СТАТИЈА ПРОУЧИБАСКЕ 1
ГИЛИ 2 Јехова тло анав
Де е Јеховаске и слава
БЕРШЕСКОРО СТИХО БАШО 2025: Ден е Јеховаске и слава која со припадинела лескере анавеске (ПС. 96:8)
СО КА СИКЉОВА
Ка дикха сар шај те да е Јеховаске и слава со заслужинела ла.
1. Ко со тане концентририме бут мануша авдиве?
ДАЛИ приметинѓан кај бут џене авдиве тане концентририме само ки песте? На пример, несаве користинена о социјална мреже те шај те фалинен коркори пес хем те фалинен пе адалеа со керѓе. Сепак, хари џене авдиве дена слава е Јеховаске. Ки акаја статија ка дикха со значинела те де слава е Јеховаске хем со ваљани те поттикнинел амен те кера адава. Исто аѓаар, ка дикха сар шај те да и слава е Девлеске со заслужинела ла хем сар ов ка славинел пло анав панда хари.
СО ЗНАЧИНЕЛА ТЕ ДЕЛ ПЕ СЛАВА Е ЈЕХОВАСКЕ?
2. Сар о Јехова сикавѓа пли слава ки планина Синај? (Дикх хем и слика тари.)
2 Со значинела о лафи слава? Ки Библија, е лафеа „слава“ шај те мислинел пе ко са о буќа со анена џи ко адава некој те овел посебно баро англо јавера. О Јехова ко јекх моќно начин сикавѓа пли слава кратко откеда о Израелција сине ослободиме таро ропство ко Египет. Замислин туке акаја ситуација: Милиоња Израелција кхединѓе пе теле ки планина Синај те шај те шунен адава со ка вакерел ленге о Девел. Јекх кало облако учхарѓа и планина. Таро јекх пути јекх силно земјотрес, веројатно ко исто моменти сине хем вулканско активност, тресинѓа и пхув тело ленгере пре џикоте ко исто време сине шемшекија, грминѓа хем шундило бут гласно звуко тари шинг (2. Мој. 19:16-18; 24:17; Пс. 68:8). Замислин кобор бут сине воодушевиме акала Израелција кеда дикхле сар о Јехова сикавела пли слава ко асавко моќно начин.
Ки планина Синај, о Јехова ко моќно начин сикавела пли слава е Израелцонге (Дикх ко пасус 2)
3. Сар шај те да слава е Јеховаске?
3 Ама сар тано аменцар е манушенцар? Дали амен да шај те да слава е Јеховаске? Нормално кај шај. Јекх начин сар даја слава е Јеховаске тано аѓаар со вакераја е јаверенге баши лескири бари моќ хем башо лескере шуже особине. Исто аѓаар, славинаја е Девле аѓаар со признајнаја кај ов поможинела амен те кера са о буќа (Иса. 26:12). О цари о Давид тано бут шукар пример башо адава со значинела те дел пе слава е Јеховаске. Ки јекх молитва со вакерѓа ла англо цело израелско народо, о Давид вакерѓа е Девлеске: „Туке Јехова припадинела о барипе, и моќ, о шужипе, и возвишеност хем и слава, соске са сој ко небо хем ки пхув тано тло“. Откеда о Давид завршинѓа пли молитва, цело народо фалинѓа е Јехова (1. Лет. 29:11, 20).
4. Сар о Исус денѓа слава е Јеховаске?
4 Кеда сине ки пхув, о Исус славинѓа пле Даде аѓаар со вакерела сине е јаверенге кај ов дела ле и моќ те шај те керел чудија (Мар. 5:18-20). Исто аѓаар, о Исус денѓа слава е Јеховаске аѓаар со вакерела сине е јаверенге башо пло Дад хем адалеа сар постапинела сине е јаверенцар. Ки јекх прилика, о Исус сикавела сине е манушен ки јекх синагога. Машкар адала со шунена сине, сине хем јекх џувли кола со 18 берш сине ла демони. Адалеске, ој сине грбавими хем нашти сине нисар те испрајнел пе. Кобор жално! О сочувство поттикнинѓа е Исусе те викинел е џувља хем ко љубезно начин те вакерел лаке: „Ослободими сиан таро тло насвалипе“. Пало адава чхивѓа пле васта упри лате, а ој одма испрајнѓа пе хем почминѓа те фалинел е Девле адалеске со састили (Лука 13:10-13). Ла сине ла шукар причина те дел слава е Јеховаске, а амен да иси амен.
