1. Сар дикхела о Јехова ко пле слуге?

 О ЈЕХОВА дикхела таро со са накхена лескере слуге теле ки пхув. Ов дикхела кеда сием среќна хем кеда сием тажна (Пс. 37:18). Кеда дикхела кај кераја са те шај те служина леске иако иси амен дукх, ов тано задоволно амендар. Освен адава, ов бут мангела те поможинел амен хем те утешинел амен.

2. Со керела о Јехова околенге сој пхаге вилеа, хем сар шај те овел амен корист таро адава со ов грижинела пе аменге?

² Ко Псалм 147:3 пишинела кај о Јехова паќарела о ране околенгере сој пхаге вилеа. Акала лафија сикавена кај о Јехова нежно грижинела пе околенге со иси лен емоционална ране. Ама со мора те кера те шај те овел амен корист таро адава со о Јехова грижинела пе аменге? Размислин баши акаја споредба. Јекх шукар доктори шај бут те поможинел некаске сој повредимо те сасљол. Сепак, те шај те овел ле корист, адава сој повредимо мора те икерел пе ко адава со вакерела леске о доктори. Ки акаја статија, ка дикха со вакерела о Јехова ко пло Лафи околенге со мучинена пе ко емоционално поглед хем ка дикха сар шај те применина лескере советија со дела лен аменге мангипаја.

О ЈЕХОВА УВЕРИНЕЛА АМЕН КАЈ СИЕМ СКАПОЦЕНА

3. Соске несаве мислинена кај на врединена?

³ Живинаја ко свето коте со нане мангипе хем колесте со бут мануша постапинена лошно е јаверенцар. Адалеске, бут мануша мислинена кај на врединена. Јекх пхен која со викинела пе Хелен a вакерела: „Ме родителија ни хари на сикавѓе аменге мангипе. Мо дад сине насилно хем секова диве вакерела сине аменге кај ништоске на врединаја“. Слично сар и Хелен, шај туте да некој малтретиринѓа тут, стално критикујнѓа тут хем керѓа те мислине кај на заслужинеа  некој те мангел тут. Ако тано аѓаар, шај туке пхаро те верујне кај некој чаче мангела тут.

4. Спрема Псалм 34:18, ко со уверинела амен о Јехова?

⁴ Чак ако о јавера понашинена пе сине туја лошно, шај те ове уверимо кај о Јехова мангела тут хем ценинела тут. Ов тано „паше узо адала сој пхаге вилеа“. (Читин Псалм 34:18.) Ако ту да сиан „пхаге духоја“, или мислинеа кај на врединеа, ма бистре кај о Јехова дикхља тле шукар особине хем привлечинѓа тут ки песте (Јован 6:44). Ов тано секогаш спремно те поможинел туке соске сиан леске скапоцено.

5. Со шај те сикљова таро начин сар о Исус понашинѓа пе околенцар со сине понижиме е јаверендар?

⁵ Шај те сикљова башо е Јеховаскере чувствија аѓаар со ка дикха е Исусескоро пример. Џикоте сине ки пхув, о Исус приметинела сине околен со сине понижиме е јаверендар хем сикавела сине ленге сочувство (Матеј 9:9-12). Кеда јекх џувли, која со надинѓа пе кај ка сасљол таро јекх пхаро насвалипе, пипинѓа е Исусескере шеја, ов утешинѓа ла хем фалинѓа ла баши лакири вера (Марко 5:25-34). О Исус совршено сикавела о особине пле Дадескере (Јован 14:9). Адалеске шај те ове уверимо кај о Јехова ценинела тут хем кај приметинела те шукар особине машкар коленде сој тли вера хем тло мангипе спрема лесте.

6. Со шај те кере ако мислинеа кај на врединеа?

