1. Со ка керел о Исус панда хари?

 ЖИВИНАЈА ко јекх бут возбудливо време! Панда хари, о Исус ка судинел секоле јекхе манушеске ки пхув. О Исус опишинѓа о време со ка анел џи ко судибе, аѓаар со денѓа пле учениконге јекх пророчко знако баши лескири присутност со на дикхјола хем „башо крајо акале светоскоро“ (Мат. 24:3). Акава пророштво тано пишимо ко Матеј поглавја 24 хем 25, хем исто аѓаар ко Марко поглавје 13 хем Лука поглавје 21.

2. Со ка дикха ки акаја статија, хем сар адава ка користинел аменге?

² О Исус денѓа корисна предупредувања аѓаар со вакерѓа трин споредбе. И прво споредба тани башо бакхре хем бузња, и дујто башо панџ мудра хем панџ глупава чхаја, а трито тани башо талантија. Секоја таро акала споредбе поможинена амен те хаљова кај о Исус ка судинел секоле манушеске спрема адава со керела. Џикоте кераја лафи башо акала споредбе ка дикха со шај те сикљова лендар хем сар шај те применина лен. Прво, ка дикха и споредба башо бакхре хем бузња.

О БАКХРЕ ХЕМ О БУЗЊА

3. Кеда о Исус ка судинел е манушенге?

³ Ки споредба башо бакхре хем бузња, о Исус вакерѓа кај ка судинел е манушенге спрема адава сар реагиринѓе ко шукар хабери хем дали поддржинѓе лескере помазиме пхрален (Мат. 25:31-46). Акава судибе ка овел џикоте трајнела и „бари неволја“, кратко англедер те почминел о Армагедон (Мат. 24:21). Исто сар јекх овчари со одвојнела  е бакхрен таро бузња, аѓаар о Исус ка одвојнел адален со верно поддржинена лескере помазиме следбеникон, околендар со на керена адава.

4. Спрема Исаија 11:3, 4 соске шај те ова сигурна кај о Исус ка судинел е манушенге праведно? (Дикх хем и слика.)

⁴ И Библија сикавела кај о Исус кова сој поставимо сар судија таро Јехова ка судинел праведно. (Читин Исаија 11:3, 4.) О Исус шукар дикхела о ставија е манушенгере, сар постапинена, хем сар керена лафи, ама хем сар понашинена пе лескере помазиме пхраленцар (Мат. 12:36, 37; 25:40). О Исус ка џанел кој поддржинѓа лескере помазиме пхрален хем о активностија со керена лен. a Јекх таро најважна начинија сар некој шај те поддржинел е Христосескере пхрален тано аѓаар со ка поможинел лен ко проповедибе. Окола со поддржинена лен ко асавко начин ка овен праведна англо е Девлескере јакхја хем ка овел лен прилика те живинен вечно ки пхув (Мат. 25:46; Отк. 7:16, 17). Акаја тани чаче бут шужи награда! Адалеа со ка ачховен верна ки бари неволја хем пало адава, ола ка икерен пумаре анава ко лил е животоскоро (Отк. 20:15).

5. Со сикљоваја тари споредба башо бакхре хем башо бузња, хем кас шај те овел ле корист латар?

⁵ Ов верно. Е Исусескири споредба башо бакхре хем бузња главно важинела околенге со иси лен надеж те живинен ки пхув. Ола сикавена пумари вера аѓаар со поможинена е Христосескере пхраленге ко проповедибе хем аѓаар со верно шунена о упатствија со добинена таро верно хем мудро робо коле со чхивѓа ле о Исус (Мат. 24:45). Ама, окола да со иси лен надеж те живинен ко небо ваљани те пазинен ко предупредувања тари акаја споредба. Соске? Адалеске со о Исус дикхела сар понашинена пе, саве ставија иси лен хем сар керена лафи. Ола да мора те овен верна. Уствари, о Исус вакерѓа панда дуј споредбе кола со посебно важинена е помазаниконге. Акала споредбе тане пишиме хем ко Матеј поглавје 25. Акана ка дикха и споредба башо мудра хем башо глупава чхаја.

