О пхраља ко Бетел керѓе повише таро јекх берш бути те шај те градинен и радиостаница WBBR ко Стејтен Ајленд (Њујорк, Америка). Откеда расчистинѓе о тхан, ола градинѓе јекх баро кхер е работниконге хем посебно зграда баши опрема. Кеда акаја бути сине завршими о пхраља почминѓе те кинен и потребно опрема те шај те мукхен и програма ки радиостаница. Ама, ваљани сине те решинен некобор проблемија.

Е пхраленге сине пхаро те чхивен и главно антена баши радиостаница. И антена која со сине дугачко 91 метре ваљани сине те овел чхивди машкар дуј каштунале греде кола со сине уче 61 метре. О прво пути на успејнѓа ленге. Ама, адалеске со сине лен доверба ко Јехова о пхраља конечно успејнѓе те чхивен и антена. О Калвин Просер, кова со керела сине бути ко адава проекти, вакерѓа: „Ако о прво пути успејнаја сине ка ова сине горда башо адава со керѓем“. Адалеске и фалба башо ленгоро успех денѓе ла е Јеховаске, ама ленгере проблемија на завршинѓе акалеа.

Адалеске со о радио сине нешто нево, на сине локхо те кинел пе и опрема со ваљанела. Адалеске, о пхраља кинѓе половно предаватели таро 500 ватија, кова со јекх мануш керѓа ле коркори. Наместо те кинен микрофони, ола користинѓе о микрофони таро обично телефони. Јекх рат ко февруари, о пхраља одлучинѓе те тестиринен и опрема која со керѓе ла. Адалеске со ваљани сине несави програма те мукхен, о пхраља гиљавѓе теократска гиља. Јекх таро адала пхраља, о Ернест Лоу, вакерѓа јекх смешно ситуација таро адава диве. Ов вакерѓа кај џикоте ола гиљавена сине  јавинѓа пе ленге о судија о Ратерфорд, b кова со шунѓа лен таро пло радио ко Бруклин кова со сине дур околу 25 километрија.

О пхрал Ратерфорд вакерѓа: „Чхинавен адале галамаја. Шунѓона сар те пхене деринена тумен!“ О пхраља хари лаџандиле хем сигате ачхавѓе и програма. Ама, сине увериме кај тане спремна баши пумари прво радиоемисија.

Ко 24 февруари 1924 берш, џикоте трајнела сине и прво официјално емисија, о пхрал Ратерфорд вакерѓа кај и радиостаница ка користинел пе башо активностија кола со денѓа лен о цари о Христос. Ов вакерѓа кај и цел е радиостаницакири сине „те поможинел са е манушенге те хаљовен и Библија хем те хаљовен ко кобор важно време живинаја“.

Адаја прво радиоемисија сине ла баро успех. Ко следна 33 берш е Девлескири организација користинѓа и радиостаница WBBR те шај те мукхел програма.

Ко јули 1924 берш, о Истражувачија е Библијакере икерѓе конгрес ко Колумбус (Охајо, Америка). Але делегатија таро цело свето хем сине икерде говорија ко англиско, арапско, германско, грчко, италијанско, литванско, полско, руско, украинско, унгарско, француско хем ко скандинавска чхибја. Несаве делија тари програма сине мукхле преку радио. Освен адава, о пхраља договоринѓе пе ки новина таро адава тхан секова диве те пишинел пе статие баши конгресно програма.

Четврток, ко 24 јули, повише таро 5.000 пхраља хем пхења иклиле те проповединен ки диз коте со икерѓа пе о конгрес. Ола денѓе скоро 30.000 лила хем почминѓе повише милје библиска курсија. И Стражарско кула башо акава диве вакерѓа кај тано „о најрадосно дело таро конгрес“.