⁶ Со шај те кере ако нонстоп или понекогаш мучинела тут и мисла кај на врединеа? Читин стихија тари Библија кола со ка уверинен тут кај сиан скапоцено е Јеховаске хем размислин баши ленде b (Псалм 94:19). Ако нашти исполнинеа несави цел или ако сиан обесхрабримо адалеске со нашти кереа  кобор со керена о јавера, ма ов строго судија коркори туке. О Јехова на очекујнела тутар те кере повише таро адава со шај те кере (Пс. 103:13, 14). Ако англедер сиан сине злоупотребимо ко несаво начин, ма мислин кај ту сиан криво башо адава! Ма бистре кај е Јеховаске нане крива о жртве, него окола со малтретиринѓе лен (1. Пет. 3:12). И Сандра која со сине малтретирими сар тикни вакерела: „Цело време молинава е Јехова те поможинел ман те дикхав о шукар особине ки манде кола со ов дикхела лен“.

7. Сар адава со накхлем англедер шај те поможинел амен ки служба башо Јехова?

⁷ Никогаш ма сумнин тут кај о Јехова шај те користинел тут те поможине е јаверенге. Ов денѓа тут и чест те ове лескоро соработнико ки служба (1. Кор. 3:9). Адава со накхљан таро пхаре ситуацие шај поможинела тут те сикаве сочувство е јаверенге хем те хаљове сар осетинена пе. Ту шај бут те поможине ленге! И Хелен која со спомнинѓем ла англедер, акана шај пошукар те поможинел е јаверенге соске лаке сине поможимо. Ој вакерела: „Англедер мислинава сине кај ни хари на врединава. Ама о Јехова поможинѓа манге те осетинав ман мангли хем користинела ман те поможинав е јаверенге“. Акана и Хелен радосно служинела сар општо пионерка.

О ЈЕХОВА МАНГЕЛА ТЕ ПРИФАТИНА ЛЕСКОРО ПРОСТИБЕ

8. Ко со уверинена амен о лафија таро Исаија 1:18?

⁸ Несавен таро е Јеховаскере слуген понадари да мучинена лен о грешке со керѓе лен англедер, шај џикоте панда на сине крстиме или откеда крстинѓе пе. Ама на ваљани те бистра кај о Јехова денѓа и откупнина адалеске со бут мангела амен. Сигурно о Јехова мангела те прифатина адава поклон. О Јехова уверинела амен кај откеда ка „расчистина“ о буќа леа c ов целосно ка простинел амаре гревија. (Читин Исаија 1:18.) Кобор сием благодарна со амаро Дад о Јехова, кова сој пхердо мангипаја, на памтинела о грешке со керѓем лен англедер. А ко исто време, ов никогаш на бистрела о шукар буќа со керѓем лен (Пс. 103:9, 12; Евр. 6:10).

9. Соске на ваљани те размислина башо гревија со керѓем лен англедер?

⁹ Ако понадари да мучинена тут о буќа со керѓан лен англедер, де тутар са те шај те концентририне тут ко адава со шај те кере акана хем ко адава со шај те кере ки иднина. Размислин башо апостол Павле. Леске сине пхаро со англедер насилно прогонинела сине е христијанен, ама џанља кај о Јехова простинѓа леске (1. Тим. 1:12-15). Дали ов понадари да мучинела пе сине башо гревија со керѓа лен англедер? Сигурно на. Исто сар со на мангља те размислинел башо пло успех со сине ле кеда сине фарисеи (Фил. 3:4-8, 13-15). Наместо адава, о Павле ревно керела сине пли служба хем дикхела сине англе ки иднина. Исто сар о Павле, ту да нашти те менине адава со уло англедер. Ама ту шај те фалине е Јехова ко тле моментална околностија хем те размислине баши бут шужи иднина која со ветинѓа ла туке.

10. Со шај те кера ако англедер поврединѓем е јаверен?

¹⁰ Шај мучинеа тут адалеске со англедер керѓан нешто колеа со поврединѓан е јаверен. Со шај те поможинел тут? Кер са со шај те поправине и штета, освен адава вакер кај туке жал хем сикав адава тле постапкенцар (2. Кор. 7:11). Молин е Јехова те поможинел  околенге со поврединѓан лен. Ов шај те поможинел туке хем околенге со поврединѓан лен те истрајнен хем палем те осетинен мир.

11. Со шај те сикљова таро пример е Јонаскоро? (Дикх хем и слика.)

