СТАТИЈА ПРОУЧИБАСКЕ 43
ГИЛИ 90 Те охрабрина амен јекх јекхеа!
Сар шај те циде тутар о сумње
Испитинен са те шај те уверинен тумен кај адава тано чаче (1. СОЛ. 5:21)
СО КА СИКЉОВА
Ка дикха со шај те поможинел аменге те цида амендар о сумње кола со шај те влијајнен упри амари служба башо Јехова.
1-2. а) Саве сумње шај иси несаве слуген е Јеховаскере? б) Со ка дикха ки акаја статија?
САРИНЕНГЕ аменге бизи разлика дали сием терне или пхуре, понекогаш шај те појавинен пе сумње. a На пример, јекх терно шај пучела пе дали о Јехова чаче интересинела пе леске. Адалеске, шај мислинела пе дали те крстинел пе. Јавер пример тано јекх пхрал кова со кеда сине терно биринѓа те чхивел ко прво тхан о Царство, а на те заработинел бут паре. Акана, ов тано попхуро хем иси ле паре само башо основна буќа пле фамилијаке. Адалеске, шај пучела пе дали кеда сине терно анѓа исправно одлука. Или, шај иси несави попхури пхен кола со нане ла више бут сила. Шај тани обесхрабрими адалеске со нашти више те керел добором кобор со керела сине англедер. Дали ту некогаш пучљан тут пучиба сар сој: „Дали о Јехова чаче приметинела ман? Дали врединена о жртве со керѓум лен башо Јехова? Дали сиум панда корисно е Јеховаске?“
2 Ако на родаја одговорија ко акала пучиба, шај те нашава амари вера ко Јехова, па чак хем те чхинава те служина леске. Ки акаја статија ка дикха сар о библиска начелија шај те поможинен амен ако појавинена пе аменге сумње башо адава: 1) дали о Јехова чаче интересинела пе аменге, 2) дали англедер анѓем мудра одлуке или 3) дали панда сием корисна е Јеховаске.
СО ШАЈ ТЕ ПОМОЖИНЕЛ ТУКЕ ТЕ ЦИДЕ ТУТАР О СУМЊЕ
3. Кова тано јекх начин сар шај те цида амендар о сумње?
3 Јекх начин сар шај те цида амендар о сумње, тано аѓаар со ко е Девлескоро Лафи ка рода одговорија башо амаре пучиба. Ако кераја адава, амари вера хем амаро амалипе е Јеховаја, ка овен панда позорале хем ка овел аменге полокхо те ачхова „цврста ки вера“ (1. Кор. 16:13).
4. Сар шај те испитина са те шај те уверина амен? (1. Солунјања 5:21).
4 Читин 1. Солунјања 5:21. Приметин кај и Библија поттикнинела амен те испитина са те шај те уверина амен. Сар шај те кера адава? Шај те уверина амен кај адава ко со верујнаја тано чаче, ако дикхаја со вакерела и Библија башо адава. На пример, размислин башо терно мануш кова со пучела пе дали врединела англо е Девлескере јакхја. Дали одма ваљани те верујнел ки адаја мисла? На. Ов ваљани те испитинел са те шај те уверинел пе, аѓаар со ка дознајнел со о Јехова мислинела башо адава.
5. Сар шај те „шуна“ е Јеховаскере одговорија ко амаре пучиба?
5 Кеда читинаја и Библија, амен „шунаја“ сар о Јехова керела аменцар лафи. Ама, те шај те дознајна со о Јехова мислинела башо несаво конкретно пучибе со мучинела амен, ваљани те кера нешто повише него само те читина и Библија. Ваљани те аракха хем те проучина извештаија тари Библија кола со ка поможинен амен те аракха одговор башо амаро пучибе. Шај те истражина баши адаја тема ко публикацие кола со дела амен е Јеховаскири организација (Изр. 2:3-6). Шај те молина е Јехова те водинел амен џикоте истражинаја хем те поможинел аменге те хаљова со мислинела ов. Пало адава, шај те рода библиска начелија хем информацие кола со ка поможинен аменге баши амари ситуација. Исто аѓаар, ка овел шукар ако проучинаја библиска извештаија башо мануша кола со аракхлиле ки слично ситуација сар амен.
6. Сар о состанокија поможинена амен те цида амендар о сумње?
6 Ко амаре состанокија исто аѓаар шај те „шуна“ сар о Јехова керела аменцар лафи. Ако редовно џаја ко состанокија, шај ко несаво говор или ко некаскоро коментари, те шуна баш адава со ваљани аменге те шај те цида амендар о сумње (Изр. 27:17). Акана ка дикха сар шај те цида амендар несаве конкретна сумње.
АКО СУМНИНЕА ТУТ ДАЛИ О ЈЕХОВА ИНТЕРЕСИНЕЛА ПЕ ТУКЕ
7. Со шај некој те пучел пе?
