1. Сар дикхела сине о апостол Павле ко слуга-помошникија?

 Е СЛУГА-ПОМОШНИКОН иси лен важна задаче ко собрание. Дикхела пе кај о апостол Павле бут ценинела сине асавке верна пхрален. На пример, кеда пишинѓа е христијаненге ко Филипи, ов конкретно поздравинѓа е слуга-помошникон заедно е старешиненцар (Фил. 1:1).

2. Сар осетинела пе о пхрал Луис адалеске сој тано слуга-помошнико?

² Бизи разлика дали терне или пхуре, бут крстиме пхраља осетинена бари радост адалеске со поможинена ко собрание сар слуга-помошникија. На пример, е Деване сине ле 18 берш кеда сине именујмо сар слуга-помошнико. Тари јавер страна, јекх пхрал со викинела пе Луис, сине именујмо кеда сине ле повише таро 50 берш. Сар осетинела пе ов адалеске сој тано слуга-помошнико? О Луис вакерела: „Бут сиум среќно со ко асавко начин служинава мле пхраленге хем пхењенге ко собрание. Ола сикавѓе манге баро мангипе хем акана ме да шај те сикавав ленге мангипе!“ Бут слуга-помошникија осетинена пе слично.

3. Кола пучиба ка дикха ки акаја статија?

³ Ако сиан крстимо пхрал, а панда на сиан слуга-помошнико, дали шај те чхиве туке асавки цел? Со шај те поттикнинел тут те кере адава? Хем кола библиска условија ваљани те пхере те шај те ове слуга-помошнико? Ки акаја статија ка дикха о одговорија ко акала пучиба. Ама, најангле те дикха сави тани и улога јекхе слуга-помошникоскири.

 САВИ УЛОГА ИСИ ЈЕКХЕ СЛУГА-ПОМОШНИКО?

4. Сави улога иси јекхе слуга помошнико? (Дикх хем и слика.)

⁴ О слуга-помошнико тано крстимо пхрал кова сој именујмо тари е Девлескири сила те шај те поможинел е старешиненге аѓаар со ка керел бут важна задаче ко собрание. Несаве слуга-помошникија грижинена пе е објавителен те овен лен доволно подрачја хем публикацие службаке. Јавера поможинена ко чистибе хем ко одржибе о дворане. Исто аѓаар, о слуга-помошникија служинена сар редарија хем поможинена ко аудио-видео џикоте трајнена о состанокија. Побаро дело таро задаче со керена о слуга-помошникија тани практично помош е собраниеске. Ама најангле, о слуга-помошникија тане духовна мануша кола со мангена е Јехова хем живинена спрема лескере праведна мерилија. Исто аѓаар, ола бут мангена пле пхрален хем пхењен (Мат. 22:37-39). Сар шај јекх крстимо пхрал те пхерел о условија те овел слуга-помошнико?

5. Сар шај јекх пхрал те керел бути ки пли цел те овел слуга-помошнико?

⁵ Ки Библија пишинела со родела пе таро јекх пхрал те шај те овел слуга-помошнико (1. Тим. 3:8-10, 12, 13). Ако мангеа те поможине е јаверенге аѓаар со ка ове слуга-помошнико, проучин о библиска условија хем пало адава де тутар са те шај те пхере лен. Ама, најангле ваљани шукар те размислине соске мангеа те ове слуга-помошнико.

СОСКЕ МАНГЕА ТЕ ОВЕ СЛУГА-ПОМОШНИКО?

6. Таро кова мотиви ваљани те служине тле пхраленге хем тле пхењенге? (Матеј 20:28; дикх хем и слика.)

⁶ Размислин башо амаро најбаро пример, о Исус Христос, кова со керела сине са таро мангипе спрема пло Дад хем спрема о мануша. Асавко мангипе поттикнинѓа ле те овел буќарно хем понизно те керел задаче коленге со несаве мануша мислинена сине кај нане важна. (Читин Матеј 20:28; Јован 13:5, 14, 15.) Ако туте да поттикнинела тут о мангипе, о Јехова ка благословинел тут хем ка поможинел туке те исполнине тли цел те шај те пхере о условија те ове слуга-помошнико (1. Кор. 16:14; 1. Пет. 5:5).

7. Соске ваљани јекх пхрал те аракхел пе таро себична амбицие?

