1. Со шај те сикљова таро попхуре?

 СЕКОЛЕ јекхеске ваљани водство, јавере лафенцар советија кеда ваљани те анел важна одлуке ко живото. Асавке советија шај те рода таро старешине хем таро јавера зрела христијања. Ако ола тане попхуре амендар, на ваљани одма те мислина кај ленгере советија нане корисна башо амаро време. О Јехова мангела те сикљова таро попхуре. Ола бершенцар кхединѓе искуство хем мудрост (Јов 12:12).

2. Со ка дикха ки акаја статија?

² Ко библиско време, о Јехова користинѓа пле верна слуген кола со сине попхуре те шај те охрабринен хем те водинен лескере народо. На пример, размислин башо Мојсеј, о Давид хем о апостол Јован. Ола живинѓе ко различно периоди хем ленгере околностија бут разликујнена пе сине. Ко крајо таро пумаро живото ола денѓе мудра советија е потерненге. О сотрин верна попхуре мурша истакнинѓе кобор тано важно те ова послушна е Девлеске. О Јехова гаравѓа ленгере мудра лафија те шај те користинен аменге авдиве. Бизи разлика дали сием потерне или попхуре, шај те овел амен корист таро ленгере советија (Рим. 15:4; 2. Тим. 3:16). Ки акаја статија ка дикха о последна лафија таро акала трин попхуре мурша, хем со шај те сикљова лендар.

„ОВ КА ДЕЛ ТУТ ТЕ ЖИВИНЕ БУТ БЕРША“

3. Ко саве начинија о Мојсеј служинѓа е Девлеске хем лескере народоске?

³ О Мојсеј ко пло живото керѓа бут башо Јехова. Ов сине пророко, судија, заповеднико хем писатели. О Мојсеј кхединѓа баро искуство ко пло живото! Ов икалѓа е израелско народо таро ропство ко Египет хем пле јакхенцар дикхља бут таро чудија  со керѓа лен о Јехова. О Јехова користинѓа ле те шај те пишинел о прва панџ лила тари Библија, о Псалм 90, а шај хем о Псалм 91. Исто аѓаар, ов веројатно пишинѓа о лил Јов.

4. Кас охрабринѓа о Мојсеј, хем соске?

⁴ Кратко англедер те мерел, кеда сине ле 120 берш, о Мојсеј кхединѓа са е Израелцон те шај те сетинкерел лен ко адава со дикхле хем доживинѓе. Џикоте сине терне, несаве лендар дикхле пле јакхенцар бут знакија хем чудија со керѓа лен о Јехова. Исто аѓаар дикхле сар ов казнинѓа е Египќанен (2. Мој. 7:3, 4). Ола накхле таро Црвено Море хем дикхле сар о Јехова уништинѓа е фараонескере војска (2. Мој. 14:29-31). Ки пустина дикхле сар о Јехова пазинела лен хем грижинела пе ленге (5. Мој. 8:3, 4). Акана, кеда о Израелција сине англи Ветими Пхув, о Мојсеј користинѓа адаја последно прилика те шај те охрабринел е народо. a

5. Ко со уверинѓе е Израелцон о последна лафија е Мојсеескере кола сој пишиме ки 5. Мојсеева 30:19, 20?

⁵ Со вакерѓа о Мојсеј? (Читин 5. Мојсеева 30:19, 20.) Е Израелцон аџикерела лен сине бут шужи иднина. Адалеске со благословинѓа лен о Јехова, ола шај сине те живинен бут време ки пхув која со ветинѓа ла ленге. Хем адаја пхув сине бут шужи хем плодно! О Мојсеј опишинѓа ла акале лафенцар: „Пхув ки која со иси баре хем шуже дизја, кола со на градинѓан лен, кхера пхерде шуже буќенцар, кола со на пхерѓан лен, ранле бунарија, кола со на ранљан лен, дракха хем маслинке, кола со на садинѓан лен“ (5. Мој. 6:10, 11).

6. Соске о Девел мукхља несаве јавера народија те побединен е Израелцон?

⁶ О Мојсеј исто аѓаар предупрединѓа е Израелцон. Те шај понадари да те живинен ки адаја плодно пхув, ола ваљани сине те овен послушна ко е Јеховаскере заповедија. О Мојсеј предупрединѓа лен те „биринен живото“ адалеа со ка шунен е Јехова хем ка икерен пе ко адава со вакерела ов. Сепак, о Израелција на мангле те шунен е Јехова. Адалеске, пало несаво време о Девел мукхља е Асирцон, а покасно хем е Вавилонцон те побединен е Израелцон хем те ингарен лен ко ропство (2. Цар. 17:6-8, 13, 14; 2. Лет. 36:15-17, 20).

