1-2. Кола буќа шај те ровљарен амен?

 НАНЕ мануш кова со никогаш на рунѓа. Понекогаш роваја тари радост кеда случинела пе аменге нешто со керела амен бут среќна. Шај пхердиле тле јакхја асва кеда случинѓа пе туке нешто посебно, сар на пример, кеда бијандило туке чхаво, кеда сетинѓан тут ко нешто шукар со случинѓа пе туке или кеда аракхљан тут несаве мангле амалеа колеа со на дикхљан тут бершенцар.

² Сепак, бут пути амаре асва авена тари дукх со осетинаја ла хор ко вило. На пример, шај роваја адалеске со некој бут разочаринѓа амен. Шај роваја адалеске со осетинаја бари дукх соске сием бут насвале или соске муло амендар некој сој паше. Ко асавке прилике шај осетинаја амен сар со осетинела пе сине о пророко о Еремија кеда о Вавилонција уништинѓе о Ерусалим. Ов вакерѓа: „Тари мли јакх тхавдена бут асва... Мле јакхја шувљона таро ројбе, ленге одмор нане“ (Плач 3:48, 49).

3. Сар осетинела пе о Јехова кеда дикхела кај лескере слуге накхена таро пхаре ситуацие? (Исаија 63:9).

³ О Јехова бут шукар џанела кобор асва тхавдинѓе таро амаре јакхја кеда сием сине ки несави пхари ситуација. И Библија уверинела амен кај ов тано свесно баши секоја пхари ситуација тари која со накхена лескере слуге хем кај ов шунела амен кеда амен молинаја ле баши помош (Пс. 34:15). Ама о Јехова на само со дикхела или шунела амен, ов керела да нешто аменге. Ов тано амаро Дад хем бут мангела амен. Адалеске, кеда дикхела кај роваја, леске тано бут пхаро хем спремно тано те поможинел аменге. (Читин Исаија 63:9.)

4. Кола библиска примерија ка дикха, хем со ка сикљова лендар башо Јехова?

 ⁴ Ко пло Лафи, о Јехова откринѓа аменге сар реагиринѓа кеда несаве лескере слуге рунѓе. Те дикха о пример е Анакоро, е Давидескоро хем е царескоро е Езекијаскоро. Соске ола рунѓе? Сар о Јехова поможинѓа ленге? Хем сар шај ленгоро пример те утешинел амен кеда роваја адалеске со сием тажна, кеда сием изневериме или кеда мислинаја кај нане амен нисави надеж?

АСВА КЕДА СИЕМ БУТ ТАЖНА

5. Сар осетинела пе сине и Ана баши пли ситуација?

⁵ Е Ана сине ла некобор пхаре проблемија кола со керена ла сине бут тажно хем ровљарена ла сине. Јекх проблеми сине адава со лакере роме сине ле панда јекх ромни, ој викинела пе сине Фенина хем понашинела пе сине бут лошно е Анаја. Упро са адава, е Ана нашти сине те овен ла чхаве, а е Фенина сине ла некобор (1. Сам. 1:1, 2). И Фенина бут асала лаке сине хем вреџинела сине е Ана адалеске со на сине ла чхаве. Сар би осетинеа тут сине ту те ове сине ко лакоро тхан? И Ана сине добором вознемирими со ровела сине, на хала сине хем лакири душа сине бут тажно (1. Сам. 1:6, 7, 10).

6. Со керѓа и Ана те шај те аракхел утеха?

⁶ Сар и Ана аракхља утеха? Јекх бути со керѓа, сине адава со гели те обожавинел е Јехова ко свето шатори. Адатхе, шај паше узо влези таро дворо е свето шаторескоро, ој почминѓа те молинел е Јехова хем бут те ровел. Ој молинѓа е Јехова те дикхел лакири неволја хем те сетинел пе ки лате (1. Сам. 1:10б, 11). И Ана ки молитва вакерѓа е Јеховаске пле најхор чувствија. Е Јехова бут погодинѓе о асва лескере скапоцено чхајакере.

7. Сави утеха добинѓа и Ана откеда молинѓа пе таро вило е Јеховаске?

