И Мери хем лакоро ром о Џон, a живинена ки пхув коте со о шукар хабери шај те проповединел пе буте работниконге кола со авена таро Филипини. Џикоте сине и пандемија КОВИД-19, и Мери почминѓа библиска курсија на само ки пхув коте со живинела него хем ко јавера тхана ко свето. Сар успејнѓа ко адава?

И Мери пучља пле интересенткен: „Дали џанеа некас јавере со би мангела те проучинел и Библија?“ Ако вакерена сине оја, ој замолинела лен сине те запознајнен ла ленцар. Акава едноставно пучибе, бут пути анела сине шукар резултатија. Соске? Адалеске со о мануша кола со ценинена е Девлескоро Лафи обично мангена те вакерен адава со сикљовена пумаре фамилијаке или е паше амаленге. Со случинѓа пе кеда и Мери пучља акава?

Е Меракири интересентка, и Џасмин, запознајнѓа ла штаре џувленцар кола со мангле те проучинен и Библија. Јекх лендар, и Кристин, добором уживинела сине ко курси со замолинѓа е Мера те проучинен дуј пути ко курко. Кеда и Мери пучља ла дали пенџарела некас јавере со би мангела те проучинел и Библија, и Кристин вакерѓа: „Оја, ка запознајнав тут мле амалинкенцар“. Башо некобор курке, и Кристин запознајнѓа е Мера штаре амалинкенцар кола со мангле библиско курси. Покасно, и Кристин запознајнѓа ла хем јавере амалинкенцар, а несаве лендар вакерѓе кај иси панда некобор џене со би шај те овен заинтересириме.

И Кристин мангља лакири фамилија да ко Филипини те сикљол тари Библија. Адалеске, керѓа лафи пле чхајаја е Андреаја. Ко почеток, и Андреа мислинела песке сине: „О Сведокија тане секта, ола на верујнена ко Исус хем користинена само о пурано завет“. Ама откеда само јекх пути проучинѓа, халили кај адава со мислинела сине башо Сведокија, нане точно. Џикоте трајнела сине о курси, бут пути вакерела сине: „Ако и Библија вакерела аѓаар, адава мора те овел чаче!“

Пало несаво време и Андреа запознајнѓа е Мера дује амалинкенцар хем јекхе колешкаја, кола со почминѓе те проучинен. Исто аѓаар, е Андреакири тетка, и Анџела, која со сине короли, секогаш шунела сине џикоте ола проучинена сине, а и Мери на џанела сине адава. Јекх диве, и Анџела замолинѓа е Андреа те запознајнел ла е Мераја хем родинѓа библиско курси. И Анџела уживинела сине ко адава со сикљола. Јекхе масекоске, ој памтинѓа бут стихија хем мангља те проучинен штар пути ко курко. Адалеске со и Андреа поможинела ла сине, почминѓа  исто аѓаар те овел редовно ко состанокија преку видеоконференција.

Кеда и Мери дознајнѓа кај е Кристинакоро ром, о Џошуа, секогаш сине атхе хем шунела сине џикоте ола проучинена, пучља ле дали мангела ов да те вклучинел пе. О Џошуа вакерѓа: „Само ка шунав, ама ма пуч ман пучиба. Ако пучеа ман нешто, ка цидав ман“. На накхле ни панџ минутија таро курси, а ов пучља повише пучиба него и Кристин, а мангља понадари да те керел лафи баши Библија.

О едноставно пучибе е Меракоро анѓа џи ко адава те овен ла бут библиска курсија. Несаве лендар денѓа лен јавере пхраленге хем пхењенге. Са вкупно, и Мери почминѓа 28 библиска курсија ко штар пхувја.

И Џасмин, и прво интересентка со сине спомними ко акава искуство, крстинѓа пе ко април 2021 берш. И Кристин крстинѓа пе ко мај 2022 берш хем иранѓа пе ко Филипини те шај те овел пле фамилијаја. О дуј јавера интересентке кола со и Мери запознајнѓа лен преку и Кристин, исто аѓаар крстинѓе пе. Некобор масекија покасно, откеда и Кристин крстинѓа пе, крстинѓа пе и Анџела да, а акана служинела сар општо пионери. Е Кристинакоро ром о Џошуа, ленгири чхај и Андреа, а хем некобор јавера интересентија шукар напредујнена ко духовно поглед.

Ко прво веко, бут мануша вакерена сине пумаре фамилијаке хем амаленге адава со сиклиле башо Исус (Јован 1:41, 42а; Апостолија 10:24, 27, 48; 16:25-33). Соске на пучеа околен касаја со проучинеа и Библија хем јавере манушен кола со сикавена интерес: „Дали џанеа некас јавере со би мангела те проучинел и Библија?“ Котар џанеа кобор библиска курсија шај те почмине ако пучеа акава едноставно пучибе кова со секој шај те пучел ле.