ДАЛИ приметинѓан кај бут мануша ко свето мислинена кај о јавера ваљани те понашинен пе ленцар ко посебно начин или кај ваљани те добинен посебна правија? Бизи разлика кобор бут добинена, ола мислинена кај заслужинена повише. Аѓаар размислинена соске иси лен себично стави хем нане благодарна, а и Библија вакерела кај о мануша ко последна диве ка овен асавке (2. Тим. 3:2).

Џанѓола пе кај секогаш сине мануша сој себична. На пример, о Адам хем и Ева мангле коркори те одлучинен баши песке сој тано шукар а сој лошно, а адава анѓа џи ко катастрофална последице. Веконцар пало адава, о Озија о цари ки Јуда, мислинѓа кај иси ле право те тхарел темјани ко храми, ама ов бут ховавѓа пе (2. Лет. 26:18, 19). Слично, о фарисеија хем о садукеија мислинена сине кај заслужинена о Девел те постапинел ленцар ко посебно начин само адалеске со авена таро Авраам (Мат. 3:9).

Живинаја машкар о мануша сој тане себична хем ленгоро стави шај те влијајнел упри аменде (Гал. 5:26). Шај те почмина те мислина аменге кај заслужинаја те добина несави привилегија или кај о јавера ваљани те постапинен аменцар ко посебно начин. Со шај те поможинел амен те на размислина аѓаар? Прво, ваљани те хаљова сар о Јехова дикхела ки акаја бути. Башо адава шај те поможинен амен дуј библиска начелија.

О Јехова тано адава со одлучинела со ваљани те добина. Те дикха некобор примерија.

• Ки фамилија, о ром ваљани те осетинел кај  тано поштујмо тари пли ромни, а и ромни ваљани те осетинел кај тани мангли таро пло ром (Еф. 5:33). Хем о ром хем и ромни иси лен право те очекујнен ленгоро брачно партнери те сикавел романтично мангипе само леске (1. Кор. 7:3). Е родителен иси лен право те очекујнен ленгере чхаве те овен ленге послушна, а е чхавен иси лен право те очекујнен ленгере родителија те грижинен пе ленге хем те сикавен ленге мангипе (2. Кор. 12:14; Еф. 6:2).

• Ко собрание, о старешине заслужинена те поштујна лен адалеске со бут трудинена пе (1. Сол. 5:12). Ама, лен нане лен право те господаринен упро пхраља хем пхења (1. Пет. 5:2, 3).

• О Девел денѓа право е манушикане владенге те роден данокија хем те овен поштујме околендар упро коленде со владинена (Рим. 13:1, 6, 7).

О Јехова мангипаја дела амен бут повише таро адава со заслужинаја. Адалеске со наслединѓем о грево, амен заслужинаја само те мера (Рим. 6:23). Сепак, о Јехова дела амен бут благословија башо пло верно мангипе (Пс. 103:10, 11). Секова благослов со добинаја лестар тано адалеске со сикавела аменге пло шукарипе со на заслужинаја ле (Рим. 12:6-8; Еф. 2:8).

Пазин те на почмине те размислине сар о мануша ко свето. Бизо те ова свесна, шај те почмина те мислина кај заслужинаја повише него јавера. Ки споредба со вакерѓа ла о Исус башо работникија коленге со сине платимо по јекх денариј, сикавела кобор локхесте шај некој те почминел те размислинел аѓаар. Несаве работникија почминѓе те керен бути рано сабајле хем керѓе цело диве бути ко баро кхам, а јавера керѓе само јекх саати. О работникија тари прво група мислинѓе кај ваљани те добинен побари плата адалеске со завршинѓе и бути (Мат. 20:1-16). Акаја споредба е Исусескири сикавела кај лескере следбеникија ваљани те овен задоволна адалеа со о Девел дела лен.

Ов благодарно хем ма аџикер те добине нешто таро јавера (1. Сол. 5:18). Џа пало пример е апостол Павлескоро кова со на родинѓа таро пхраља ко Коринт финансиски те поддржинен ле иако сине ле право башо адава  (1. Кор. 9:11-14). Ваљани те ова благодарна башо са со добинаја таро јавера наместо те очекујна нешто лендар.

Ов понизно. Кеда некас иси ле бут баро мислење баши песте, ов обично мислинела кај ваљани те добинел повише таро адава со иси ле. И понизност тани против отров башо асавко штетно размислибе.

О пророко о Даниел тано шукар пример баши понизност. Ов авела сине тари јекх важно фамилија, шукар изглединела сине, сине интелигентно хем сине ле бут способностија. Адалеске, ов шај сине те мислинел кај заслужинела о привилегие со иси ле (Дан. 1:3, 4, 19, 20). Ама, о Даниел ачхило понизно хем адалеске сине бут скапоцено англо е Јеховаскере јакхја (Дан. 2:30; 10:11, 12).

Те ова одлучна те борина амен е себично ставеа кова со иси авдиве ко свето хем понадари да те радујна амен ко секова благослов со о Јехова дела амен адалеске со сикавела аменге пло шукарипе со на заслужинаја ле.