О МУДРА ХЕМ О ГЛУПАВА ЧХАЈА

6. Сар панџ таро чхаја сикавѓе кај тане мудра? (Матеј 25:6-10).

⁶ Ки јавер споредба о Исус керѓа лафи башо 10 чхаја кола со геле те аџикерен е џамутре (Мат. 25:1-4). Сарине ола надинена пе сине кај ка кхувен леа ко бијав. Панџенге лендар, о Исус вакерѓа кај тане „мудра“, а панџенге кај тане „глупава“. О мудра чхаја сине спремна хем џангавде. Ола сине спремна те аџикерен е џамутре кобор со ваљани сине, па чак ако ресела касно раќате. Адалеске, ола леле пеа пумаре лампе те шај те овел лен светло, чак леле пеа повише масло случајно те на каснинел о џамутро. Аѓаар, сине спремна те шај ленгере лампе те на ачхон. (Читин Матеј 25:6-10.) Кеда ресља о џамутро, о мудра чхаја кхувѓе леа ко бијав. Слично, о помазиме христијања со ка овен спремна аѓаар со ка ачховен верна хем џангавде са џи ко авибе е Христосескоро, ка овен достојна те овен е Исусеа ко лескоро небесно Царство b (Отк. 7:1-3). А со случинѓа пе е глупава чхаенцар?

7. Со случинѓа пе е панџе глупава чхаенцар, хем соске?

⁷ Различно таро панџ мудра чхаја, о панџ  глупава чхаја на сине спремна кеда ресља о џамутро. Ленгере лампе само со на ачхиле. Освен адава, ола на леле пеа повише масло. Кеда дознајнѓе кај о џамутро панда хари ка ресел, мора сине те џан те кинен масло. Кеда ресља о џамутро, ола на сине адатхе. Тегани „о чхаја со сине спремна кхувѓе леа андре ко бијав хем о удар пханлило“ (Мат. 25:10). Покасно, кеда о глупава чхаја иранѓе пе хем мангле те кхувен, о џамутро вакерѓа ленге: „На пенџарава тумен“ (Мат. 25:11, 12). Адала чхаја на сине спремна те аџикерен е џамутре добором кобор со ваљани сине. Со шај те сикљовен о помазаникија таро акава?

8-9. Со шај те сикљовен о помазаникија тари споредба е чхаенцар? (Дикх хем и слика.)

⁸ Ов спремно хем џангавдо. О Исус на мангља те пророкујнел кај ка овен дуј групе помазаникија — јекх со ка овел спремно те аџикерел џи ко крајо акале светоскоро, а јекх со нане те овел спремно. Уствари, ов мангља те вакерел со ка случинел пе е помазаниконцар ако нане спремна истрајно те аџикерен џи ко крајо. Ако случинела пе адава, тегани ола нане те добинен пумари награда (Јован 14:3, 4). Акава тано бут сериозно предупредување! Бизи разлика дали иси амен надеж те живина ко небо или ки пхув, сарине амен ваљани те пазина ко предупредување тари споредба е чхаенцар. Секој амендар ваљани те овел џангавдо хем спремно те шај те истрајнел џи ко крајо (Мат. 24:13).

⁹ Откеда вакерѓа и споредба е чхаенцар, те шај те истакнинел кобор тано важно те овел пе спремно хем џангавдо, о Исус вакерѓа и споредба башо талантија. Акаја споредба сикавела кобор тано важно те ова буќарне.

О ТАЛАНТИЈА

10. Сар о дуј робија сикавѓе кај тане верна? (Матеј 25:19-23).