7. Со шај те сикљова таро е Мојсеескере лафија? (Дикх хем и слика.)

⁷ Со шај те сикљова? И послушност ка спасинел амаро живото. Исто сар о Израелција со сине ко праго тари Ветими пхув, амен да сием ко праго таро нево свето кова со ветинела ле аменге о Јехова о Девел. Панда хари ка шај те дикха сар и пхув ка овел рај (Иса. 35:1; Лука 23:43). Нане те овен о Бенг хем о демонија (Отк. 20:2, 3). Нане више те постојнел и ховавни религија која со ширинела ховајба башо Јехова (Отк. 17:16). Нане више те овен о манушикане владе кола со мучинена е народо (Отк. 19:19, 20). Ко рај нане те овел тхан башо бунтовникија (Пс. 37:10, 11). О мануша ки цели пхув ка шунен е Јеховаскере праведна законија, кола со керена те ова ко јекхипе хем мир. Са о мануша ка манген пе хем ка овел лен доверба машкар песте (Иса. 11:9). Кобор шужо време аџикерела амен! Ама сој панда поважно, ако сием послушна е Јеховаске, ка шај те живина ко рај ки пхув на само веконцар него ки цели вечност! (Пс. 37:29; Јован 3:16).

8. Сар о ветување башо вечно живото поможинѓа јекхе пхралеске кова сој бершенцар мисионери? (Јуда 20, 21).

⁸ Ако цело време размислинаја башо е Девлескоро ветување башо вечно живото, ка  манга те ова послушна е Јеховаске бизи разлика саве проблемија ка овен амен. (Читин Јуда 20, 21.) Исто аѓаар, адава ветување шај те дел амен сила те шај те борина амен амаре слабостенцар. Јекх пхрал, кова сој бут берша мисионери ки Африка хем кова со бершенцар боринѓа пе против јекх слабост, вакерѓа: „Адава со халиљум кај шај те нашавав и прилика те живинав вечно керѓа те овав поодлучно те боринав ман е проблемеа хем таро вило те молинав е Јехова башо адава. Адалеске со ов поможинѓа ман успејнѓум те боринав ман против мли слабост“.

„КА ОВЕ УСПЕШНО“

9. Саве неволје сине е Давиде ко пло живото?

⁹ О Давид сине цари кова со сине верно е Јеховаске хем кова со мангела сине е народо. Ов сине музичари, поети, војнико хем пророко. Е Давиде сине ле бут неволје. Некобор берш, ов нашела сине таро јекх тхан ко јавер адалеске со о цари о Саул сине леске љубоморно. Откеда уло цари, о Давид палем ваљани сине те нашел те шај те спасинел пло живото кеда о Авесалом пробинѓа те овел цари наместо лесте. Иако сине ле бут пхарипа хем керѓа сериозна гревија, о Давид ачхило верно е Девлеске џи ко крајо таро пло живото. Баши лесте о Јехова вакерѓа кај тано „мануш спрема [лескоро] вило“. Адалеске, врединела те шуна о совет е Давидескоро (Апо. 13:22; 1. Цар. 15:5).

10. Соске о Давид денѓа совет пле чхавеске е Соломонеске кова со ваљани сине те овел о следно цари ко Израел?

¹⁰ На пример, размислин башо совет со о Давид денѓа пле чхавеске е Соломонеске, кова со ваљани сине те овел о следно цари ко Израел. О Јехова биринѓа акале терне мануше те градинел леске храми колесте со шај о мануша те обожавинен ле (1. Лет. 22:5). Е Соломоне ка овен ле сине пхарипа. Саво совет денѓа ле о Давид? Ајде те дикха.

11. Спрема 1. Царевите 2:2, 3, ко со уверинѓа о Давид пле чхаве е Соломоне, хем сар адава иклило кај тано чаче? (Дикх хем и слика.)

