1-2. а) Сави сине и ситуација ки Јудеја кеда о апостол Павле пишинѓа о писмо џи ко Евреија? б) Соске акава писмо сине баш ко време?

 Е ХРИСТИЈАНЕН со живинена сине ко Ерусалим хем ки Јудеја сине лен бут пхарипа откеда муло о Исус. Кратко откеда сине кердо о христијанско собрание почминѓа баро прогонство (Апо. 8:1). Околу 20 берш покасно, е христијанен сине лен баре економска проблемија, шај адалеске со англедер ки адаја пхув сине бокхалипе хем чоролипе (Апо. 11:27-30). Сепак околу 61-то берш тари а.е., о христијања на сине добором прогониме кобор со сине прогониме пало адава. Ко адава време ола добинѓе писмо кова со пишинѓа ле о апостол Павле водимо тари е Девлескири сила — писмо кова со ало баш ко време.

² О писмо кова со добинѓе о Евреија сине баш ко време, соске о мир ко кова со живинена сине о христијања нане сине те трајнел бут. О Павле денѓа лен практична советија кола со ка поможинен ленге сине те истрајнен ко пхарипа кова со панда хари ваљани сине те овел лен. Панда хари о Ерусалим ваљани сине те овел уништимо, сар со пророкујнѓа о Исус (Лука 21:20). Џанѓола пе, ни о Павле, ни о христијања ки Јудеја на џанле кеда точно ка авел адава уништибе. Сепак, акала христијања шај сине те користинен о време со ачхило лен те шај те спреминен пе аѓаар со ка развинен особине сар сој вера хем истрајност (Евр. 10:25; 12:1, 2).

3. Соске о писмо џи ко Евреија тано посебно важно е христијаненге авдиве?

³ Амен аџикерела амен панда бут побари неволја тари адаја со сине е христијанен со живинена сине ко Ерусалим хем ки Јудеја (Мат. 24:21; Отк. 16:14, 16). Адалеске, ајде те дикха несаве таро практична советија кола со о Јехова денѓа акале христијаненге, а кола со шај аменге да те користинен.

 „ТЕ НАПРЕДУЈНА ЏИ КИ ЗРЕЛОСТ“

4. Со на сине локхо те керен о еврејска христијања, хем соске? (Дикх хем и слика.)

⁴ О еврејска христијања ваљани сине те керен баре промене кола со ни хари на сине ленге локхе. Несаво време о Евреија сине е Јеховаскоро биримо народо. О Ерусалим сине тхан коте со о израелска царија бешена сине ко е Јеховаскоро престол, сар претставникија е Девлескере. А о храми сине о најважно тхан коте со о Евреија обожавинена сине е Јехова. Са о верна Евреија икерена сине е Мојсеескоро закони аѓаар сар со сикавена лен сине ленгере верска водачија. Акала сикљојба влијајнена сине упро адава со ка хан, упро ленгоро стави башо сунети, па чак упро начин сар ка понашинен пе е манушенцар таро јавера народија. Сепак, пало е Исусескоро мерибе, е Мојсеескоро закони чхинавѓа те важинел. О Јехова на прифатинела сине више о жртве со о Евреија дена лен сине ко храми. Адалеске со сине сикле те икерен пе ко Закони, е Евреенге кола со уле христијања на сине локхо те менинен о начин сар обожавинена сине е Девле (Евр. 10:1, 4, 10). Чак несаве зрела христијаненге, сар со сине о апостол Петар, сине пхаро те прифатинен несаве промене (Апо. 10:9-14; Гал. 2:11-14). Адалеске со прифатинѓе о неве верувања, акала христијања сине прогониме таро еврејска верска водачија.

5. Таро со ваљани сине те аракхен пе о христијања?

⁵ Е еврејска христијанен сине лен противибе таро дуј групе мануша. Јекх група сине о еврејска верска водачија кола со понашинена пе сине ленцар сар те пхене сине отпадникија. А и дујто група сине несаве со пхенена сине кај тане христијања хем упорно вакерена сине кај сар следбеникија е Христосескере мора понадари да те икерен несаве буќа таро е Мојсеескоро закони — акава шај керена ле сине те шај те на овен прогониме (Гал. 6:12). Со поможинѓа е верна христијаненге те икерен пе ко чачипе?

6. Ко со поттикнинѓа о Павле пле пхрален? (Евреија 5:14 — 6:1).