¹⁰ Ки споредба башо талантија, о Исус керѓа лафи башо дуј робија кола со сине  верна пле господареске хем башо јекх робо со на сине верно (Мат. 25:14-18). О дуј робија сикавѓе кај тане верна аѓаар со сине буќарне хем бајрарѓе о барвалипе пумаре господарескоро. Англедер те џал ко дур тхан, ов денѓа лен талантија — јекх бари сума паре. О дуј верна робија сине буќарне хем мудро користинѓе о паре. Со случинѓа пе пало адава? Кеда ленгоро господари иранѓа пе, ола дуплиринѓе и сума таро паре која со денѓа лен ов. О господари пофалинѓа лен хем ола радујнѓе пе леа. (Читин Матеј 25:19-23.) Ама со случинѓа пе е трито робоја? Со керѓа ов е паренцар со денѓа ле о господари?

11. Со случинѓа пе е мрзале робоја, хем соске?

¹¹ О трито робо добинѓа јекх таланти, ама сине мрзало. Лескоро господари очекујнела сине мудро те користинел адава таланти. Наместо адава, ов парунѓа ле ки пхув. Кеда о господари иранѓа пе, акава робо денѓа ле само адава јекх таланти. Акале робо на сине ле шукар стави. Наместо те извининел пе е господареске, адалеске со на бајрарѓа и сума таро паре, ов неправедно вакерѓа кај о господари тано „мануш кова со родела бут“. Акава робо на радујнкерѓа пле господаре. Освен адава, леља пе лестар о таланти хем сине палдимо таро е господарескоро кхер (Мат. 25:24, 26-30).

12. Кас претставинена о дуј верна робија авдиве?

¹² О дуј верна робија претставинена е верна помазиме христијанен. О Господари о Исус канинела лен те радујнен пе пумаре господареа. Ола добинена пумари небесно награда, о прво воскресение (Мат. 25:21, 23; Отк. 20:5б). Тари јавер страна, о лошно пример е мрзале робоскоро тано предупредување е помазаниконге. Ки која смисла?

13-14. Со шај те сикљовен о помазаникија тари споредба башо талантија? (Дикх хем и слика.)

¹³ Ов буќарно. Е споредбенцар башо талантија хем башо чхаја, о Исус на мангља те вакерел кај о помазаникија ка овен мрзале. Уствари, ов мангља те објаснинел со ка случинел пе ако ола некогаш нашавена пумари ревност. Ако случинела пе адава, тегани ка нашти те потврдинен адава  сој тане „викиме хем бириме“ хем нане те дозволинел пе ленге те кхувен ко небесно Царство (2. Пет. 1:10).

¹⁴ О споредбе со вакерѓа лен о Исус башо чхаја хем башо талантија, јасно сикавена кај са о помазаникија ваљани те овен спремна хем џангавде, а исто аѓаар буќарне. Ама дали о Исус вакерѓа нешто јавер кова со шај те овел сар предупредување е помазаниконге? Оја! Адава предупредување аракхљола ко Матеј 24:40, 41 хем адалеа мислинела пе ко последно судо упро помазаникија.

КОЈ КА ОВЕЛ ЛЕНДО?

15-16. Сар о лафија таро Матеј 24:40, 41 поможинена е помазаниконге те хаљон кобор тано важно те ачховен џангавде ко духовно поглед?

¹⁵ Англедер те вакерел о трин споредбе, о Исус опишинѓа сар ка овел о последно судо упро помазаникија со ка сикавел дали тане одобриме таро Девел. Ов керѓа лафи башо дуј мануша со керена бути ки нива хем башо дуј џувља со мелинена гив. Ко солдуј случаија дикхјола кај о солдуј керена сине исто бути, ама о Исус вакерѓа кај „јекх ка овел лендо, а јекх ка овел мукхло“. (Читин Матеј 24:40, 41.) Пало адава, поттикнинѓа пле следбеникон: „Ачховен џангавде, соске на џанена ко кова диве авела тумаро Господари“ (Мат. 24:42). О Исус вакерѓа нешто слично кеда вакерѓа и споредба башо чхаја (Мат. 25:13). Дали акала изјаве тане поврзиме машкар песте? Изгледа оја. Само окола сој верна хем сој чаче помазаникија „ка овен ленде“, јавере лафенцар о Исус ка приминел лен ко пло небесно Царство (Јован 14:3).

