СТАТИЈА ПРОУЧИБАСКЕ 4
ГИЛИ 18 Благодарна сием баши откупнина
Со сикљоваја тари откупнина?
Е Девлескоро мангипе баши аменде сикавѓа пе аѓаар со: о Девел бичхалѓа пле единствено бијаме Чхаве (1. ЈОВ. 4:9)
СО КА СИКЉОВА
Ка дикха сар и откупнина сикавела аменге о бут шуже особине е Јеховаскере хем е Исус Христосескере.
1. Сар користинела аменге адава со секова берш сием присутна ки Спомен-свеченост башо е Христосескоро мерибе?
СИГУРНО ка сложине тут кај и откупнина тани јекх бут скапоцено поклон (2. Кор. 9:15). Адалеске со о Исус муло аменге, ту шај те ове паше амал е Јеховаја, е Девлеа. А шај хем те овел тут надеж башо вечно живото. Иси амен бут причине те ова благодарна е Јеховаске, кова со спреминѓа и откупнина адалеске со бут мангела амен! (Рим. 5:8). Те шај те поможинел аменге те ачхова благодарна хем никогаш те на мислина кај амен заслужинѓем и откупнина, о Исус денѓа заповед јекх пути ко берш те сетина амен ко лескоро мерибе (Лука 22:19, 20).
2. Башо со ка кера лафи ки акаја статија?
2 Акава берш и Спомен-свеченост ка икерел пе сабота 12 април 2025 берш. Сигурно сарине амен планиринаја те присуствујна ки лате. Бут ка користинел аменге ако ко курке англедер и Спомен-свеченост хем пало адава одвојнаја аменге време хор те размислина башо адава со о Јехова хем лескоро Чхаво керѓе аменге. Ки акаја статија ка дикха со сикљоваја башо Јехова хем башо лескоро Чхаво. А и јавер статија ка поможинел аменге те хаљова сар шај те користинел аменге и откупнина хем сар шај те сикава благодарност баши лате.
СО СИКЉОВАЈА ТАРИ ОТКУПНИНА БАШО ЈЕХОВА
3. Сар шај о мерибе јекхе манушескоро те ослободинел милиоња манушен? (Дикх хем и слика.)
3 Тари откупнина сикљоваја баши е Јеховаскири правда (5. Мој. 32:4). Адалеске со о Адам на сине послушно, сарине амен наслединѓем грево кова со ингарела ко мерибе (Рим. 5:12). Те шај те ослободинел амен таро грево хем таро мерибе, о Јехова бичхалѓа пле Чхаве те шај те дел амен и откупнина. Ама сар шај и жртва јекхе совршено манушескири те ослободинел милиоња манушен? О апостол Павле објаснинѓа: „Сар со преку јекхе манушескири непослушност [о Адам] бут џене уле грешна, аѓаар преку јекхе манушескири послушност [о Исус] бут џене ка овен праведна“ (Рим. 5:19; 1. Тим. 2:6). Јавере лафенцар, и непослушност јекхе совршено манушескири сине доволно те шај сарине амен те ова робија е гревоскере хем е мерибаскере. Спрема адава, и послушност јекхе совршено манушескири тани доволно те шај те ова ослободиме.
Себепи јекх мануш улем робија е гревоскере хем е мерибаскере. Адалеске, јекх мануш тано доволно те шај те ослободинел амен (Дикх ко пасус 3)
4. Соске о Јехова на мукхља е Адамескере послушна чхавенге те живинен вечно?
4 Дали о Исус чаче мора сине те мерел те шај те ова спасиме? Нашти ли сине о Јехова те мукхел е Адамескере послушна чхавен те живинен вечно? Сар несовршена мануша, шај дикхјола аменге кај адава ка овел сине милостиво хем разумно решение. Ама адава нане ко склад е Јеховаскере совршено правдаја. Адалеске со о Јехова тано праведно, ов никогаш на би одлучинела сине те игнориринел адава со о Адам сине непослушно.
5. Соске шај те ова сигурна кај о Јехова секогаш ка керел адава сој исправно?
