1-2. Саве неправде шај те доживина?

 О ИСУС вакерѓа јекх парамис баши јекх удовица која со упорно молинѓа јекхе судија те сикавел лаке правда. Веројатно, е Исусескере ученикија шај сине локхе те хаљовен акале џувља соске ко адава време бут пути керела пе сине неправда е обична манушенге (Лука 18:1-5). А адаја парамис тани важно аменге да соске сариненцар некогаш сине постапимо неправедно.

² Авдиве ко свето е манушен иси лен предрасуде, нане љубезна, тане алчна. Адалеске, на сием изненадиме кеда некој понашинела пе аменцар неправедно (Проп. 5:8). Ама, шај посебно те овел аменге пхаро ако несаво пхрал или пхен понашинела пе аменцар аѓаар. Џанѓола пе, амаре пхраља хем пхења нане амаре душмања. Едноставно, ола тане несовршена. Шај бут те сикљова таро адава сар о Исус реагиринѓа ко неправде со доживинѓа лен таро противникија. Ако сикаваја стрпливост кеда о противникија понашинена пе аменцар неправедно, кобор повише ваљани те ова стрплива амаре пхраленцар хем пхењенцар! Сар осетинела пе о Јехова кеда доживинаја неправде, бизи разлика дали таро пхраља хем пхења или некастар јаверестар? Дали ов приметинела адава?

3. Дали о Јехова приметинела кеда трпинаја неправде, хем котар џанаја адава?

³ О Јехова приметинела кеда некој понашинела пе лошно аменцар. „О Јехова мангела и правда“ (Пс. 37:28). О Исус  уверинела амен кај о Девел ка керел „сигате те [добина] и правда“ ко право време (Лука 18:7, 8). Панда хари, ов ка поправинел са и штета со трпинѓем ла хем ка анел крајо башо са о неправде (Пс. 72:1, 2).

4. Сар о Јехова поможинела амен те издржина о неправде?

⁴ Џикоте аџикераја те авел о време кеда ки цели пхув ка овел правда, о Јехова поможинела аменге те издржина о неправде (2. Пет. 3:13). Ов сикавела амен те на кера нешто бизо те размислина кеда доживинаја неправде. Преку о пример пле Чхавескоро, о Јехова совршено сикавѓа аменге сар те реагирина кеда доживинаја неправда. Исто аѓаар, денѓа амен практична советија кола со ка поможинен амен кеда некој понашинела пе аменцар лошно.

ПАЗИН САР РЕАГИРИНЕА КО НЕПРАВДЕ

5. Соске ваљани те пазина сар реагиринаја ко неправде?

⁵ О неправде шај бут те погодинен амен хем те керен те осетина амен вознемириме (Проп. 7:7). Аѓаар осетинѓе пе хем несаве верна слуге е Јеховаскере сар со сине о Јов хем о Авакум (Јов 6:2, 3; Авак. 1:1-3). Адала тане нормална чувствија, ама мора те пазина сар реагиринаја те шај те на кера нешто бизо те размислина.

6. Со сикљоваја таро е Авесаломескоро пример? (Дикх хем и слика.)

⁶ Јекх погрешно реакција шај те овел ако лаја о буќа ко амаре васта. Ама адава само шај те керел о буќа те овен полошна. Те дикха со случинѓа пе е Авесаломеа, о чхаво е царескоро е Давидескоро. Ов бут хољанѓа кеда дознајнѓа кај лескири пхен и Тамара сине силујми таро Амнон, кова со сине ленге пхрал само таро дад. Спрема е Мојсеескоро закони, о Амнон ваљанѓа те овел мудардо башо адава со керѓа (3. Мој. 20:17). Иако е Авесаломе сине ле право те хољанел, ле на сине ле право те лел о буќа ко пле васта (2. Сам. 13:20-23, 28, 29).

7. Џикоте дикхела сине о неправде, со почминѓа те мислинел о псалмисти?

⁷ Кеда дикхјола аменге кај окола со постапинена неправедно нане казниме башо адава, шај те почмина те сумнина амен дали врединела те кера адава сој исправно. Размислин башо псалмисти колеске со дикхјола сине кај е лошнонге џала са шукар ко живото џикоте о праведна цидена муке. Ов вакерѓа: „Е лошнонге џала са локхе“ (Пс. 73:12). Ов сине добором вознемиримо башо  неправде со дикхела лен сине со чак јекх време мислинѓа кај на врединела те служинел е Јеховаске. Ов вакерѓа: „Кеда пробинава сине те хаљовав адава, сине манге превише пхаро“ (Пс. 73:14, 16). Уствари, ов признајнѓа: „А мле пре харичкаске ка циден пе сине таро право друмо, харичкаске ка лизгав сине“ (Пс. 73:2). Нешто слично случинѓа пе јекхе пхралеске, коле со ка викина ле Алберто.