⁶ Ко пло писмо џи ко Евреија, о Павле поттикнинѓа е пхрален похор те проучинен е Девлескоро Лафи. (Читин Евреија 5:14 — 6:1.)  Аѓаар со користинѓа о Хебрејска списија, о Павле објаснинѓа ленге соске о начин сар о христијања обожавинена е Јехова тано бут пошукар таро начин сар о Евреија обожавинена ле. a О Павле џанља кај адава со акала христијања пошукар ка џанен хем похор ка хаљовен о чачипе ка поможинел ленге те пенџарен хем те отфрлинен о погрешна сикљојба хем аѓаар те на овен ховавде.

7. Сави опасност иси амен авдиве?

⁷ Исто сар о христијања ко Ерусалим хем ки Јудеја, амен да авдиве аваја ко контакт манушенцар со ширинена информацие хем сикљојба кола сој спротивна таро е Јеховаскере праведна мерилија. О противникија бут пути нападинена амаре ставија башо морал, кола со темелинена пе ки Библија хем вакерена кај на сием толерантна хем сием строга. О начин сар размислинена о мануша тано са поспротивно таро совршено начин сар размислинела о Јехова (Изр. 17:15). Адалеске, мора те кера позорали амари способност те пенџара хем те отфрлина о размислибе кова со ширинена ле о противникија те шај те обесхрабринен амен, па чак те ховавен амен (Евр. 13:9).

8. Сар шај понадари да те напредујна џи ки христијанско зрелост?

⁸ Шукар тано те размислина башо совет со о Павле денѓа ле е еврејска христијаненге — понадари да те напредујнен џи ки христијанско зрелост. Адава значинела са похор те хаљова о чачипе хем те прифатина е Јеховаскоро начин сар размислинела. Акава ваљани те кера ле чак откеда ка крстина амен да. Бизи разлика кобор време сием ко чачипе, сарине амен мора редовно те читина хем те проучина е Девлескоро Лафи (Пс. 1:2). Адава со ка овел амен навика редовно те проучина ка поможинел амен те бајрара јекх особина која со о Павле истакнинѓа ла ко пло писмо џи ко Евреија — и вера (Евр. 11:1, 6).

ОКОЛА СО ВЕРУЈНЕНА СПАСИНЕНА ПУМАРО ЖИВОТО

9. Соске е христијаненге ко Ерусалим хем ки Јудеја ваљанѓа бари вера?

⁹ Е еврејска христијаненге ваљанѓа силно вера те шај те преживинен и неволја која со ваљани сине те авел упри Јудеја (Евр. 10:37-39). О Исус предупрединѓа пле следбеникон кај кеда ка дикхен о Ерусалим опколимо тари војска, ка ваљани те нашен ко планине. Лескоро совет важинела сине са е христијаненге, бизи разлика дали ола живинена сине ки диз или ко гава (Лука 21:20-24). Ко адава време, ако несави војска нападинела сине, о мануша обично нашена сине ко дизја сар со сине о Ерусалим, соске о ѕидија е дизјакере ка заштитинен лен сине. Те нашел пе ко планине на дикхјола сине логично хем ваљани сине бари вера те шај те керел пе адава.

10. Ко со ка поттикнинел сине е христијанен ленгири силно вера? (Евреија 13:17).

¹⁰ Е еврејска христијанен исто аѓаар ваљанѓа те овел лен доверба ко окола колен со о Исус користинѓа те шај те водинел о собрание. Окола со предводинена сине веројатно денѓе конкретна упатствија те шај те поможинен сариненге ко собрание те овен послушна ко е Исусескоро совет ко право време хем ко право начин. (Читин Евреија 13:17.) О грчко лафи кова со ко Евреија 13:17 тано преведимо сар „овен послушна“, дословно значинела некој те овел убедимо, јавере лафенцар спремно те прифатинел о водство адалеске со иси ле доверба околесте со дела адава водство. Адава значинела повише него само те ове послушно некаске само адалеске со иси ле право те дел водство. Значи, е христијанен ко Ерусалим хем ки Јудеја ваљанѓа те овел лен  доверба околенде со предводинге панда англедер те авел и неволја. Ако о христијања сине послушна е старешиненге ко време кеда сине мир, тегани ка овел ленге сине панда полокхо те керен адава ко пхаро време.

11. Соске авдиве тано бут важно е христијанен те овел лен силно вера?