Петок, ко 25 јули, ко конгрес случинѓа пе јавер да нешто сој тано важно. О пхрал Ратерфорд читинѓа јекх документи колеа со храбро кривинела пе сине е верска водачен. Ко документи пишинела сине кај о политичка хем верска водачија хем окола со водинена о трговско систем „чхинавена е манушен те дознајнен башо е Девлескоро Царство коле со о Девел ка користинел те шај те благословинел са е манушен“. Освен адава, ко документи пишинела сине кај адала мануша „поддржинена и Лига е народонгири хем вакерена кај преку лате о Девел владинела ки пхув“. О Истражувачија е Библијакере ваљани сине те  овен бут храбра те шај те вакерен акаја порака е манушенге.

Те шај те опишинел пе сар влијајнѓа о конгрес упро пхраља хем о пхења, ки Стражарско кула сине објавимо кај о конгрес ко Колумбус бајрарѓа и вера акале ревносно Девлескере слугенгири. О конгрес денѓа лен храброст те проповединен бизи разлика саво противибе ка овел лен сине. О Лео Клаус, кова со сине присутно ко адава конгрес вакерѓа: „Кеда гелем аменге таро конгрес сием сине воодушевиме хем спремна те вакера акаја порака ко амаро подрачје“.

Ко октомври, о Истражувачија е Библијакере почминѓе те делинен милиоња примерокија таро трактати О свештенство тано обвинимо, колесте со сине пишими и порака со о пхрал Ратерфорд читинѓа ла против о верска водачија. Ки тикни диз Кливленд, ки Оклахома (Америка), о Френк Џонсон обработинѓа е трактатеа цело подрачје со сине леске дендо хем ваљани сине те аџикерел 20 минутија џикоте авена сине несаве пхраља хем пхења коленцар со ваљани сине те џал песке. Несаве мануша тари диз сине хољаме башо лескоро проповедибе хем родена ле сине. Адалеске, на сине безбедно те аџикерел ко несаво тхан коте со шај сине локхе те дикхен ле. О пхрал Џонсон, одлучинѓа те гаравел пе ки јекх црква која со сине паше. Адалеске со ој сине чучи ов мукхља примерокија таро трактати ки е свештеникоскири Библија хем ко секова седиште. Са адава керѓа ле сигате хем адалеске сине ле панда време те џал ко панда дуј цркве хем те керел о исто.

О Френк сигате иранѓа пе ко тхан коте со ваљани сине те аракхел пе е пхраленцар. Гаравѓа пе пали јекх бензинско пумпа котар со шај сине те дикхел е манушен со родена ле. Ола накхле пумаре врдаја, ама на дикхле ле. Само со геле песке, о пхраља хем о пхења со проповединена сине паше, але пало Френк врдаја хем сарине заедно геле песке.

Јекх таро пхраља вакерѓа: „Џикоте џаја сине аменге тари диз, накхлем таро адала трин цркве. Англи секоја црква сине по околу 50 џене. Несаве читинена сине о трактати, а јавера сикавена сине е свештеникоске. Харичкаске нашлем тари бејља! Ама благодарна сием е Јеховаске, амаре Девлеске, адалеске со заштитинѓа амен хем поможинѓа амен те џана сар те наша таро акала душмања е Девлескере Царствоскере“.

О Истражувачија е Библијакере храбро проповединѓе хем ко јавера пхувја. Ки Северно Франција, о Јозеф Крет проповединѓа е рударенге кола со але тари Полска. Ов ваљани сине те икерел говор е насловеа „Панда хари о муле ка воскреснинен“. Кеда о пхраља хем о пхења делинѓе о покане е манушенге тари адаја диз, о локално свештенико предупрединѓа адален со сине членија ки лескири црква те на џан. Лескоро предупредување сине ле контра ефекти. Повише таро 5.000 мануша присуствујнѓе ко говор, машкар коленде со сине хем о свештенико! О пхрал Крет канинѓа е свештенико те бранинел пле верувања, ама ов одбинѓа. Пало говор, о пхрал Крет делинѓа са о публикацие со сине адалеске со приметинѓа кај о мануша коленге со сведочинѓа сине жедна башо чачипа таро е Девлескоро Лафи (Амос 8:11).