5 Ама со ако о Јехова на би дела сине откупнина, него игнориринела сине и правда, аѓаар со ка дозволинел сине е Адамескере несовршена чхавенге хем чхаенге те живинен вечно? Тегани о мануша веројатно ка пучен пе сине дали о Девел би постапинела сине праведно хем ко јавера буќа. На пример, шај ка пучен пе сине дали ов ка исполнинел са пле ветувања. Ама на ваљани те секирина амен башо асавко нешто. Адава со о Јехова керѓа адава сој праведно, иако платинѓа бари цена башо адава — жртвујнѓа пле мангле Чхаве — уверинела амен кај ов секогаш ка керел адава сој исправно.
6. Сар и откупнина сикавела аменге е Јеховаскоро мангипе? (1. Јованескоро 4:9, 10).
6 И откупнина поможинела аменге те хаљова кај о Јехова тано праведно, ама посебно поможинела аменге те хаљова кобор тано баро лескоро мангипе (Јован 3:16; читин 1. Јованескоро 4:9, 10). Тари откупнина дикхаја кај о Јехова мангела на само те овел амен вечно живото, него хем те ова дело тари лескири фамилија. Размислин башо акава: Кеда о Адам грешинѓа, о Јехова бркинѓа ле тари пли фамилија колате со иси верна слуге. Адалеске никој амендар на бијанѓовела сар дело таро е Девлескири фамилија. Ама адалеске со сине денди и откупнина, са о мануша со иси лен вера ко Девел хем тане леске послушна, јекх диве ка овен дело тари лескири фамилија. Панда авдиве шај те ова паше е Јеховаја хем амаре пхраленцар хем пхењенцар. О Јехова чаче мангела амен! (Рим. 5:10, 11).
7. Сар адава со о Исус цидинѓа муке поможинела аменге те хаљова кобор бут о Јехова мангела амен?
7 Ка хаљова панда пошукар кобор бут о Јехова мангела амен ако размислинаја кобор скупо платинѓа и откупнина. О Сатана вакерела кај нијекх слуга е Девлескоро нане те ачховел леске верно кеда ка овел ко пхаре ситуацие. Те шај те сикавел кај о Сатана ховавела, о Јехова дозволинѓа о Исус те цидел муке англедер те мерел (Јов 2:1-5; 1. Пет. 2:21). О Јехова дикхља џикоте о мануша асана сине е Исусеске, сине камшикујмо таро војникија хем сине ковимо ко стубо. Хем тегани, англо лескере јакхја, лескоро мангло Чхаво муло ко баре муке (Мат. 27:28-31, 39). О Јехова шај сине ко секова моменти те чхинавел адава. На пример, кеда о мануша вакерѓе: „Ако о Девел мангела ле, нека спасинел ле акана“, о Јехова шај сине те керел баш адава (Мат. 27:42, 43). Ама ако о Девел мешинела пе сине, нане сине те овел платими и откупнина хем нане те овел амен сине нисави надеж. Адалеске, о Јехова дозволинѓа лескоро Чхаво те цидел муке са џикоте на муло.
8. Дали о Јехова осетинѓа дукх џикоте дикхела сине сар лескоро Чхаво цидела муке? Објаснин. (Дикх хем и слика.)
8 На ваљани те мислина кај адалеске сој тано Семоќно, е Девле нане ле чувствија. Амен сием керде спрема лескоро лико, јавере лафенцар те овен амен чувствија. А адава сикавела кај е Јехова да иси ле чувствија. Ки Библија пишинела кај ов осетинела жал хем дукх (Пс. 78:40, 41). Размислин исто аѓаар башо извештај башо Авраам хем лескоро чхаво о Исак. О Јехова вакерѓа е Авраамеске те дел пле единствено чхаве сар жртва (1. Мој. 22:9-12; Евр. 11:17-19). Шај само те замислина аменге со са осетинѓа о Авраам џикоте спреминела пе сине те мударел пле чхаве. А кобор потажно сине о Јехова џикоте дикхела сине сар мануша со на служинена леске мучинѓе лескере Чхаве хем мударѓе ле! (Ки jw.org дикх о видеоклипи Угледајте се на нивната вера — Авраам [дел 2].)
О Јехова осетинѓа бари дукх џикоте дикхља сар лескоро Чхаво цидела муке (Дикх ко пасус 8)
9. Со сикљоваја башо е Јеховаскоро мангипе таро Римјања 8:32, 38, 39?