¹⁶ Ов џангавдо ко духовно поглед. Окола помазаникија со нане те ачховен џангавде ко духовно поглед нане те овен кхедиме околенцар сој бириме (Мат. 24:31). Ама шај те вакера, кај са е Девлескере слуге, бизи разлика сави надеж иси лен, ко е Исусескере лафија ваљани те дикхен сар предупредување те ачховен џангавде хем верна.

17. Соске на ваљани те ова секириме ако о Јехова одлучинела те помазинел некас таро пле слуге ко амаро време?

¹⁷ Амен бут шукар пенџараја е Јехова хем адалеске иси амен доверба кај са со керела тано праведно. Нане соске те секирина амен ако о Јехова одлучинела те помазинел некас ко амаро време. c Џанаја со вакерѓа о Исус башо работникија тари лескири споредба баши нива е дракхенцар, кола со але те керен бути ко панџто саати (Мат. 20:1-16). Окола со сине викиме те керен бути ки нива е дракхенцар покасно ко адава диве, добинѓе и исто плата која со добинѓе адала со але те керен порано. Слично, бизи разлика кеда некој сине биримо те овел помазанико, са о помазаникија ка добинен и небесно награда ако ачховена верна.

ПАЗИН КО ПРЕДУПРЕДУВАЊА

18-19. Со сиклилем, хем саве предупредувања дикхлем?

¹⁸ Со дикхлем ки акаја статија? Околенге со иси лен надеж те живинен засекогаш ки пхув, и споредба башо бакхре хем бузња сикавела кобор тано важно те ачховен верна е Јеховаске — акана хем ки бари неволја која со ка авел. Ки иднина, кратко англедер те почминел о Армагедон, о Исус ка судинел кој тане верна е Јеховаске хем ка вакерел кај тане праведна те добинен вечно живото (Мат. 25:46).

¹⁹ Исто аѓаар, дикхлем дуј споредбе коленде  со иси предупредувања башо помазаникија. Ки е Исусескири споредба башо мудра хем глупава чхаја, дикхлем кај панџ лендар сикавѓе кај тане гоѓавер. Ола сине спремна хем џангавде те аџикерен е џамутре добором кобор со ваљани сине. Ама о глупава чхаја на сине спремна. Адалеске, о џамутро на мукхља лен те кхувен ко лескоро бијав. Амен да исто ваљани те ова спремна те аџикера кобор хем те ваљанел са џикоте о Исус на чхивела крајо акале светоске. Исто аѓаар, ки споредба башо талантија, дикхлем о пример таро дуј верна робија кола со сине буќарне. Ола вредно керѓе бути пумаре господареске хем аѓаар добинѓе лескоро одобрување. Ама, о мрзало робо сине отфрлимо. Со сикљоваја? Мора те ачхова зафатиме ки служба башо Јехова са џи ко крајо. Исто аѓаар, дикхлем кај о помазаникија мора те ачховен џангавде те шај те овен „ленде“, јавере лафенцар те шај о Исус те дел лен ленгири небесно награда. Ола едвај аџикерена те овен „кхедиме“ таро Исус ко небо. Пало Армагедон ола ка овен е Исусескири бори ко бијав е Бакхрескоро (2. Сол. 2:1; Отк. 19:9).

20. Сар ка постапинел о Јехова околенцар со пазинена ко лескере предупредувања?

²⁰ О време кеда о Исус ка судинел авела бут сигате, ама на ваљани те дара. Ако ачховаја верна, амаро небесно Дад кова сој пхердо мангипаја, ка дел амен сила „која со накхавела и нормално“ те шај те терѓова „англо манушикано Чхаво“ (2. Кор. 4:7; Лука 21:36). Бизи разлика дали иси амен надеж те живина ко небо или ки пхув, ка кера радосно амаре Даде ако пазинаја ко предупредувања таро споредбе е Исусескере. Адалеске со о Јехова сикавела аменге шукарипе со на заслужинаја ле, амаре анава „ка овен пишиме ко лил е животоскоро“ (Дан. 12:1; Отк. 3:5).