О Клод Браун гело ки Африка, ки пхув Златно Брего, која сој тани акана пенџарди сар Гана, те шај те проповединел о шукар хабери. Лескере говорија хем о публикацие со добинѓа лен поможинѓе о чачипе сигате те ширинел пе ки адаја пхув. О Џон Бленксон, кова со студиринѓа фармација, присуствујнѓа ко јекх таро говорија е пхралескере Браун. Ов сигате халило кај аракхља о чачипе. О Џон вакерѓа: „О чачипе анѓа манге бари радост хем керава сине лафи баши лесте буте манушенцар ки мли школа“.

 О Џон дознајнѓа кај о тројство нане библиско сикљојбе. Адалеске јекх диве, ов гело ки Англиско црква те шај те пучел е свештенико башо адава. О свештенико хољанѓа, бркинѓа ле хем викиндор вакерѓа леске: „Ту на сиан христијани. Ту припадинеа е Бенгеске. Циде тут акатар!“

Кеда ресља кхере, о Џон пишинѓа писмо е свештеникоске колесте со пучља ле дали шај те аракхен пе хем англо јавера те бранинел о тројство. О свештенико вакерѓа е Џонеске те џал ки канцеларија е главно професореске ко факултети. Адари о професори пучља ле дали ов чаче пишинѓа писмо е свештеникоске.

„Оја, пишинѓум леске господине“, одговоринѓа о Џон.

О професори родинѓа таро Џон те пишинел писмо е свештеникоске колеа со ка извининел пе леске. Адалеске о Џон пишинѓа:

„Господине, мло професори замолинѓа ман те пишинав туке писмо колесте со ка извининав ман туке хем ме сиум спремно те керав адава ако ту признајнеа кај ширинеа ховавне сикљојба“.

О професори сине чудимо хем пучља ле: „Бленксон, чаче мангеа адава те пишине?“

„Оја господине. Адава тано са со шај те пишинав“.

„Ка ове бркимо таро факултети. Сар шај те кере лафи против о свештенико е црквакоро кола со поддржинела и влада хем те надине тут кај јекх диве адаја влада ка приминел тут ки бути?“

„Ама, господине... кеда ту предајнеа аменге несави лекција хем кеда амен нешто нашти те хаљова, на пучаја тут ли пучиба?“

„Нормално кај пучена“.

„Па, господине... баш адава случинѓа пе. О свештенико сикавела амен сине баши Библија хем ме пучљум ле пучибе. Ако ов нашти те одговоринел ко пучибе, тегани мислинава кај на ваљани те извининав ман леске“.

Иако о Бленксон на извининѓа пе е свештеникоске, ов на сине бркимо таро факултети.

Ки Стражарско кула баши активност е Девлескере народоскири ко адава берш, пишинела сине: „Амен да сар о Давид, шај те вакера: ’Ту ка де ман сила те боринав ман‘ (Псалм 18:39). Акава берш бут охрабринѓа амен соске дикхлем сар о Јехова поможинела амен ки служба. Лескере верна слуге радосно проповединѓе о шукар хабери“.

Покасно ко адава берш, о пхраља планиринѓе те керен панда јекх радиостаница. Ој сине градими паше узо Чикаго (Америка). Акаја неви радиостаница сине викими WORD, со значинела „Лафи“, адалеске со ола ваљани сине те проповединен е Девлескоро Лафи преку радио. Акава пути, ола користинѓе опрема таро 5.000 ватија преку колате со шај сине те шунен и порака башо Царство чак адала со сине дур бут километрија, са џи ко север тари Канада.

Ама, ко 1925 берш, о Јехова поможинѓа е пхраленге пошукар те хаљовен адава со пишинела ко Откровение поглавје 12. Башо адава нево хаљојбе, несаве сопкинѓе пе хем чхинавѓе те служинен е Јеховаске. Ама, бут јавера сине радосна со пошукар халиле со случинѓа пе ко небо хем со халиле сар адава влијајнѓа упро е Девлескоро народо ки пхув.