1-2. Соске е Девлескере слуге тане среќна? (Јаков 1:22-25).

 О ЈЕХОВА хем лескоро мангло Чхаво мангена те ова среќна. О писатели со пишинѓа о Псалм 119:2 вакерѓа: „Среќна тане окола со икерена пе ко лескере поуке. Ола родена ле цело вилеа“. О Исус денѓа акава ветување: „Радосна тане окола со шунена е Девлескоро лафи хем икерена ле!“ (Лука 11:28).

² Сар слуге е Јеховаскере, амен сием среќна мануша. Соске? Иси амен бут причине башо адава, ама јекх важно причина тани адаја со редовно читинаја е Девлескоро Лафи хем даја са амендар те шај те применина адава со сикљоваја. (Читин Јаков 1:22-25.)

3. Сар користинела аменге кеда применинаја адава со читинаја ко е Девлескоро Лафи?

³ Адава со живинаја спрема е Девлескоро Лафи користинела аменге ко некобор начинија. На пример, џанаја кај акава тано јекх важно начин колеа со радујнаја е Јехова, а адава керела амен среќна (Проп. 12:13). Исто аѓаар, кеда применинаја о советија таро е Девлескоро Лафи сием ко шукар односија е јаверенцар ки фамилија хем ко собрание. Акава веројатно тано аѓаар хем ко тло живото да. Освен адава, избегинаја бут таро проблемија кола со иси околен со на шунена е Јеховаскере заповедија. Амен сложинаја амен адалеа со вакерѓа о цари о Давид. Откеда ки гили спомнинѓа е Јеховаскоро закони, о наредбе хем о пресуде, о Давид завршинѓа е лафенцар: „Адава со икерела лен, ка овел бут наградимо“ (Пс. 19:7-11).

4. Соске нане секогаш локхо те читина е Девлескоро Лафи хем те применина адава со сикљоваја?

⁴ Реално тано кај нане секогаш локхо те читина е Девлескоро Лафи хем те применина адава со сикљоваја соске сием бут зафатиме. Ама иако тано аѓаар, мора те одредина аменге време  кеда ка читина хем ка проучина и Библија те шај те хаљова со о Јехова очекујнела амендар. Адалеске, ки акаја статија ка дикха некобор предлогија со шај те поможинен аменге редовно те читина и Библија. Исто аѓаар, ка дикха со ка поможинел аменге те размислина башо адава со читинаја хем ка дикха сар шај те применина адава со сикљоваја.

ОДВОЈН ВРЕМЕ ТЕ ШАЈ ТЕ ЧИТИНЕ Е ДЕВЛЕСКОРО ЛАФИ

5. Кола одговорностија лена баро дело таро амаро време?

⁵ Повише џене таро е Јеховаскере слуге тане бут зафатиме. Баро дело таро амаро време трошинаја ле те шај те кера о одговорностија баши коленде со и Библија вакерела кај тане важна. На пример, бут џене амендар кераја бути те шај те овен амен о основно буќа живибаске (1. Тим. 5:8). Бут пхраља хем пхења грижинена пе некаске сој насвало или некој сој попхуро тари ленгири фамилија. Исто аѓаар, секова јекх амендар ваљани те аракхел пло састипе, а башо адава ваљани време. Освен акала одговорностија, амен исто аѓаар иси амен задаче ко собрание. Јекх важно одговорност која со иси амен тани ревно те учествујна ки служба. Ама иако иси тут са акала обврске, сар шај те аракхе време редовно те читине и Библија, те размислине башо адава со читинеа хем те применинена адава со пишинела ки лате?

6. Со шај те кере те шај секова диве те читине и Библија? (Дикх хем и слика.)

⁶ Сар христијања, аменге о читибе и Библија тани јекх таро најважна буќа, адалеске ваљани те овел аменге ко прво тхан (Фил. 1:10). Башо среќно мануш, ко прво псалм пишинела кај „уживинела ко е Јеховаскоро закони, читинела хем размислинела лескере законеске диве хем рат“ (Пс. 1:1, 2). Акава јасно сикавела кај ваљани те одвојна аменге време те шај те кера адава. Кова тано најшукар време те читина и Библија? Адава тано секасте различно. Ама важно тано, кај ваљани те овел амен време кеда ка шај редовно те читина и Библија. Јекх пхрал со викинела пе Виктор вакерела: „Ме мангава те  читинав и Библија сабајле. Иако манге пхаро те уштав рано, ама тегани нане добором буќа со сметинена ман. Ко адава време шај пошукар те размислинав хем полокхе те концентриринав ман“. Шај исто тано туја да. Пуч тут: „Кова време таро диве највише одговоринела манге те читинав и Библија?“

ХОР РАЗМИСЛИН БАШО АДАВА СО ЧИТИНЕА

7-8. Со шај те чхинавел амен те овел амен целосно корист таро адава со читинаја? Вакер пример.