⁷ Сар осетинѓа пе и Ана откеда таро вило молинѓа пе е Јеховаске хем откеда шунѓа о шуже лафија со вакерѓа лен лаке о првосвештенико о Илиј? О извештај вакерела аменге: „Пало адава гели песке, па хаља хем лакоро муј на сине више тажно“ (1. Сам. 1:17, 18). Иако лакири пхари ситуација панда на сине меними, и Ана осетинѓа андруно мир. Ој фрдинѓа пле секирацие е Јеховаске. Ов дикхља лакири неволја, шунѓа ла кеда молинѓа пе баши помош хем покасно благословинѓа ла адалеа со ачхили кхамни (1. Сам. 1:19, 20; 2:21).

8-9. Спрема Евреија 10:24, 25, соске ваљани те да са амендар те ова присутна ко состанокија? (Дикх хем и слика.)

⁸ Поуке аменге. Дали ту да аракхљовеа ки несави ситуација која со керела тут бут тажно? Шај муло тутар некој тари фамилија или несаво амал. Ко асавке моментија,  нормално тано те манге те ове коркори. Ама исто сар и Ана со добинѓа утеха хем охрабрување адалеа со гели ко свето шатори, ту да шај те добине утеха адалеа со ка ове присутно ко состанокија, чак кеда на осетинеа тут најшукар. (Читин Евреија 10:24, 25.) Џикоте ко состанокија шунаја охрабрувачка библиска стихија, о Јехова шај те поможинел аменге те менина о негативна мисле позитивна мисленцар. Адава шај те поможинел аменге те осетина амен пошукар, чак ако амари ситуација на менинела пе одма.

⁹ Ко состанокија, амаре пхраља хем пхења шај те утешинен амен хем те сикавен аменге кобор бут мангена амен, а адава ка поможинел аменге те осетина амен пошукар (1. Сол. 5:11, 14). Те дикха о пример јекхе специјално пионерескоро каскири ромни мули. Ов вакерела: „Панда ровава. Понекогаш ка бешав ки јекх ќуша хем само ка ровав. Ама о состанокија бут охрабринена ман. О шуже лафија хем о коментарија е пхраленгере хем е пхењенгере манге тане сар мелеми ки рана. Кобор хем те овав вознемиримо или секиримо англедер те авав ко состанок, адатхе секогаш овела манге пошукар“. Кеда сием ко амаре состанокија, о Јехова шај те поможинел аменге преку о пхраља хем о пхења.

10. Сар шај те џа пало е Анакоро пример кеда сием бут тажна?

¹⁰ И Ана исто аѓаар добинѓа утеха адалеа со вакерѓа е Јеховаске ки молитва сар осетинела пе. Ту да шај те фрде е Јеховаске са тле секирацие аѓаар со ка овел тут доверба кај ов шунела тут (1. Пет. 5:7). Јекх пхен колакоро ром сине мудардо таро чора, вакерела: „Мло вило сине пхаго ко котора, мислинѓум кај никогаш повише нане те сасљол. Ама сине манге полокхо секогаш кеда молинава ман сине е Јеховаске, мле небесно Дадеске кова со бут мангела ман. Понекогаш на џанава сине сар те вакерав леске сар осетинава ман, ама џанава сине кај ов хаљола ман. Кеда сине манге бут лошно, молинава ле сине те дел ман андруно мир. Одма осетинава ман сине посмирими хем шај сине те продолжинав понадари“. Кеда вакереа е Јеховаске кобор туке пхаро, ов осетинела пе тажно башо тле асва хем хаљола тли дукх. Чак ако о проблеми на цидела пе, о Јехова шај те дел тут утеха хем те поможинел туке те овел тут андруно мир (Пс. 94:19; Фил. 4:6, 7). Хем ов ка наградинел тут адалеске со верно истрајнеа (Евр. 11:6).

АСВА КЕДА СИЕМ ИЗНЕВЕРИМЕ

11. Сар осетинела пе сине о Давид кеда сине ко пхаре ситуацие?