СО ПОТТИКНИНЕЛА АМЕН ТЕ ДА СЛАВА Е ЈЕХОВАСКЕ?
5. Кола причине иси амен те поштујна е Јехова?
5 Славинаја е Јехова адалеске со хор поштујнаја ле. Иси амен бут причине те поштујна е Девле. О Јехова тано Семоќно, лескири моќ нане ла границе (Пс. 96:4-7). Лескири бари мудрост јасно дикхјола таро адава со створинѓа. Ов денѓа амен живото хем дела амен са со ваљани аменге те шај те живина (Отк. 4:11). Ов тано верно (Отк. 15:4). Успешно тано ко са со керела хем секогаш ачхола ко пло лафи (Ис. Нав. 23:14). Баш адалеске о пророко о Еремија башо Јехова вакерѓа: „Машкар са о мудра мануша ко народија хем ко са ленгере царствија нијекх нане сар туте“ (Ерем. 10:6, 7). Чаче, иси амен шукар причине те поштујна амаре небесно Даде. Ама лескере бут шуже особине на поттикнине амен само те поштујна ле него хем те манга ле.
6. Соске мангаја е Јехова?
6 Славинаја е Јехова адалеске со бут мангаја ле. Размислин башо несаве таро е Јеховаскере особине кола со поттикнинена амен те манга ле. Ов тано милостиво хем сочувствително (Пс. 103:13; Иса. 49:15). Кеда амен осетинаја дукх, ов да осетинела дукх (Зах. 2:8). О Јехова поможинела амен те ова паше амала леа (Пс. 25:14; Апо. 17:27). Хем, о Јехова тано понизно. Ки Библија пишинела: „Ов тељола те шај те дикхел о небо хем и пхув, таро право ваздела е чороле“ (Пс. 113:6, 7). Са акала буќа поттикнинена амен те манга те славина амаре бут шукар Девле (Пс. 86:12).
7. Сави посебно прилика иси амен?
7 Славинаја е Јехова адалеске со мангаја о јавера те запознајнен ле. Бут џене на џанена о чачипе башо Јехова. Соске? Адалеске со о Сатана ширинѓа бут ховајба башо Девел хем о мануша верујнена ки ленде (2. Кор. 4:4). О Сатана убединела е манушен кај о Јехова мангела само те казнинел, кај на грижинела пе ленге хем кај ов тано криво башо бут муке со иси ко свето. Ама амен џанаја о чачипе башо амаро Девел. Иси амен прилика те сикава кај о Сатана ховавела хем аѓаар те да слава е Јеховаске (Иса. 43:10). Побаро дело таро 96 Псалм керела лафи башо дејбе слава е Јеховаске. Џикоте дикхаја несаве делија таро акава Псалм, размислин ко саве начинија шај те де слава е Јеховаске која со ов заслужинела ла.
САР ШАЈ ТЕ ДА Е ЈЕХОВАСКЕ И СЛАВА СО ЗАСЛУЖИНЕЛА ЛА?
8. Кова тано јекх начин сар славинаја е Јехова? (Псалм 96:1-3).
8 Читин Псалм 96:1-3. Шај те славина е Јехова адалеа со вакераја баши лесте. Ко акала стихија сием поттикниме те гиљава е Јеховаске, те фалина лескоро анав, те вакера о шукар хабери башо спасение со дела ле ов хем те вакера машкар о народија баши лескири слава. Акала тане некобор начинија сар шај те славина амаре небесно Даде амаре лафенцар. О верна Евреија, а пало адава хем о христијања ко прво веко, ревно вакерѓе е јаверенге башо са о шукар буќа со о Јехова керѓа ленге хем бранинѓе лескоро анав (Дан. 3:16-18; Апо. 4:29). Сар шај амен да те кера адава?
9-10. Со сикљовеа таро искуство е Анџелинакоро? (Дикх хем и слика.)
