1. Саво предизвик иси саринен амен?

 СЕКОВА ДИВЕ ваљани те ана одлуке. Несаве одлуке џи негде тане локхе, сар на пример со те ха сабајле или кеда те чхива амен те сова. Башо јавера буќа тано попхаро те анел пе одлуке. Ола шај те влијајнен упро амаро састипе, упри амари радост, упро амаре мангле или упро амаро обожавибе е Јехова. Амен мангаја амаре одлуке те овен башо амаро шукарипе хем о шукарипе амаре фамилијакоро. А сој најважно, надинаја амен кај амаре одлукенцар ка радујна е Јехова (Рим. 12:1, 2).

2. Кола чекорија ка поможинен тут те ане мудра одлуке?

² Побари тани и веројатност кај ка ана мудра одлуке 1) ако дознајнаја о буќа, 2) ако лаја ко предвид сар дикхела о Јехова ко буќа хем 3) ако шукар дикхаја саве опцие иси амен. Ки акаја статија ка дикха акала трин чекорија хем ка дознајна сар шај те вежбина амари „способност хаљојбаске“ (Евр 5:14).

ДОЗНАЈН О БУЌА

3. Вакер пример кова со сикавела соске ваљани те дознајне о буќа англедер те ане несави одлука.

³ О прво чекори со ка поможинел тут те ане шукар одлуке тано те дознајне о буќа. Соске тано акава важно? Замислин туке кај несаво пациенти џала ко доктори адалеске со иси ле сериозно проблеми састипаја. Дали о доктори одма ка дел ле терапија бизо англедер те преглединел ле или те пучел ле сој леске? Нормално кај на! Ту да ка ане пошукар одлуке ако англедер дознајнеа о буќа баши тли ситуација. Сар шај те кере адава?

4. Спрема Изреки 18:13, со шај те кере те шај те дознајне о буќа? (Дикх хем и слика.)

 ⁴ Бут пути, те шај те дознајне о буќа ваљани те пуче. На пример, замислин кај сиан викимо ки несави забава. Дали ваљани те џа? Ако на пенџареа доволно адале со организиринела и забава хем ако на џанеа со планиринела те овел ки лате, ка ваљани те пуче ле пучиба, сар на пример: „Кеда хем кај ка овел и забава? Кобор мануша тане викиме? Кој ка надглединел ла? Кој ка овел адатхе? Сој тано планиримо те керел пе ки забава? Дали ка овел алкохол?“ О одговорија ко акала пучиба ка поможинен туке те ане мудро одлука. (Читин Изреки 18:13.)

5. Со ваљани те кере откеда ка дознајне са о буќа?

⁵ Пало адава, откеда ка дознајне са о буќа, шукар размислин баши цели ситуација. На пример, со ако дознајнеа кај ки забава ка овен мануша кола со на поштујнена о библиска начелија или кај ка овел алкохол бизо некој те надглединел адава? Дали мислинеа кај иси шанса и забава те почминел те овел распуштено? (1. Пет. 4:3). Тари јавер страна, со ако и забава ка икерел пе ко термини кеда иси тут собраниско состанок или кеда планиринѓан те џа ки служба? Ако размислинеа башо са о буќа, ка овел туке полокхо те ане шукар одлука. Ама, иси панда јекх чекори со ваљани те кере. Ту џанеа, сар ту дикхеа ки ситуација, ама пуч  тут: „Сар дикхела о Јехова ки лате?“ (Изр. 2:6).

ЛЕ КО ПРЕДВИД О ЈЕХОВА САР ДИКХЕЛА КО БУЌА

6. Спрема Јаков 1:5, соске ваљани те рода помош таро Јехова?

⁶ Молин е Јехова те поможинел туке те хаљове сар ов дикхела ки несави бути. Ов ветинела кај ка дел амен мудрост те хаљова дали несави амари одлука ка радујнел ле или на. Асавки мудрост „ов дела дарежливо сариненге хем бизо те родел о грешке“. (Читин Јаков 1:5.)

7. Сар шај те дознајне сар дикхела о Јехова ки несави бути? Вакер пример.