7 Дали некогаш пучљан тут: „Дали о Јехова чаче приметинела ман?“ Ако мислинеа кај на сиан важно, тегани шај те мислине кај никогаш нашти те ове амал околеа со створинѓа о универзум. Шај о цари о Давид да мислинела сине аѓаар. Ов сине воодушевимо тари мисла кај о Јехова чак приметинела е манушен хем адалеске вакерѓа: „О Јехова, сој тано о мануш те шај те приметине ле, о манушикано чхаво те шај те грижине тут леске?“ (Пс. 144:3). Коте шај те аракхе одговор ко акава пучибе?
8. Спрема 1. Самоилова 16:6, 7, 10-12, со приметинела о Јехова ко мануша?
8 Тари Библија дознајнаја кај о Јехова приметинела околен кола со е јаверенге нане важна. На пример, о Јехова бичхалѓа е Самоиле ко кхер е Јесеескоро те шај те помазинел јекхе таро лескере чхаве те овел о следно цари ко Израел. Кеда о Самоил ресља, о Јесеј викинѓа ефта таро пле офто чхаве, ама на викинѓа е најтикне, е Давиде. b Сепак, о Јехова биринѓа баш е Давиде. (Читин 1. Самоилова 16:6, 7, 10-12.) О Јехова дикхља саво чаче тано о Давид — терно чхаво кова со ценинела сине о духовна буќа.
9. Соске шај те ове уверимо кај о Јехова интересинела пе туке? (Дикх хем и слика.)
9 Размислин сар џи акана о Јехова сикавѓа туке кај приметинела тут. Ов мангела те дел тут о најшукар советија кола со ваљанена баш туке (Пс. 32:8). Дали шај те керел адава ако на џанела тут шукар? (Пс. 139:1). Кеда применинеа о советија таро Јехова хем дикхеа сар ола поможинена тут, тегани уверинеа тут кај ов чаче интересинела пе туке (1. Лет. 28:9; Апо. 17:26, 27). О Јехова приметинела са со кереа те шај те служине леске хем те ове леске послушно. Приметинела тле шуже особине хем мангела те овел туја амал (Ерем. 17:10). Хем, бут ка радујнел пе ако мангеа ту да те ове лескоро амал (1. Јов. 4:19).
„Ако родеа [е Јехова], ка мукхел тут те аракхе ле“ (1. Лет. 28:9). (Дикх ко пасус 9) c
АКО СУМНИНЕА ТУТ ДАЛИ АНГЛЕДЕР АНЃАН МУДРА ОДЛУКЕ
10. Кеда размислинаја башо одлуке со анѓем лен англедер, со шај те пуча амен?
10 Понекогаш, несаве шај пучена пе дали о одлуке со анѓе лен англедер сине исправна. Ола шај откажинѓе пе тари несави шукар платими бути или одлучинѓе те на почминен несаво шукар бизнис, те шај те керен повише башо Јехова. Ама, шај накхле бут берша хем акана шај џанена несаве манушен кола со анѓе појавер одлука хем дикхјола кај иси лен бут паре хем уживинена ко живото. Адалеске, шај пучена пе: „Дали врединена о жртве со керѓум лен башо Јехова? Или ваљани сине те керав повише бути те шај акана те овен ман повише паре?“
11. Солеа мучинела пе сине о писатели таро 73 Псалм?
11 Ако туте да мучинена тут слична пучиба, размислин сар осетинѓа пе о писатели таро 73 Псалм. Ов дикхља е манушен со на служинена сине е Јеховаске, ама сине састе, барвале хем изглединела сине кај нане лен нисаве секирацие (Пс. 73:3-5, 12). Џикоте дикхела сине сар живинена хем изглединела сине кај са шукар џала ленге ко живото, почминѓа те мислинел кај о жртве со керѓа лен те шај те служинел е Јеховаске, на врединена. Ов по цело диве мучинела пе сине акале обесхрабрувачко мислаја (Пс. 73:13, 14). Сар иклило ко крајо акале негативно чувствонцар?
12. Спрема Псалм 73:16-18, со поможинѓа е писателеске те побединел о негативна мисле?
12 Читин Псалм 73:16-18. О псалмисти гело ко е Јеховаскоро свето тхан. Ко акава мирно тхан ов шај сине шукар те размислинел. Ов халило кај иако несавен сине лен локхо живото ама на сине лен надеж баши иднина. Акава поможинѓа леске те овел ле андруно мир хем те уверинел пе кај и најшукар одлука со шај некој те анел ла тани те чхивел е Јехова ко прво тхан ко пло живото. Адалеске, ов сине панда поодлучно понадари да те служинел е Јеховаске (Пс. 73:23-28).
13. Сар шај те овел тут андруно мир ако на сиан сигурно дали англедер анѓан шукар одлуке? (Дикх хем и слика.)