⁷ Шај одрединѓан туке време те шај редовно те читине и Библија. Ама, иси панда нешто ко со ваљани те пазине. Дали некогаш случинѓа пе туке те читине нешто, а кратко пало адава нашти те сетине тут ко адава со читинѓан? Сариненге случинѓа пе адава. Жално тано со акава шај те случинел пе хем кеда читинаја и Библија. На пример, шај чхивѓем аменге цел те читина некобор поглавја тари Библија секова диве. Адава тано шукар. Амен ваљани те чхива аменге целија хем те трудина амен те исполнина лен (1. Кор. 9:26). Ама о читибе и Библија тано само почеток. Ако мангаја те овел амен корист таро читибе е Девлескоро Лафи, мора те кера повише таро адава.

⁸ Размислин башо акава пример: О растенија нашти бизо пани хем бут пути адава пани добинена ле преку о бршим. Ама, ако башо кратко време дела бут бршим, тегани и пхув ка овел пхерди пањеа. Адава нане те овел корисно башо растение, соске е пхувјаке ваљани време те шај те пиел о пани хем те поможинел о растение те бајрол. Слично, амен ваљани те избегина те читина и Библија сигате, јавере лафенцар те читина добором сигате со нане те овел амен време те размислина, те памтина хем те применина адава со читинѓем (Јак. 1:24).

9. Со ваљани те кера ако иси амен навика сигате те читина и Библија?

⁹ Дали приметинѓан кај понекогаш читинеа и Библија бут сигате? Со ваљани те кере? Читин побавно. Трудин тут те размислине башо адава со читинеа или башо адава со  више читинѓан. Акава на би ваљани те овел пхаро. Адалеске, шај ка ваљани те одвојне повише време проучибаске те шај хор те размислине башо адава со читинеа. Или шај те одлучине те читине похари стихија, а о јавер дело таро време те размислине башо адава со читинѓан. О Виктор, коле со спомнинѓем ле англедер вакерела: „Читинава похари тари Библија, шај по јекх поглавје. Адалеске со читинава рано сабајле, тегани цело диве шај те размислинав башо адава со читинѓум“. Бизи разлика кобор ка одлучине те читине, важно тано те читине доволно бавно те шај те овел тут целосно корист таро адава со читинѓан (Пс. 119:97; дикх и рамка „ Пучиба размислибаске“.).

10. Вакер пример башо адава сар шај те применине адава со сикљовеа (1. Солунјања 5:17, 18).

¹⁰ Бизи разлика кеда читинеа и Библија хем кобор време накхеа ко читибе, трудин тут те аракхе начинија те применине адава со читинеа. Џикоте читинеа несаво дело таро е Девлескоро Лафи, пуч тут: Сар шај те применинав акаја информација акана или ко време со авела?“ На пример, те вакера кај џикоте читине и Библија, читинеа хем о стихија таро 1. Солунјања 5:17, 18. (Читин.) Откеда ка читине акала дуј стихија шај хари те ачхове хем те размислине кобор пути молинеа тут хем дали молинеа тут таро вило. Исто аѓаар, шај те размислине башо буќа коленге со сиан благодарно. Шај ка одлучине те благодарине е Јеховаске башо трин конкретна буќа. Чак ако само некобор минутија размислинеа башо поуке тари Библија, адава ка поможинел туке те хаљове е Девлескоро Лафи хем те кере адава со ов вакерела. Размислин кобор корист ка овел тут ако кереа акава секова диве јавере да делонцар тари Библија. Сигурно, сар со ка накхел о време, ка ове пошукар слуга е Јеховаскоро. Ама, со ако иси бут буќа коленде со ваљани те кере бути?

ЧХИВ ТУКЕ РАЗУМНА ЦЕЛИЈА

11. Соске шај понекогаш ка осетине тут обесхрабримо? Вакер пример.