¹¹ Сикљов таро грешке со керѓан лен англедер хем спремно мукх о Јехова те користинел тут ко било саво начин со ов ка биринел ле. Размислин башо пророко о Јона. Наместо те џал ки Ниневија сар со заповединѓа леске о Девел, о Јона нашља ки скроз јавер страна. О Јехова укоринѓа ле хем ов сиклило тари пли грешка (Јона 1:1-4, 15-17; 2:7-10). О Јехова на откажинѓа пе таро Јона. О Девел денѓа ле панда јекх шанса те џал ки Ниневија, хем акава пути о Јона одма гело. Е Јонаске сине жал баши грешка со керѓа ла, сепак на мукхља адава те чхинавел ле те прифатинел акаја задача таро Јехова (Јона 3:1-3).

О ЈЕХОВА УТЕШИНЕЛА АМЕН ПРЕКУ ПЛИ СИЛА

12. Сар о Јехова дела амен мир кеда доживинаја несави траума или кеда нашаваја нешто? (Филипјања 4:6, 7).

¹² Кеда доживинаја несави траума или нашаваја нешто, о Јехова шај те утешинел амен преку пли сила. Те дикха о искуство таро Рон хем и Керол. Жално тано адава со ленгоро чхаво мударѓа пе. Ола вакерена: „Англедер да сине амен пхаре неволје, ама акаја сине и најпхари. Бут раќа нашти сине те сова хем молинаја амен сине е Јеховаске, чаче осетинѓем о мир сој опишимо ко стихија таро Филипјања 4:6, 7“. (Читин.) Ако тут да иси тут несаво пхарипе кова со керела туке ко вило бари дукх, пхрав тло вило е Јеховаске, леа шај те кере лафи било кеда хем кобор мангеа (Пс. 86:3; 88:1). Стално молин е Јехова те дел тут пли сила. Ов секогаш ка поможинел тут (Лука 11:9-13).

13. Сар шај е Девлескири сила те поможинел амен понадари да верно те служина е Јеховаске? (Ефешања 3:16).

¹³ Дали адалеске со доживинѓан нешто бут пхаро осетинеа кај нане тут сила башо ништо? Е Девлескири сила шај те керел тут позорало те шај понадари да верно те служине е Јеховаске. (Читин Ефешања 3:16.) Размислин башо адава со доживинѓа јекх пхен со викинела пе Флора. Ој хем лакоро ром заедно служинѓе сар мисионерија, ама о ром лакоро керѓа прељуба хем развединѓе пе. И Флора вакерела: „Бут сиум сине тажно башо адава со изневеринѓа ман хем нашти сине те мислинав ко ништо јавер. Молинѓум е Јехова те дел ман пли сила те шај те истрајнав. О Јехова утешинѓа ман хем иако ко почеток дикхјола сине кај нане те успејнав, о Јехова иранѓа мли сила хем адава поможинѓа манге те истрајнав“. И Флора осетинѓа кај о Девел поможинѓа ла те бајрарел пли доверба ки лесте хем уверими тани кај о Јехова ка поможинел ла ки било сави ситуација. Ој вакерела кај о лафија таро Псалм 119:32 бут шукар опишинена сар о Јехова поможинѓа лаке. Адатхе пишинела: „Цело вилеа ка икерав тле заповедија, соске ту пхравеа мло вило те шај ола те ресен ки лесте“.

14. Сар шај те дозволина е Девлескири сила те влијајнел упри аменде?

¹⁴ Откеда молинѓан е Јехова те дел тут пли сила, со ваљани те кере? Учествујн ко активностија кола со ка керен е Девлескири сила те влијајнел упри туте. Ко акава тано вклучимо те џа ко состанокија хем ки служба. Одвојн туке време те читине и Библија секова диве хем аѓаар ка шај те икере е Јеховаскере мисле ки годи (Фил. 4:8, 9). Џикоте читинеа, размислин башо мануша таро пурано време кола со сине лен неволје хем дикх сар о Јехова поможинѓа ленге те истрајнен. Е Сандра кола со спомнинѓем ла  англедер сине ла бут проблемија ко живото. Ој вакерела: „О извештај башо Јосиф бут охрабринела ман. Ов на дозволинѓа о неволје хем о неправде те слабонкерен лескоро амалипе е Јеховаја“ (1. Мој. 39:21-23).