¹¹ Аменге да авдиве ваљани вера, исто сар е христијаненге коленге со о Павле пишинѓа о писмо. Живинаја ко време коте со повише мануша на верујнена кај ка авел о крајо акале светоскоро. Ола чак асана аменге со верујнаја ко адава (2. Пет. 3:3, 4). Освен адава, иако и Библија дела амен несаве информацие башо адава со ка случинел пе ки бари неволја, иси бут буќа кола со на џанаја лен. Ваљани те овел амен силно вера кај о крајо акале светоскоро ка авел баш ко време хем кај о Јехова ка грижинел пе аменге (Авак. 2:3).

12. Со ка поможинел аменге те преживина и бари неволја?

¹² Амен да мора те кера позорали амари вера ко адава кај о Јехова авдиве водинела амен преку „о верно хем о мудро робо“ (Мат. 24:45). Кеда ка почминел и бари неволја, шај ка добина конкретна упатствија со шај те спасинен амаро живото, исто сар со добинена сине о христијања со живинена сине ко Ерусалим хем ки Јудеја кеда али и римско војска. Акана тано време те бајрара амари доверба ко водство со добинаја ле околендар со предводинена ки е Јеховаскири организација. Нашти те очекујна кај ки бари неволја ка овел амен доверба хем ка шуна ленгере упатствија ако авдиве аменге пхаро те кера адава.

13. Соске о совет сој пишимо ко Евреија 13:5 сине потребно?

¹³ Џикоте аџикерена сине те добинен знако те шај те нашен, о христијања ко Ерусалим хем ки Јудеја ваљани сине те живинен едноставно живото хем те на овел лен „мангипе спрема о паре“. (Читин Евреија 13:5.) Несаве лендар доживинѓе бокхалипе хем чоролипе (Евр. 10:32-34). Иако англедер сине спремна те издржинен пхарипа башо шукар хабери, несаве шај почминѓе те кхеден песке барвалипе, мислиндор кај адава ка заштитинел лен. Ама, бизи разлика кобор паре те овен лен сине, нане те заштитинен лен сине таро уништување со авела (Јак. 5:3). Уствари, секоле јекхеске со мангела сине о материјална буќа веројатно ка овел сине бут попхаро те нашел хем те мукхел пло кхер хем о буќа со сине ле.

14. Сар и силно вера шај те влијајнел упро одлуке со анаја лен авдиве башо материјална буќа?

¹⁴ Ако иси амен силно вера кај о Јехова панда хари ка уништинел акава свето, тегани ка ова одлучна те борина амен против о материјализам. Уствари, ки бари неволја о мануша „пло сребро ка фрден ле ко улице“ соске ка хаљон кај „ни ленгоро сребро ни ленгоро злато ка нашти те спасинен лен ко диве е Јеховаскере хољакоро“ (Езек. 7:19). Наместо те концентририна амен ко адава те заработина со повише паре, ваљани те ана одлуке кола со ка поможинен те грижина амен аменге хем амаре фамилијаке, а кола со ка керен аменге полокхо те служина е Јеховаске. Адава значинела те борина амен против о искушение бизи потреба те чхива амен ко дугија, или те кхеда материјална буќа коленге со покасно ка ваљани бут време те одржинен пе. Исто аѓаар, мора бут те пазина те на ова бут поврзиме е буќенцар со иси амен (Мат. 6:19, 24). Џикоте аџикераја о крајо акале светоскоро, о материјална буќа шај те овен испит баши амари вера.

„ВАЉАНИ ТУМЕНГЕ ИСТРАЈНОСТ“

15. Соске посебно е христијаненге ко Ерусалим хем ки Јудеја ваљани сине истрајност?

¹⁵ Е христијаненге ки Јудеја ваљани сине истрајност ки ленгири служба башо Јехова соске аџикерена лен сине баре испитија (Евр. 10:36). Иако несавен лендар сине  лен баро прогонство, бут џене прифатинѓе о христијанство ко време кеда сине мир. О Павле спомнинѓа кај иако истрајнѓе ко баре испитија баши пумари вера, ола панда на цидинѓе муке сар о Исус — џи ко мерибе (Евр. 12:4). Адалеске со о христијанство са повише ширинела пе сине, о еврејска противникија овена сине са похољаме хем понасилна. Некобор берша англедер о Павле те пишинел акава писмо, јекх група таро мануша нападинѓа ле џикоте проповединела сине ко Ерусалим. Повише таро 40 Евреија хале совли кај нане ни те хан, ни те пиен са џикоте на мударена е Павле (Апо. 22:22; 23:12-14). Иако о јавера бут ка мрзинен лен сине хем ка прогонинен лен, акала христијања ка ваљани сине понадари да те кхеден пе заедно те шај те обожавинен е Јехова, те проповединен о шукар хабери хем те керен позорали пумари вера.