8. Сар јекх неправда влијајнѓа упро јекх пхрал?

⁸ Несаве пхраља неправедно кривинѓе е Алберто кај чорѓа таро собраниска паре. Адалеске нашавѓа са о одговорностија со сине ле, а исто аѓаар бут џене таро собрание кеда шунѓе башо адава чхинавѓе те поштујнен ле. Ов вакерела: „Бут сиум сине хољамо хем разочаримо“. О Алберто дозволинѓа и емоционално дукх те руминел лескоро амалипе е Јеховаја. Добором сине повредимо со панџ берш сине неактивно. Акава сикавела џи кај шај те ингарел и холи.

СИКЉОВ ТАРО ИСУС САР ШАЈ ТЕ ИКЉОВЕ КО КРАЈО Е НЕПРАВДЕНЦАР

9. Саве неправде трпинѓа о Исус? (Дикх хем и слика.)

⁹ О Исус денѓа амен совршено пример башо адава сар шај те издржина о неправде. Ов доживинѓа неправде буте џенендар, машкар коленде со сине хем некој тари фамилија. Лескири фамилија вакерѓа кај ов  делиндило, о верска водачија кривинѓе ле кај добинела моќ таро демонија, а о римска војникија асандиле леске, малтретиринѓе ле хем ко крајо мударѓе ле (Мар. 3:21, 22; 14:55; 15:16-20, 35-37). Сепак, о Исус трпинѓа са акала неправде бизо те иранел. Со сикљоваја лестар?

10. Сар реагиринѓа о Исус ко неправде? (1. Петарескоро 2:21-23).

¹⁰ Читин 1. Петарескоро 2:21-23. a О Исус тано аменге совршено пример башо адава сар те реагирина кеда доживинаја неправде. Ов џанља кеда те чутинел, а кеда те керел лафи (Мат. 26:62-64). Ов на реагиринела сине ко секова ховајбе со сине вакердо баши лесте (Мат. 11:19). А кеда керела сине лафи, на вреџинела сине околен со прогонинѓе ле, а ни палем на заканинела пе ленге сине. О Исус сикавѓа самоконтрола адалеске со мукхља „е Девлеске ко васта праведно те судинел“. Џанља кај тано најважно сар о Јехова дикхела ко буќа. Ле сине ле доверба кај о Јехова ка решинел о неправде ко право време.

11. Сар шај те контролирина амари чхиб? (Дикх хем о слике.)

¹¹ Шај те џа пало пример е Исусескоро аѓаар со ка пазина со ка вакера кеда некој нане те овел аменцар фер. Понекогаш шај те овел аменге керди несави тикни неправда хем адалеске шај нане те ваљанел те вакера или те кера нешто. Ки јавер ситуација шај ка одлучина те чутина те шај те на вакера нешто со ка керел о буќа те овен панда полошна (Проп. 3:7; Јак. 1:19, 20). А ко несаве ситуацие шај ка ваљани те кера лафи те шај те бранина некас со трпинела неправда  или те шај бранина амаре верувања (Апо. 6:1, 2). Ама, бут тано важно те трудина амен те ачхова смириме хем те сикава поштовање џикоте кераја лафи (1. Пет. 3:15). b

12. Сар шај те мукха о буќа „е Девлеске ко васта праведно те судинел“?

¹² Исто аѓаар, ка џа пало е Исусескоро пример ако мукхаја о буќа „е Девлеске ко васта праведно те судинел“. Кеда некој погрешно ка хаљовел амен или ка постапинел аменцар лошно иси амен доверба кај о Јехова џанела цело ситуација. Акава шај те поможинел аменге те истрајна кеда трпинаја неправда соске сием увериме кај ко крајо о Јехова ка решинел о буќа. Ако иси амен доверба ко Јехова хем аџикераја ов те решинел са о проблемија, нане те ачхова хољаме или те мрзина е јаверен. Асавке чувствија шај те анен амен џи ко адава те реагирина избувливо, те лен амари радост хем те руминен амаро амалипе е Јеховаја (Пс. 37:8).

13. Со ка поможинел аменге те истрајна кеда трпинаја неправде?

¹³ Џанѓола пе, никогаш ка нашти совршено те џа пало е Исусескоро пример. Понекогаш, ка кера или ка вакера нешто башо со пало адава ка каина амен (Јак. 3:2). А шај хем те доживина неправде кола со ка мукхен аменге хор емоционално хем физичко белего кова со ко акава свето ка пхирава ле џи ко крајо акале животоскоро. Ако туте да иси тут асавко белего, ов уверимо кај о Јехова џанела таро со накхеа. А о Исус, кова со ки пли кожа трпинѓа разна неправде, бут шукар хаљола тут (Евр. 4:15, 16). Освен о совршено пример пле Чхавескоро, о Јехова исто аѓаар дела амен практична советија кола со поможинена амен те икљова ко крајо е неправденцар. Шај бут те поможинен амен дуј стихија таро библиско лил Римјања.