⁷ Откеда молинѓан е Јехова те водинел тут, дикх шукар сар ов ка одговоринел туке. Те дикха јекх пример: Ако нашавѓовеа џикоте патујнеа, шај те пуче некас со живинела ко адава тхан те поможинел туке. Ама, дали ка џа туке англедер ов те одговоринел туке? Нормално кај на. Шукар ка шуне џикоте вакерела туке кај те џа. Слично, откеда молинѓан е Јехова баши мудрост, трудин тут те хаљове кова тано лескоро одговор аѓаар со ка дознајне кола библиска законија хем начелија важинена ки тли ситуација. На пример, кеда одлучинеа дали те џа ки забава со спомнинѓем ла англедер, шај те размислине со вакерела и Библија башо распуштена забаве, о лошно друштво хем кај ваљани те чхиве е Девлескоро Царство англедер тле  лична желбе (Мат. 6:33; Рим. 13:13; 1. Кор. 15:33).

8. Со шај те кере ако ваљани туке помош те шај те аракхе о информацие со родеа лен? (Дикх хем и слика.)

⁸ Сепак, понекогаш шај ка ваљани туке помош те шај те аракхе о информацие со родеа лен. Шај те роде совет или предлог таро несаво искусно пхрал или пхен. Ама исто аѓаар бут ка поможинел туке ако коркори истражинеа. Иси пхердо корисна информацие ко амаре алатке истражибаске, сар на пример ко Прирачнико истражибаске е Јеховаскере сведоконгоро хем ко лил Библиска стихија со поможинена амен ко живото. Ма бистре кај тли цел тани те ане одлука колаја со ка радујне е Јехова.

9. Сар шај те ова сигурна кај амари одлука ка радујнел е Јехова? (Ефешања 5:17).

⁹ Сар шај те ова сигурна кај амари одлука ка радујнел е Јехова? Најангле ваљани шукар те пенџара ле. Ки Библија пишинела: „О пенџарибе е Најсвето ингарела џи ки разборитост“ (Изр. 9:10). Ка ова чаче разборита ако џанаја кола тане е Јеховаскере особине, која тани лескири намера хем кола буќа мангела, а кола мрзинела. Пуч тут: „Спрема адава со џанава башо Јехова, сави одлука шај те анав те шај те радујнав ле?“ (Читин Ефешања 5:17.)

10. Соске о библиска начелија тане поважна тари фамилијарно традиција или култура?

¹⁰ Те шај те радујна е Јехова, понекогаш ка мора те разочарина околен сој аменге паше. На пример, несаве родителија мислиндор те керен шукарипе пумаре возрасно чхајаке ка керен лаке притисок те женинел пе некасаја сој ки финансиско ситуација шукар, иако о чхаво нане духовно јако. Нормално тано те манген ленгере чхаја те овел ла шукар живото, ама ој ваљани те пучел пе: „Дали акава ром ка поможинел ман те овав паше е Јеховаја? Сар дикхела о Јехова ки акаја бути?“ О одговор аракхљола ко Матеј 6:33. Ко адава стихо о христијања тане поттикниме „најангле те роден о Царство“. Иако поштујнаја амаре родителен хем е манушен тари амари околина коте со живинаја, аменге тано најважно те радујна е Јехова.

ДИКХ САВЕ ОПЦИЕ ИСИ ТУТ

11. Спрема Изреки 2:11, со ка поможинел тут шукар те дикхе саве опцие иси тут?

¹¹ Откеда дикхљан о библиска начелија кола со важинена баши тли ситуација, ваљани шукар те размислине кола опцие иси тут. (Читин Изреки 2:11.) И способност шукар те хаљове о буќа ка поможинел туке те дикхе со шај те случинел пе пали секоја опција со ка бирине ла. Несаве одлуке локхе шај те ане лен. Ама јавера нане добором локхе. И способност шукар те хаљове о буќа ка поможинел туке те ане мудра одлуке чак хем ко пхаре ситуацие.

12-13. Сар шај и разборитост те поможинел тут те ане мудро одлука кеда керела пе лафи баши бути?