16. Сар о писмо џи ко Евреија шај те поможинел аменге те овел амен исправно стави башо прогонство? (Евреија 12:7).

¹⁶ Со ка поможинел сине е еврејска христијаненге те истрајнен ко прогонство со ка овел лен сине? О Павле џанља кај ка ваљани те овел лен исправно стави башо пле неволје. Адалеске ов објаснинѓа кај кеда о христијања накхена таро неволје, о Јехова шај те користинел адава те шај те обучинел лен. (Читин Евреија 12:7.) Асавки обука шај те поможинел јекхе христијанеске те овен ле о особине со свиџинена пе е Јеховаске, или панда пошукар те сикавел лен. Адава со ка концентриринен пе сине ко шукар буќа со авена таро асавке неволје ка поможинел сине е еврејска христијаненге те истрајнен (Евр. 12:11).

17. Со сиклило о Павле башо адава сар те истрајнел пе ко прогонство?

¹⁷ О Павле поттикнинѓа е еврејска христијанен те овен панда поодлучна те истрајнен ко неволје. Соске о Павле шај сине те дел шукар советија башо адава сар те издржинел пе ко прогонство? Адалеске со англедер прогонинела сине е христијанен, о Павле џанела сине кобор лошно постапинела пе сине ленцар. Исто аѓаар, ов џанља сар те истрајнел ко  прогонство. Уствари, откеда уло христијани, е Павле сине ле различна прогонствија (2. Кор. 11:23-25). Адалеске, о Павле бут шукар џанља со ваљани те шај те истрајнел пе. Ов сетинкерѓа акале христијанен кај кеда истрајнена ко неволје, ваљани те овел лен доверба ко Јехова, а на ки песте. Адалеске со ов коркори керела сине акава, о Павле шај сине храбро те вакерел: „О Јехова тано мло помошнико, нане те дарав“ (Евр. 13:6).

18. Со ка доживина сарине ки иднина, хем сар шај те спремина амен?

¹⁸ Несаве таро амаре пхраља хем пхења баш акана истрајнена ко прогонство. Амен шај верно те поддржина лен аѓаар со ка молина амен баши ленде, а понекогаш хем ка поможина ленге ко практична начинија (Евр. 10:33). И Библија јасно вакерела кај „сарине со мангена те живинен ко јекхипе е Христос Исусеа хем те обожавинен е Девле, ка овен прогониме“ (2. Тим. 3:12). Адалеске, сарине амен ваљани те спремина амен башо адава со авела. Понадари да те овел амен целосно доверба ко Јехова хем те ова сигурна кај ов ка поможинел аменге те истрајна ки секоја неволја која со шај ка овел амен. Ко време со одрединѓа ле, о Јехова ка керел те овел полокхо са пле верна слугенге (2. Сол. 1:7, 8).

19. Кола буќа шај те поможинен аменге те спремина амен баши бари неволја? (Дикх хем и слика.)

¹⁹ Сигурно, е Павлескоро писмо џи ко Евреија поможинѓа е христијаненге ко прво веко те спреминен пе баши неволја со авела сине. О Павле поттикнинѓа пле пхрален пошукар те џанен хем похор те хаљовен о света списија. Адава ка поможинел ленге сине те пенџарен хем те отфрлинен о сикљојба кола со шај сине те слабонкерен ленгири вера. Ов поттикнинѓа лен те керен позорали пумари вера те шај одма те шунен о упатствија таро Исус хем таро окола со предводинена ко собрание. Исто аѓаар, поможинѓа е христијаненге те овел лен истрајност аѓаар со поттикнинѓа лен те овел лен исправно стави башо неволје хем те дикхен ки ленде сар прилика те овен обучиме таро пло Дад кова со грижинела пе ленге. Акала советија таро е Девлескоро Лафи важинена аменге да авдиве. Ако трудинаја амен те применина лен ка шај верно те истрајна џи ко крајо (Евр. 3:14).