¹¹ Кеда читинеа и Библија хем родеа начинија сар шај те применине лакере советија, понекогаш шај ка обесхрабрине тут. На пример, замислин туке кај ко извештај со читинеа ле авдиве тари Библија, иси советија баши пристрасност (Јак. 2:1-8). Хаљовеа кај шај те ове пошукар ко начин сар постапинеа е јаверенцар хем адалеске одлучинеа те кере несаве промене. Адава тано бут шукар! О следно диве читинеа несаве стихија кола со сикавена кобор тано важно те контролирине тли чхиб (Јак. 3:1-12). Хаљовеа кај понекогаш вакереа лафија со нане љубезна или кереа лафи башо буќа со нане охрабрувачка.  Адалеске, одлучинеа те кере лафи башо попозитивна хем поохрабрувачка буќа. О трито диве, читинеа библиско извештај коте со иси предупредување башо адава те на ова амала е светоја (Јак. 4:4-12). Приметинеа кај ваљани повише те пазине сави забава биринеа. О штарто диве шај осетинеа тут бут обесхрабримо соске иси бут буќа коленде со ваљани те поправине тут.

12. Соске на ваљани те обесхрабрине тут ако џикоте читинеа и Библија хаљовеа кај ваљани те кере промене? (Дикх хем и фуснота.)

¹² Ако ваљани те кере повише промене или те поправине тут ко нешто, ма обесхрабрин тут. Адава со хаљовеа кај ваљани те поправине тут сикавела кај сиан понизно хем кај иси тут исправна мотивија. Окова сој понизно хем искрено пеа, читинела и Библија те шај те хаљовел коте те поправинел пе. a Ма бистре кај о урајбе и „неви личност“ тано процес со на чхинавѓола (Кол. 3:10). Со ка поможинел туке понадари да те живине спрема е Девлескоро Лафи?

13. Кова тано јекх шукар начин сар шај те применине адава со сиклиљан? (Дикх хем и слика.)

¹³ Наместо те пробине те применине таро јекх пути са адава со читинѓан, ов скромно хем чхив туке само јекх или дуј целија (Изр. 11:2). Пробин те кере акава: Кер туке списако буќенцар коленде со ваљани те поправине тут. Пало адава, бирин јекх или дуј лендар коленде со одма ка кере бути, а о јавера мукхлен башо покасно. Котар те почмине?

14. Ко кола целија шај прво те бирине те кере бути?

¹⁴ Шај ка одлучине те почмине те кере бути ки несави цел која сој туке полокхо те исполнине ла. Или шај ка бирине те кере бути ко нешто коте со мислинеа кај највише ваљани те поправине тут. Откеда ка бирине тли цел, истражин ко амаре публикацие аѓаар со ка  користине и Онлајн Библиотека Watchtower или о Прирачнико истражибаске е Јеховаскере сведоконгоро. Молин тут баши тли цел хем молин е Јехова те дел тут хем и желба хем и сила те шај те успејне ко адава (Фил. 2:13). Пало адава, трудин тут те применине адава со сиклиљан. Кеда ка дикхе кај напредујнеа ки тли прво цел со чхивѓан ла туке, адава шај те поттикнинел тут те кере бути хем ки несави јавер цел. Уствари, кеда ка успејне те поправине тут ки јекх бути таро христијанско живото или ки несави христијанско особина, веројатно ка овел туке полокхо те кере о исто хем ко јавера да буќа.

ДОЗВОЛИН Е ДЕВЛЕСКОРО ЛАФИ ТЕ ВЛИЈАЈНЕЛ УПРИ ТУТЕ

15. Сави тани и разлика машкар е Јеховаскере слуге хем бут јавера кола со читинена и Библија? (1. Солунјања 2:13).

¹⁵ Несаве мануша вакерена кај бут пути читинѓе и Библија. Ама дали ола чаче верујнена ки Библија? Дали ола применинена лакере советија хем дали дозволинена ој те влијајнел упро ленгоро начин сар живинена? Жално, ама бут пути о одговор тано на. Кобор бут разликујнена пе е Јеховаскере слуге! Исто сар о христијања таро прво веко, амен прифатинаја и Библија сар сој чаче, „сар лафи таро Девел“. Освен адава, амен трудинаја амен те сикава кај ој влијајнела упро амаро живото. (Читин 1. Солунјања 2:13.)

16. Со шај те поможинел аменге те постапина спрема е Девлескоро Лафи?

¹⁶ Нане секогаш локхо те читина е Девлескоро Лафи хем те применина о советија сој ки лесте. Шај аменге пхаро те аракха време читибаске. Или шај иси амен навика те читина бут сигате хем адалеске нашти те размислина башо адава со читинаја. Или шај сием обесхрабриме адалеске со ваљани те кера бут промене. Бизи разлика саво тано тло предизвик, о Јехова шај те поможинел туке те успејне. Те ова одлучна те прифатина лескири помош хем те на бистра адава со шунѓем, него те постапина спрема е Девлескоро Лафи. Шај те ова сигурна кај кобор повише читинаја е Девлескоро Лафи хем применинаја ле ко амаро живото, добором посреќна ка ова (Јак. 1:25).