¹¹ Со вакерѓа о Давид? (Читин 1. Царевите 2:2, 3.) О Давид вакерѓа пле чхавеске кај, ако тано послушно е Јеховаске, ка овел успешно, јавере лафенцар ка овел шукар водачи хем о Јехова ка благословинел ле. Бершенцар о Јехова денѓа е Соломоне бут шукар буќа хем поможинѓа ле ко разна начинија (1. Лет. 29:23-25). Ов градинѓа бут шужо храми хем пишинѓа некобор библиска лила. О Соломон уло пенџардо пали пли мудрост хем пло барвалипе (1. Цар. 4:34). Ама сар со објаснинѓа о Давид, о Соломон ка овел сине успешно са џикоте тано послушно е Девлеске, е Јеховаске. Жално тано со кеда о Соломон пхурило, почминѓа те обожавинел јавере девлен. Ов нашавѓа пло амалипе е Јеховаја, хем о Девел чхинавѓа те дел ле и мудрост со ваљанела те шај те владинел шукар хем праведно (1. Цар. 11:9, 10; 12:4).

12. Со шај те сикљова таро е Давидескере лафија?

 ¹² Со шај те сикљова? Ако сием послушна е Јеховаске ов ка благословинел амен хем ка поможинел амен (Пс. 1:1-3). Нормално, о Јехова на ветинела кај ка дел амен барвалипе хем слава сар со сине е Соломоне. Ама, ако сием послушна амаре Девлеске, ов ка дел амен и мудрост со ваљанела те шај те ана шукар одлуке (Изр. 2:6, 7; Јак. 1:5). Е Јеховаскере советија шај те поможинен амен кеда анаја одлуке баши бути, школа, паре хем забава. Ако постапинаја спрема е Девлескири мудрост, ка аракха амаро амалипе леа хем ка овел амен вечно живото (Изр. 2:10, 11). Ка овен амен шукар амала хем амари фамилија ка овел среќно.

13. Со поможинѓа јекхе пхењаке со викинела пе Кармен те анел мудра одлуке ко пло живото?

¹³ И Кармен, која со живинела ко Мозамбик, мислинела сине кај те шај те овел тут пошукар живото мора те овел тут бари школа. Ој пишинѓа пе ко факултети баши архитектура. И Кармен пишинѓа: „Свиџинела пе сине манге адава со сикљовава. Ама, лела сине мандар бут време хем сила. Сиум сине ко факултети таро 7:30 сабајле џи ко 18:00 раќате. Сине манге пхаро те џав ко состанокија хем мло амалипе е Јеховаја на сине више сар англедер. Хор ки манде халиљум кај пробинава те служинав дује господаренге“ (Мат. 6:24). Ој молинѓа пе хем истражинѓа ко амаре публикацие баши пли ситуација. И Кармен понадари вакерела: „Откеда добинѓум мудра советија таро старешине хем тари ми дај, одлучинѓум те мукхав о факултети хем те служинав е Јеховаске полновремено. Акава поможинѓа ман те анав о најшукар одлуке ко мло живото хем ни хари те на жалинав башо адава“.

14. Која сине и главно порака е Мојсеескири хем е Давидескири?

¹⁴ О Мојсеј хем о Давид мангена сине е Јехова хем џанена сине кај тано бут важно те овен леске послушна. Пумаре последна лафенцар ола поттикнинѓе е јаверен те џан пало ленгоро пример аѓаар со ка ачховен верна е Јеховаске. Исто аѓаар, о солдуј предупрединѓе кај окола со нане те ачховен верна е Јеховаске ка нашавен пло амалипе леа, ама хем о благословија со ов ветинѓа ленге. Ленгере советија важинена аменге да авдиве. Веконцар покасно, јекх јавер да слуга е Јеховаскоро  сикавѓа кобор тано важно те ачхова верна е Девлеске.

„НАНЕ ПОБАРИ РАДОСТ“

15. Со са дикхља о апостол Јован ко пло живото?

¹⁵ О Јован сине апостоли коле со о Исус Христос посебно мангела сине (Мат. 10:2; Јован 19:26). О Јован сине е Исусеа џикоте трајнѓа лескири служба, дикхља саве чудија керѓа о Исус хем ачхило леске верно кеда сине ле пхарипа. Ов исто аѓаар дикхља сар сине мудардо о Исус хем дикхља ле откеда воскреснинѓа. О Јован дикхља сар ширинела пе о христијанство ко прво веко хем сар проповединела пе о шукар хабери машкар „са о мануша тело небо“ (Кол. 1:23).

16. Кас иси корист таро писмија е Јованескере?