О ЈЕХОВА УТЕШИНЕЛА АМЕН ПРЕКУ О ПХРАЉА ХЕМ О ПХЕЊА

15. Кој шај те утешинел амен, хем ко саве начинија? (Дикх хем и слика.)

¹⁵ Кеда цидаја муке, амаре пхраља хем пхења тане акате те утешинен амен (Кол. 4:11). Јекх начин сар о Јехова сикавела аменге кај мангела амен тано преку о пхраља хем о пхења. Ола шај те утешинен амен аѓаар со ка сикавен сочувство хем ка шунен амен, или шај те поддржинен амен адалеа со ка овен узи аменде. Шај те охрабринен амен несаве библиско стихоја или те молинен пе аменцар заедно d (Рим. 15:4). Понекогаш, несаво пхрал или пхен шај те сетинкерел амен сар о Јехова размислинела хем адалеа те поможинел аменге те истрајна. Амаре пхраља хем пхења шај исто аѓаар те поможинен амен практично, на пример аѓаар со ка анен аменге хајбаске кеда сием ко крајо е силенцар.

16. Со шај ка ваљани те кера те шај те добина помош јаверендар?

¹⁶ Те шај те добина помош е јаверендар шај ка ваљани коркори те рода адава. Амаре пхраља хем пхења мангена амен хем мангена  те поможинен аменге (Изр. 17:17). Ама шај на џанена сар осетинаја амен хем со ваљани аменге (Изр. 14:10). Ако осетинеа емоционално дукх, кер лафи несаве амаленцар кола сој зрела христијања. Вакер ленге сар осетинеа тут хем сар шај те поможинен туке. Шај те кере лафи јекхе или дује старешиненцар коленцар со осетинеа тут слободно. Несаве пхења тане утешиме кеда керена лафи несаве зрело пхењаја.

17. Саве предизвикија шај те чхинавен амен те добина охрабрување, хем сар шај те икљова ко крајо ленцар?

¹⁷ Ма циде тут таро јавера. Адалеске со осетинеа дукх, понекогаш повише шај ка манге те ове коркори. Понекогаш о пхраља хем о пхења шај ка хаљовен тут погрешно или ка вакерен нешто колеа со ка поврединен тут (Јак. 3:2). Ама ма дозволин асавке буќа те циден тут таро тле пхраља хем пхења соске аѓаар ка нашти те добине о охрабрување со ваљани туке. Јекх старешина со викинела пе Гевин коле со иси ле депресија, вакерела: „Бут пути ни на перела манге ки годи те овав мле амаленцар“. Ама, о Гевин на дозволинела адала чувствија те контролиринен ле хем трудинела пе те овел е пхраленцар. Кеда керела адава бут пути осетинела пе пошукар. Јекх пхен која со викинела пе Ејми вакерела: „Адава со доживинѓум англедер керела манге пхаро те овел ман доверба ко мануша. Ама сикљовава те мангав е пхрален хем е пхењен хем те овел ман доверба ки ленде исто сар о Јехова. Џанава кај адава радујнела ле хем анела радост манге да“.

Е ЈЕХОВАСКЕРЕ ВЕТУВАЊА БАШИ ИДНИНА ШАЈ ТЕ УТЕШИНЕН АМЕН

18. Со едвај аџикераја те случинел пе ки иднина, хем со шај те кера акана?

¹⁸ Шај те ова увериме кај панда хари о Јехова целосно ка сасљарел амен таро са адава со анела аменге дукх ко физичко хем ко емоционално поглед (Отк. 21:3, 4). Ко адава време, о лошна искуствија со сине амен англедер нане те појавинен пе аменге ко вило (Иса. 65:17). Сар со дикхлем, о Јехова паќарела амаре ране панда акана. Користин целосно са адава со дела тут о Јехова те шај те утешинел тут хем те поможинел тут. Ни хари ма сумнин тут кај „ов грижинела пе [туке]“ (1. Пет. 5:7).