1-2. Сар и ситуација е манушенгири тани слично сар е терне манушескири сој спомнимо ко прво пасус?

 ЗАМИСЛИН ТУКЕ јекхе терне мануше кова со барило ки јекх барвали фамилија. Јекх диве случинела пе трагедија. Лескере родителија мерена ки јекх несреќа. Акава хабери бут погодинела ле. Ама, акава нане са. Акава терно шунела панда јекх хабери кова со шокиринела ле. Ов дознајнѓа кај лескере родителија ни хари на мислинѓе сар трошинена сине пумаро барвалипе хем адалеске мукхле леске баре дугија. Наместо те наслединел ленгоро барвалипе, ов наслединела ленгере дугија, а о мануша родена одма те платинел адала дугија. Адава дуго тано бут баро со ов никогаш нашти те иранел ле.

² Ко несаво начин, амари ситуација тани слично сар акале терне манушескири. Амаре прва родителија, о Адам хем и Ева, сине совршена хем живинена сине ко јекх бут шужо рај (1. Мој. 1:27; 2:7-9). Шај сине те овел лен среќно хем бут шужо живото ки цели вечност. Ама тегани са менинѓа пе. Ола сине бркиме таро рај хем нашавѓе и прилика те живинен вечно. Кова наследство шај сине те мукхен пумаре чхавенге? Ки Библија пишинела: „Преку јекх мануш [о Адам] о грево кхувѓа ко свето хем преку о грево о мерибе, хем аѓаар о мерибе ширинѓа пе ко са о мануша, соске сарине грешинѓе“ (Рим. 5:12). О наследство со мукхља аменге о Адам тано о грево хем адалеске мераја. О грево со наслединѓем ле тано сар јекх баро дуго кова со никој амендар нашти те платинел ле (Пс. 49:8).

 3. Соске амаре гревија шај те спорединен пе „дугонцар“?

³ О Исус спорединѓа о гревија „дугонцар“ (Мат. 6:12 фус.; Лука 11:4). Кеда грешинаја, адава тано сар те пхене кхуваја ко дуго англо Јехова. О дуго башо адава грево ваљани  те платина ле. Ако на платинаја адава дуго, ов шај те овел цидимо само амаре мерибаја (Рим. 6:7, 23).

 4. а) Со ка овел са е грешниконцар ако на добинена помош? (Псалм 49:7-9). б) Ко со мислинела пе е лафеа „грево“ ки Библија? (Дикх и рамка „ Грево“.)

⁴ Дали шај палем те добина са адава со нашавѓе о Адам хем и Ева? Амен коркори нашти те кера адава. (Читин Псалм 49:7-9.) Ако нане кој те поможинел амен, нашти те добина надеж башо вечно живото ки иднина, а ни палем прилика башо воскресение. Уствари, амаро мерибе ка овел исто сар е животненгоро (Проп. 3:19; 2. Пет. 2:12).

 5. Сар амаро Дад, кова сој пхердо мангипаја, поможинѓа аменге те платина башо амаре гревија? (Дикх хем .)

⁵ Размислин башо терно мануш коле со спомнинѓем ле ко почеток. Сар ка осетинел пе ако некој сој барвало мангела те платинел са лескере дугија? Сигурно акава терно мануш ка овел бут благодарно хем ка прифатинел акава дарежливо поклон. Ко слично начин амаро Дад, о Јехова кова сој пхердо мангипаја, денѓа амен јекх поклон колеа со платинѓа о дуго башо грево со наслединѓем ле таро Адам. О Исус објаснинѓа акава акале лафенцар: „О Девел добором бут мангља о свето со денѓа пле единствено бијаме Чхаве, те шај секој со верујнела ки лесте те на овел уништимо, него вечно те живинел“ (Јован 3:16). Исто аѓаар, акава поклон дела амен прилика те ова паше амала е Јеховаја.

 6. Со ка дикха ки акаја статија, хем соске?

⁶ Сар шај те овел амен корист таро акава бут шужо поклон кова со поможинела те овен простиме амаре гревија? Те шај те добина одговор ко акава пучибе, ка дикха акала библиска изразија: те смирина амен е Јеховаја, учхарибе о гревија, откупнина, спасиме хем праведна англо е Девлескере јакхја. Ки акаја статија ка дикха со значинена ола. Адава со ка размислина со са керѓа о Јехова те шај те простинел аменге, ка поможинел амен те бајрара амари благодарност.

ЦЕЛ: ТЕ СМИРИНА АМЕН Е ЈЕХОВАЈА

 7. а) Со јавер нашавѓе о Адам хем и Ева? б) Сар чхаве е Адамескере хем е Евакере, со ваљанела аменге бут? (Римјања 5:10, 11).

