАЈВАЖНО

12. Сар о Исус истакнинѓа со ваљани те овел аменге најважно?

¹² Аке јекх важно поука аменге таро Јован 6 поглавје. Најважно ваљани те овен аменге амаре духовна потребе. Сетин тут кај о Исус истакнинѓа акаја поука кеда сине искушимо таро Сатана (Мат. 4:3, 4). Ки Проповед ки гора да ов истакнинѓа кобор тано важно те ова свесна башо амаре духовна потребе (Мат. 5:3). Спрема адава шај те пуча амен: „Дали ме животоја сикавава кај поважно манге те задоволинав мле духовна потребе него те задоволинав мле телесна потребе?“

13. а) Соске нане погрешно те уживина ко хајбе? б) Кова предупредување ваљани шукар те шуна? (1. Коринќања 10:6, 7, 11).

¹³ Нане погрешно те молина амен башо амаре телесна потребе хем те уживина кеда задоволинаја акала потребе (Лука 11:3). И Библија вакерела кај „нане ништо пошукар таро адава о мануш те хал хем те пиел хем те уживинел ко шукар буќа таро пло трудо“ хем кај „адава авела таро вас е чачутно Девлескоро“ (Проп. 2:24; 8:15; Јак. 1:17). Ама, мора те пазина о материјална буќа те на овен аменге о најважно нешто ко живото. О апостол Павле истакнинѓа акава кеда пишинѓа е христијаненге кола со живинена сине ко време англедер о Ерусалим те овел уништимо. Ов спомнинѓа настанија кола со случинѓе пе е Израелцонге англедер, машкар коленде со сине адава да со случинѓа пе паше узи планина Синај. О Павле предупрединѓа е христијанен те на манген о лошнипе сар со о Израелција мангле о лошнипе. (Читин 1. Коринќања 10:6, 7, 11.) О Јехова чудоја денѓа храна адале Израелцонге. Ама адалеске со сине алчна хајбаске, о хајбе уло ленге сар лошнипе (4. Мој. 11:4-6, 31-34). А кеда обожавинѓе е златно телцо, о Израелција сикавѓе кај поважно ленге те хан, те пиен хем те уживинен него те овен послушна е Јеховаске (2. Мој. 32:4-6). О Павле вакерѓа ленгоро пример сар предупредување е христијаненге кола со живинена сине ко време кратко англедер те овел уништимо о Ерусалим ко 70 берш тари а.е. Амен живинаја кратко англедер те овел уништимо акава свето. Адалеске важно тано шукар те шуна е Павлескоро совет.

14. Кеда керела пе лафи башо хајбе, со шај те очекујна ко нево свето?

¹⁴ Кеда о Исус вакерѓа те молина амен башо „маро акале дивеске“, ов исто аѓаар сикавѓа амен те молина амен те керел пе е Девлескири волја „сар ко небо аѓаар ки пхув“ (Мат. 6:9-11). Сар замислинеа туке адава време? И Библија вакерела кај е  Девлескири волја тани исто аѓаар ки пхув те овел шужо хајбе. О лафија таро Исаија 25:6-8 сикавена кај кеда ка владинел е Девлескоро Царство е манушен ка овел лен бут хем вкусно хајбе. Ко Псалм 72:16 тано пророкујмо: „Ки пхув о гив бут ка бијанел, хем ко најуче тхана е планинакере ов бут ка бајрол“. Дали едвај аџикереа адале гивеа те спремине тло омилено маро или те пробине несаве неве рецепте? Освен адава, ка шај те уживине ко дракха со ту садинѓан лен (Иса. 65:21, 22). Хем сарине ки пхув ка уживинен ко акала бут шуже буќа.

15. Башо со ка овен сикавде окола со ка воскреснинен? (Јован 6:35).

¹⁵ Читин Јован 6:35. Со аџикерела околен со хале таро маро хем таро мачхе со денѓа лен о Исус? Ко воскресение со ка овел шај ка запознајне несавен лендар. Чак хем ако англедер на сикавѓе вера ко Исус, шај ка воскреснинен (Јован 5:28, 29). Ола ка ваљани те хаљовен со значинена е Исусескере лафија: „Ме сиум о маро со дела живото. Окова со ка авел ки манде нане никогаш те овел бокхало“. Ка ваљани те развинен вера ки откупно жртва е Исусескири — вера кај ов денѓа пло живото ленге. Ко адава време ка овел јекх образовно акција коте со ка овен сикавде окола со ка воскреснинен хем о чхаве со шај ка бијанѓовен. Аменге ка овел бари радост те учествујна ки адаја акција. Ко адава ка уживина бут повише него ко хајбе со ка овел амен. О духовна буќа ка овен о најшужо нешто ко адава време.

16. Со ка дикха ки следно статија?

¹⁶ Дикхлем само јекх дело таро извештај сој пишимо ко 6 поглавје таро Јован. Ама, о Исус вакерѓа панда бут јавера поуке башо вечно живото. Важно сине о Евреија шукар те шунен адала поуке, а важно тано амен да авдиве шукар те шуна лен. Ки следно статија ка продолжина те дикха о 6 поглавје таро Јован.