СТАТИЈА ПРОУЧИБАСКЕ 5
ГИЛИ 108 Е Девлескоро верно мангипе
Саве благословија иси амен таро е Јеховаскоро мангипе?
О Христос Исус ало ко свето те спасинел е грешникон (1. ТИМ. 1:15)
СО КА СИКЉОВА
Ка дикха сави корист иси амен тари откупнина хем сар шај те сикава е Јеховаске кај сием благодарна.
1. Со шај те кера те шај те радујна е Јехова?
ЗАМИСЛИН кај некаске со мангеа ле деа посебно поклон сој тано шужо хем практично. Кобор ка ове разочаримо ако ов само чхивела ле ки несави фиока хем никогаш повише на сетинела пе ки лесте! Тари јавер страна, сигурно ка овел туке бут мило ако ов користинела о поклон хем сикавела кај тано благодарно баши лесте. Сар акава пример шај те поврзина ле е откупнинаја? О Јехова денѓа пле Чхаве те мерел аменге. Кобор среќно мора те овел о Јехова кеда сикаваја кај сием благодарна башо адава скапоцено поклон хем башо лескоро мангипе кова со теринѓа ле те дел и откупнина! (Јован 3:16; Рим. 5:7, 8).
2. Со ка дикха ки акаја статија?
2 Сепак, сар со накхела о време, шај те нашава амаро ценење баши откупнина хем те на дикха ки лате сар скапоцено поклон. Адава би овела сар те пхене чхиваја о поклон таро Девел ки фиока. Среќна сием со иси амен, ама бешела аменге ки страна. Те шај те на нашава амари благодарност мора редовно те размислина башо са адава со керѓе о Девел хем о Христос аменге. Акаја статија ка поможинел амен ко адава. Ка дикха сар користинела аменге и откупнина авдиве хем сар шај те користинел аменге ки иднина. Исто аѓаар, ка дикха сар шај те сикава благодарност башо е Јеховаскоро мангипе, посебно англедер хем пали Спомен-свеченост акава берш.
САР КОРИСТИНЕЛА АМЕНГЕ АВДИВЕ
3. Кова тано јекх начин сар користинела аменге и откупнина авдиве?
3 Амен више иси амен корист тари откупно жртва е Христосескири. На пример, адалеске со сине денди и откупнина, о Јехова простинела амаре гревија. Ов нане дужно те простинел аменге, ама мангела те керел адава. Тари благодарност о псалмисти вакерѓа: „Ту, Јехова, сиан шукар хем спремно сиан те простине“ (Пс. 86:5; 103:3, 10-13).
4. Каске о Јехова денѓа и откупнина? (Лука 5:32; 1. Тимотеј 1:15).
4 Несаве шај мислинена кај на заслужинена о Јехова те простинел ленге. Уствари, никој амендар на заслужинела. О апостол Павле халило кај нане достојно те овел викимо апостоли, сепак вакерѓа: „Адалеске со о Девел сикавѓа манге пло шукарипе со на заслужинаја ле, ме сиум апостоли“ (1. Кор. 15:9, 10). Кеда каинаја амен башо амаре гревија, о Јехова простинела аменге. Соске? На адалеске со заслужинаја, него адалеске со мангела амен. Ако ту да мислинеа кај на заслужинеа о Јехова те простинел туке, ма бистре кај о Јехова на денѓа и откупнина совршена манушенге, него адаленге со каинена пе башо пумаре гревија. (Читин Лука 5:32; 1. Тимотеј 1:15.)
5. Дали некас амендар иси ле право те мислинел кај о Јехова мора те простинел леске? Објаснин.
5 Никој амендар на ваљани те мислинел кај иси ле право о Јехова те сикавел леске милост, чак ако бершенцар служинела леске. Нормално, о Јехова ценинела са адава со керѓем леске (Евр. 6:10). Ов денѓа пле Чхаве аменге сар бесплатно поклон, а на сар плата баши служба со кераја леске. Ка овел погрешно ако мислинаја кај заслужинаја о Јехова те простинел аменге само адалеске со керѓем бут буќа баши лесте. Адава би овела сар те пхене вакераја кај на сине потребно о Исус те мерел. (Споредин Галатјања 2:21.)
6. Соске о Павле трудинѓа пе бут ки служба башо Јехова?
6 О Павле џанља кај нашти те заработинел е Девлескири милост. Тегани соске добором бут трудинѓа пе ки служба башо Јехова? На те шај те докажинел кај заслужинела е Јеховаскоро шукарипе, него те сикавел благодарност баши откупнина (Еф. 3:7). Исто сар о Павле, амен да понадари служинаја ревно, на те шај те заработина е Јеховаскири милост, него те сикава благодарност баши лате.
7. Ко саво јавер начин користинела аменге и откупнина авдиве? (Римјања 5:1; Јаков 2:23).