⁷ Освен со нашавѓе и прилика те живинен вечно, о Адам хем и Ева нашавѓе пло скапоцено амалипе пумаре Дадеа е Јеховаја. Англедер те керен грево, о Адам хем и Ева сине дело тари е Девлескири фамилија (Лука 3:38). Ама откеда на шунѓе е Јехова  ола сине бркиме тари лескири фамилија англедер те овен лен чхаве (1. Мој. 3:23, 24; 4:1). Адалеске со аваја лендар, амен ваљани те смирина амен е Јеховаја. (Читин Римјања 5:10, 11.) Јавере лафенцар, ваљани те почмина те ова амала е Јеховаја. О грчко лафи сој акате преведимо сар „смирибе“ шај те значинел „те ове амал некасаја кова со сине туке душмани“. Воодушевиме сием таро адава со о Јехова прво керѓа нешто те шај те ова леа амала. Сар?

ПОДГОТОВКА: УЧХАРИБЕ О ГРЕВИЈА

 8. Со керѓа о Јехова те шај палем те ова леа амала?

⁸ О учхарибе о гревија тано подготовка, јавере лафенцар, о решение со анѓа о Јехова те шај о грешна мануша палем те овен леа амала. Те шај те иранел адава со нашавѓа о Адам, о Јехова денѓа нешто со иси ле исто вредност. Ко Римјања 3:25, башо адава решение вакерела пе кај тано „жртва те шај о мануша те смиринен пе [е Девлеа]“. Акава дела прилика е манушенге палем те овен амала е Јеховаја.

 9. Со керѓа о Јехова те шај о гревија е Израелцонгере те овен простиме?

⁹ Те шај о Израелција те овен амала леа, о Јехова керѓа нешто привремено те шај те простинел ленгере гревија. Ко пурано Израел, јекх пути ко берш икерела пе сине о Диве простибаске о гревија. Ко адава диве, о првосвештенико дела сине животинска жртве башо народо. Џанѓола пе, е животинска жртвенцар нашти скроз те учхарен пе некаскере гревија соске о животне тане похари вредна таро мануша. Ама, са џикоте о Израелција каинена пе сине хем дена сине о жртве кола со о Јехова родела лен сине, ов сине спремно те простинел ленгере гревија (Евр. 10:1-4). Освен адава, о жртве со дена сине ко Диве простибаске о гревија хем о жртве кола со дена сине ко јавера прилике, сетинкерена лен сине кај тане грешникија хем кај ваљани ленге нешто побаро те шај ленгере гревија те овен скроз чистиме.

10. Со керѓа о Јехова те шај јекх пути засекогаш те овен простиме е манушенгере гревија?

¹⁰ Со керѓа о Јехова те шај засекогаш те овен простиме е манушенгере гревија? О Јехова денѓа пле мангле Чхаве „јекх пути засекогаш те шај те лел о гревија буте џененгере“ (Евр. 9:28). О Исус денѓа „пло живото сар откупнина буте џененге“ (Мат. 20:28). Сој тани и откупнина?

ЦЕНА: ОТКУПНИНА

11. а) Спрема и Библија, соске ваљанѓа те платинел пе откупнина? б) Кој само шај сине те платинел и откупнина?

¹¹ Спрема и Библија, о Јехова одлучинѓа кај ваљани те платинел пе откупнина, јавере лафенцар одредено цена те шај те овен простиме амаре гревија хем те ова амала леа. a Која сине и цена со ваљанѓа те платинел пе те шај о мануша те добинен адава со нашавѓа о Адам? О Адам хем и Ева нашавѓе о совршено живото хем и прилика те живинен вечно. Адалеске, ваљанѓа те платинел пе откупнина кола со сине ла исто вредност сар адава со сине нашавдо (1. Тим. 2:6). Шај сине те платинел ла само возрасно мануш кова со: 1) сине совршено, 2) сине ле прилика те живинел засекогаш ки пхув хем 3) сине спремно те жртвујнел или те откажинел пе таро адава живото баши аменге. Само тегани ка шај сине адале манушескоро живото те заменинел, или те надокнадинел, о живото со сине нашавдо.

12. Соске о Исус шај сине те платинел и откупнина со ваљанѓа?

 ¹² Размислин башо трин причине соске о Исус шај сине те платинел и откупнина. 1) Ов сине совршено — на керѓа нијекх грево (1. Пет. 2:22). 2) Адалеске, шај сине те живинел засекогаш ки пхув. 3) Ов сине спремно те мерел хем те откажинел пе таро адава живото баши аменге (Евр. 10:9, 10). Ов сине совршено, исто сар о прво мануш о Адам, англедер те грешинел (1. Кор. 15:45). Адалеске, пле мерибаја, о Исус шај сине те учхарел е Адамескоро грево, јавере лафенцар те надокнадинел адава со нашавѓа о Адам (Рим. 5:19). Аѓаар, о Исус уло „о последно Адам“. Нане потреба те авел јавер совршено мануш хем те платинел са адава со нашавѓа о Адам. О Исус муло „јекх пути засекогаш“ (Евр. 7:27; 10:12).

13. Која тани и разлика машкар о учхарибе о гревија хем и откупнина?

¹³ Тегани која тани и разлика машкар о учхарибе о гревија хем и откупнина? О учхарибе о гревија тани подготовка со керѓа ла о Девел те шај о мануша палем те овен леа амала. И откупнина тани и цена сој платими те шај те чистинен пе о гревија е манушенгере. Адаја цена тани претставими е Исусескере скапоцено ратеа кова со сине чхордо аменге (Еф. 1:7; Евр. 9:14).