„МУКХЕН О ДЕВЕЛ ТЕ СИКАВЕЛ ПЛИ ХОЛИ“

14. Со значинела те мукха „о Девел те сикавел пли холи“? (Римјања 12:19).

¹⁴ Читин Римјања 12:19. О апостол Павле поттикнинѓа е христијанен те „мукхен о Девел те сикавел пли холи“. Адава кераја аѓаар со мукхаја о Јехова те одлучинел кеда хем сар ка анел правда. Кеда јекх пхрал со викинела пе Џон доживинѓа неправда, вакерѓа: „Мора сине свесно те кочинав ман те на лав о буќа ко мле васта. О лафија таро Римјања 12:19 поможинѓе манге те аџикерав ко Јехова“.

15. Соске тано најшукар те аџикера о Јехова те решинел о буќа?

¹⁵ Амаре шукарипаске тано кеда аџикераја о Јехова те решинел о буќа. Адава тано бут пошукар него те пробина коркори те решина о проблеми хем те кера аменге стрес хем нервозе со на ваљани. О Јехова мангела те поможинел амен. Ов сар те пхене вакерела аменге: „Мукх о буќа ко мле васта; ме ка решинав лен“. О Јехова вакерѓа: „Ме ка иранав“. Ако иси амен доверба ко акава ветување, ка мукха о проблеми ко лескере васта соске сием сигурна кај ов џанела сар најшукар те решинел ле. Адава поможинѓа е Џонеске коле со спомнинѓем ле англедер. Ов вакерела: „Ме само ваљани те аџикерав ко Јехова. Ов пошукар џанела сар хем кеда те керел нешто“.

„ПОБЕДИН О ЛОШНИПЕ Е ШУКАРИПАЈА!“

16-17. Сар шај и молитва те поможинел амен те победина о лошнипе е шукарипаја? (Римјања 12:21).

¹⁶ Читин Римјања 12:21. О Павле поттикнинѓа е христијанен те керен јавер да нешто: „Победин о лошнипе е шукарипаја!“ А ки Проповед ки гора о Исус вакерѓа: „Манген  тумаре душманен хем молинен тумен околенге со прогонинена тумен“ (Мат. 5:44). Коркори о Исус керѓа адава. Шај те замислина аменге кобор бут муке цидинѓа кеда о римска војникија ковинѓе ле ко стубо. Ама нашти ни те претпоставина кобор пхаро сине леске башо адава со сине вреџимо хем со трпинѓа неправде.

¹⁷ О Исус на дозволинѓа о неправде те перавен ле, јавере лафенцар те лен лескири сила. Ов на денѓа армања адале војникон него молинѓа пе: „Мо Дад простин ленге, соске ола на џанена со керена!“ (Лука 23:34). Кеда молинаја амен околенге со понашинена пе лошно аменцар адава шај те поможинел амен те смирина амен хем те на ова добором бут хољаме. Шај чак ка почмина те дикха појавер ки ленде.

18. Сар и молитва поможинѓа е Албертоске хем е Џонеске те икљовен ко крајо е неправденцар?

¹⁸ Адалеске со и молитва поможинѓа лен, о дуј пхраља колен со спомнинѓем лен ки акаја статија, успејнѓе те икљовен ко крајо е неправденцар со сине ленге керде. О Алберто вакерела: „Молинава ман сине башо пхраља кола со неправедно кривинѓе ман. Повише пути молинѓум е Јехова те поможинел ман те на дукхал ман више адаја неправда“. Кобор шукар со о Алберто палем верно служинела е Јеховаске. О Џон вакерела: „Бут пути молинѓум ман е пхралеске со поврединѓа ман. Адала молитве поможинѓе манге те дикхав пошукар ко пхрал хем те на осудинав ле. А исто аѓаар, керѓе те овел ман андруно мир“.

19. Со мора те кера са џикоте трајнела акава свето? (1. Петарескоро 3:8, 9).

¹⁹ Са џикоте трајнела акава свето на џанаја саве неправде ка овен амен. Ама бизи разлика со ка случинел пе никогаш те на чхинава те рода помош таро Јехова. Исто аѓаар те трудина амен ко неправде те реагирина сар со реагиринѓа о Исус хем понадари те применина о библиска начелија. Ако кераја адава шај те ова сигурна кај о Јехова ка благословинел амен. (Читин 1. Петарескоро 3:8, 9.)