7 Јавер начин сар користинела аменге и откупнина авдиве тано аѓаар со секој амендар шај те овел паше амал е Јеховаја. a Сар со дикхлем ки англуни статија, кеда бијандилем, на сием сине амала е Девлеа. Ама адалеске со сине денди и откупнина, шај те ова ко „мир е Девлеа“, а адава поможинела амен те ова леа паше. (Читин Римјања 5:1; Јаков 2:23.)
8. Соске ваљани те ова благодарна е Јеховаске баши чест те молина амен леске?
8 Размислин баши панда јекх бути со шај те кера адалеске со сием амала е Јеховаја — иси амен чест те молина амен леске. О Јехова на шунела само о јавна молитве пле слугенгере кеда кхедена пе заедно, него хем о лична молитве секоле јекхескере амендар. И молитва шај те смиринел амаро вило хем те дел амен андруно мир. Ама, ој тани бут повише него шукар терапија. Ој шај те керел те ова панда попаше е Девлеа (Пс. 65:2; Јак. 4:8; 1. Јов. 5:14). Џикоте сине ки пхув, о Исус често молинела пе сине адалеске со џанља кај о Јехова шунела ле хем кај и молитва ка поможинел леске те ачхол паше амал пле Дадеа (Лука 5:16). Бут сием благодарна со е Исусескири откупно жртва поможинела амен те ова амала е Јеховаја, па чак хем те кера леа лафи ки молитва!
САР ШАЈ ТЕ КОРИСТИНЕЛ АМЕНГЕ КИ ИДНИНА
9. Сар ка користинел и откупнина е Јеховаскере верна слугенге ки иднина?
9 Сави корист тари откупнина ка овел е Јеховаскере верна слуген ки иднина? Ка добинен вечно живото. Бут мануша мислинена кај адава нашти те овел адалеске со о мануша мерена више некобор милја берша. Ама, е Јеховаскири намера ко почеток сине о мануша те живинен вечно. Те на грешинел сине о Адам, никој нане те мислинел сине кај о вечно живото тано превише шукар те шај те овел чаче. Хем иако акана пхаро аменге те замислина кај ка живина вечно, шај те верујна ко адава. Соске? Адалеске со о Јехова платинѓа и најскупо цена — о живото пле мангле Чхавескоро (Рим. 8:32).
10. Со едвај аџикерена о помазаникија, а со о јавера бакхре?
10 Иако о вечно живото ка добина ле ки иднина, о Јехова мангела те размислина баши лесте панда акана. О помазаникија едвај аџикерена о време кеда ка владинен заедно е Исусеа таро небо упри пхув (Отк. 20:6). О јавера бакхре надинена пе кај ка живинен ко рај ки пхув, коте со нане те овен лен дукха, муке хем нане те овен тажна (Отк. 21:3, 4). Дали ту да сиан дело таро јавера бакхре колен со иси лен надеж башо вечно живото ки пхув? Асавко живото нане само утешно награда. О Јехова керѓа е манушен баши адаја цел хем адалеске о живото ки пхув ка керел амен бут среќна.
11-12. Кола тане несаве благословија ко рај со едвај аџикераја лен? (Дикх хем о слике.)
11 Замислин саво ка овел тло живото ко рај ки пхув. Нане те секирине тут дали ка насваљове или ка мере (Иса. 25:8; 33:24). О Јехова целосно ка задоволинел секоја исправно желба со иси тут. Со би мангеа те сикљове? Дали би мангеа те сикљове нешто повише башо животне хем о птице? Дали мангеа те башале ко несаво инструменти или те цртине? Сигурно ка овел потреба таро архитектија, градежникија хем земјоделција. А ка овел потреба хем таро некој со ка спреминел хајбаске, ка керел алатија хем ка грижинел пе баши и бут шужи природа (Иса. 35:1; 65:21). Кеда ка живине вечно ка овел тут време те развине секоја вештина со ка манге.
12 Кобор ка ова радосна кеда ка аџикера адален со ка воскреснинен! (Апо. 24:15). Замислин хем кобор ка уживине те сикљове башо Јехова аѓаар со ка истражине са о буќа со ов створинѓа лен (Пс. 104:24; Иса. 11:9). А најшукар таро са ка овел адава со ка шај те обожавине е Јехова бизо те осетине тут криво кај керѓан несаво грево. Дали би откажинеа тут таро акала благословија со ка овен ки иднина те шај те уживине „ко грешна задоволствија со накхена“? (Евр. 11:25). Нормално кај на! Башо акала благословија врединела секоја жртва со ка кера ла авдиве. Ма бистре, кај о рај ки пхув нане вечно те аџикера ле. Јекх диве ка живина ки лесте. Ко ништо таро акава на би шај сине те надина амен ако о Јехова на мангља амен добором бут те шај те дел пле Чхаве те мерел аменге.
Саве благословија ко рај едвај аџикереа лен? (Дикх ко пасусија 11-12)
СИКАВ БЛАГОДАРНОСТ БАШО Е ЈЕХОВАСКОРО МАНГИПЕ
13. Сар шај те сикава благодарност башо е Јеховаскоро мангипе? (2. Коринќања 6:1).
