О апостол Павле пишинѓа е Тимотееске кова исто аѓаар сине старешина: „Заповединава туке англо Девел, англо Христос Исус хем англо бириме ангелија, те икере тут ко акала упатствија бизо те судинен е манушенге англедер хем бизо те делине е манушен“ (1. Тим. 5:21).

Прво, те дикха кој нашти те овен акала бириме ангелија. Јасно тано кај адала нане о 144.000. Кеда о Павле пишинѓа акава е Тимотееске, панда на почминѓа о воскресение е помазиме христијаненгоро башо живото ко небо. О апостолија хем о јавера помазаникија панда на сине духовна суштествија хем адалеске нашти сине ола те овен о „бириме ангелија“ (1. Кор. 15:50-54; 1. Сол. 4:13-17; 1. Јов. 3:2).

Исто аѓаар, о „бириме ангелија“ нашти те овен о ангелија кола со на сине послушна ко време кеда сине о Потоп. Адала ангелија уле тари страна е Сатанаскири хем уле демонија, а адалеа уле душмања е Исусескере (1. Мој. 6:2; Лука 8:30, 31; 2. Пет. 2:4). Ки иднина, ола ка овен фрдиме ки бездна коте со ка овен 1.000 берша, а пало адава ка овен уништиме заедно е Бенгеа (Јуда 6; Отк. 20:1-3, 10).

Значи о „бириме ангелија“ кола со о Павле спомнинѓа лен мора те овен о ангелија сој ко небо кола со верно соработинена околенцар сој спомниме ко исто стихо, е Девлеа хем е Христос Исусеа.

Иси бут милје верна ангелија (Евр. 12:22, 23). Хем изгледа, нане лен саринен исто задача ко исто време (Отк. 14:17, 18). На пример, ки јекх ситуација јекх ангели добинѓа задача те мударел 185.000 асирска војникија (2. Цар. 19:35). Тари јавер страна, повише ангелија шај добинѓе и задача „те циден таро [е Исусескоро] Царство са околен со керена о јавера те грешинен хем со керена лошна буќа“ (Мат. 13:39-41). Јавера шај „ка кхеден околен со ов биринѓа“ башо небо (Мат. 24:31). А иси хем асавке сој ленге заповедимо те аракхен амен ко са амаре друмија (Пс. 91:11; Мат. 18:10; споредин Матеј 4:11; Лука 22:43).

О „бириме ангелија“ кола сој спомниме ко 1. Тимотеј 5:21, веројатно тане о ангелија со иси лен посебна задаче поврзиме е Девлескере народоја. Таро контекст дикхаја кај о Павле денѓа мудра советија е старешиненге, кола со заслужинена о јавера таро собрание те поштујнен лен. А о старешине ваљани те керен пумаре задаче бизи пристрасност хем предрасуде, хем те на анен одлуке бизо шукар те размислинен. Јекх важно причина соске ваљани те шунен о совет е Павлескоро тано адалеске со са со керена, керена „англо Девел хем англо Христос Исус хем англо о бириме ангелија“. Таро акава јасно дикхела пе кај несаве ангелија иси лен задаче сој тане поврзиме е собраниеа, на пример, те заштитинен е Девлескере слуген, те надглединен о проповедибе хем те известинен е Јехова башо адава со дикхена (Мат. 18:10; Отк. 14:6).