¹¹ Ко пло живото, е Давиде сине ле различна пхаре ситуацие колендар со рунѓа. Сине бут мануша кола со мрзинѓе ле, чак несаве таро лескере амала хем фамилија коленде со сине ле доверба, изневеринѓе ле (1. Сам. 19:10, 11; 2. Сам. 15:10-14, 30). Ки јекх прилика кеда сине леске бут пхаро, ов пишинѓа: „Уморинѓум ман таро офкибе. Добором манге пхаро со више нане ман сила, по цело рат само ровава. Ме асвенцар сапанкерава ми постела“. Соске о Давид осетинѓа пе аѓаар? Ов објаснинѓа: „Себепи мле душмања“ (Пс. 6:6, 7). Кеда о јавера постапинена сине бут лошно е Давидеа, ов осетинела сине бари дукх хем лескере асва тхавдена сине сар чешма.

12. Сар со дикхаја таро Псалм 56:8, ко со сине уверимо о Давид?

¹² Иако е Давиде сине ле бут неволје ко живото, ов сине уверимо кај о Јехова мангела ле. Ов пишинѓа: „О Јехова ка шунел мло ројбе“ (Пс. 6:8). А ки јекх јавер прилика, ов пишинѓа о поетска лафија со читинаја лен ко Псалм 56:8. (Читин.) Кеда читинаја  акала лафија амен шај те хаљова кај о Јехова бут мангела амен хем нежно грижинела пе аменге. О Давид осетинела пе сине сар те пхене о Јехова кхедела лескере асва ко шиши тари кожа или пишинела лен сине ко лил. Ов сине уверимо кај о Јехова дикхела хем памтинела лескири дукх. О Давид на сумнинела пе сине кај лескоро небесно Дад кова со бут грижинела пе леске, на само сој тано свесно таро со накхела, него хем џанела сар адава керела те осетинел пе.

13. Со шај те утешинел амен кеда о јавера разочаринена амен или изневеринена амен? (Дикх хем и слика.)

¹³ Поуке аменге. Дали сине туке бут пхаро адалеске со некој касте со сине тут доверба разочаринѓа тут или изневеринѓа тут? Шај тло вило тано пхаго адалеске со таро јекх пути раскининѓан некасаја со сиан сине ки врска, мукхља тут тло брачно партнери или некој со мангеа ле чхинавѓа те служинел е Јеховаске. Јекх пхрал каскири ромни керѓа прељуба хем мукхља ле, вакерѓа: „Нашти сине те верујнав, сиум сине ко шок. Осетинава ман сине кај на врединава, сиум сине тажно хем бут хољамо“. Ако туте да некој изневеринѓа тут или разочаринѓа тут, шај те утешинел тут адава со џанеа кај о Јехова никогаш нане те мукхел тут. О пхрал вакерѓа: „Халиљум кај о мануша шај те изневеринен тут, ама о Јехова тано амари Карпа. Било со те овел, ов тано секогаш акате аменге. Ов никогаш нане те мукхел околен сој тане леске верна“ (Пс. 37:28). Исто аѓаар ма бистре кај е Јеховаскоро мангипе тано побаро таро мангипе било коле манушескоро. Кеда сиан изневеримо осетинеа бут бари дукх, ама адава никогаш нане те влијајнел упро адава кобор грижинела пе туке о Јехова (Рим. 8:38, 39). Адава со ваљани те памтина тано: Бизи разлика сар некој понашинѓа пе туја, тло небесно Дад мангела тут.

14. Ко со уверинела амен о Псалм 34:18?

¹⁴ Ако некој изневеринѓа амен, утеха шај те аракха хем ко охрабрувачка лафија е Давидескере кола тане пишиме ко Псалм 34:18. (Читин.) Ко јекх библиско прирачнико пишинела кај е лафенцар „адален сој пхаге духоја“ шај те мислинел пе ко „мануша со нане лен ко со те надинен пе“. Со керела о Јехова те шај те поможинел околенге со осетинена пе аѓаар адалеске со некој бут разочаринѓа лен? „О Јехова тано паше“ узи аменде. Ов тано сар родители кова со икерела ки ангали хем утешинела пле вознемириме чхаве. Ако аменге пхаро адалеске со некој изневеринѓа амен или мукхља амен, о Јехова осетинела амари дукх хем одма поможинела аменге. Ов мангела те утешинел хем те сасљарел амаро пхаго вило. Хем  ветинѓа аменге бут шуже буќа коленде со шај те надина амен хем кола со шај те поможинен аменге те истрајна ко неволје со иси амен акана (Иса. 65:17).

АСВА КЕДА НАНЕ АМЕН НИСАВИ НАДЕЖ

15. Соске о Езекија бут рунѓа?