РЕЗУЛТАТИ: СПАСИМЕ ХЕМ ПРАВЕДНА АНГЛО Е ДЕВЛЕСКЕРЕ ЈАКХЈА

14. Со ка дикха акана, хем соске?

¹⁴ Сави корист иси амен таро адава со о Јехова керѓа аменге? Те шај те добина одговор ко акава пучибе, ка дикха со значинена дуј библиска изразија. Адава ка поможинел амен те хаљова сави корист иси амен таро адава со о Јехова простинела.

15-16. а) Саво сине о резултати адалеске со сине платими и откупнина? б) Сар керела те осетина амен адава со џанаја кај сием ослободиме таро грево хем таро мерибе?

¹⁵ И Библија вакерела кај адалеске со сине платими и откупнина, амен сием спасиме, јавере лафенцар ослободиме. О апостол Петар објаснинѓа акава акале лафенцар: „Соске, џанена кај на сиен спасиме [дословно: откупиме; ослободиме] нештолеа со руминѓовела — среброја или златоја — таро тумаро чучо живото, кова со наслединѓен ле таро тумаре парапапија, него е Христосескере скапоцено ратеа, кова сој сар рат бакхрескоро кова со нане мелало хем нане ле маана“ (1. Пет. 1:18, 19).

¹⁶ Адалеске со сине платими и откупнина, шај те ова ослободиме таро ропство е гревоскоро хем таро мерибе (Рим. 5:21). Иси амен бут причине те ова благодарна е Јеховаске хем е Исусеске адалеске со сием откупиме е Исусескере скапоцено ратеа (1. Кор. 15:22).

17-18. а) Со значинела адава со о Девел дикхела ки аменде сар праведна? б) Сар користинела аменге адава со сием праведна англо е Девлескере јакхја?

¹⁷ Кеда о Јехова баши аменде вакерела кај сием праведна англо лескере јакхја, акава значинела кај тане цидиме о обвиненија против аменде хем кај на ваљани те платина башо амаре гревија. Ама, акава на значинела кај о Јехова на икерела пе ко пле мерилија баши правда. О Јехова на дикхела ки аменде сар праведна адалеске со заслужинаја адава, а ни палем на оправдинела амаре гревија. Уствари, ов мангела те простинел амаре гревија адалеске со сикаваја вера ко са адава со керѓа ов хем о Исус те шај те ден и откупнина (Рим. 3:24; Гал. 2:16).

¹⁸ Со значинела акава секоле јекхеске  амендар? Несаве коленде со о Девел дикхела сар праведна тане бириме те владинен заедно е Христосеа ко небо хем тане викиме е Девлескере чхаве (Тит 3:7; 1. Јов. 3:1). О Девел простинела ленгере гревија хем ки ленде дикхела сар ка пхене никогаш на керѓе адала гревија. Хем аѓаар, ола пхерена о условија те овен ко Царство (Рим. 8:1, 2, 30). О јавера сој праведна англо е Девлескере јакхја, ка живинен засекогаш ки пхув. О Јехова простинѓа ленгере гревија хем ола овена лескере амала (Јак. 2:21-23). О баро мноштво со ка преживинел о Армагедон, ка овел ле прилика башо вечно живото (Јован 11:26). О „праведна“ хем окола со „нане праведна“, кола со совена ко гробо, ка воскреснинен (Апо. 24:15; Јован 5:28, 29). Пало несаво време, са о послушна слуге е Јеховаскере ки пхув, „ка добинен и славно слобода е Девлескере чхавенгири“ (Рим. 8:21). Кобор баре благословија иси амен адалеске со о Јехова керѓа нешто те шај те овен учхарде амаре гревија. Едвај дикхаја те авел о време кеда ка ова совршена чхаве амаре Дадескере е Јеховаскере!

19. Сар амари ситуација ули пошукар? (Дикх хем и рамка „ Со значинела адава аменге“.)

¹⁹ Шај те вакера кај амари ситуација сине сар е терне манушескири коле со спомнинѓем ле ко почеток, кова со нашавѓа са хем наслединѓа баро дуго со нашти сине никогаш те иранел ле. Ама о Јехова поможинѓа амен. Амари ситуација менинѓа пе адалеске со о Јехова керѓа нешто те шај те учхарен пе амаре гревија хем сине денди и откупнина. Амари вера ко Исус Христос поможинела амен те ова спасиме или ослободиме таро грево хем таро мерибе. Исто аѓаар, амаре гревија шај те овен поништиме хем о Јехова те дикхел ки ленде сар те пхене никогаш на керѓем лен. А најважно таро са, акана шај те ова паше амала амаре мангле небесно Дадеа, е Јеховаја.

20. Башо со ка кера лафи ки јавер статија?

²⁰ Кеда размислинаја башо са адава со керѓе аменге о Јехова хем о Исус, амаро ценење баши ленде бајрола панда повише (2. Кор. 5:15). Бизи ленгири помош нане сине те овел амен нисави надеж. Ама, со значинела секоле јекхеске лично адава со о Јехова простинела? Башо адава ка кера лафи ки јавер статија.