⁷ О мануша ко свето бут пути воодушевинена пе околенге со мангена те овен важна англо јавера. Ама акава нане аѓаар ки е  Јеховаскири организација. Јекх пхрал со мангела е јаверен исто сар о Исус, на мангела те владинел упро јавера или о јавера ки лесте те дикхен сар некој сој бут важно. Ако асавко амбициозно мануш овела именујмо ко собрание, веројатно ка одбинел те керел несаве понизна задаче кола со ваљани баши грижа е Јеховаскере скапоцена бакхренге. Ов шај ка мислинел кај ако керела асавке задаче адалеа ка перавел пе (Јован 10:12). О Јехова нане те благословинел о трудо некаскоро сој гордо хем кова со мукхела те овел водимо таро себична амбицие (1. Кор. 10:24, 33; 13:4, 5).

8. Саво совет денѓа о Исус пле апостоленге?

⁸ Понекогаш, чак хем адала со најпаше соработинена сине е Исусеа мангле те керен несаве задаче таро погрешна мотивија. Размислин баши јекх ситуација колате со сине вклучиме дуј таро е Исусескере апостолија — о Јаков хем о Јован. Ола родинѓе таро Исус те дел лен важно тхан ко лескоро Царство. О Исус на пофалинѓа лен баши ленгири амбиција. Наместо адава, са е апостоленге објаснинѓа: „Кој мангела те овел баро машкар туменде, нека овел туменге слуга, хем кој мангела те овел прво машкар туменде, нека овел робо сариненге“ (Мар. 10:35-37, 43, 44). О пхраља со мангена те керен задаче таро исправно мотиви — јавере лафенцар те служинен е јаверенге — ка овен благослов е собраниеске (1. Сол. 2:8).

СО ШАЈ ТЕ БАЈРАРЕЛ ТЛИ ЖЕЛБА ТЕ СЛУЖИНЕ Е ЈАВЕРЕНГЕ?

9. Сар шај те бајраре тли желба те служине е јаверенге?

⁹ Џанѓола пе, ту мангеа е Јехова хем мангеа те служине е јаверенге. Сепак, шај нане тут желба те кере додатна задаче кола со родена пе таро јекх слуга-помошнико. Сар шај те бајраре тли желба те служине ко асавко начин? Размислин кобор радосно ка ове ако служинеа тле пхраленге хем пхењенге. О Исус вакерѓа: „Повише радост иси кеда дела пе, него кеда лела пе“ (Апо. 20:35). Коркори о Исус живинѓа спрема акава начело. Ов сине бут радосно џикоте служинела сине е јаверенге, а о исто шај те овел туја да.

10. Сар о Исус сикавѓа кај адава со служинела сине е јаверенге керела ле радосно? (Марко 6:31-34).

¹⁰ Те дикха јекх пример кова со сикавела кај о Исус сине радосно кеда служинела сине е јаверенге. (Читин Марко 6:31-34.) Ки јекх прилика, о Исус хем лескере апостолија сине уморна. Ола цидинѓе те џан ко јекх тхан коте со на сине никој те шај те одморинен пе. Ама јекх бари група мануша ресле адари англедер ленде соске надинена пе сине кај о Исус ка сикавел лен. Ов шај сине те одбинел лен соске ни ле, ни лескере апостолен, на сине лен време ни те хан. Или, о Исус шај сине само кратко те сикавел е манушен башо јекх или дуј чачипа. Ама, адалеске со мангела сине е манушен ов „почминѓа те сикавел лен башо бут буќа“ хем продолжинѓа те сикавел лен џи касно раќате (Мар. 6:35). Ов на керѓа адава соске мора сине, него адалеске со жалинѓа лен. О Исус мангља те сикавел лен соске сине поттикнимо таро мангипе. Е Исусе керела ле сине бут радосно адава со служинела сине е јаверенге.

11. Сар о Исус служинѓа е јаверенге ко практично начин? (Дикх хем и слика.)