13 Е Девлескоро Лафи шај те поможинел туке да те овел тут андруно мир. Сар? Размислин кобор врединела адава со иси тут, коте сој вклучимо хем о барвалипе со кхединѓан ле ко небо, хем споредин адава е буќенцар со иси е манушен коленгири награда тани само адава со нудинела о свето. Лен шај иси лен целосно доверба ко буќа со иси лен акана адалеске со нане лен нисави надеж баши иднина. Сепак, о Јехова туке ветинѓа благословија кола сој бут пошуже таро са адава со шај те замислине туке (Пс. 145:16). Размислин башо акава да: Дали чаче шај те џана саво ка овел сине амаро живото ако анаја сине појавера одлуке? Јекх тано сигурно: Ако анеа одлуке адалеске со мангеа е Девле хем е јаверен, секогаш ка овен тут о буќа ко живото кола со ка керен тут чаче среќна.
Дикх ко благословија со ветинѓа аменге о Јехова (Дикх ко пасус 13) d
АКО СУМНИНЕА ТУТ ДАЛИ СИАН КОРИСНО Е ЈЕХОВАСКЕ
14. Ки сави ситуација тане несаве, хем со шај пучена пе?
14 Несаве таро е Јеховаскере слуге нашти те керен добором кобор со мангена соске тане пхуре, насвале или иси лен несаво хендикеп. Адалеске, шај мислинена кај нане корисна е Јеховаске. Ола шај пучена пе: „Дали панда сиум корисно е Јеховаске?“
15. Ко со сине уверимо о писатели таро 71 Псалм?
15 Е писателе таро 71 Псалм сине ле слична чувствија. Ов молинѓа е Јехова: „Ма мукх ман кеда нане те овел ман више сила!“ (Пс. 71:9, 18). Сепак, о псалмисти сине уверимо кај ако верно служинела е Јеховаске, ов ка водинел ле хем ка поддржинел ле. О псалмисти халило кај о Јехова радујнела пе кеда некој дела ле пло најшукар те шај те служинел леске иако о околностија ограничинена ле (Пс. 37:23-25).
16. Ко саво начин шај о Јехова те користинел е попхурен? (Псалм 92:12-15).
16 Ако сиан попхуро, дикх ки тли ситуација сар со дикхела о Јехова. Ов шај те поможинел тут те служине леске верно иако ко физичко поглед иси тут ограничувања. (Читин Псалм 92:12-15.) Наместо те концентририне тут ко адава со нашти више те кере, концентририн тут ко адава со шај те кере. На пример, шај те поможине е јаверенге адалеа со верно ка служине е Јеховаске хем ка интересине тут ленге. Шај те вакере е јаверенге сар о Јехова поддржинѓа тут са акала берша хем кола ветувања ки иднина едвај аџикереа те исполнинен пе. Исто аѓаар, никогаш ма бистре кај о молитве со вакереа лен башо јавера иси лен бари моќ (1. Пет. 3:12). Бизи разлика саве тане амаре околностија, сарине амен шај те да нешто е Јеховаске хем е јаверенге.
17. Соске на ваљани те споредина амен е јаверенцар?
17 Ако обесхрабринела тут адава со нашти те кере повише ки служба башо Јехова, ов уверимо кај ов ценинела адава со шај те кере. Шај иси тут навика те споредине тут е јаверенцар. Ама, ма кер адава. Соске? Адалеске со о Јехова на спорединела амен е јаверенцар (Гал. 6:4). На пример, и Марија макхља е Исусескере пре јекхе скапоцено мирисливо маслоја (Јован 12:3-5). Тари јавер страна, и чороли удовица мукхља сар прилог ко храми дуј тикне паре кола со бут хари врединена (Лука 21:1-4). Сепак, о Исус на спорединѓа акале дује џувлен. Наместо адава, ов дикхља кај солдуј џене сикавѓе вера. Лескоро Дад, о Јехова, бут ценинела са адава со кереа леске таро мангипе хем тари вера, иако ту шај мислинеа кај адава тано бут хари.
18. Со ка поможинел аменге те цида амендар о сумње? (Дикх хем и рамка Е Јеховаскоро Лафи шај те поможинел тут те циде тутар о сумње.)
18 Понекогаш, сариненге аменге шај те појавинен пе сумње. Ама сар со дикхлем, и Библија шај те поможинел аменге те цида адала сумње. Адалеске, де тутар са те шај те циде адала сумње. Адава ка поможинел туке те осетине мир хем те на ове секиримо. Ов сигурно кај о Јехова приметинела тут лично. Ов ценинела о жртве со кереа лен хем сигурно ка наградинел тут. Ов уверимо кај о Јехова мангела хем грижинела пе секоле јекхеске таро пле верна слуге.
ГИЛИ 111 О Јехова дела амен радост
a ОБЈАСНИМЕ ЛАФИЈА: Ки акаја статија, ка кера лафи башо сумње со чхивена амен те мислина дали врединаја англо Јехова или дали англедер анѓем мудра одлуке. На керела пе лафи башо сумње сој спомниме ки Библија кола со шај те сикавен кај фалинела аменге вера ко Јехова хем ко лескере пророштвија.
b Иако ки Библија на пишинела точно кобор берш сине ле, о Давид веројатно сине тинејџери кеда о Јехова биринѓа ле. (Дикх ки Стражарско кула таро 1 септември 2011, стр. 29, пас. 2. Акава број нане ко романе.)