¹² Те дикха јекх ситуација. Замислин кај родеа бути те шај те грижине тут тле фамилијаке. Пхравѓона туке дуј тхана буќаке. Ту леа ко предвид са о буќа, сар на пример сави тани и бути, о работно време, кобор време ка ваљани туке те шај те ресе џи лате хем панда бут јавера буќа. О солдуј буќа на пхагена нисаво библиско начело. Шај јекх таро адала буќа повише свиџинела пе туке адалеске со мангеа и бути со керела пе адатхе, или и плата тани побари. Ама, англедер те ане одлука ваљани те ле ко предвид јавера да буќа.

¹³ На пример, дали несави таро акала буќа ка чхинавен тут те присуствујне ко несаве состанокија? Дали ка лел тутар о време со ваљани туке те шај те грижине тут башо емоционална хем о духовна потребе тле фамилијакере? Адава со ка пуче тут асавке пучиба ка поможинел тут „те проценине сој  најважно“, јавере лафенцар о обожавибе е Јехова хем о потребе тле фамилијакере те овен туке поважна таро адава те заработине повише паре (Фил. 1:10а). Аѓаар ка шај те ане одлука која со о Јехова ка благословинел ла.

14. Сар и способност те хаљова о буќа хем о мангипе ка поможинен амен те пазина те на сопкина е јаверен?

¹⁴ И способност те хаљова о буќа исто аѓаар ка поттикнинел амен те размислина сар амари одлука шај те влијајнел упро јавера. Адава поможинела амен те на сопкина е јаверен (Фил. 1:10б). Акава тано важно кеда анаја лична одлуке, сар сој о одлуке башо урајбе хем дотерибе. На пример, шај аменге свиџинела пе несаво стили урајбаске или дотерибаске. Ама со ако о јавера ко собрание или авријал о мануша тане вознемириме башо адава? И способност те хаљова о буќа ка поможинел амен те поштујна ленгере чувствија.  О мангипе ка поттикнинел амен те рода „и корист е јаверескири“ хем те ова скромна (1. Кор. 10:23, 24, 32; 1. Тим. 2:9, 10). Аѓаар, ка ана одлука колатар со ка дикхјол кај мангаја хем поштујнаја е јаверен.

15. Со ваљани те кере англедер те ане несави важно одлука?

¹⁵ Ако ваљани те ане несави побари одлука, размислин со ка ваљани те кере те шај те икере тут ки лате. О Исус сикавѓа амен те рачунина „о трошако“ (Лука 14:28). Размислин кобор време, трудо хем јавера буќа ка ваљанен туке те шај те успејнел тли одлука. Ко несаве ситуацие шај ка ваљани те кере лафи тле фамилијаја башо адава со ваљани те керел секој лендар те шај те поддржинел и одлука. Соске асавко планирибе тано корисно? Адава шај ка поможинел тут те хаљове кај ваљани те кере несаве промене ки одлука или кај несави јавер опција тани пошукар. Кеда ки тли одлука ка вклучине тле фамилија хем ка шуне ленгере предлогија, ола ка овен поспремна те соработинен туја те шај тли одлука те успејнел (Изр. 15:22).

ОДЛУКА СО КА ОВЕЛ УСПЕШНО

16. Кола чекорија ка поможинен тут те ане одлука која со ка овел успешно? (Дикх хем и рамка „ Сар те ане мудра одлуке“.)

¹⁶ Ако керѓан са о буќа сој спомниме поупре, спремно сиан те ане мудро одлука. Лељан ко предвид са о буќа, истражинѓан о начелија кола со ка поможинен туке те ане одлука колаја со ка радујне е Јехова. Акана, шај те молине е Јехова те поможинел тут тли одлука те овел успешно.

17. Која главно бути ка поможинел тут те ане мудра одлуке?

¹⁷ Чак ако англедер анѓан бут одлуке кола сој тане шукар, ма бистре кај и главно бути која со ка поможинел туке те ане мудра одлуке тани адаја те овел тут доверба ки е Јеховаскири мудрост, а на ки тли интелигенција или ко тло искуство. Само ов шај те керел те џане чаче о буќа, те ове разборито хем те ове способно шукар те хаљове о буќа. Акала буќа тане бут важна те шај те ове мудро (Изр. 2:1-5). О Јехова шај те поможинел тут те ане одлуке коленцар со ка радујне ле (Пс. 23:2, 3).