¹¹ Кеда о Исус служинѓа е манушенге со але ки лесте, ов керѓа нешто повише него само те сикавел лен. Ов грижинѓа пе хем башо ленгере физичка потребе. Чудоја керѓа те овел лен хајбаске хем вакерѓа пле учениконге те делинен адава хајбе (Мар. 6:41). Аѓаар, ов сикавѓа пле ученикон сар те служинен е јаверенге. Исто аѓаар, ов сикавѓа ленге кај асавки служба, која со обично керена ла о слуга-помошникија, тани бут важно. Шај те замислина аменге кобор сине радосна о апостолија со  сине лен прилика те соработинен е Исусеа хем те делинен е манушенге о хајбе кова со ов чудоја керѓа ле, колестар со сарине „хале хем чалиле“ (Мар. 6:42). Џанѓола пе, акава на сине ни прво, ни последно пути кеда о Исус чхивѓа е јаверенгере потребе англедер пле. Ов керѓа адава цело пло живото џикоте сине ки пхув (Мат. 4:23; 8:16). Е Исусеске сине бари радост хем задоволство те сикавел е јаверен хем понизно те грижинел пе башо ленгере потребе. Сигурно ту да ка ове бут радосно ако спремно служинеа е јаверенге сар слуга-помошнико.

12. Соске никас амендар нане ле причина те мислинел кај нане ле нисаве способностија коленцар со шај те поможинел ко собрание?

¹² Ако мислинеа кај нане тут несави посебно способност, ма обесхрабрин тут. Сигурно иси тут несаве особине кола со шај те користине лен те шај те поможине ко собрание. Размислин башо адава со вакерѓа о Павле ко 1. Коринќања 12:12-30 хем пало адава роде таро Јехова те поможинел туке те дикхе сар акала лафија важинена ко тло случај. Таро е Павлескере лафија јасно дикхела пе кај ту, ама хем секова слуга е Јеховаскоро, иси тут важно хем скапоцено улога ко собрание. Ако ко моменти на пхереа о условија те ове слуга-помошнико, ма разочарин тут. Наместо адава, кер са со шај те шај те служине е Јеховаске хем те поможине тле пхраленге хем пхењенге. Ов уверимо кај о старешине ка размислинен баши туте хем ка ден тут задаче со шај те кере лен (Рим. 12:4-8).

13. Соске нане бут пхаро те пхере о условија те ове слуга-помошнико?

¹³ Размислин баши панда јекх причина соске ваљани те чхиве туке цел те пхере о условија те ове слуга-помошнико. Повише таро условија важинена са е христијаненге, уствари са о христијања ваљани те овен паше е Јеховаја, радосно те ден е јаверенге хем те овен пример ко адава сар живинена. Ама, акана те дикха со конкретно ваљани те керел јекх пхрал те шај те пхерел о условија те овел слуга-помошнико.

КОЛА ТАНЕ О УСЛОВИЈА ТЕ ШАЈ НЕКОЈ ТЕ ОВЕЛ СЛУГА-ПОМОШНИКО

14. Ки сави смисла о слуга-помошникија ваљани те овен сериозна? (1. Тимотеескоро 3:8-10, 12).

¹⁴ Те дикха несаве таро условија сој пишиме ко 1. Тимотеескоро 3:8-10, 12 (Читин.) О слуга-помошникија мора „те заслужинен е јаверенгоро поштовање“, израз кова со шај те превединел пе хем сар сериозна. Акава на значинела кај никогаш на смејнеа те аса или  те шалине тут (Проп. 3:1, 4). Ама, ваљани сериозно те дикхе ко са тле задаче. Ако шукар кереа и бути сој туке денди, тегани о пхраља хем о пхења ко собрание ка џанен кај шај те овел лен доверба ки туте хем ка поштујнен тут.

15. Со значинела некој те на овел дујмујало хем те на овел алчно мануш кова со ко нечесно начин дикхела те овел ле корист?

¹⁵ „На смејнена те овен дујмујале.“ Акава значинела те ове искрено, чесно хем те заслужине е јаверенгири доверба, те ачхове ко тло лафи хем англо јавера те на глумине кај сиан некој со на сиан (Изр. 3:32). Те на „овен алчна мануша кола со ко нечесно начин дикхена те овел лен корист“. Акава значинела кај сиан чесно кеда кереа бизнис некасаја хем кеда туке дендо те аракхе паре со сине денде сар прилог таро пхраља хем пхења. Освен адава, нане те искористине адава со сиан амал е пхраленцар хем е пхењенцар те шај те заработине паре.

16. а) Со значинена о лафија те на пиен бут мол? б) Со значинена о лафија те овел лен чисто совест?