9 Тари откупнина сикљоваја кај никој на мангела амен добором бут сар о Јехова — чак ни адава сој аменге најпаше ки фамилија, а ни палем о најшукар амал. (Читин Римјања 8:32, 38, 39.) А ни хари на сумнинаја амен кај о Јехова мангела амен повише таро амен со мангаја амен коркори. Дали мангеа те живине вечно? О Јехова мангела адава панда повише. Дали мангеа те овен простиме тле гревија? О Јехова мангела адава панда повише. Са со родела амендар тано те сикава благодарност баши откупнина, те сикава вера ки лесте хем те ова леске послушна. И откупнина тано јекх бут вредно поклон кова сој доказ башо е Јеховаскоро мангипе спрема аменде. А ко нево свето ка дознајна панда повише башо е Јеховаскоро мангипе (Проп. 3:11).
СО СИКЉОВАЈА ТАРИ ОТКУПНИНА БАШО ИСУС
10. а) Со керела сине посебно пхаро е Исусеске башо лескоро мерибе? б) Сар о Исус бранинѓа е Јеховаскоро анав? (Дикх хем и рамка „ И верност е Исусескири бранинѓа е Јеховаскоро анав“.)
10 Е Исусеске сине бут важно о анав лескере Дадескоро (Јован 14:31). Е Исусеске сине бут пхаро со сине кривимо кај керела лафи против о Девел хем бунтујнела пе, а адава шај сине те каљарел лескере Дадескоро анав. Адалеске молинѓа пе: „Мо Дад, ако шај, нека накхел акаја чаша бизо те пијав латар“ (Мат. 26:39). Адалеа со ачхило е Јеховаске верно џи ко пло мерибе, о Исус бранинѓа пле Дадескоро анав.
11. Сар о Исус сикавѓа пло баро мангипе спрема о мануша? (Јован 13:1).
11 Исто аѓаар, тари откупнина сикљоваја кај е Исусеске тане бут важна о мануша, посебно лескере ученикија (Изр. 8:31; читин Јован 13:1). На пример, ов џанља кај несаве буќа ка овен пхаре џикоте керела пли служба ки пхув, посебно лескоро мерибе кова со сине бут мучно. Сепак, пле задаче ки пхув на керела лен сине само адалеске со ваљани сине. Наместо адава, о Исус цело пле вилеа проповединела сине, сикавела сине хем служинела сине е јаверенге. Чак и рат англедер те мерел, одвојнѓа време те тховел пле апостоленгере пре, те утешинел лен хем те сикавел лен башо бут буќа (Јован 13:12-15). А џикоте сине ко стубо мучибаске, кхединѓа сила те дел надеж е криминалцоске кова со мерела сине узи лесте хем те грижинел пе пле дајаке (Лука 23:42, 43; Јован 19:26, 27). Ко асавко начин, о Исус сикавѓа пло баро мангипе на само преку пло мерибе него хем пле цело животоја ки пхув.
12. Сар о Исус понадари да керела жртве баши аменге?
12 Иако муло „јекх пути засекогаш“, о Христос панда керела жртве аменге (Рим. 6:10). Сар? Ов понадари да трошинела време хем бут трудинела пе те шај те дел амен шуже буќа кола со шај те добина лен панда акана адалеске со денѓа и откупнина. Размислин со са керела. Служинела сар амаро Цари, Првосвештенико хем поглавари ко собрание (1. Кор. 15:25; Еф. 5:23; Евр. 2:17). Ов тано одговорно те шај те кхеден пе о помазаникија хем о баро мноштво, задача која со ка овел завршими англедер те завршинел и бари неволја a (Мат. 25:32; Мар. 13:27). Ов исто аѓаар грижинела пе лескере верна слуген те овел лен доволно духовно хајбе џикоте трајнена акала последна диве (Мат. 24:45). А џикоте трајнена о милја берша, ов понадари да ка служинел ки амари корист. О Јехова денѓа пле Чхаве на само те мерел аменге, него хем те керел бут јавера буќа!
МА ЧХИНАВ ТЕ СИКЉОВЕ
13. Сар о хор размислибе ка поможинел туке понадари да те сикљове башо е Девлескоро хем е Христосескоро мангипе со иси лен спрема аменде?