¹⁵ Кеда сине ле 39 берш, о цари о Езекија тари Јуда, насвалило таро пхаро насвалипе. О пророко о Исаија вакерѓа леске порака таро Јехова кај ка мерел таро адава насвалипе (2. Цар. 20:1). Изглединела сине кај нане нисави надеж е Езекијаске. Разочаримо таро адава хабери, ов бут рунѓа хем молинѓа е Јехова те поможинел леске (2. Цар. 20:2, 3).

16. Со керѓа о Јехова е Езекијаске?

¹⁶ Кеда шунѓа е Езекијаскири молитва хем дикхља лескере асва, о Јехова жалинѓа ле хем вакерѓа леске: „Шунѓум тли молитва хем дикхљум тле асва. Аке, ка сасљарав тут“. Преку о Исаија, о Јехова милостиво ветинѓа леске кај ка продолжинел лескоро живото хем кај ка спасинел о Ерусалим таро Асирција (2. Цар. 20:4-6).

17. Сар поможинела амен о Јехова кеда иси амен сериозна проблемија састипаја? (Псалм 41:3; дикх хем и слика.)

¹⁷ Поуке аменге. Дали иси тут несаво насвалипе колеске со мислинела пе кај нане леко? Вакер е Јеховаске сар осетинеа тут. Ов шунела тут чак ако молинеа тут асвенцар. И Библија уверинела амен кај „о Дад сој милостиво хем о Девел секоле утехакоро [ка дел] амен утеха ки секоја амари неволја“ (2. Кор. 1:3, 4). Авдиве нашти те очекујна о Јехова те цидел са амаре проблемија, ама ов секогаш ка поможинел аменге. (Читин Псалм 41:3.) О Јехова дела амен сила, мудрост хем андруно мир те шај те икљова ко крајо е ситуацијаја (Изр. 18:14; Фил. 4:13). Освен адава, ов утешинела амен преку и надеж тари Библија кај јекх диве са о насвалипа ка овен цидиме (Иса. 33:24).

18. Кова стихо дела тут утеха кеда иси тут посебно пхаре ситуацие? (Дикх и рамка „ Лафија кола со шај те утешинен амен кеда роваја“.)

¹⁸ О лафија е Јеховаскере утешинѓе е Езекија. Амен да шај те аракха утеха ко е Девлескоро Лафи. О Јехова мукхља адатхе те овен пишиме лафија кола со ка утешинен амен хем ка смиринен амен кеда иси амен пхаре ситуацие (Рим. 15:4). Откеда јекхе пхењаке тари Западно Африка откринѓе кај иси ла рако, ој бут пути ровела сине. Ој вакерела: „Посебно утешинѓа ман о стихо таро Исаија 26:3. Амен ретко иси амен целосно контрола упро амаре проблемија, ама акава стихо уверинела ман кај о Јехова шај те дел амен андруно мир кова со ка поможинел аменге те овел амен контрола упро адава сар реагиринаја кеда иси амен неволје“. Дали иси тут несаво стихо со дела тут утеха кеда боринеа тут несаве ситуациенцар сој  тане посебно пхаре, па чак бизи нисави надеж?

19. Сави иднина аџикерела амен?

¹⁹ О крајо акале светоскоро тано бут паше хем свесна сием кај ка овен панда попхаре ситуацие кола со ка анен аменге дукх хем асва. Ама сар со дикхлем таро пример е Анакоро, е Давидескоро хем е царескоро е Езекијаскоро, о Јехова дикхела амаре асва хем нане леске са јекх кеда роваја. Амаре асва леске тане скапоцена. Адалеске, кеда накхаја таро пхаре ситуацие, важно тано те пхрава амаро вило ки молитва е Јеховаске. Никогаш ма те изолирина амен таро амаре мангле пхраља хем пхења таро собрание. Хем понадари да те аракха утеха ко охрабрувачка лафија тари Библија. Шај те ова увериме кај ако верно истрајнаја, о Јехова ка наградинел амен. Јекх награда тани о бут шужо ветување кај јекх диве „ов ка косел секоја асвин“ таро амаре јакхја адалеске со сием сине бут тажна, изневериме хем со сием сине бизи надеж (Отк. 21:4). Тегани ако роваја, ка рова само тари радост.