¹⁶ „Те на пиен бут мол.“ Акава значинела кај на пиеа бут алкохол хем кај на сиан пенџардо сар некој со бут пиела. „Те овел лен чисто совест.“ Акава значинела кај живинеа спрема е Јеховаскере мерилија. Иако на сиан совршено, тут иси тут андруно мир соске сиан паше амал е Јеховаја.

17. Со значинена о лафија „најангле ваљани те овен испитиме“? (1. Тимотеескоро 3:10; дикх хем и слика.)

¹⁷ „Најангле ваљани те овен испитиме.“ Акава значинела кај више шукар кереа тле одговорностија хем кај е старешинен шај те овел лен доверба ки туте. Адалеске, кеда ола ка ден тут несави задача, икер тут шукар ко ленгере упатствија хем ко упатствија тари организација. Трудин тут те хаљове со точно тано вклучимо ки тли задача хем кеда ваљани те завршине ла. Џикоте деа тутар са те шај шукар те завршине секоја задача, о јавера таро собрание ка приметинен тло напредок. Тумен о старешине ден тумендар са те шај те обучинен е крстиме пхрален. (Читин 1. Тимотеескоро 3:10.) Дали ко тло собрание иси крстиме пхраља колен со иси таро 10 џи ко 14 берш, или чак потикне? Дали иси лен шукар навике проучибаске хем дали шукар спреминена пе башо состанокија? Дали редовно коментиринена ко состанокија хем дали редовно џана ки служба? Ако оја, тегани ден лен задаче кола со ка одговоринен ко ленгере берша хем околностија. Аѓаар, акала терне пхраља ка шај „те овен испитиме“. Тегани,  кеда ка овел лен таро 17 џи ко 19 берш, веројатно ка пхерен о условија те овен слуга-помошникија.

18. Со значинена о лафија нане нешто лошно те вакерел пе баши ленде?

¹⁸ „Нане нешто лошно те вакерел пе баши ленде.“ Акава значинела кај никас нане оправдано причина те кривинел тут кај керѓан несави сериозно грешка. Џанѓола пе, некој шај те вакерел ховајба башо е Девлескере слуге. Несаве мануша вакерѓе ховајба башо Исус хем ов пророкујнѓа кај лескере следбеникија да ка доживинен о исто (Јован 15:20). Ама ако тле постапке тане чиста, исто сар со сине е Исусескере, тегани ка овел тут шукар анав ко собрание (Мат. 11:19).

19. Со значинена о лафија нека овел лен само јекх ромни?

¹⁹ Нека овел лен „само јекх ромни“. Ако сиан ко брако, мора те поштујне е Јеховаскоро мерило башо брако кова со чхивѓа ле панда ко почеток, а адава тано јекх ром хем јекх ромни (Мат. 19:3-9). Јекх христијани никогаш на смејнела те керел сексуално неморал (Евр. 13:4). Ама нане доволно само адава. Ту мора те ачхове верно тле ромњаке аѓаар со никогаш нане те сикаве романтично интерес јавере џувленге (Јов 31:1).

20. Со значинена о лафија шукар те водинен пумаре чхавен хем пумаре фамилија?

²⁰ „Шукар те водинен пумаре чхавен хем пумаре фамилија.“ Ако иси тут ромни хем чхаве, мора сериозно те дикхе ки тли одговорност сар поглавари. Редовно икер и Фамилијарно рат. Џа ки служба со шај почесто секоле јекхеа тари тли фамилија. Поможин тле чхавенге те овен паше е Јеховаја (Еф. 6:4). Јекх ром кова со шукар грижинела пе пле фамилијаке сикавела кај шај шукар те грижинел пе хем е собраниеске. (Споредин 1. Тимотеескоро 3:5.)

21. Со шај те кере ако панда на служинеа сар слуга-помошнико?

²¹ Ако панда на сиан слуга-помошнико, молинаја тут шукар те читине акаја статија хем те молине е Јехова баши акаја цел. Проучин о условија кола со ваљанена те шај те ове слуга-помошнико хем трудин тут те пхере лен. Размислин башо адава кобор бут мангеа е Јехова хем е пхрален. Бајрар тли желба те служине ленге (1. Пет. 4:8, 10). Де тутар са те шај те ове слуга-помошнико хем тегани ка ове бут радосно џикоте служинеа е пхраленге хем е пхењенге ко собрание. О Јехова нека благословинел тут џикоте трудинеа тут те ове слуга-помошнико (Фил. 2:13).