Дали внимателно читинѓан о броја тари Стражарско кула акале бершеске? Дикх дали шај те одговорине ко акала пучиба.

Саво пример дела о Јехова башо адава сар ваљани те постапинел пе е џувленцар?

Ов постапинела ленцар непристрасно, адава значинела кај на постапинела е муршенцар пошукар него е џувленцар. О Девел шунела е џувлен хем важно леске сар осетинена пе хем башо со секиринена пе. Исто аѓаар, о Јехова сикавела доверба ко џувља адалеа со денѓа лен задаче ки служба баши лесте (w24.01, стр. 15-16).

Сар шај те применина о совет таро Ефешања 5:7, коте со пишинела: „Ма те овел тумен ништо ленцар“?

О апостол Павле предупрединѓа амен те на дружина амен манушенцар со керена аменге пхаро те икера амен ко е Девлескере мерилија. Ко асавко лошно друштво нане само окола касаја со дружинаја амен лично. Машкар ленде тане хем окола касаја со комунициринаја преку социјална мреже (w24.03, стр. 22-23).

Таро саве ховавне информацие ваљани те аракха амен?

Ваљани те аракха амен таро информацие со нане провериме кола со авена таро амаре пхраља хем пхења, таро имејл пораке со бичхалѓе лен мануша со на пенџараја лен хем таро отпадникија со преправинена пе кај интересинена пе башо чачипе (w24.04, стр. 12).

Со џанаја, а со на џанаја башо адава сар ка судинел о Јехова е Соломонеске, околенге со муле ко Содом хем Гомор хем околенге со муле ко Потоп?

На сием сигурна дали о Јехова осудинѓа са адале манушен те овен вечно уништиме. Сепак, џанаја кај о Јехова џанела са о фактија хем кај сикавела бари милост (w24.05, стр. 3-4).

Ко со уверинела амен адава со ки Библија башо Јехова вакерела пе кај тано „Карпа“? (5. Мој. 32:4).

О Јехова тано амаро тхан гарајбаске. Ов заслужинела и доверба хем секогаш исполнинела пле ветувања. Исто аѓаар, ов тано стабилно — лескири личност хем лескири намера никогаш на менинена пе (w24.06, стр. 26-28).

Со шај те поможинел туке те прилагодине тут ко нево собрание?

Нека овел тут доверба ко Јехова, кова со ка поможинел тут исто сар со поможинѓа пле слугенге таро пурано време. Ма кер споредбе тле пуране собраниеа. Ов зафатимо ко тло нево собрание хем кер туке амала (w24.07, стр. 26-28).

Со сикљоваја таро трин споредбе кола сој пишиме ко Матеј поглавје 25?

И споредба башо бакхре хем бузња сикавела кобор тано важно те ова верна е Јеховаске. И споредба башо мудра хем глупава чхаја истакнинела кај ваљани те ова спремна хем џангавде. А и споредба башо талантија истакнинела кобор тано важно те ова буќарне (w24.09, стр. 20-24).

Кобор сине учо о влези ко храми е Соломонескоро?

Ко несаве пуране преводија ко 2. Летописи 3:4, пишинела кај о влези сине учо „120 лактија“, со би значинела кај сине учо околу 53 метре. Ама, ко јавера преводија коленге со шај те верујнел пе пишинела кај сине учо „20 лактија“, јавере лафенцар околу ења метре. Ако лаја те дикха кобор сине бувле о ѕидија котар со кхувела пе сине ко храми, тегани побари тани и веројатност кај о влези сине учо ења метре (w24.10, стр. 31).

Со значинела адава кај јекхе слуга-помошнико ваљани те овел „само јекх ромни“? (1. Тим. 3:12).

Адава значинела кај тано женимо само јекхе ромњаја хем кај никогаш на ваљани те керел сексуално неморал. Освен адава, на ваљани те сикавел романтично интерес јавере џувленге (w24.11, стр. 19).

Соске шај те вакера кај е Исусескере лафија сој пишиме ко Јован 6:53 на сикавена сар ваљани те икерел пе е Господарескири вечера?

Ко Јован 6:53 пишинела кај ваљани те хал пе е Исусескоро тело хем те пиел пе лескоро рат. О Исус вакерѓа акала лафија ко 32 берш тари а.е., ки Галилеја, англо Евреија кола со ваљани сине те сикавен вера ки лесте. Сепак, е Господарескири вечера сине воспоставими јекх берш покасно ко Ерусалим. О Исус тегани керѓа лафи околенцар со ваљани сине те владинен заедно леа ко небо (w24.12, стр. 10-11).