9 Размислин башо искуство е Анџелинакоро, a јекх пхен која со живинела ки Америка. Ој храбро бранинѓа е Јеховаскоро анав ки бути. Кеда почминѓа те керел бути атхе, и Анџелина сине викими ко јекх состанок коте со са е неве работникон сине лен прилика те вакерен нешто англо колеге баши песте. И Анџелина спреминѓа презентација сликенцар те шај те сикавел кај сар е Јеховаскоро сведоко иси ла среќно живото. Ама, англедер ој те авел ко редо, јекх лакоро колега вакерѓа кај барило родителенцар со сине е Јеховаскере сведокија. Ов почминѓа те лел ки хајгара амаре верувања. И Анџелина вакерела. „Мло срце почминѓа силно те кхувел. Ама мислинѓум манге: ’Дали ка дозволинав некој те вакерел ховајба башо Јехова, или ка бранинав лескоро анав?‘“
10 Кеда лакоро колега завршинѓа, и Анџелина кратко молинѓа пе ки песте. Пало адава, љубезно вакерѓа леске акала лафија: „Иси амен несаве сличностија. Ме да бариљум сар Сведоко хем панда сиум“. Иако дикхјола сине кај и ситуација тани напнато, и Анџелина ачхили смирими џикоте сикавела сине о шуже слике таро теократска настанија коленде со присуствујнѓа хем џикоте тактично бранинела сине пле верувања (1. Пет. 3:15). Саво сине о резултати таро адава? Кеда и Анџелина завршинѓа пле презентацијаја, акава мануш ковлило. Ов чак признајнѓа кај сине ле шукар моментија таро време кеда барило сар е Јеховаскоро сведоко. И Анџелина вакерела: „О Јехова заслужинела те бранина ле. Чест тано те бранина лескоро анав“. Амен да шај те фалина хем те славина е Јехова кеда о јавера на поштујнена ле. А адаја тани бари чест.
Шај те славина е Јехова амаре лафенцар (Дикх ко пасусија 9-10) b
11. Сар о слуге е Јеховаскере применинѓе о начело таро Псалм 96:8 ко пурано време?
11 Читин Псалм 96:8. Шај те славина е Јехова е буќенцар со иси амен. Е Јеховаскере слуге отсекогаш дена ле сине чест ко асавко начин (Изр. 3:9). На пример, о Израелција денѓе паре хем вредна буќа те шај те градинел пе хем те одржинел пе о храми (2. Цар. 12:4, 5; 1. Лет. 29:3-9). Несаве ученикија е Исусескере поддржинѓе ле хем лескере апостолен е буќенцар со сине лен (Лука 8:1-3). Несаве христијања ко прво веко исто аѓаар бичхалѓе помош пумаре пхраленге хем пхењенге кола со сине ко тхана коте со сине бокхалипе (Апо. 11:27-29). Амен да авдиве шај те славина е Јехова амаре доброволна прилогонцар.
12. Сар шај амаре прилогија те анен слава е Јеховаске? (Дикх хем и слика.)
12 Те дикха само јекх пример кова со сикавела сар амаре прилогија анена слава е Јеховаске. Јекх извештај ко 2020 берш, керела сине лафи баши јекх бари суша која со сине ко Зимбабве. Милиоња мануша сине ки опасност те мерен бокхатар, а машкар ленде сине јекх амари пхен со викинела пе Приска. Иако сине суша, и Приска на чхинавѓа те џал ки служба секоја среда хем петок, чак ки сезона кеда рандена пе сине о ниве. Лакере комшие асана сине лаке адалеске со џала ки служба наместо те керел бути ко пле ниве хем вакерена сине лаке: „Ка мере бокхатар“. И Приска сине сигурно кај о Јехова ка грижинел пе лаке хем адалеске вакерела сине: „О Јехова никогаш нане те мукхел пле слуген“. Кратко пало адава, ој добинѓа помош тари амари организација — хајбе хем јавера буќа со ваљанена сине лаке, а адава шај сине те добинел адалеске со сарине амен даја прилогија. О комшие е Прискакере сине воодушевиме хем вакерѓе: „О Девел никогаш на мукхља тут. Адалеске, амен да мангаја те сикљова нешто повише баши лесте“. Ефта таро лакере комшие почминѓе те авен ко состанокија.
Шај те славина е Јехова е буќенцар со иси амен (Дикх ко пасус 12) c
13. Сар амаре понашибаја шај те славина е Јехова? (Псалм 96:9).