13 Шај понадари да те сикљове башо е Јеховаскоро хем е Исусескоро мангипе спрема аменде ако на чхинавеа хор те размислине башо са адава со керѓе. Ко курке англедер и Спомен-свеченост хем пали лате акава берш, шај шукар те читине јекх или некобор евангелија. Ма пробин те читине бут материјали таро јекх пути. Наместо адава читин попохари хем роде јавера да причине соске ваљани те манга е Јехова хем е Исусе. Хем адава со сикљовеа вакер ле е јаверенге.
14. Сар адава со ка истражине шај те поможинел туке те дознајне неве буќа баши откупнина хем башо јавера сикљојба? (Псалм 119:97; дикх хем и слика.)
14 Ако бут берша сиан ко чачипе, шај пучеа тут дали панда иси неве буќа кола со шај те дознајне лен башо пенџарде теме, сар на пример баши е Девлескири правда, башо е Девлескоро мангипе хем и откупнина. Џанѓола пе кај секогаш ка овел нешто нево со шај те сикљова башо акала хем јавера теме. Тегани со шај те кере? Ко амаре публикацие иси бут информацие кола со шај те читине лен хем те проучине лен. Кеда ка читине нешто ки Библија со на хаљовеа ле целосно, истражин. Пало адава, ко теко е дивескоро хор размислин башо адава со дознајнѓан хем со сикљовеа таро адава башо Јехова, лескоро Чхаво хем ленгоро мангипе спрема туте. (Читин Псалм 119:97.)
Чак ако сием бут берша ко чачипе, шај панда пошукар те хаљова хем те ценина и откупнина (Дикх ко пасус 14)
15. Соске ваљани понадари да те рода вредна буќа тари Библија?
15 Ма обесхрабрин тут ако на аракхеа нешто нево или нешто интересно секова пути кеда ка читине и Библија или ка истражине. Шај те вакерел пе кај ту сиан сар некој со родела злато. Асавке мануша стрпливо накхена саатија или диве те шај те аракхен чак о најтикно зрно злато. Сепак, ола тане упорна адалеске со секова зрно врединела ленге. Кобор повише врединела секоја неви бути со сикљоваја ла тари Библија! (Пс. 119:127; Изр. 8:10). Адалеске, ов стрпливо хем редовно читин и Библија (Пс. 1:2).
16. Сар шај те џа пало е Јеховаскоро хем е Исусескоро пример?
16 Џикоте проучинеа, размислин сар шај те применине адава со сикљовеа. На пример, нека овел туке пример е Јеховаскири правда аѓаар со ка постапине е јаверенцар непристрасно. Нека овел туке пример е Исусескоро мангипе со иси ле спрема пло Дад хем спрема о мануша аѓаар со спремно ка кере адава со родела о Јехова хем ка поможине јавере пхраленге хем пхењенге чак кеда адава нане те овел локхо. Хем џа пало е Исусескоро пример аѓаар со ка сведочине јаверенге те шај лен да те овел лен прилика те прифатинен е Јеховаскоро скапоцено поклон.
17. Со ка дикха ки јавер статија?
17 Кобор повише хаљоваја хем ценинаја и откупнина добором повише ка манга е Јехова хем лескере Чхаве. Ако кераја адава, ола панда повише ка манген амен (Јован 14:21; Јак. 4:8). Адалеске, те користина адава со о Јехова денѓа амен те шај понадари да те сикљова баши откупнина. Ки јавер статија ка дикха сар користинела аменге и откупнина хем сар шај те сикава благодарност башо е Јеховаскоро мангипе.
ГИЛИ 107 Те сикава мангипе сар о Девел
a Кеда ка овел кхедимо „адава сој ко небо“ кова со спомнинѓа ле о Павле, а пишимо тано ко Ефешања 1:10, тано различно таро адава со вакерѓа о Исус башо кхедибе околен сој бириме, а тано пишимо ко Матеј 24:31 хем Марко 13:27. О Павле керѓа лафи башо време кеда о Јехова биринела пле духовна чхавен аѓаар со помазинела лен пле силаја. О Исус керела лафи башо време кеда ка овен кхедиме ко небо о помазаникија со панда ка овен ки пхув џикоте трајнела и бари неволја.