13 Сар шај те сикава благодарност е Јеховаске башо адава со денѓа и откупнина? Аѓаар со ка чхива и служба баши лесте ко прво тхан ко амаро живото (Мат. 6:33). И Библија вакерела: „[О Исус] муло сариненге, те шај окола со живинена те на живинен више песке, него леске, кова со муло ленге хем сине воскреснимо“ (2. Кор. 5:15). Амен сигурно на мангаја те промашина и цел соске аменге сикавдо е Јеховаскоро шукарипе со на заслужинаја ле. (Читин 2. Коринќања 6:1.)
14. Сар шај те сикава кај иси амен доверба ко е Јеховаскоро водство?
14 Шај исто аѓаар те сикава благодарност башо е Јеховаскоро мангипе адалеа со ка овел амен доверба ко водство со ов дела амен. Сар? Кеда анаја одлуке, на пример поврзимо адалеа кобор бари школа ка завршина или сави бути ка прифатина, на ваљани те бистра со о Јехова мангела те кера (1. Кор. 10:31; 2. Кор. 5:7). Кеда амари вера сикаваја ла постапкенцар, случинела пе нешто бут шукар — амари вера ко Јехова хем амаро амалипе леа овена поцврста, а амари надеж овела побари (Рим. 5:3-5; Јак. 2:21, 22).
15. Сар шај те сикава амаро ценење англедер хем пали Спомен-свеченост?
15 Иси панда јекх начин сар шај те сикава благодарност башо е Јеховаскоро мангипе. Шај шукар те користина о периоди англедер хем пали Спомен-свеченост акава берш те шај те сикава е Јеховаске кобор сием благодарна баши откупнина. Освен со ка планирина те ова присутна ки Спомен-свеченост, шај те канина е јаверен да те авен (1. Тим. 2:4). Околенге со ка канине лен објаснин со ка случинел пе ки Спомен-свеченост. Шај те поможинел тут ако сикавеа о видеоклипија Соске муло о Исус? хем Сетин тут ко е Исусескоро мерибе? ки jw.org. О старешине ваљани те трудинен пе те канинен адален сој неактивна. Кобор бари радост ка овел хем ко небо хем ки пхув ако некој таро е Јеховаскере бакхре со нашавдило ка овел поттикнимо те иранел пе ко стадо! (Лука 15:4-7). Те чхива аменге цел те поздравина амен адаленцар со ка авен ки Спомен-свеченост, а посебно околенцар сој неве или кола со на але бут време. Мангаја шукар те доџакера лен! (Рим. 12:13).
16. Соске ваљани те трудина амен повише те џа ки служба ко периоди кеда тани и Спомен-свеченост?
16 Шај ли повише те учествујне ко духовна активностија англедер хем пали Спомен-свеченост? Адава тано јекх шукар начин те сикаве тли благодарност башо са адава со о Девел хем о Христос керѓе аменге. Кобор повише учествујнаја ки служба башо Јехова, добором повише ка осетина лескири поддршка хем аѓаар амари доверба ки лесте ка овел побари (1. Кор. 3:9). Исто аѓаар, читин о извештаија тари Библија баши Спомен-свеченост сој денде ко Дивескоро стихо или ки табела сој ко листија спремибаске. Ки тли лично студија шај похор те истражине адала библиска извештаија.
17. Солеа тано задоволно о Јехова? (Дикх хем и рамка „ Сар те сикаве благодарност башо е Јеховаскоро мангипе“.)
17 Нормално, тле околностија шај нане те мукхен тут те кере са о предлогија тари акаја статија. Ама ма бистре кај о Јехова на спорединела адава со кереа ту адала со керена о јавера. Ов дикхела со иси тут андре ко вило. Ов тано задоволно кеда дикхела кобор сиан благодарно башо лескоро скапоцено поклон, и откупнина (1. Сам. 16:7; Мар. 12:41-44).
18. Соске сием благодарна е Јеховаске хем е Исусеске?
18 Само адалеске со сине денди и откупнина, шај те овен аменге простиме амаре гревија, те ова амала е Јеховаја хем те овел амен надеж башо вечно живото. Секогаш те сикава благодарност башо мангипе е Јеховаскоро, кова со поттикнинѓа ле те дел амен акала благословија (1. Јов. 4:19). Исто аѓаар, те сикава благодарност е Исусеске, кова со добором бут мангља амен со денѓа пло живото аменге! (Јован 15:13).
ГИЛИ 154 Мангипе со на чхинавѓола
a О Јехова простинела сине пле слугенге ко пурано време панда англедер о Христос те платинел и откупнина. О Јехова шај сине те керел адава адалеске со сине сигурно кај лескоро Чхаво ка ачхол леске верно џи ко мерибе. Значи, е Девлеске ко јакхја, и откупнина сар те пхене више сине платими (Рим. 3:25).