¹⁶ О апостол Јован живинѓа бут берша, ама англедер те мерел ле сине ле чест те пишинел несаве таро библиска лила. Ов пишинѓа „о откровение башо Исус Христос“ (Отк. 1:1). Пишинѓа хем о евангелие кова со пхиравела лескоро анав. Водимо тари е Девлескири сила, о Јован пишинѓа хем трин писмија. Пло трито писмо пишинѓа ле јекхе верно христијанеске, со викинела пе сине Гај, коле со мангела ле сине сар пло духовно чхаво (3. Јов. 1). Џи тегани, сигурно сине бут христијања колен со о Јован дикхела лен сине сар пле духовна чхаве. Адава со пишинѓа акава верно попхуро мануш тано охрабрување са е Исусескере следбениконге џи авдиве.

17. Спрема 3. Јованескоро 4, со керела амен те ова радосна?

¹⁷ Со пишинѓа о Јован? (Читин 3. Јованескоро 4.) О Јован пишинѓа кај ако сием послушна е Девлеске адава ка керел амен радосна. Џикоте завршинѓа пишибаја пло трито писмо, несаве џене више ширинѓе ховавне сикљојба хем керѓе те овел поделбе. Сепак, јавера понадари да живинена сине „спрема о чачипе“. Ола сине послушна е Јеховаске хем живинена сине „спрема лескере заповедија“ (2. Јов. 4, 6). Акала верна христијања радујнѓе на само е Јоване него хем е Јехова (Изр. 27:11).

18. Со шај те сикљова таро е Јованескере лафија?

¹⁸ Со шај те сикљова? Ако сием верна е Јеховаске адава ка анел аменге радост (1. Јов. 5:3). На пример, радосна сием башо адава со џанаја кај радујнаја е Јехова. Ов радујнела пе кеда дикхела кај на кераја о лошна буќа со иси ко свето хем сием послушна ко лескере заповедија (Изр. 23:15). О ангелија да ко небо радујнена пе (Лука 15:10). Амен да радујнаја амен кеда дикхаја сар амаре пхраља хем пхења  ачховена верна чак ако тане прогониме или тане ко искушение те керен нешто погрешно (2. Сол. 1:4). А кеда акава свето ка овел уништимо, ка шај те ова радосна адалеске со ачхилем верна е Јеховаске чак ко свето колеа со владинѓа о Сатана.

19. Со вакерѓа и Рејчел башо сикајбе е јаверен? (Дикх хем и слика.)

¹⁹ Амен сием посебно радосна кеда вакераја о шукар хабери е јаверенге. И Рејчел, која со живинела ки Доминиканско Република, дикхела сар бари чест ко адава те сикавел е јаверен башо амаро бут шукар Девел колеске со служинаја. Башо пле духовна чхаве, ој вакерела: „Нане ман лафија коленцар со шај те опишинав и радост со осетинава кеда дикхава сар окола со сикавава лен почминена те манген е Јехова, сикљона те овел лен доверба ки лесте хем керена промене ко пумаро живото те шај те радујнен ле. Адаја радост тани побари таро адава со трудинѓум ман хем таро са о жртве со керѓум те шај те сикавав е јаверен“.

НЕКА ОВЕЛ ТУТ КОРИСТ ТАРО ПОСЛЕДНА ЛАФИЈА НЕСАВЕ ВЕРНА СЛУГЕНГЕРЕ

20. Со иси амен заедничко е Мојсееа, е Давидеа хем е Јованеа?

²⁰ О Мојсеј, о Давид хем о Јован живинѓе ко време хем околностија кола со разликујнена пе таро амаре. Ама, иси амен бут заедничка буќа ленцар. Ола служинѓе е чачутне Девлеске, а служинаја леске амен да. Исто сар ленде, молинаја амен е Јеховаске, иси амен доверба ки лесте хем родаја лестар водство. Хем, исто сар акала мурша таро пурано време увериме сием кај о Јехова бут ка благословинел околен сој леске послушна.

21. Саве благословија аџикерена околен со на бистрена о советија е верна попхуре муршенгере сар сој о Мојсеј, о Давид хем о Јован?

²¹ Адалеске, те на бистра о последна лафија акале верна попхуре муршенгере аѓаар со ка ова послушна ко е Јеховаскере заповедија. Тегани ка ова успешна ко са. Ка живина бут берша, јавере лафенцар вечно (5. Мој. 30:20). Хем ка ова радосна адалеске со радујнаја амаре небесно Даде сој пхердо мангипаја. Ов исполнинела са пле ветувања ко бут пошукар начин таро адава со очекујнаја, па чак пошукар таро адава со шај те замислина аменге (Еф. 3:20).