13 Читин Псалм 96:9. Шај те славина е Јехова амаре понашибаја. О свештеникија кола со служинена сине ко свето шатори ваљани сине те овен чиста ко физичко поглед (2. Мој. 40:30-32). Амен да ваљани те ова чиста ко физичко поглед, ама панда поважно таро адава тано те ачхова чиста ко амаре мисле, лафија хем постапке (Пс. 24:3, 4; 1. Пет. 1:15, 16). И Библија вакерела кај ваљани те хуљава „и пурани личност“, а те урава „и неви личност“. Адава значинела кај ваљани те трудина амен те на размислина хем те на постапина ко начин сар со на мангела о Јехова. Наместо адава, те размислина хем те постапина ко начин колеа со ка сикавел е Јеховаскере бут шуже особине (Кол. 3:9, 10). Адалеске со о Јехова поможинела амен, чак хем несаве мануша кола со живинена бут неморално хем тане бут насилна, шај те менинен пе хем те уравен и неви личност.
14. Со шај те сикљова таро Џек? (Дикх хем и слика.)
14 Те дикха о искуство јекхе насилно хем опасно манушескоро кова со викинела пе сине Џек, а коле со денѓе надимак, о Демони. Адалеске со керѓа пхаро криминал, ов сине осудимо ки смртно казна. Сепак, џикоте аџикерела сине те овел мудардо, ов сложинѓа пе те проучинел јекхе пхралеа кова со посетинела сине о затвор колесте со сине пханло ов. Иако о Џек сине опасно хем насилно мануш, ов хуљавѓа и пурани личност хем сар со накхела сине о време пхерѓа о условија те крстинел пе. Ов добором променинѓа пе, со ко диве кеда ваљани сине те мударен ле, несаве чуваренгере јакхја пхердиле асва џикоте поздравинена пе сине леа. Јекх војнико со керела сине бути ко затвор, вакерѓа: „Англедер, о Џек сине јекх таро најлошна затвореникија акате, ама акана тано јекх таро најшукар“. Јекх курко откеда сине мудардо о Џек, о пхраља со геле ко затвор те шај те икерен о состанок башо адава курко дикхле јекхе затворенико кова со прво пути ало. Со поттикнинѓа ле те авел ко состанок? Ов сине воодушевимо таро промене со керѓа о Џек хем мангља те дознајнел со ваљани те керел те шај те служинел е Јеховаске. Дикхјола кај о начин сар понашинаја амен, шај те славинел амаре небесно Даде (1. Пет. 2:12).
Шај те славина е Јехова амаре понашибаја (Дикх ко пасус 14) d
САР О ЈЕХОВА КА СЛАВИНЕЛ ПЛО АНАВ ПАНДА ХАРИ
15. Сар о Јехова целосно ка славинел пло анав панда хари? (Псалм 96:10-13).
15 Читин Псалм 96:10-13. Акала последна стихија таро 96 Псалм, опишинена е Јехова сар праведно Судија хем Цари. Сар о Јехова ка славинел пло анав панда хари? Аѓаар со ка анел правда. Панда хари ов ка уништинел о Баро Вавилон адалеске со анела лаџ лескере свето анавеске (Отк. 17:5, 16; 19:1, 2). Несаве, кеда ка дикхен кај тано уништимо о Баро Вавилон, шај ка почминен те служинен е Јеховаске заедно аменцар. Ко крајо, ко Армагедон, о Јехова ка уништинел цело свето е Сатанаскоро аѓаар со ка уништинел са околен со противинена пе леске хем со анена лаџ лескере анавеске. А ка спасинел са околен со мангена ле, сој леске послушна хем со анена леске слава (Мар. 8:38; 2. Сол. 1:6-10). Пало последно испит, откеда ка завршинен о милја берша коте со ка владинел о Христос, о Јехова целосно ка славинел пло свето анав (Отк. 20:7-10). Тегани, „и пхув ка овел пхерди пенџарибаја баши е Јеховаскири слава сар сој о море пхердо пањеа“ (Авак. 2:14).
16. Со сиан одлучно те кере? (Дикх хем и слика.)
16 Кобор шукар ка овел кеда секој ка дел е Јеховаске и слава која со припадинела лескере анавеске. Ама, џикоте авела адава диве, шај те да амендар са те славина е Јехова ки секоја прилика. Те шај те истакнинел кобор тано важно акава, о Водечко тело одлучинѓа о Псалм 96:8 те овел е бершескоро стихо башо 2025 берш: „Ден е Јеховаске и слава која со припадинела лескере анавеске“.
Ко крајо секој ка дел и слава е Јеховаске со пропадинела лескере анавеске! (Дикх ко пасусија 16)
ГИЛИ 12 О Јехова тано баро Девел
a Несаве анава тане мениме.
